Byuma Bimikwasa Mutande Mbimbiliya ha Litangwa na Litangwa

Kuma kukamikaluwila kutanda Mbimbiliya ha litangwa na litangwa mwafwa ya kuzezama manene ndi? (Joshua 1:8) Nga mukemwo, co esekeni kulinga byuma binatako:

• Bwaheseni byuma bimyanukisa. Akeni alamu ha foni yeni mangana imyanukise kutanda Mbimbiliya.

• Akeni Mbimbiliya yeni ha mwasa kuimona. Nga mukapangesa Mbimbiliya ya kupulinta, co yakeni ha mwasa kuimona simbu yoshe.—Detro 11:18.

• Tolilileni ku majwi a kurekoda. Tolilileni ku Mbimbiliya ya kurekoda oku muli na kupanga bipangi byeni bya ha litangwa na litangwa. Tara uje wapwa painiya na cisemi wa munakazi uje akapanga butsiki, bendekele ngwabo: “Kutolilila ku Mbimbiliya ya kurekoda oku njipanga bipangi bya ha njibo, kukanjikwasa njitande Mbimbiliya simbu yoshe.”

• Keti muzeye. Nga kuli byuma binalingiwa bije kumwasinganyekele, co binamyonowesa kutanda Mbimbiliya ngwe mumunanonekelele, co tandeni mavesi akupwamo simbu kanda muye na kulala. Muwana bukwasi nameme nga mutanda mavesi akupwamo ha litangwa na litangwa.—1 Pita 2:2.