BYUMA BYASA KUMIKWASA NGA BINDANDO BINALONDO

Pweni Baka-kwana

Nga kuli na kumikaluwila kuwana bimbongo, mwasa kuliziba ngweni kumwapandele kwanako bakweni byuma bimuli nabyo. Oloni kupwa baka-kwana kwasa kumikwasa mu kolesele mu bukalu bwa kujeneka kukala na bimbongo bya kupwamo. Kupwa baka-kwana kukumilingisa mujeneke kutulika bimbongo.

MWAFWA BIKA KUPWA BAKA-KWANA KWAPWA KWA SEHO?

Tupwa ba kubwahelela oshe tupwa baka-kwana nameme nga twana byuma byabindondo. Baka-kutondesesa banawana ngwabo kwana kutukwasa tupwe ba kulikangula ku mubila na mu bisinganyeka. Cakumwenako, kupwa baka-kwana kwasa kutukwasa tutepulule ku bishoti na kujeneka kubinja mushongo wa mbunge na mishongo ikwabo. Kutukwasa lalo tulikuwe tulo na kujeneka kulala cilabulabu.

“Mu kwana muli kubwahelela kwakama kutubakana mu kutambula.”—Bilinga 20:35.

Nga tukana bakwetu bimbongo nambe byuma byeka, co netu kutupwila kwakwasi kutambula bukwasi bwa bakwetu. Howard uje wakala mu England wendekele ngwendi: “Yange na muka-limbo lyange tukashakezeka bingila bya mwakwanena bakwetu, kulinga ngoco kukatukwasa tujeneke kuliziba kubihya nga bakwetu batukwasa.” Baka-kwana kubesi kubandamena ngwabo banu babanana nabo banapande kubanako bimo. Oloni kwana kukabakwasa bakale na babusamba baje bashaka kubakwasa nga bali mu bukalu.

“Twaleleleniho kwana, co neni banu bakamyana.”—Luka 6:38.

BIMWASA KULINGA

Aneniko bakweni byuma bimuli nabyo. Nameme kumwesi na byuma byabingi, mwasa kwanako bakweni nameme byakulya bimuli nabyo. Duncan uje wakala mu Uganda na naanga yendi bapwa tuhutu, oloni bapwa baka-kwana. Duncan ngwendi: “Lyacalumingo, yange na mwebwange tukalanyako munu umo ku njibo yetu kwa kulya nendi byakulya byoshe-byoshe biliko. Tukalikuu kusikama na bakwetu.”

Oloni omwo mwana, taleni na kubunga. Kumwapandele kuseza naanga yeni mu njala oku ili na kulanduka.—Yombi 17:5.

Esekeni ebi: Aneniko munu byakulya nambe byakunwa byoshe-byoshe biliko. Nga muli na byuma bije kumwesi na kulikwasesa, mwasa kubyana babusamba nambe banu bamwatunga nabo baje kubesi nabyo.

Aneni mu bingila bikwabo. Byuma bimo bitwasa kwana kubitondeka bimbongo. Cakumwenako, twasa kupangesa simbu yetu mu kukwasa bakwetu na kumwesa ngwetu twabaka mbunge. Majwi amabwa nawo asa kupwa bwana butwasa kwana bakwetu. Ngeci, lekeni bakweni ngweni mwabaka mbunge nambe ngweni mwabazema.

Esekeni ebi: Kwaseni bakweni kupanga bipangi bya ha njibo nambe kubakwasa kubwahesako bimo nambe kulyana bamitume kukabalandelako byuma bimo. Sonekeleni kabusamba keni majwi amabwa ha kadi nambe kamuzimbu ka ha foni, mwasa kumusonekela ngweni muli na kumwanuka.

Nga mupwa baka-kwana, co muwana bibezikiso byabingi.

“Keti mwibale kulinga byabibwa na kulipangela na bakweni byuma bimuli nabyo.”—Bahebelu 13:16.

Munalume na munakzi wendi bali na kukwasa kakulukazi wa munakazi bipangi bya ha njibo. Uje kakulukazi nabatwalela tii ya kushaluka omwo bali na kukomba maputa.