Cizemo ca Yehova Cakalako Myaka Yoshe

1-2. Bukalu muka bubakaliwana nabwo baka-Kristu babangi?

ACILINGENI ngwe muli mu bwato, co kukatuka lihunzi lyakama na mankimba akama aje aningangesa bwato. Buje bwato bunasa kuya kwoshe-kwoshe kuwabutwala mankimba nga kubabwimika na cimikiso ca bwato. Cimikiso ca bwato cikwasa buje bwato bwimane na kujeneka kungumuka na lihunzi.

² Nga muli na kuliwana na bukalu bwakama munasa kuliziba ngwe buje bwato. Litangwa limo muliziba ngweni Yehova wamizema, co ali na kumikwasa. Oloni litangwa likwabo muuwasana indi Yehova ali na kumona byuma bili na kulingiwa mu kuyoya kweni. (Samu 10:1; 13:1) Hamo kabusamba keni nasa kumilekako majwi a kuzembeleka, co munasa kulizibako mwamubwa ha simbu yaindondo. (Prov 17:17; 25:11) Oloni munima ya simbu yaindondo mushangumuka lalo kuuwasana indi Yehova ali na kumikwasa. Munasa kusinganyeka ngweni Yehova wamimona kupwa bangoco, co kasa kumizema. Mwasa kushimbika bati cimikiso ca bwato ca cifwisa nga muli na kuliwana na bukalu bwa cifweci? Nambe ngwetu, bika byasa kumikwasa mutwaleleleho kukulahela ngweni Yehova wamizema, co amikwasa?

3. Kwesekesa na mukanda wa Samu 31:7 na 136:1, “cizemo cije kucesi kutenguluka” cilumbununa bika, co bika twendekela ngwetu Yehova ikeye mwanja waubwa manene wa kumwesa cizemo cije kucesi kutenguluka? (Taleni na cikupulo.)

³ Ngila imo imikwasa mukolese nga muli mu bukalu, inapu kwanuka cizemo ca Yehova cije kucesi kutenguluka. (Tandeni Samu 31:7; 136:1.) Majwi a kwendeka ngwawo “cizemo cije kucesi kutenguluka” anatalesa ku cizemo cakama na kulongwa kwakala nakwo munu kuli mukwabo. Yehova ikeye namwesa mwanja waubwa manene mu kumwesa cizemo cije kucesi kutenguluka. Mbimbiliya inamutumbula ngwayo “wakala manene na cizemo cije kucesi kutenguluka.” (Ekizo 34:6, 7) Mbimbiliya inendeka lalo hali Yehova ngwayo: “Ukamwesa manene cizemo cije kucesi kutenguluka kuli baje bali na kutambeka kuli yobe.” (Samu 86:5) Awa Majwi alumbununa bika? Alumbununa ngwawo Yehova kesi kumbila kuti bangamba bendi ba kulongwa. Kwanuka ngweni Yehova wakala manene na cizemo cije kucesi kutenguluka kumikwasa mukanyame nga munaliwana na bukalu bwakama.—Samu 23:4.

ANUKENI NGWENI CIZEMO CA YEHOVA CAPWA CIMO CA BILONGESA BYA MASHANGUMUKILO BYA MU MBIMBILIYA

4. Bilongesa muka bimo bya mashangumukilo bya mu Mbimbiliya, co mwafwa bika tukabikulahela manene?

⁴ Cuma cimo cimikwasa mukanyame nga muli mu bukalu, cinapu kwanuka ngweni cizemo ca Yehova capwa cimo ca bilongesa bya mashangumukilo bya mu Mbimbiliya. Bika bikaija mu bisinganyeka byeni mumukazibi ngwabo “cilongesa ca mashangumukilo ca mu Mbimbiliya”? Hamo mukanuka bilongesa bimwalilongesele mu Lijwi lya Njambi. Cakumwenako, mwalilongesele ngweni lizina lya Njambi ikeye Yehova, co Yesu Kristu wapwa muna Njambi umolika, batsi nacimo cahi cibazibuka, co kaye kakapwa paradaisi muje mubakayoya banu myaka yoshe. (Samu 83:18; Ekele 9:5; Iwano 3:16; Kujo 21:3, 4) Mumwalilongesele ebi byuma kwapwile kwakukalu kumilingisa mulikele kubikulahela. Mwafwa bika? Mwafwa mwanangukile ngweni ebi bilongesa binemana ha bukaleho bwa busunga. Tucimoneni omwo kumona cizemo ca Yehova kupwa cimo ca bilongesa bya mashangumukilo bya mu Mbimbiliya mukwasa kutukwasela twecele kuuwasana indi Yehova watwaka mbunge nambe indi ali na kumona bukalu butuli na kuliwana nabwo.

5. Munu asa kuhyana bati bilongesa bya makuli? Lumbununeni.

⁵ Mumwashangumukile kulilongesa Mbimbiliya, bika byamikwasele mubyane bilongesa bya makuli? Hamo mwesekesele byuma bimwalilongesele ku bulombelo bweni na byuma biilongesa Mbimbiliya. Cakumwenako, hamo hakulibanga mwakulahelele ngweni Yesu wapwa Njambi Muka-nzili Yoshe. Oloni mumwalilongesele Mbimbiliya mwalihwile ngweni, ‘kuma eci cilongesa capwa ca busunga ndi?’ Munima ya kulilongesa biyendeka Mbimbiliya ha ñanda ei, mwazibukile ngweni Yesu kapwile Njambi. Ngeci kutubakana kukulahela bilongesa bya makuli bimwalilongesele, mwashangumukile kukulahela busunga bwa mu Mbimbiliya buje bwendeka ngwabwo Yesu wapwa “ntwatwa ku byakutanga byoshe, Muna Njambi umolika.” (Kolo 1:15; Iwano 3:18) Cili bene, bilongesa bya makuli binasa kupwa “bya kukola manene,” co kwakukalu kubihyana. (2 Kori 10:4, 5) Oloni mumwasele kulinga ngoco, kumwelukilile lalo kubikulahela.—Filp 3:13.

6. Mwafwa bika mwakulahela ngweni ‘cizemo ca Yehova cije kucesi kutenguluka’ cakalako myaka yoshe?

⁶ Mwasa kulinga byuma bya kulifwa ku byuma biilongesa Mbimbiliya kutalesa ku cizemo ca Yehova. Nga mwaliwana na ceseko, co muli na kuuwasana indi Yehova wamizema, lihuleni ngweni: ‘Kuma ebi bisinganyeka binapande ndi?’ Nga muli na kuuwasana indi Yehova wamizema, co singanyekeseseni ha majwi ali ku mukanda wa Samu 136:1, cisoneka haje hanemana cino cilongesa. Mwafwa bika Yehova nendeka ngwendi cizemo cendi “kucesi kutenguluka”? Mwafwa bika majwi a kwendeka ngwawo “cizemo cendi cije kucesi kutenguluka cakalako myaka yoshe” banawelukila lwa kupwa 26 ku mukanda wa Samu capita 136? Ngwe mutunasimutwiya, cizemo ca Yehova cije kucesi kutenguluka cakamwesa banu bendi capwa cilongesa ca seho manene ca mu Mbimbiliya ngecilika mwa bilongesa bikwabo bya mu Mbimbiliya bije bimwakulahelele na mbunge yeni yoshe. Biyongola bya kwendeka ngwabyo Yehova wamimona kupwa mubangoco nambe kasa kumizema, byapwa bya makuli. Byaneni biyongola byacifweci ngecilika mumwasa kubyanena bilongesa byoshe bya makuli.

7. Bisoneka muka bimwesa ngwabyo Yehova watuzema?

⁷ Mu Mbimbiliya muli bukaleho bukwabo bwabwingi buje bumwesa ngwabwo Yehova watuzema. Cakumwenako, Yesu walekele baka-kumukabangeya ngwendi: “Mu ba seho kutubakana tunzilili babangi.” (Mate 10:31) Yehova walekele banu bendi ngwendi: ‘Njimikanyamesa, eyo, njimikwasa, njimikwatelela bene na liboko lyange lya cilyo lya kusungama.’ (Isaya 41:10) Awa majwi akanyamesa. Yesu kendekele ngwendi ‘munasa kupwa ba seho manene,’ co lalo Yehova kendekele ngwendi ‘njinasa kumikwasa.’ Oloni Yesu wendekele ngwendi: “Mu ba seho manene,” co Yehova wendekele ngwendi: ‘Njimikwasa.’ Ngeci nga muuwasana ha cizemo ca Yehova omwo muliwana na ceseko, co bisoneka bya cifweci byasa kumizembeleka na kumikwasa mukulahele ngweni Yehova wamizema. Ebi bisoneka binemana ha bukaleho bwa busunga. Nga mulombela kuli Yehova ha byuma bimuli na kuuwasana na kusinganyekesesa mwamubwa ha bisoneka ebi, co mwasa kwendeka majwi ali ku mukanda wa 1 Iwano 4:16 a kwendeka ngwawo: “Tunazibuka na kutaba ngwetu Njambi watuzema.”a

8. Bika bimwasa kulinga nga bisimbu bimo mucikalizibi ngweni Yehova kamizemene?

⁸ Oloni bika bimwasa kulinga nga bisimbu bimo mucikalizibi ngweni Yehova kamizemene? Esekeseni mumuli na kulizibila na byuma bimuzibuka hali Yehova. Mutukalizibila kunasa kutenguluka, oloni cizemo ca Yehova capwa busunga bwa mu Mbimbiliya buje kubwasa kutenguluka. Nga kutwesi na kukulahela ngwetu Yehova watuzema, co tuli na kwombwanesa cifwa cendi ca seho manene, cizemo.—1 Iwa 4:8.

SINGANYEKESESENI ‘MWAMIZEMENA’ YEHOVA

9-10. Yesu walumbunwine bika mwendekele majwi ali ku mukanda wa Iwano 16:26, 27 a kwendeka ngwawo “Tate babenya wamizema”? (Taleni na cikupulo.)

⁹ Twasa kulilongesa byabingi kutalesa ku cizemo ca Yehova nga tusinganyekesesa ha majwi endekele Yesu kuli baka-kumukabangeya. Wendekele ngwendi: “Tate babenya wamizema.” (Tandeni Iwano 16:26, 27.) Yesu kendekele awa majwi mu kushaka kuzibisa kubwaha bandongesi bendi. Bika twendekela ngoco? Mwafwa ha simbu ei, Yesu kakele na kwendeka mubakele na kulizibila bandongesi bendi. Oloni wakele na kwendeka bya lilombelo.

¹⁰ Yesu walekele bandongesi bendi ngwendi banapande kulomba kwitila muli ikeye keti kulomba kuli ikeye. (Iwano 16:23, 24) Kwapwile kwa seho kuli bandongesi ba Yesu kuzibuka ngoco. Mwafwa bika? Mwafwa munima ya kusanguka kwa Yesu, bandongesi bendi banesi kukobela mu ceseko ca kulombela kuli ikeye mwafwa wapwile kabusamba kabo. Banesi kusinganyeka ngwabo mwafwa Yesu wabazemene manene, co asa kubatolilila na kubendekelako kuli Ishe mangana abakwase. Oloni Yesu wabalekele ngwendi, kubapandele kusinganyeka mu ngila ei. Mwafwa bika twekela ngoco? Mwafwa wabalekele ngwendi: “Tate babenya wamizema.” Obu busunga bunapu cilongesa ca mashangumukilo ca mu Mbimbiliya kutalesa ku lilombelo. Acisinganyekeni muinamikundamena ei ñanda, kulilongesa Mbimbiliya kunamilingisa muzibuke Yesu na kumuzema. (Iwano 14:21) Ngecilika mwa bandongesi bakulibanga, neni mwasa kulombela kuli Njambi na kukulahela ngweni “Tate babenya wamizema.” Mumwesa ngweni mwakulahela awa majwi simbu yoshe imulombela kuli Yehova.—1 Iwa 5:14.

ZIBUKENI BYUMA BIKAMILINGISA MUUWASANE

11. Mwafwa bika Satana abwahelela nga tuuwasana indi Yehova watuzema?

¹¹ Byuma muka byasa kutulingisa tuuwasane indi Yehova watuzema? Satana ikeye akatulingisa tuuwasane. Liyabolo “ali na kutonda yalya,” co atonda ngwendi tuuwasane indi Yehova watuzema. (1 Pita 5:8) Cizemo cikeco cashongangeyeye Yehova atwane ndando ya kupatula. Oloni Satana atonda tulizibe ngwetu ndando ya kupatula kuyatupandele. (Hebe 2:9) Satana abwahelela nga tuuwasana indi Yehova watuzema. Co lalo abwahelela nga tuzeya na kulikela kupangela Yehova. Atonda ngwendi tusinganyeke ngwetu Yehova katuzemene. Oloni obu keti busunga. Yehova kazemene Satana. Nameme ngoco, Satana akeseka mwoshe mwasela kupangesa ‘bilinga byendi bya linyanyamena’ mu kutulingisa tulizibe ngwetu Yehova natubyana, co katuzemene. (Efeso 6:11) Nga tunanguka biyongola bya Satana, co tweseka mwoshe mutwasela ‘kumulwisa.’—Jems 4:7.

12-13. Kujeneka kulumbunuka, kwasa kutulingisa bati tuuwasane indi Yehova watuzema?

¹² Kuli byuma bikwabo lalo byasa kutulingisa tuuwasane indi Yehova watuzema. Byuma muka bene obyo? Binapu bubi butwatambwile kuli bisemi betu bakulibanga. (Samu 51:5; Loma 5:12) Bubi bwatwangunwine kuli Ishamatanga yetu. Co lalo bunabiisa bisinganyeka byetu, mutukalizibila na bukangule bwetu bwa ku mubila.

¹³ Nga twalingi bubi, tukalizibi kukala manene na mulonga, bishoti, kuziba lyoba na shwamwa. Oloni nameme kutwalingile bubi, twasa kuliziba mu ngila ei mwafwa tuzibuka ngwetu kutwalumbunukile, co Yehova katutangele mu cifweci. (Loma 8:20, 21) Mota ije ili na liwili lya kujeneka mpunzi kuyasa kwenda mwamubwa. Mu ngila imolika, netu kutwasa kulinga mwamubwa byuma ngwe mubatutangelele mwafwa ya kujeneka kulumbunuka. Ngeci kutukomoka bisimbu bimo mutukauwasana indi Yehova watuzema. Nga mushangumuka kuuwasana indi Yehova wamizema, anukeni ngweni Yehova ‘wapwa wakama na kukomokesa. Co akamwesa cizemo cije kucesi kutenguluka kuli baje bamuzema na kunyunga mashiko endi.’—Nehe 1:5.

14. Kusinganyekesesa ha ndando ya kupatula kutukwasa bati tukulahele ngwetu Yehova watuzema? (Loma 5:8) (Taleni lalo cipalo ca ‘Linyungilileni ku Nzili ya Bubi ya Kungumuna.’)

¹⁴ Bisimbu bimo twasa kuliziba ngwetu cizemo ca Yehova kucatupandele. Cili bene cizemo ca Yehova kucatupandele mukemwo capwa ca kulitila. Kukwesi bitwasa kulingila Yehova mangana tutambule cizemo cendi. Nameme ngoco, Yehova natwana ndando ya kupatula mangana atukonekele bubi bwetu mwafwa watuzema. (1 Iwa 4:10) Anukeni lalo ngweni Yesu wezile na kwobola baka-bubi keti banu ba kulumbunuka, embwe. (Tandeni Loma 5:8.) Kukwesi munu asa kulinga byuma mu kulumbunuka, co Yehova kabandamena ngwendi tulinge byuma mu kulumbunuka. Kuzibuka ngwetu cifwa cetu ca bubi casa kutulingisa tuuwasane indi Yehova watuzema, kutulingisa tweseke mwoshe mutwasela kulwisa cifwa cetu ca bubi mangana keti cungumune bisinganyeka byetu.—Loma 7:24, 25.

ANGULENI KUTWALELELAHO KUPWA BA KULONGWA

15-16. Bika bitwasa kukulahela nga tutwalelelaho kupwa ba kulongwa, co mwafwa bika? (2 Samwele 22:26)

¹⁵ Yehova atonda ngwendi twangule mwamubwa byakulinga na “kukakateya kuli ikeye.” (Detro 30:19, 20) Nga tulinga ngoco, co twasa kukulahela ngwetu Yehova atwalelelaho kupwa wa kulongwa kuli yetu. (Tandeni 2 Samwele 22:26.) Nga tutwalelelaho kupwa ba kulongwa kuli Yehova, co twasa kukulahela ngwetu atukwasa tukolese mu bukalu bwoshe butuliwana nabwo.

¹⁶ Ngwe mutunasimutwiya, kuli byuma byabingi bitulingisa tutwaleleleho kukanyama nga tuliwana na bukalu ha simbu ino na kulutwe. Tuzibuka ngwetu Yehova watuzema, co atukwasa. Ebi bikebyo biilongesa Mbimbiliya. Nga tuuwasana indi Yehova watuzema, co tunapande kusinganyekesesa bituzibuka ha cizemo cendi kutubakana kwaka mbunge mutuli na kulizibila. Tutwaleleleniho kukulahela busunga bwa mu Mbimbiliya buje bumwesa ngwabwo cizemo ca Yehova cije kucesi kutenguluka cakalako myaka yoshe.