Bupolofweto Bwapwa Buka?

Biyendeka Mbimbiliya

Bupolofweto bwapwa majwi akuhwiminina kuli Njambi. Mbimbiliya ngwayo tupolofweto “bakele na kwendeka byuma bya kutunda kuli Njambi oku babatwamenena na sipilitu ya kujela.” (2 Pita 1:20, 21) Ngeci, kapolofweto wapwa munu uje akatambula muzimbu kutunda kuli Njambi na kuwetesa ku bakwabo.—Bilinga 3:18.

Tupolofweto bakele na kutambula bati muzimbu kutunda kuli Njambi?

Njambi wapangesele bingila byakuliseza-seza mu kuleka tupolofweto biyongola byendi:

• Kwitila mu kusoneka. Njambi wapangesele ei ngila lumolika kuli Mosesa mwamwanene Mashiko 10 a kusonekela cimweja.—Ekizoda 31:18.

• Kwitila mu tungelo. Cakumwenako, Njambi wapangesele kangelo aleke Mosesa muzimbu wapandele kukaleka Falo, mwene wa Baijipiti. (Ekizoda 3:2-4, 10) Bisimbu bimo Njambi mwakele na kushaka kwetesa muzimbu wa kulitila, wakele na kuleka tungelo baleke banu mangana bausonoke, ngecilika mwalingile kuli Mosesa. Cakumwenako, walingile ngoco mwalekele Mosesa ngwendi: “Unapande kusoneka awa majwi mwafwa njili na kulinga cikumiiyo nobe na Baisalele kwesekesa nawa majwi.”—Ekizoda 34:27.a

• Kwitila mu bimona. Bisimbu bimo, kapolofweto wakele na kumona cimona oku ali mu mesho. (Isaya 1:1; Habakuki 1:1) Bisimbu bimo tupolofweto bakele na kuliziba ngwe nabo mubali mu bimona. (Luka 9:28-36; Kujombolola 1:10-17) Bisimbu bikwaboco, bakele na kulezukila mu tulo mangana bamone bimona. (Bilinga 10:10, 11; 22:17-21) Njambi wakele na kwetesa lalo muzimbu wendi ku tupolofweto kwitila mu bilota.—Daniele 7:1; Bilinga 16:9, 10.

• Kwitila mu kutwamenena bisinganyeka byabo. Njambi watwamenenene bisinganyeka bya tupolofweto mangana betese muzimbu wendi. Mukemwo Mbimbiliya inendeka ngwayo: “Bisoneka byoshe babihwimininine kuli Njambi.” (2 Timothi 3:16) Njambi wapangesele sipilitu yendi ya kujela mu “kuhwiminina” biyongola byendi muli bangamba bendi. Muzimbu watundile kuli Njambi, oloni banu bakebo bakele na kwangula majwi abakele na kupangesa.—2 Samwele 23:1, 2.

Kuma bupolofweto bukendeka lika byuma bya kulutwe ndi?

Embwe, bupolofweto bwa mu Mbimbiliya kubwesi kwendeka lika byuma bya kulutwe. Nameme ngoco, bwingi bwa bupolofweto bwa Njambi bukendeka mubwasa kufwila buyoye bwa banu kulutwe. Cakumwenako, tupolofweto ba Njambi belukilile kunangula Baisalele ba kusañulu ha bilinga byabo byabibi. Bije binangulo byendekele bibezikiso bibatambula banu nga batolilila ku binangulo hamolika na byuma bitundamo nga kubononoka. (Jelemiya 25:4-6) Byuma byasele kutundamo byemanene ha byuma bibangwile kulinga.—Detronoma 30:19, 20.

Myanja ya bupolofweto bwa mu Mbimbiliya buje kubwendekele ha byuma bya kulutwe

• Simbu imo Baisalele mubalombele bukwasi kuli Njambi, wabatuminine kapolofweto uje wabalumbunwinine ngwendi Njambi kabakwasele mwafwa kubononokele mashiko endi.—Maako 6:6-10.

• Yesu mwendekele na munakazi wa Kasamaliya, wamulekele byuma byalingiwile mu buyoye bwendi kunima. Yesu wasele kulinga ngoco mwafwa Njambi ikeye wamukwasele. Uje munakazi wa Kasamaliya wanangukile ngwendi Yesu wapwile kapolofweto nameme kamulekele byuma bikalingiwa kulutwe.—Iwano 4:17-19.

• Yesu mubakele na kumusompesa, bamufwikile ku mesho na kumupupa, co bamulekele ngwabo: “Polofweta! Iya nakupupu?” Kubalekele Yesu ngwabo apolofwete byuma bya kulutwe, oloni ngwabo Njambi amukwase kuzibuka munu namupupu.—Luka 22:63, 64.