Iya Imwangula Kupwa Ntwama Yeni?—Bika Biyendeka Mbimbiliya?

Mu byalumingo bija kulutwe mu mafuti a kuliseza-seza bangula bantwama. Banu bali na kulibwahesela ntwama ibangula.

Bika Biyendeka Mbimbiliya?

Kuli byuma bimo kubasa kulinga bantwama ba banu

Mbimbiliya inamwesa byuma bimo kubasa kulinga bantwama ba banu.

• “Kesi ukulahele bantwama ba hano hasi embwe, munu naumo wahi asa kukwamena. Omwo munu atsa, co eluka ku libu, matumbe endi oshe ahwa ha litangwa lije atsa.” Myaso 146:3, 4.

Nameme bantwama baje bali na kuyula bwino, litangwa limo bakatsa. Co lalo kubasa kulingisa banu baje baija munima yabo, kulinga byuma byabibwa bije bibakele na kulinga bakebo.—Muka-kwambulula 2:18, 19.

Mbimbiliya inendeka busunga ngwayo banu kubabatangele kuliyula bakebo babenya.

• “Munu ikeye babenya kesi na nzili ya kwenda mwoshe mwashakela.”—Njelemiya 10:23.

Kuma kuli munu asa kupwa ntwama mwamubwa ano matangwa indi?

Ntwama yanangula Njambi

Mbimbiliya inamwesa ngwayo Njambi nangula ntwama wamubwa itwasa kukulahela, Yesu Kristu. (Myaso 2:6) Yesu ikeye Mwene wa Bumwene bwa Njambi, buje buli na kuyula kutundilila mwilu.—Mateu 6:10

Kuma mwangula Yesu kupwa ntwama yeni indi? Mbimbiliya inamwesa seho yeci cihula:

• “Tsembeni myanja yendi, kutewa alubala ngeci munyonge bwasi-bwasi, omwo bukalu bwendi bushwama bwasi. Babezika boshe baje batewela muli ikeye.”—Myaso 2:12.

Ngeci, ino ikeyo simbu imunapande kulyangwila bya kulinga. Bupolofweto bwa mu Mbimbiliya bunamwesa ngwabwo Yesu washangumukile kuyula mu 1914, co ololo Bumwene bwa Njambi bwinga bifulumende byoshe bya banu.—Ndanyele 2:44.

Nga mushaka kuzibuka bimunapande kulinga mangana mukundwiye Yesu ha kupwa Mwene. Tandeni ñanda yendeka ngwayo, “Kundwiyeni Bumwene bwa Njambi Hano Bene!”