Bakaleho ba Yehova Bamona Bati Banu Baje Bakele mu Bulombelo Bwabo?

Tukeseka mwoshe mutwasela kuzema banu boshe, kubazibila ngozi na kubasingimika. Nga Mukaleho wa Yehova umo nelukila munima nambe necela kulikwatasana netu mu kulemesa Yehova,a tukasimutwiya nendi, kumuleka ngwetu hanga twamuzema, na kweseka kushambeya lishungu lyendi.—Luka 15:4-7.

Bisimbu bimo, bilinga bya munu binasa kumulingisa bamutundise mu cikungulukilo. (1 Korinte 5:13) Oloni kulingila twazema manene bakwetu baka-kutaba, tukeseka mwoshe mutwasela kumukwasa simbu kanda bamutundise mu cikungulukilo mangana nga citaba keti bamutundise. Nameme nga bamutundisa, hanga bene tumumwesa cizemo na kumusingimika, ngwe muili na kutushongangeya Mbimbiliya.—Maki 12:31; 1 Pita 2:17.

Bika Bikalingisa Munu Bamutundise mu Cikungulukilo?

Mbimbiliya imwesa ngwayo nga munu nalingi bubi bwakama, co shendi kutenguluka, banapande kumutundisa mu cikungulukilo.b (1 Korinte 5:11-13) Mbimbiliya inamwesa mwamubwa bubi bwakama buje bwasa kulingisa munu bamutundise mu cikungulukilo. Cakumwenako, inatumbula byuma bya kufwa ngwe bukoi, butakwa, kutsiya, kuyandesa baka-naanga, na bwizi.—1 Korinte 6:9, 10; Galatiya 5:19-21; 1 Timothi 1:9, 10.

Nameme ngoco, kutwesi kushatukila lika kutundisa munu mu cikungulukilo uje nalingi bubi bwakama. Bakulunu ba cikungulukiloc bakabanga kumukwasa mangana atenguluke. (Loma 2:4) Bakalifwiti kumweta ku mbunge ha kusimutwiya nendi mu kuwa mbunge na kupwa bababotsi na kumumwesa ngozi. (Galatiya 6:1) Kulinga ngoco kukwasa uje nalingi bubi ananguke ngwendi nabiisa, co napande kutenguluka. (2 Timothi 2:24-26) Oloni nga abyana kutenguluka, co atwalelelaho kupokola mashiko a mu Mbimbiliya nameme bakulunu banatwalelelaho kumukwasa, co banapande kumutundisa mu cikungulukilo. Bakulunu beketesa mutambi ku cikungulukilo ngwabo owo munu keti Mukaleho wa Yehova.

Bakulunu ba cikungulukilo babali bali na kusimutwiya na mukwenje kupangesa Mbimbiliya. Umo wabo namukwata ha citsili omwo ali na kusimutwiya nendi. — Bakulunu bakalifwiti kweta ku mbunge ya munu uje nalingi bubi ha kwendeka nendi mu kuwa mbunge na kupwa bababotsi na kumumwesa ngozi

Bubwa muka butundamo nga batundisa munu mu cikungulukilo uje atwalelelaho kulinga bubi? Cakulibanga, cikungulukilo citwalelelaho kupwa ca kujela, co lalo baje bali mu cikungulukilo kubongumuka mwafwa ya bilinga byendi byabibi. (1 Korinte 5:6; 15:33; 1 Pita 1:16) Camucibali, uje munu nalingi bubi nasa kuseza futisi yendi yaibi na kushangumuka kulinga byabibwa.—Bahebelu 12:11.

Bakaleho ba Yehova bamona bati banu baje banatundu mu cikungulukilo?

Mbimbiliya ngwayo baka-Kristu banapande kwecela “kulikwatasana na munu” uje natundu mu cikungulukilo, “nambe kulya bene keti” balye nendi. (1 Korinte 5:11) Ngeci, kutwesi kulikwatasana na munu uje natundu mu cikungulukilo. Oloni kutwesi kumwibala, tukamusingimika. Nazituka kwija na kukunguluka netu. Co nga aija, Bakaleho ba Yehova baliko banasa kulyangwila kumumeneka.d Co lalo asa kulomba bakulunu bamukwase mangana eluke mu cikungulukilo.

Ndolome na munakazi wendi bali ku Njibo ya Bumwene, co bali na kumeneka na nzanzu munakazi uje natundu mu cikungulukilo. — Baje banatundu mu cikungulukilo banazituka kwija ku biwano byetu

Batico nga munu banamutundisa mu cikungulukilo, oloni muka-limbo lyendi na bana bendi babandondo bakebo bacinapu Bakaleho ba Yehova? Nameme kubalemesela hamo nendi Yehova ha kupwa naanga, oloni hanga bacinapu naanga. Kulingila bakala mu njibo imo, batwalelelaho kulimwesa cizemo mu bulo bwabo na mu naanga yabo.

Munu uje ibanatundisa mu cikungulukilo nasa kulomba bakulunu bamwendele, co bamunangula kupangesa Bisoneka na kumushongangeya mu cizemo ngwabo atenguluke na kwiluka kuli Njambi. (Zakaliya 1:3) Nga ecela bilinga byendi byabibi na kumwesa ngwendi ashaka bene kuyoya mu kulitombola na binangulo bya mu Mbimbiliya, co basa kumwilwisa mu cikungulukilo. Cikungulukilo cimutambula na “kumukonekela na kumuzembeleka,” ngwe mubalingile baka-Kristu ba mu Korinte munu umo uje walingile bubi mwatengulukile.—2 Korinte 2:6-8.

Baje babatundisile mu cikungulukilo kunima bali na kuliziba bati?

Zibeni bibanendeka Bakaleho ba Yehova bamo baje batundile mu cikungulukilo, oloni munima belukile kuli Njambi.

Maria wa ku United States ngwendi: “Munjashakele kwiluka mu cikungulukilo, njalishoshomwenene ngwange hamo bakulunu bakashaka ngwabo njibaleke byuma byoshe binjakela na kulinga mu myaka yoshe injinatundile mu cikungulukilo. Oloni bakebo banjilekele lika ngwabo, ‘Tushaka ngwetu wake mbunge ku byuma biulinga kushwa hano kuya kulutwe.’ Mubendekele ngoco, njazibile bene na ku mbunge hehu.”

Malcom wa ku Sierra Leone ngwendi: “Cikungulukilo cabwahelelele manene munjelukile. Njalizibile ngwange banjaka mbunge. Bandolome na bandokazi banjilingisile njilizibe ngwange bananjikonekela na kwecela kusinganyeka ha bubi bunjalingile. Bakulunu balibwaheselele kunjikwasa njikanyamese lalo busamba bwange na Yehova. Banjizembelekele na kunjikwasa njimone ngwange Yehova hanga wanjaka mbunge na kunjizema.”

Sandi wa ku United States ngwendi: “Njabwahelela kuzibuka ngwange Yehova wazema manene banu bendi mukemwo ashaka ngwendi munga yendi itwalelelaho kupwa ya kujela. Nameme banu bamo banasa kumona ngwe kunapu kukenyuka kutundisa munu mu cikungulukilo, oloni kulinga ngoco kunapande, co lalo kunapu kumwesa cizemo. Njakandelela kuli Tate yetu wa mwilu mwafwa wapwa Njambi wa cizemo uje akakonekela.”

Bibanendeka baka-mashiko baje keti Bakaleho ba Yehova

Bika bibinendeka binkuta na baka-mashiko ha Bakaleho ba Yehova ha kutundisa banu mu cikungulukilo baje banalingi bubi, co kubashaka kutenguluka? Zibeni bibanendeka bamo.

“Munga ya bulombelo ije ikakabangeya binangulo bya mu Mbimbiliya na kubitabesa bitwamenene banu balimo, inapande kukala na nzili ya [kutundisa munu uje nabiisa]. Kunapande kulinga ngoco, co lalo kunapu kwa seho mwafwa nga munu kasa kukabangeya binangulo bya mu Mbimbiliya nambe nga shendiko, co kafwila kukala omwo mu munga. Co lalo nga kubamutundisamo asa kungumuna bakwabo baje bashaka kupwa ba kulongwa.”—Nkuta Yakama Manene mu England na Wales, June 7, 2019.
“Binkuta bya mu Europe na binkuta bya ku mitambela yeka binawana ngwabyo Bakaleho ba Yehova mubakakula [kutundisa] munu mu cikungulukilo kubesi kubiisa . . , co lalo kubesi kupokola mashiko. Bakapangesa mwamubwa lisesa lyabo lya kulemesa Njambi . . , co ebi keti biñanda bibanapande kutala mu binkuta.”—Profesa Paulo Pinto de Albuquerque, uje wapwile lyaako mu Nkuta Yakama ku Europe ije Itala bya Lisesa lya Banu.

a Nameme tunendeka manene ha banalume, oloni biñanda bili omu mu cilongesa bipanga na ku banakazi.

b Kunima twakele na kutumbula banu banabiisa baje kubashaka kutenguluka ngwetu banau mu cikungulukilo. Oloni ano matangwa tuli na kukabangeya endekesi ya mu Mbimbiliya, ngeci tuli na kwendeka ngwetu banatundu mu cikungulukilo.

c Bakulunu banapu banalume ba kuhya ku sipilitu baje bakalongesa kupangesa Bisoneka na kunyunga banu ba Njambi ha kubakwasa na kubashongangeya. Kubesi kubafweta.—1 Pita 5:1-3.

d Bisimbu bimo, munu nasa kuseza cikungulukilo na kushangumuka kungumuna baje bali mu cikungulukilo nambe kukundwiya bilinga byabibi. Nga munu alinga ngoco, tukabangeya lishiko lya mu Mbimbiliya lije limwesa ngwalyo kutwapandele “kumumeneka.”—2 Iwano 9-11.