Endekesi Yeni Yasa Kuzibisa Bati Yehova Kubwaha ku Mbunge?

Yehova watutangele na cashu cacibwa ca kwendeka. Kuma akamono mutukapangesela eci cashu ndi? Eyo. (Tandeni Yakomba 1:26.) Co twasa kupangesa bati cashu cetu ca kwendeka mu ngila ije izibisa Yehova kubwaha ku mbunge?

1. Tunapande kupangesa bati cashu cetu ca kwendeka?

Mbimbiliya ngwayo tunapande ‘kulitakamesa umo na mukwabo na kulikwasa.’ (1 Tesalonika 5:11) Kuma kuli bamo batondeka kubatakamesa ndi? Mwasa kubatakamesa bati? Bamweseni ngweni mwabaka mbunge. Hamo mwasa kubaleka byuma bimo byabibwa bibakalingi bije bimwazema. Cisoneka muka cimwasa kupangesa mangana mutakamese munu uje nazeye? Kuli bisoneka byabingi bimwasa kupangesa. Anukeni lalo ngweni kwangula mwamubwa majwi na kuwendeka mu ngila yaibwa kwa seho manene. Ngeci, simbu yoshe esekeni kwendeka mu ngila yaibwa.—Visimo 15:1.

2. Endekesi muka kutwapandele kukala nayo?

Mbimbiliya ngwayo: “Kesi mupangese majwi amabi omwo mwendeka.” (Tandeni Efeso 4:29.) Oku kulumbununa ngwabo kutwapandele kupangesa majwi amabi aje asa kuzibisa bakwetu kubabala ku mbunge nambe kubalubalesa. Co lalo kutwapandele kukala na lufwe nambe kuya na kubiisa bakwetu mazina.—Tandeni Visimo 16:28.

3. Bika bitukwasa tukale na endekesi yaibwa?

Kakangi munu akendeka bili mu mbunge yendi nambe byali na kusinganyeka. (Luka 6:45) Ngeci, tunapande kulizilisa kusinganyeka byuma byabibwa, bya busunga, bya kujela na bije bibasa kushangala. (Filipu 4:8) Cuma cimo citukwasa tukale na bisinganyeka bya cifwa eci, cinapu kwangula mwamubwa byakulizima nabyo buli na kwangula mwamubwa babusamba. (Visimo 13:20) Co lalo tunapande tahi kusinganyeka ha byuma bitushaka kwendeka simbu kanda tubyendeke. Singanyekeni mubasa kulizibila bamushaka kuleka owo majwi. Mbimbiliya ngwayo: ‘Majwi a lyashamena abinjisa mbunge ngwe munu ibanatibi moko ya mukwale, oloni majwi a kwendeka mwamubwa akahwimisa mbunge.’—Visimo 12:18.

TONDESESENI

4. Kwateni ndaka yeni

Bisimbu bimo, tukalibeye ngwetu ngwe kutwendekele byuma bitunendekele. (Yakomba 3:2) Tandeni Ngalatiya 5:22, 23, na kusimutwiya ha bihula binatako:

• Ku bifwa bibanendeka oku ku mukanda, cifwa muka cimwasa kulomba Yehova mangana amikwase kukala naco cije cimikwasa mukale na endekesi yaibwa? Kukala nebi bifwa kumikwasa bati?

Tandeni 1 Kolinte 15:33, na kusimutwiya ha cihula cinatako:

• Babusamba beni na byuma bimwangula kulizima nabyo buli byasa kumilingisa mukale na endekesi ya kufwa bati?

Tandeni Muka-kwambulula 3:1, 7, na kusimutwiya ha cihula cinatako:

• Simbu muka imunasa kwoloka nambe kubandamena simbu yaibwa ya kwendeka?

5. Keti mwendeke bakweni mwamubi

VIDIO: Endekeni ‘Majwi Amabwa Aje Asa Kutunga’ Bakweni (4:07)

• Kwesekesa na vidio, bukalu muka bwakele nabwo uje ndolome?

• Bika byalingile mangana atengulule futisi yendi?

Tandeni Muka-kwambulula 7:16, na kusimutwiya ha cihula cinatako:

• Bika bitunapande kwanuka nga tushaka kwendeka bakwetu mwamubi?

Tandeni Muka-kwambulula 7:21, 22, na kusimutwiya ha cihula cinatako:

• Ou mukanda wasa kumikwasa bati mangana mukwate mbunge nga kuli bamo banamyendeka mwamubi?

6. Endekeni mwamubwa nga muli na kusimutwiya na baka-naanga yeni

VIDIO: Cizemo na Kasingimiko Bikakwatasanesa Binaanga (3:08)

• Bika bimikwasa mangana mwendeke-endeke mwamubwa na baka-naanga yeni?

Tandeni Efeso 4:31, 32, na kusimutwiya ha cihula cinatako:

• Endekesi muka yasa kuzibisa bwino baka-naanga yeni?

Yehova wendekele mwazemenene Munendi Yesu. Tandeni Mateo 17:5, na kusimutwiya ha cihula cinatako:

• Twasa kutembwinina bati Yehova omwo tusimutwiya na baka-naanga yetu?

SIMPI YAKAMA

Majwi akala na nzili. Ngeci, tunapande kusinganyekesesa ha byuma bitushaka kwendeka na simbu itubyendeka, nomu mutubyendekela.

Kwitulukamo

• Endekesi yetu yasa kukwasa bati bakwetu?

• Endekesi muka kutwapandele kukala nayo?

• Bika bitukwasa tukale na endekesi yaibwa ije itunga bakwetu?

WANENI BIKWABO

Bika bitukwasa tukale na endekesi yaibwa?

Endekeni Majwi Amabwa (8:04)

Bika bimikwasa mangana keti mukale na endekesi yaibi?

“Kuma Kusinga Kwapwa Kwakubi Bene Ndi?” (Ñanda ya ha webusaiti)

Bika bitukwasa tujeneke kukala na lufwe?

Bika Binjikwasa Njijeneke Kukala na Lufwe? (2:36)

Nangukeni omwo Yehova wakwaselele munalume umo ombile kuti endekesi yaibi.

“Njashangumukile Kusinganyekesesa Kuinjitwala Futisi Yange” (Kaposhi ka Kukengela ka August 1, 2013)