Levitike
21 Yehova walekele lalo Mosesa ngwendi: “Leka bana ba Aloni ba banalume baje banapu tupilistu ngwobe, ‘Naumo wahi napande kulijwalesa hakati ka banu bendi mwafwa ya mutsi. 2 Oloni nasa kulijwalesa nga kunatsi kabushoko kendi wa ha mbunge, kulumbununa ina, ishe, munendi wa munalume, munendi wa munakazi, na ndolome yendi. 3 Co lalo nasa kulijwalesa mwafwa ya ndokazi yendi yakele nendi, uje kanda alilaleho laja na munalume, co lalo kanda ashomboke. 4 Kapandele kulijwalesa ikeye babenya hakati ka banu bendi, na kupwa wa kujwala mwafwa ya munakazi uje nashomboka. 5 Kubapandele kukongobola mitwe yabo nambe kutehula minjezi yabo ya ku binana, nambe kulilengozola ha mibila yabo. 6 Banapande kupwa ba kujela kuli Njambi yabo, co kubapandele kujwalesa lizina lya Njambi yabo mwafwa bali na kwana Yehova bwana bwa kwenyeka mu tuhya, kulumbununa likende* lya Njambi yabo, co banapande kupwa ba kujela. 7 Kubapandele kwambata munakazi wa lihule nambe ibanajwalesa nambe munakazi ibanalukulula, mwafwa kapilistu wapwa wa kujela kuli Njambi yendi. 8 Munapande kumumona kupwa wa kujela mwafwa ikeye ana likende lya Njambi yeni. Munapande kumumona kupwa wa kujela mwafwa yange Yehova njili na kumijelesa njapwa nji wa kujela.
9 “‘Nga muna kapilistu wa munakazi alijwalesa ikeye babenya ha kulinga buhule, ali na kujwalesa ishe. Banapande kumwenyeka mu tuhya.
10 “‘Kapilistu wahakamwa uje ibanangula hakati ka bandolome bendi, uje ibanabwabesa na mazi ku mutwe, uje lalo ibanangula kuzala bizalo bya bupilistu, kapandele kwecelela biñambu bya ku mutwe wendi nambe kutabula bizalo byendi. 11 Kapandele kushwena cibimbi woshe-woshe, kapandele kulijwalesa nameme nga ishe nambe ina ikeye natsi. 12 Kapandele kutunda mu mwela wa kujela, co kapandele kujwalesa mwela wa kujela wa Njambi yendi mwafwa cizibukiso ca kulikundika cije cinapu mazi a Njambi yendi a kupangesa mu kubwabesa cili ha mutwe wendi. Yange Yehova.
13 “‘Napande kwambata munakazi uje kanda alilaleho laja na munalume. 14 Kapandele kwambata fwile nambe munakazi ibanalukulula, nambe munakazi ibanajwalesa nambe lihule. Oloni napande kwambata munakazi hakati ka banu bendi, uje kanda alilaleho laja na munalume mangana apwe munakazi wendi. 15 Kapandele kujwalesa bana bendi hakati ka banu bendi, mwafwa yange Yehova njili na kumujelesa.”’
16 Yehova watwaleleleleho kuleka Mosesa ngwendi: 17 “Leka Aloni ngwobe, ‘Munu wa ku naanga yobe mu bisemwa byeni byoshe uje ali na kapenga, kapandele kwana likende lya Njambi yendi. 18 Munu woshe uje ali na kapenga kapandele kushwena ku mutula, ipwe kapuputwa nambe ciyanga nambe uje ali na kapenga ku cihanga,* nambe munu wa lindi nambe liboko lyalilaha kutubakana likwabo, 19 nambe wa kupokoka lindi nambe liboko, 20 nambe wa litunda nambe kamonapi,* nambe munu uje ali na kapenga ha lisho nambe uje ali na bimbulu nambe ali na litota, nambe uje ali na mambindu anabihya. 21 Munu wa ku naanga ya kapilistu Aloni uje ali na kapenga, kapandele kushwena ku mutula na kwana Yehova bwana bwa kwenyeka mu tuhya. Ali na kapenga, ngeci kapandele kushwena ku mutula na kwana likende lya Njambi yendi. 22 Nasa kulya likende lya Njambi yendi, kulumbununa byuma bya kujela manene na byuma bya kujela. 23 Oloni kapandele kushwena kuyehi na nanga, nambe kushwena ku mutula, mwafwa ali na kapenga. Ngeci kapandele kujwalesa mwela wange wa kujela mwafwa yange Yehova uje ali na kubajelesa.’”
24 Ngeci Mosesa wendekele na Aloni na bana bendi na Baisalele boshe.