3. Mwafwa Bika Banu Bababwa Bali Na Kuyanda?
Bikwapwila kwa Seho Kuzibuka Cikumbululo
Tukalizibi ngwetu banu bababwa kubapandele kuyanda. Co lalo, banu bamo bakasinganyeka ngwabo kukwesi seho ya kupwa munu wamubwa mwafwa na banu bababwa bali na kuyanda.
Bya Kusinganyekesesa
Banu bamo bakulahela ngwabo nga munu atsa akalimuka na kusemuka lalo mu cuma ceka. Ngwabo baje banalingi byabibwa mubatsa basemuka lalo na kuyoya buyoye bwabubwa, oloni baje banalingi byabibi mubasemuka lalo bayanda myaka yoshe. Banu bakulahela ebi byuma bamona ngwabo nameme banu bababwa basa kuyanda nga balingile byuma byabibi kunima. Oloni . . .
Nga bendeka ngwabo munu asemuka lalo kesi kwanuka buyoye bwendi bwa kunima, co bikoni ayandela?
Nga tukayandela byuma bitwalingile kunima, co bikoni bitulifwitila kulinyungilila ku mishongo imo na bimonde?
LILONGESENI BYABINGI
Kengeni vidio ya Bika Njambi Natabesela Tuyando Tutwaleleleho na Simbu Yino? ije ili ha jw.org/mck.
Biyendeka Mbimbiliya
Kuyanda kukwapwile kashitiko ka kutunda kuli Njambi.
Kakangi, tukaliwana na bukalu bumo mwafwa ya kukala mu mwela mulingiwa byuma byabibi.
“Baka-kushatuka manene kubesi kuhyana kushatuka simbu yoshe, co baka-kusimpa kubesi kuhyana nzita simbu yoshe, co baka-mana kubesi kuwana bufuko simbu yoshe, na baka-butongwe kubesi kuwana bitumbamo byakama simbu yoshe. Lubinda lukaija ku munu woshe-woshe.”—MUKA-KWAMBULULA 9:11.
Tuli na kuliwana lalo na tuyando mwafwa ya bubi butunasemuka nabwo.
Banu bamo bakasinganyeka ngwabo lijwi lya “bubi” lilumbununa byuma byabibi byalinga munu. Oloni Mbimbiliya ikapangesa lalo eli lijwi kutalesa ku bubi buje butunasemuka nabwo. Obu bubi buli ku banu bababi na bababwa.
‘Banjikitilile mu bubi, co mu bubi mukemwo mubanjimitilile banana.’—MYASO 51:5.
Bubi bunakobelesa banu mu bukalu bwakama.
Bunatsii busamba bwetu na Ishamatanga na kulingisa banu bajeneke kulitombola na bakwabo, co lalo bunalingisa banu babiise byuma bili mu kaye. Ngeci, bubi bunanene kayando ku banu boshe.
“Omwo njishaka kulinga byabibwa, co haje bene bubi busholoka.”—LOMA 7:21.
“Byakutanga byoshe bili na kukemanga.”—LOMA 8:22.