Bandolome Babali Babaha ba mu Cibunga ca Kutwamenena

LYA October 5, 2024, ha ciwano ca ha mwaka batambekele mutambi wakulitila uje wamwesele ngwawo: Ndolome Jody Jedele na ndolome Jacob Rumph banabangula kupwa bamo ba mu Cibunga ca Kutwamenena ca Bakaleho ba Yehova. Boshe babali, banapangela Yehova mu kulongwa ha myaka yaingi.

Ndolome Jedele wasemukilile mu Missouri ku U.S.A, co wakolelele mu busunga. Naanga yabo yakele ku mutambela kuje kwakele Bakaleho ba Yehova babandondo. Ngeci ndolome Jedele waliwanene na bandolome na bandokazi babangi ba kutunda ku myela ya kuliseza-seza omu mu lifuti, baje bakele na kwija mangana bakukwase mu cipangi ca kwambulula. Co cizemo na likwatasano lyabo byamushongangeyeye manene. Bamumbwitikile lya October 15, 1983. Wazemene manene kwambulula, co washangumukile bupainiya bwa simbu yoshe mu September 1989 mwamanesele sikola yakama.

Mwapwile mwanike, Ndolome Jedele na ndokazi yendi na bisemi babo bakele na kuya na kukamona ha Betheu. Awa mangenzi akwasele ndolome Jedele na ndokazi yendi balyakele cilengo ca kukapangela ha Betheu cije cibashulisilile mu kwita kwa simbu. Ndolome Jedele waile ha Munango wa Wallkill mu September 1990. Hakulibanga, wapangelele mu Dipatimenti ya Kujelesa, co munima wapangelele mu Dipatimenti Itala bya Kusaka.

Ha simbu ije bikungulukilo bije bikapangesa ndaka ya Spanish byakele na kulibwezelela, co kwatondekele bandolome. Ngeci ndolome Jedele walikwatasanene na cikungulukilo cimo na kushangumuka kulilongesa ndaka ya Spanish. Munima ya simbu yaindondo, ndolome Jedele waliwanene na ndokazi Damaris uje wakele na kulinga bupainiya mu citingitingi ca kulifwa. Kutundaho balyambatele na kushangumuka kupangela hamo ha Betheu.

Mu 2005, batundile ha Betheu mangana bakanyunge bisemi babo ba kulongwa. Ha simbu ei bakele na kulinga bupainiya bwa simbu yoshe. Ndolome Jedele walongesele mu Masikola a Cipangi ca Bupainiya awana nambe atanu, co wapangelele mu Komiti ya Kulizibasana na Baka-cipatela na mu Komiti Itala bya Kutunga.

Mu 2013, ndolome na ndokazi Jedele babalanyele lalo kukapangela ha Betheu mu cipangi ca kutunga munango wa Warwick. Kutunda haje, ndolome Jedele na munakazi wendi bapangelele lalo ku Patterson na ku Wallkill. Ndolome Jedele napangela mu Dipatimenti Itala bya Kutunga na Dipatimenti ya Mizimbu ya mu Bipatela. Mu March 2023, bamwangwile kupwa mukwasi mu Komiti ya Bipangi. Mwasinganyekele ha bipangi byoshe byatambwile kunima, wendekele ngwendi: “Simbu imo unasa kulishoshomwena manene nga utambula bipangi byabiha. Oloni ha simbu ya cifweci, tunapande kukulahela Yehova na kwanuka ngwetu atukwasa tulinge byuma bya natulombo.”

Ndolome Rumph wasemukilile mu California ku U.S.A. Mwapwile mwanike baina bazeyele ku sipilitu, oloni balingile mwoshe mubaselele kumulongesa busunga bwa mu Mbimbiliya. Co lalo mwaka na mwaka wakele na kwendela bakuku yendi ba banakazi baje bapwile Bakaleho ba Yehova ba kulongwa. Bakuku yendi bamukwasele akale na lishungu lya kushaka kuzibuka byabingi ha Mbimbiliya, co mwakele na myaka 13, walombele kulilongesa Mbimbiliya. Lya September 27, 1992, bamumbwitikile oku acili mukwenje. Kubezika, baina bashangumukile lalo kupangela Yehova. Co baishe na shongo yendi wa munalume na wa munakazi bashangumukile kukola ku sipilitu ngeci babambwitikile.

Mwapwile mukwenje, ndolome Rumph walimwenenenene kubwahelela kubakele nakwo bapainiya. Ngeci mwamanesele sikola, washangumukile bupainiya mu September 1995. Mu 2000, waile na kukapangela ku Ecuador kuje kwakele bujene bwa baka-kwambulula. Co wakaliwanene na ndokazi Inga painiya uje watundile ku Canada, co mu kwita kwa simbu balyambatele. Munima ya kulyambata, bapangelele hamo na cibunga cacindondo ca baka-kwambulula mu mbongi ya Ecuador. Ha simbu ino cinapu cikungulukilo muje muli baka-kwambulula babangi.

Mu kwita kwa simbu, ndolome na ndokazi Rumph babangwile kupwa bapainiya ba kulitila. Kutundaho bapangele cipangi ca kwendela bikungulukilo. Mu 2011, babalanyele kukakobela Sikola ya Giliyadi mu kilasi yabu 132. Mubamanesele sikola, bapangelele mu mafuti a kuliseza-seza mu kaye koshe. Co banalikuu kupanga bipangi bya kuliseza-seza bya kufwa ngwe kupangela ha Betheu, kupanga cipangi ca bumishinali na cipangi ca kwendela bikungulukilo. Co lalo ndolome Rumph walongesele mu Sikola ya Baka-kwambulula bya Bumwene.

Ndolome na ndokazi Rumph belukile ku United States mwafwa ya mushongo wa COVID-19. Babalanyele kukapangela ha munango wa Wallkill, co mubakele kuje ndolome Rumph bamulongesele cipangi mu Dipatimenti ya Bipangi. Kutundaho, babatumine kukapangela ha munango wa Ecuador, co ndolome Rumph wakapangelele mu Komiti ya Munango. Mu 2023, babatumine ku Warwick. Mu January 2024, ndolome Rumph bamwangwile kupwa mukwasi mu Komiti ya Bipangi. Mwasinganyekesesele ha myela ya kuliseza-seza yanapangela, wendekele ngwendi: “Banu baukapanga nabo bakebo basa kukulingisa ulikuwe cipangi cobe keti mwela kuuli na kupangela, embwe.”

Tukakandelela kukupanga na nzili kwaba bandolome, co ‘banu ba cifweci tutwalelelaho kubakwata na maboko abali.’—Filp 2:29.