Kunyungilila Banakazi—Biyendeka Mbimbiliya
Banakazi babangi mu kaye koshe bali na kubalinga mwamubi. Kuma neni bali na kumilinga mwamubi ndi? Zibukeni mwakamwena Njambi bukangule bweni nebi byakalinga ku banu bali na kuyandesa banakazi.
“Munjapwile njimwanike yayange wa munalume wakele na kunjiyandesa na kunjendeka mwamubi ha litangwa na litangwa. Co lalo munjashombokele, banyotomweno na batolomweno nabo banjilingile mwamubi. Ngeci njasinganyekele bya kulitsiya.”—Madhua wa ku India.
Muzimbu wa Baka-kutala bya Bukangule bwa Banu ngawo, “Banakazi balinakubalwisa manene muno mu kaye koshe.” Banakazi bali na kuliwana na bukalu bwa kubayandesa na kubasindiya kulilala nabo.
Nga munu aliwana na bukalu bwa cifweci, asa kusinganyeka ngwendi kwoshe-kwoshe kwaya banu basa kumuyandesa, kumwendeka mwamubi nambe kumusindiya kulilala nendi. Mwafwa yebi byuma munakazi asa kuliziba ngwendi kapwile wa seho. Kuma Njambi wamona banakazi kupwa baseho ndi?
Mbimbiya imwesa ngwayo Njambi wamona bukangule bwa banakazi kupwa bwa seho
Njambi wamona bati banakazi?
Cisoneka; “[Njambi] wabatangele munalume na munakazi”.—Genese 1:27.
Bicilumbununa: Njambi watangele banalume na banakazi. Wabamona kupwa ba seho, co akabasingimika. Co lalo ashaka ngwendi,munalume azeme “munakazi wendi ngwe mwalizema ikeye babenya,” keti mu kumweseka na kumwolola kupangesa majwi amabi nambe kumupupa. (Efeso 5:33; Kolose 3:19) Cili bene Njambi wamona bukangule bwa banakazi kupwa bwaseho.
“Munjapwile njimwanike, babushoko bwange banjipikile. Co munjakele na myaka 17, mukulunu wa bipangi wanjilekele ngwendi anjitundisa bipangi nga kunjililala nendi. Co lalo Munjashombokele munalume wange, bisemi bange na banjatunga nabo kubakele na kunjana kasingimiko. Mu kwita kwa simbu njalilongesele bya Yehovab Ishamatanga. Wamona banakazi kupwa ba seho. Ngeci, oku kwanjilingisa njilizibe ngwange Yehova wanjizema, co lalo wanjimona kupwa wa seho.”—Maria wa ku Argentina.
Bika byasa kumikwasa mushangumuke kuliziba kushubuluka?
Cisoneka; “Kuli kabusamba akashwene manene muyehi kutubakana ndolome ya munu.”—Provebia 18:24.
Bicilumbununa: Kabusamba wa mubwa akukwasa. Nga citaba, lekako kabusamba kobe iwakulahela muuli na kulizibila.
“Ha myaka 20 kunjalekeleko munu ngwange bakele na kunjipika. Ngeci kunjapwile wakubwahelela, njalishoshomwenene na kuliziba kukala na mulonga. Oloni munjalekeleko munu uje wanjizibisisile, njalizibile na kwehuka.”—Elif wa ku Türkiye.
Cisoneka; “Umbileni bishoti byeni hali [Njambi] mwafwa wamyaka mbunge.”—1 Pita 5:7.
Bicilumbununa: Nga mulombela, Njambi amitolilila. (Samu 55:22; 65:2) Amikwasa muzibisise ngweni mu ba seho, mwafwa wamyaka mbunge.
“Kulilongesa bya Yehova kwanjikwasele mangana keti njilizibe manene kubabala ku mbunge. Ngeci hanoni njasa kulombela kuli Njambi na kumuleka mwoshe munjilizibila. Napu ngwe kabusamba uje akazibisisa mwoshe munjikalizibila.”—Ana wa ku Belize.
Kuma Njambi akalingisa banakazi keti babayandese ndi?
Cisoneka; “Yehova wakwila mu kusungama baje kubesi na baishabo na baje babanalyatelela, Mangana munu wa hasi keti abazibise lalo lyoba.”—Samu 10:17, 18.
Bicilumbununa: Ololo Njambi amanesa byuma byabibi byoshe bibali na kuliwana nabyo banakazi.
“Kulilongesa ngwange ololo Yehova amanesa byuma byabibi bibali na kuliwana nabyo banakazi kunapu lika ngwe njinakanguka. Kunanjana kwoloka kwa mu bisinganyeka.”—Roberta wa ku Mexico.
Nga mushaka kulilongesa byabingi omwo Mbimbiliya muyasa kumikwasela mukale na lilabelelo na kukulahela bikulaheso byayo nomwo Bakaleho ba Yehova basa kumikwasela kuzibisisa mwamubwa Mbimbiliya kwa kujeneka kufweta.
a Mazina banawatengulula.
b Yehova likelyo lizina lya Njambi. (Samu 83:18) Taleni ñanda ya, “Yehova ikeye iya?”