Levitike

20 Yehova watwaleleleleho kuleka Mosesa ngwendi: 2 “Unapande kuleka Baisalele ngwobe, ‘Kaisalele woshe nambe munu woshe wa ku lifuti lyeka uje ali na kuyoya mu Isalele, uje ana munendi kuli Moleki, munapande kumutsiya bene. Banu bomu mu lifuti banapande kumutsiya na mamanya. 3 Njikatala ou munu na butenu na kumutsiya, mwafwa nana bana bendi bamo kuli Moleki, co lalo najwalesa mwela wange wa kujela na kujwalesa lizina lyange lya kujela. 4 Nga banu bomu mu lifuti balinga ngwe kubamwene byuma byanalingi ou munu uje nana munendi kuli Moleki, co kubamutsii, 5 co yange njikatala ou munu na butenu hamolika na naanga yendi. Njikatsiya ou munu hamolika na boshe baje banalikwatasana nendi mu kulinga buhule na Moleki.

6 “‘Munu uje aya kuli baka-kwendeka na bakulu na baka-kuumikiya mangana alinge nabo buhule bwa ku sipilitu, njikamulwisa na kumutsiya.

7 “‘Munapande kulijelesa yeni babenya na kupwa ba kujela, mwafwa yange Yehova njinapu Njambi yeni. 8 Co munapande kunyunga mashiko ange na kuwononoka. Yange Yehova uje ali na kumijelesa.

9 “‘Nga munu asinga ishe nambe ina, munapande kumutsiya bene. Omwo nasingi ishe nambe ina, maninga endi akala ha mutwe wendi.

10 “‘Omu mukemwo mumunapande kulinga munalume uje alinga bukoi na munakazi wambala: Munalume uje alinga bukoi na munakazi wa mukwabo munapande kumutsiya bene. Munapande kutsiya munalune na munakazi. 11 Munu uje alilala na munakazi wa ishe nazibisa ishe shwamwa.* Boshe babali munapande kubatsiya bene. Maninga abo akala ha mitwe yabo. 12 Nga munu alilala na inamweno, co boshe babali banapande kubatsiya bene. Banengika cisemwa. Maninga abo akala ha mitwe yabo.

13 “‘Nga munalume alilala na mukwabo munalume ngwe mwakalilalela na munakazi, co boshe babali banalingi cuma ca bunyengwe. Banapande kubatsiya bene. Maninga abo akala ha mitwe yabo.

14 “‘Nga munalume ambata mwana wa munakazi na ina, co eci cinapu cuma ca shwamwa. Boshe banapande kubenyeka mu tuhya, mangana bilinga bya shwamwa keti bitwaleleleho kulingiwa mukati keni.

15 “‘Nga munalume alilala na kasitu, munapande kumutsiya bene na kutsiya uje kasitu. 16 Nga munakazi aya kuli kasitu mangana akalilale nendi, co munapande kutsiya ou munakazi na kasitu. Munapande kubatsiya bene. Maninga abo akala ha mitwe yabo.

17 “‘Nga munalume alilala na ndokazi yendi, muna ishe nambe muna ina, co amona bushwamwa bwendi, co nendi amona bushwamwa bwa ndolome yendi, co eci cinapu cuma ca shwamwa. Boshe munapande kubatsiila ha mesho a banu. Ou munalume nazibisa shwamwa ndokazi yendi.* Napande kuliwana na bukalu butunda mu mulonga wendi.

18 “‘Nga munalume alilala na munakazi uje ali ku ngonde, boshe babali kubamwesele kasingimiko ku maninga endi aje ali na kwita. Boshe babali banapande kubatsiya.

19 “‘Keti ulilale na ndokazi ya nyoko nambe ndokazi ya isho, mwafwa oku kunapu kuzibisa shwamwa kabushoko kobe wa ha mbunge. Boshe banapande kuliwana na bukalu butunda mu mulonga wabo. 20 Munalume uje alilala na munakazi wa ndolome ya ishe, nazibisa ndolome ya ishe* shwamwa. Boshe banapande kuliwana na bukalu butunda mu bubi bubanalingi. Banapande kutsa simbu kanda bakite bana. 21 Nga munalume ambata munakazi wa ndolome yendi, co eci cinapu cuma ca bunyengwe. Nazibisa ndolome yendi* shwamwa. Co uje munalume na uje munakazi banapande kutsa simbu kanda bakite bana.

22 “‘Munapande kunyunga mashiko ange oshe na kusompa kwange kwoshe na kubyononoka mangana lifuti munjimitwala keti likamishanje. 23 Keti mukabangeye bisemwa bya baka-mafuti baje banjili na kusheka kulutwe lweni. Mwafwa banalingi ebi byuma byoshe mukemwo njabazinda. 24 Mukemwo njamilekele ngwange mukaswana lifuti lyabo, co njikamyanalyo kupwa buswana bweni, lifuti muje munalisala mabele na buki. Yange Yehova Njambi yeni uje namyangununa ku baka-mafuti. 25 Munapande kuzibuka kuliseza kuli mukati ka kasitu wa kujela na kasitu wa kujwala, na kuliseza kuli mukati ka kazila wa kujwala na kazila wa kujela. Kumwapandele kulijwalesa yeni babenya na kasitu nambe kazila nambe na cuma coshe-coshe cije cikalikoko hasi, bije binjinamileke ngwange binapu bya kujwala. 26 Munapande kupwa ba kujela mu mesho ange, mwafwa yange Yehova njapwa nji wa kujela, yange njili na kumyangununa ku baka-mafuti mangana mupwe bange.

27 “‘Munalume nambe munakazi uje endeka na bakulu nambe muka-kuumikiya banapande kumutsiya bene. Banu banapande kutsiya banu ba cifweci na mamanya. Maninga abo akala ha mitwe yabo.’”