Kweta Vanu Vatulongetha ku Vimbunge
1. Vilongetha vya Yesu vyakwatele vati vanu ku vimbunge?
1 Yesu wetele ku vimbunge vya vanu valongethele. Thimbu imo, vimbunge vya Vandongethi vendi “vyethzukile” mwalumbunwine Vithoneka mwamuvwa. (Luk. 24:32) Omwo kwononoka Njambi kunapande kutunda kwithi ya mbunge, twatha kulongetha vati vanu mu ngila ije ivashongangeya kutengulula vimo mu kuyoya kwavo?—Lom. 6:17.
2. Kupwa va kunyanyama kwatha kutukwatha vati kulongetha vanu mu ngila ije ivakwata ku mbunga?
2 Pweni va Kunyanyama: Vanu vamo nambe muvaleke vyuma vyavivi nevi vyavivwa kuvatha kutenguluka. Cho lalo, kuvatandela mikanda yaingiingi ije ilwitha likulahelo lyavo kwatha kuvathzeyetha. Twatha kukwatha munu mwamuvwa nga tuthzivuka vili na kunenetha ngwavo alinge vyuma vimo na kuvikulahela. Nga twangula mwamuvwa vihula vya kumwihula, cho athzituka kwendeka vyuma vili ku mbunge yendi. (Vithi. 20:5) Echi chitukwatha twangule mwamuvwa vithimpi vya mu Lijwi lya Njambi vije vyatha kumukwata ku mbunge. Muthzemeni cho lalo kethi mushatuke lumbithi. (Vithi. 25:15) Anukeni ngweni vanu vamulongetha voshe, kuvatha kukala na chashu cha kulifwa. Vandameneni sipilitu ya Njambi ivashokolole mutwe na kuvakwatha kupangetha vivalilongetha.—Mak 4:26-29.
3. Twatha kukwatha vati vanu vatukalongetha kukala na vifwa vyavivwa?
3 Vakwatheni Vakale na Vifwa Vyavivwa: Viñanda vya mu Mbimbiliya vije vyendeka ha vuvwa vwa Yehova vyatha kukwatha munu itukalongetha kukala na vifwa vyavivwa. Twatha kupangetha Mikanda ya kufwa ngwe Myatho 139:1-4 nambe Luka 12:6, 7 mu kumukwatha alimwene ngwendi Njambi washaka manene munu na munu. Nga vanu vamona chithzemo cha Yehova kupwa cha kulema, cho vamuthzema manene na kumupangela na mbunge imo. (Lom. 5:6-8; 1 Yow. 4:19) Nga vathzivuka ngwavo vivakalingi vikakwata Yehova ku mbunge, Echi chivashongangeya kulinga vyuma vyashaka na kumuthingimika. Mya. 78:40, 41; Vithi. 23:15.
4. Omwo tulongetha vanu mu lihya, twatha kumwetha vati ngwetu kutuvangwila vya kulinga?
4 Yehova kethi kuthindiya vanu kwononoka mashiko endi. loni akakwatha lika vanu kuthzivuka vuvwa vwa kwononoka Mashiko endi. (Isa. 48:17, 18) Netu tutembwinina Yehova nga tulongetha vanu mungila ije ivalingitha valyangwile vya kulinga vakevo vavenya. Nga vanu valyangwila vakevo vavenya kutengululako vimo mu kuyoya kwavo, cho valinga mwamuvwa manene. (Lom. 12:2) Echi chivashongangeya lalo kukanyametha manene vuthamba vwavo na Yehova, “muka-kwilula vimbunge”. Vithi. 17:3. NW.