BYUMA BYASA KUMIKWASA NGA BINDANDO BINALONDO

Kulaheleni Ngweni Byuma Bikakala Mwamubwa

Kuma muli na kwonwa kulanda byuma byoshe bimutonda mwafwa bindando binalondo manene mu lifuti lyeni ndi? Kuma munalishoshomwena mwakuwanena naanga yeni byuma bya ku mubila ndi? Nga mukemwo, co hamo mwalishoshomwena mubifwila byuma kulutwe. Nameme muli na kuliwana na bukalu bwa cifweci, kukala na lilabelelo kwasa kumikwasa manene.

MWAFWA BIKA KAPWA KWA SEHO KUKALA NA LILABELELO?

Banu baje bali na lilabelelo, kubesi kubandamena ngwabo baliwana lika na byuma byabibwa. Lilabelelo likabakwasa kulinga mwoshe mubasela mangana batepulule ku bukalu bubali na kuliwana nabwo. Cakumwenako, baka-kutondesesa banawana ngwabo banu baje bakala na lilabelelo . . .

bakakolesa nga bali mu bukalu
bakatengululako byuma bimo nga kutondeka kulinga ngoco
bakangula mwamubwa byakulinga bije bikabakwasa kukala na bukangule na buyoye bwabubwa

BIMWASA KULINGA

Cakulibanga, moneni muyasa kumikwasela Mbimbiliya. Mu Mbimbiliya muli binangulo bije byasa kumikwasa kuzibuka byakulinga mona bindando bilonda. Ebi binangulo byasa kumikwasa lalo mulizibe ngweni kuli byuma bimwasa kulinga nga mwaliwana na bukalu ha simbu ino nambe kulutwe.

“Cashu ca kusinganyeka cikunyungilila Na kunanguka cikunyungilila.”—Provebia 2:11.

Camucibali, singanyekeseseni ha byuma biinendeka Mbimbiliya bije bikalingiwa kulutwe. Nga mulimwena ngweni Mbimbiliya ili na binangulo byabibwa, co oku kumilingisa mushake kuzibuka biinendeka kutalesa ku byuma bikalingiwa kulutwe. Cakumwenako, Mbimbiliya imwesa ngwayo Njambi ashaka ngwendi mukawane “buyoye bwabubwa kulutwe na lilabelelo.” Co lalo Mbimbiliya inatuleke na byuma bitulingisa tukulahele manene eci cikulaheso. (Jelemiya 29:11) Ebi byuma binapu Bumwene bwa Njambi.

BUMWENE BWA NJAMBI BWAPWA BUKA, CO BUKALINGA BYUMA MUKA?

Bumwene bwa Njambi bwapwa fulumunde ije ikayula lifuti-libu lyoshe. (Daniele 2:44; Mateu 6:10) Obu bumwene bukayula kutundilila mwilu, co bukamanesa tuyando na buhutu bwoshe na kunena kwoloka ngwe mubimwesela bisoneka binatako.

‘Ukabwahelela na kulikuwa kwoloka.’—Samu 128:2.

Banu babukayula obu Bumwene “kubakalisini lika kuundangana.”—Isaya 65:23.

“Bimbuto bikatuma ha lifuti-libu.”—Samu 72:16.

Banu babangi banakulahela ebi bikulaheso mwafwa bazibuka ngwabo Njambi “kasa kukwisa.” (Tito 1:2) Ngeci, litandeleni ebi bikulaheso mu Mbimbiliya. Bikulaheso bya mu Mbimbiliya byasa kumikwasa mukolese mu bukalu bwa kujeneka kukala na bimbongo bya kupwamo na kumikwasa mukale na lilabelelo lya byuma bija kulutwe.