Levitike

18 Yehova watwaleleleleho kuleka Mosesa ngwendi: 2 “Leka Baisalele ngwobe, ‘Yange Yehova Njambi yeni. 3 Kumwapandele kuyoya ngwe mubali na kuyoyela mu lifuti lya Ijipiti muje mu mwakele, co lalo kumwapandele kulinga byuma bibali na kulinga mu lifuti lya Kanana muje munjimitwala. Co lalo kumwapandele kukabangeya bisemwa byabo. 4 Munapande kukabangeya kusompa kwange na kunyunga mashiko ange na kuwakabangeya. Yange Yehova Njambi yeni. 5 Munapande kukabangeya mashiko ange na kusompa kwange. Woshe abikabangeya ayoya mwafwa ya kulinga ngoco. Yange Yehova.

6 “‘Naumo wahi mukati keni napande kushwena kuli kabushoko kendi wa ha mbunge mangana alilale nendi.* Yange Yehova. 7 Kuwapandele kulilala na isho, co lalo kuwapandele kulilala na nyoko. Napu nyoko, ngeci kuwapandele kulilala nendi.

8 “‘Kuwapandele kulilala na munakazi wa isho. Kulinga ngoco kuzibisa isho shwamwa.*

9 “‘Kuwapandele kulilala na ndokazi yobe, ipwe muna isho nambe muna nyoko, ipwe uje nasemukila mu njibo imolika nobe nambe uje nasemukila kweka.

10 “‘Kuwapandele kulilala na mutekulyobe wa munakazi yanakiti munobe wa munalume, nambe mutekulyobe wa munakazi yanakiti munobe wa munakazi, mwafwa banapu bushwamwa bwobe.

11 “‘Kuwapandele kulilala na muna isho wa munakazi uje yanakiti na munakazi weka, mwafwa napu ndokazi yobe.

12 “‘Kuwapandele kulilala na ndokazi ya isho. Napu lininga lya isho.

13 “‘Kuwapandele kulilala na ndokazi ya nyoko, mwafwa napu lininga lya nyoko.

14 “‘Kuwapandele kuzibisa shwamwa* ndolome ya isho ha kulilala na munakazi wendi. Mwafwa napu nyoko.

15 “‘Kuwapandele kulilala na nyokomweno. Napu munakazi wa munobe, co kuwapandele kulilala nendi.

16 “‘Kuwapandele kulilala na munakazi wa ndolome yobe, mwafwa oku kunapu kuzibisa shwamwa* ndolome yobe.

17 “‘Kuwapandele kulilala na munakazi na munendi wa munakazi. Kuwapandele kwambata mutekulyendi wa munakazi uje yanakiti munendi wa munalume, na mutekulyendi wa munakazi uje yanakiti munendi wa munakazi na kulilala nabo. Banapu babushoko bwendi ba ha mbunge, eci cinapu cuma ca shwamwa.

18 “‘Kuwapandele kwambata ndokazi ya munakazi wobe mangana apwe muka-lifuwa lyendi, na kulilala nendi oku munakazi wobe acili na kuyoya.

19 “‘Kuwapandele kushwena munakazi uje ali ku ngonde mangana ulilale nendi.

20 “‘Kuwapandele kulilala na munakazi wa mukweni* na kulijwalesa yobe babenya.

21 “‘Kuwapandele kwana* munobe kuli Moleki. Kuwapandele kujwalesa lizina lya Njambi yobe mu ngila ei. Yange Yehova.

22 “‘Kuwapandele kulilala na mukweni munalume ngwe ulilala na munakazi. Cinapu cuma ca bunyengwe.

23 “‘Munalume kapandele kulilala na kasitu na kulijwalesa ikeye babenya, co lalo munakazi kapandele kulitwala ku kasitu mangana akalilale nendi. Oku kunapu kwingika cisemwa.

24 “‘Kumwapandele kulijwalesa nebi byuma, mwafwa ebi bene byuma byoshe bikebyo bibanalijwalesa nabyo baka-mafuti baje banjili na kusheka kulutwe lweni. 25 Lifuti linabihya, ngeci njilyana kashitiko mwafwa ya milonga yalyo, co lifuti likashanja banu bakalamo. 26 Oloni yeni munapande kunyunga mashiko ange na kusompa kwange, co kumwapandele kulinga ebi byuma bya bunyengwe, ipwe Kaisalele nambe munu wa ku lifuti lyeka uje ali hakati keni. 27 Mwafwa banu balibangele kukala omu mu lifuti bakele na kulinga ebi byuma byoshe bya bunyengwe, mukemwo lifuti linapu lya kujwala. 28 Nga kumulingi ebi byuma, co lifuti kulikamishanja mwafwa ya kulijwalesa ngwe mulishanjela baka-mafuti baje balibangele kukalamo. 29 Munu woshe alinga cuma coshe-coshe hali ebi byuma bya bunyengwe, banapande kumutsiya. 30 Munapande kunyunga mashiko ange ha kujeneka kulinga cuma coshe-coshe hali ebi byuma bya bunyengwe bibakele na kulinga banu balibangele kukala omu mu lifuti, mangana keti mulijwalese nabyo. Yange Yehova Njambi yeni.’”