Levitike

19 Yehova watwaleleleleho kuleka Mosesa ngwendi: 2 “Leka mbunga yoshe ya Baisalele ngwobe, ‘Munapande kupwa ba kujela mwafwa yange Yehova Njambi yeni njapwa nji wa kujela.

3 “‘Umo na umo weni napande kusingimika* ina na ishe, co munapande kunyunga bisabata byange. Yange Yehova Njambi yeni. 4 Keti mukabangeye binjambi ba kujeneka seho nambe kulifulila binjambi ba bikubo. Yange Yehova Njambi yeni.

5 “‘Nga mwana mulambu wa kulila hamo kuli yange Yehova, co munapande kwana ou mulambu mu ngila yaibwa mangana njiutambule. 6 Munapande kuulya ha litangwa limuwana na ha litangwa linatako, co bije bisalaho kweta litangwa lyamucitatu, munapande kubyenyeka mu tuhya. 7 Nga mukaulya ha litangwa lyamucitatu, co Njambi kakautambula mwafwa ukapwa wa bunyengwe. 8 Woshe akaulya akaliwana na bukalu butunda mu mulonga wendi mwafwa najwalesa cuma ca kujela ca Yehova. Co ou munu banapande kumutsiya.

9 “‘Mumukateja, keti mukateje byoshe bije bikakala ku shongo ya mahya eni, co lalo keti mukambate bije bikasala ku byuma bimukateja. 10 Keti mukakungulule bije bikasala mu mahya eni a binyu nambe kunonongola bushuka bwa binyu buje bukawila hasi mu mahya eni a binyu. Munapande kukabisezela tuhutu na banu ba ku mafuti eka. Yange Yehova Njambi yeni.

11 “‘Keti mwibe, keti mungumune bakweni, co lalo keti mulikwise umo na mukwabo mu byuma bimulinga. 12 Keti mulisinge byuma bya makuli mu lizina lyange, mangana keti mujwalese lizina lya Njambi yeni. Yange Yehova. 13 Keti mulyapule bakweni, co lalo keti mwibe. Munapande kufweta bwasi baka-kupanga bamukumuna.

14 “‘Keti musinge tubebebe nambe kwaka bitanwiso kulutwe lwa tupuputwa, co munapande kuzibila lyoba Njambi yeni. Yange Yehova.

15 “‘Munapande kusompa mu kusungama. Keti mumwese ngozi kahutu mwafwa lika napu kahutu, nambe kulinga mwamubwa munu wa kufuka mwafwa napu muka-kufuka. Munapande kusompa bakweni mu kusungama.

16 “‘Keti muye na kwitangana mukati ka banu beni na kubiisa bakweni mazina. Keti mulinge cuma coshe-coshe cije caka buyoye bwa bakweni mu bushonde.* Yange Yehova.

17 “‘Keti muzinde bandolome beni mu bimbunge byeni, oloni munapande kwendekela bakweni mangana neni keti mukale na bubi bwabo.

18 “‘Keti mulinge shambandinga nambe kukala na nkulundundu ku bana ba banu beni, co munapande kuzema bakweni banu ngwe mumwalizema yeni babenya. Yange Yehova.

19 “‘Munapande kwononoka awa mashiko ange. Keti mukatabese bimuna beni baseme na bimuna ba muyati weka. Keti mukakune bimbuto bya miyati ibali mu mahya eni, co lalo keti mukazale bizalo bya kutunga na bwanda bwa miyati ibali.

20 “‘Co nga munalume alilala na munakazi uje napu ngamba ibanakulahesa kushombwesa ku munalume weka, oloni ou ngamba kanda bamupatule nambe kumwecela aye, co mu bubali bwabo banapande kubana kashitiko. Oloni kubapandele kubatsiya mwafwa uje ngamba te kanda bamupatule. 21 Ou munalume napande kunena bwana bwa mulonga kuli Yehova ku cikolo ca tenti ya kuliwanena. Napande kunena manga wa nkomba wa bwana bwa mulonga. 22 Co kapilistu akamwanena mulambu mangana bamukonekele bubi, akamwanena uje manga wa nkomba wa bwana bwa mulonga ku mesho a Yehova, mwafwa ya bubi bwanalingi, co bakamukonekela bubi bwanalingi.

23 Mumukakobela muje mu lifuti na kukuna miti ya kulya, co munapande kukamona bushuka bukemako kupwa bwa kujwala. Munapande kukabumona ngweni banabubindika. Banamibindika kubulya ha myaka itatu. Keti mukabulye. 24 Oloni mu mwaka wamuciwana, bushuka bwoshe bukapwa bwa kujela. Mukabwane kuli Yehova oku munabwahelela. 25 Co mu mwaka wamucitanu mwasa kukalya obu bushuka, co mukabwezelela ku byuma bimunateje. Yange Yehova Njambi yeni.

26 “‘Keti mukalye cuma cili na maninga.

Keti mukatahe nambe kulinga manseno.

27 “‘Keti mukatehule biñambu bya mumikulo ya mitwe yeni, nambe kutehula ku shongo ya minjezi yeni.*

28 “‘Keti mukalengozole mibila yeni nga kunatsi munu, co lalo kumwapandele kukalisona ha mibila yeni. Yange Yehova.

29 “‘Keti mukashawise bana beni ba banakazi ha kubapwisa mahule, keti ngoconi mahule bakatuma mu lifuti, co mukashula byuma bya shwamwa.

30 “‘Munapande kunyunga bisabata byange, co lalo munapande kusingimika* mwela wange wa kujela. Yange Yehova.

31 “‘Keti mukaye ku baka-kwendeka na bakulu, co lalo keti mukehule baka-kuumikiya mangana keti bakamijwalese. Yange Yehova Njambi yeni.

32 “‘Munapande kwimana mu kumwesa kasingimiko baje bali na bwele na kumwesa kalemeso kuli baje banakolo. Co lalo munapande kuzibila lyoba Njambi Yeni. Yange Yehova.

33 “‘Nga munu wa ku lifuti lyeka akakala neni mu lifuti lyeni, kumwapandele kukamuyandesa. 34 Munu wa ku lifuti lyeka uje akakala mukati keni, napande kukapwa ngwe umo weni, co munapande kukamuzema ngwe mumwalizema yeni babenya, mwafwa neni mwayoyele mu lifuti lyambala lya Ijipiti. Yange Yehova Njambi yeni.

35 “‘Keti mukapangese biseteko bya linyanyamena omwo mukaseteka byuma mu bulaha bwabyo, na bulemu bwabyo, na bwingi bwabyo. 36 Munapande kukapangesa bipeseleso bya kusungama na mamanya a kusungama a kupangesa mu kupeselesa, na biseteko bya kusungama bya byuma bya kuma,* na biseteko bya byuma bya mema bya kusungama.* Yange Yehova Njambi yeni, uje wamitundisile mu lifuti lya Ijipiti. 37 Ngeci munapande kunyunga mashiko ange oshe na kusompa kwange kwoshe na kubikabangeya. Yange Yehova.’”