Bakaleho ba Yehova Bakala na Mbimbiliya Yabo Ndi?
Bakaleho ba Yehova banapangesa Bimbimbiliya bya kuliseza-seza. Oloni bakapangesa manene Mbimbiliya ya Bisoneka bya Kaye Kakaha mu bindaka muili, mwafwa muli lizina lya Njambi, banainungulula mu kusungama, na mu ngila yayasi.
Kupangesa lizina lya Njambi. Baka-kutuhula Bimbimbiliya babangi kubanene bumpau babenya Mbimbiliya. Cakumwenako, mu Mbimbiliya imo banatumbulamo mazina a banu ba kutubakana 70 baje balingileko bimo mangana ituhuke. Oloni kubatumbwilemo Yehova Njambi uje wapwa babenya Mbimbiliya nameme lumo.
Mu Mbimbiliya ya Bisoneka bya Kaye Kakaha mukemwo lizina lya Njambi banalilwisila ha myela hoshe haje halyakele mu bisoneka bya kulibanga. Oloni banu bakele mu komiti yatuhwile ei Mbimbiliya bakebo kubabatumbwile.
Kunungulula mu kusungama. Keti Bimbimbiliya byoshe binendeka muzimbu wa mu Mbimbiliya mu kusungama. Cakumwenako, mu Mbimbiliya imo bananungulula mukanda wa Mateo 27:35 ngwabo: “Co omwo bamushukikile ha cilindakano, batele ñela ha kulipangela buzalo bwendi.” Oloni mu bisoneka bya kulibanga bapangesele lijwi lya “citi,” keti lya “cilindakano.” Hamo baka-kunungulula bapangesele lijwi lya “cilindakano” mwafwa bakulahelele ngwabo Yesu bamushukikile ha cilindakano. Oloni Mbimbiliya kuimwesa ngoco. Ngeci, mu Mbimbiliya ya Bisoneka bya Kaye Kakaha, ou mukanda banaunungulula mu kusungama ngwabo: “Mubamanesele kumupameya ha citi, batele ñela mangana balipangele bizalo byendi.”
Kunungulula mu ngila yayasi. Mbimbiliya ibananungulula mwamubwa kubapandele lika kuinungulula mu kusungama, oloni inapande lalo kupwa yayasi kuizibisisa. Tusimutwiyeni ha cakumwenako cinatako. Ku mukanda wa Mateo 5:3, Yesu wendekele majwi aje anasa kulumbununa ngwawo “banabwahelela baje banahutwa ku sipilitu.” Oloni kunasa kupwa kwakukalu kuwazibisisa, mukemwo mu Mbimbiliya ya Bisoneka bya Kaye Kakaha bananungulula awa majwi mu ngila yayasi. Ei vesi ngwayo: “Banabwahelela baje bazibuka ngwabo batonda Njambi.”
Mu Mbimbiliya ya Bisoneka bya Kaye Kakaha muli lizina lya Njambi, inasungama, co lalo yayasi kuizibisisa. Kuli cuma cikwabo lalo cinalingisa ei Mbimbiliya iliseze na Bimbimbiliya bikwabo. Ei Mbimbiliya bali na kuyana banu bwana. Ngeci, banu babangi bali na kulitandela Mbimbiliya mu ndaka yabo, nameme baje kubasa kulanda Mbimbiliya.