Levitike

27 Yehova watwaleleleleho kuleka Mosesa ngwendi: 2 “Leka Baisalele ngwobe, ‘Nga munu alinga cikumiiyo ca kulitila ca kwana Yehova seteko ya bimbongo bibanesekesa ku munu, 3 co ndando ibanesekesako ya banalume ba myaka 20 kutwala 60 ikapwa mashekele* 50 a siuva kwesekesa na bulemu bwa shekele ya mu mwela wa kujela.* 4 Oloni nga munakazi, co ndando ibanesekesako ipwa mashekele 30. 5 Nga munalume ali na myaka itanu kutwala 20, co ndando ibanesekesako inapu mashekele 20, oloni nga munakazi, co mashekele 10. 6 Nga munu ali na ngonde imo kutwala myaka itanu, nga munalume, co ndando ibanesekesa inapu mashekele atanu a siuva, oloni nga munakazi, co mashekele atatu a siuva.

7 “‘Nga munalume ali na myaka 60 nambe kutubakana, co ndando ibanesekesa ipwa mashekele 15, oloni nga munakazi, co mashekele 10. 8 Nga munu nahutuwa manene, co kasa kufweta ndando ibanesekesa, co owo munu ibanendeka ngwabo bamwana kuli Njambi emane kulutwe lwa kapilistu, co kapilistu akaka ndando. Akaka ndando kwesekesa nebi byasa kufweta uje nalingi cikumiiyo.

9 “‘Nga munu alikumiiya ngwendi ana cimuna ibatabesa kupwa bwana kuli Yehova, co cimuna yaana kuli Yehova apwa cuma ca kujela. 10 Kapandele kumwingisa nambe kumulandakana na cimuna wamubwa nambe wamubi. Oloni nga amulandakana na cimuna weka, co uje cimuna wakulibanga na cimuna ibanalandakana boshe bapwa ba kujela. 11 Oloni nga napu cimuna wa kujwala uje kubasa kwana kuli Yehova kupwa bwana, co akemika uje cimuna kulutwe lwa kapilistu. 12 Co kapilistu akaka ndando yendi kwesekesa nomwo mwanafu. Oyo ndando yaka kapilistu ikeyo ikapwa ndando yendi. 13 Oloni nga mwalinga byuma ashaka kulanda cije cuma mangana cipwe cendi lalo, co napande kufweta ndando yaco ibanacesekesele na kubwezelelaho mutamba wamucitanu wa ndando yaco.

14 “‘Nga munu akundika njibo yendi mangana ipwe cuma ca kujela kuli Yehova, co kapilistu napande kwaka ndando yayo kwesekesa nomu muinafu. Ndando yaka kapilistu ikeyo ipwa ndando yayo. 15 Oloni nga uje nakundika njibo yendi ashaka kuilanda mangana ipwe yendi lalo, co napande kufweta ndando ibanakele ya ije njibo, na kwakaho mutamba wamucitanu wa ije ndando, co ije njibo ipwa yendi.

16 “‘Nga munu akundika mutamba umo wa lihya lyendi kuli Yehova, co ndando ya uje mutamba bayaka kwesekesa na mbuto ibanapande kukunamo. Homa* imo ya bimbuto bya mbali ipwa mashekele 50 a siuva. 17 Nga akundika lihya lyendi mu Mwaka wa Kupatuka, co ije ndando ya lije lihya kuitenguluka. 18 Nga akundika lihya lyendi munima ya Mwaka wa Kupatuka, co kapilistu napande kutotalesa ndando ya lije lihya kwesekesa na myaka inasalako simbu kanda mwete mu Mwaka wa Kupatuka unatako, co munapande kutepulula ku ndando ya lije lihya. 19 Oloni mwalinga byuma nga uje nakundikile lihya lyendi ashaka kulilanda mangana lipwe lyendi lalo, co napande kufweta ndando ya lije lihya na kwakaho mutamba wamucitanu wa ije ndando, co lije lihya lipwa lyendi. 20 Oloni nga kalanda lije lihya mangana lipwe lyendi lalo, co lije lihya balilandesa kuli munu weka. Lije lihya kasa kulilanda lalo mangana lipwe lyendi. 21 Nga lije lihya banalipatula mu Mwaka wa Kupatuka, co lipwa cuma ca kujela kuli Yehova mwafwa banalikundika kuli ikeye. Likapwa lya tupilistu.

22 “‘Nga munu akundika kuli Yehova lihya lyanalandele, lije kulyapwile mutamba wa buswana bwendi, 23 co kapilistu akamutotalesela mangana amone ndando ya lije libu kwesekesa na myaka inasalako kweta mu Mwaka wa Kupatuka, co ha litangwa lije bene akaka ndando. Linapu cuma ca kujela kuli Yehova. 24 Mu Mwaka wa Kupatuka, lije lihya linapande kwiluka kuje kubalilandele, kuli babenyalyo.

25 “‘Ndando yoshe banapande kuyaka kwesekesa na kulema kwa shekele ya mu mwela wa kujela. Shekele imo inapande kupwa hamo na magira 20.*

26 “‘Oloni naumo wahi napande kukundika cimuna wakulibanga kusemuka mwafwa cimuna wakulibanga kusemuka wapwa wa Yehova. Ipwe ngombe wa nkomba nambe manga, acisemuka lika napu laja wa Yehova. 27 Nga napu umo wa tusitu ba kujwala, co ashaka kumupatula kwesekesa na ndando ibanesekesa, co napande kufweta ndando ibanakele na kubwezelelaho mutamba wamucitanu wa ije ndando. Oloni nga kubamulanda lalo, co bamulandesa kwesekesa na ndando ibanesekesa.

28 “‘Oloni kukwesi cuma canakundika munu* kuli Yehova na mbunge yendi yoshe kutundilila ha byuma byendi, cibanapande kulandesa nambe kulanda lalo, ipwe munu, cimuna nambe lihya. Cuma coshe cibanakundika cinapu ca kujela manene kuli Yehova. 29 Kutundaho, munu woshe ibanapande kutsiya kumwapandele kumupatula. Munapande kumutsiya bene.

30 “‘Mutamba umo wa ha mitamba 10* ya byuma bimuteja mu mahya a mu lifuti lyeni na bushuka bwa ku miti binapu bya Yehova. Binapu byuma bya kujela kuli Yehova. 31 Nga munu ashaka kulanda lalo ou mutamba wendi wa bu 10, co napande kufweta ndando ya uje mutamba na kubwezelelaho mutamba wa bu 5 wa ndando yawo. 32 Bimanga na bingombe boshe ba bu 10, kulumbununa cimuna woshe wa bu 10 uje aita mwisi ya mulamu wa kanyungi akapwa cuma ca kujela kuli Yehova. 33 Kapandele kumwilula mangana amone indi wamubwa indi wamubi, co lalo kapandele kumulandakana, oloni nga mwalinga byuma amulandakana, co cimuna wakulibanga na uje yanalandakana bapwa ba kujela. Kumwasa kubalanda lalo.’”

34 Awa akewo mashiko anene Yehova kuli Baisalele kwitila muli Mosesa ha Munkinda wa Sinai.