Bihula bya Baka-kutanda

Yehova akaka “butumbe” muka mu bimbunge bya baka-mafuti kulutwe?

Mukanda wa Kujombolola 17:16, 17 unendeka mukakashangumukila kayando kakama ngwawo: “Mambinga 10 aunamwene, na cikashama, bakazinda uje lihule, co bakabiisa bufuko bwendi na kumuseza mutotototo, co bakalya situ yendi na kumwenyeka na tuhya. Mwafwa Njambi naka butumbe bwendi mu bimbunge byabo ngwendi balinge byanayongola. Eyo, bashulisilile biyongola byabo bimolika bya kwana bumwene bwabo kuli cikashama.” Kunima mabulu etu akele na kwendeka ngwawo “butumbe” bwakaka Yehova mu bimbunge bya baka-mafuti bukapwa bwa kunyongesa bulombelo bwa makuli.

Oloni tunapande kutengulula mutuli na kuzibisisila ou mukanda. “Butumbe” bwakaka Yehova mu bimbunge bya baka-mafuti bunapu bwa “kwana bumwene bwabo kuli cikashama.” Hakulinga mangana tuzibisise mwamubwa mubukalishulisilila obu bupolofweto, tusimutwiyeni ha bihula binatako.

Beya babanatumbula omu mu bupolofweto? “Lihule” uje ibasana lalo ngwabo “Babiloni Wakama,” emanena bulombelo bwa makuli bwa mu kaye koshe. “Cikashama wa kubenga” emanena munga ya United Nations. Ei munga baimungile mu 1919 mu kushaka kunena kwoloka mu kaye. Hakulibanga ei munga baitumbwile ngwabo League of Nations. (Kujo 17:3-5) “Mambinga 10” emanena bifulumende byoshe bije bili na kukundwiya uje cikashama.

Likwatasano muka lili mukati ka lihule na cikashama wa kubenga? Lihule natwalelelaho ‘kutumama’ ha cikashama, kulumbununa kumukundwiya na kumwendesa.

Bika bikalingiwa ku lihule? Cikashama hamolika na mambinga 10 “bakazinda [manene] uje lihule.” Ngeci bakambata bufuko bwendi bwoshe na kusholola bubi bwendi ku banu boshe. Kutundaho, bakamunyongesa ngwe mwanendekela Yehova. (Kujo 17:1; 18:8) Awa akewo akapwa mamaneselelo a bulombelo bwa makuli bwoshe. Oloni simbu kanda ebi byuma bilingiwe, Yehova akalingisa baka-mafuti balinge byuma bije kanda balingeho laja.

Yehova akalingisa baka-mafuti balinge byuma muka? Yehova akalingisa baka-mafuti bakale na “butumbe bwendi,” bwa “kwana bumwene bwabo kuli cikashama [wa kubenga,]” kulumbununa munga ya United Nations. (Kujo 17:13) Oku kulumbununa ngwabo keti baka-mafuti bakalimangela kwana nzili na bumwene bwabo kuli cikashama. Bupolofweto bumwesa ngwabwo Njambi ikeye akabalingisa bakale na biyongola bya cifweci. (Prov 21:1; esekeseni Isaya 44:28.) Kuma eci kutenguluka cikasholoka kabundondo-kabundondo ndi? Embwe. Eci kutenguluka cikaija mu kukasumuna. Kutundaho, cikashama akanyongesa bulombelo bwoshe bwa makuli.

Bika bitunapande kubandamena ngwetu bilingiwa kulutwe? Kutwapandele kubandamena ngwetu tutambula mizimbu ije imwesa ngwayo baka-mafuti banashangumuka kukundwiya manene munga ya United Nations kabundondo-kabundondo. Oloni cuma citunapande kubandamena eci: Mu kukasumuna, Yehova akalingisa baka-mafuti oshe bane nzili yabo ku munga ya United Nations. Mutukamona byuma bya cifweci bilingiwa, co tukazibuka ngwetu kayando kakama ololo kashangumuka. Ngeci tutwaleleleniho ‘kutona na kusinganyeka mwamubwa’ mwafwa ololo kulingiwa byuma bya kukasumuna.—1 Tesa 5:6.