Levitike

22 Yehova walekele lalo Mosesa ngwendi: 2 “Leka Aloni na bana bendi ngwobe banapande kunyanyama nomwo mubalingilamo* byuma bya kujela bya Baisalele, na kujeneka kujwalesa lizina lyange lya kujela kutalesa ku byuma bibali na kunjijelesela. Yange Yehova. 3 Baleke ngwobe, ‘Mu bisemwa byeni byoshe munapande kutsiya munu wa ku naanga yeni woshe uje napu wa kujwala, uje ashwena ku byuma bya kujela bibali na kunjijelesela Baisalele. Yange Yehova. Munapande kumutundisa ku mesho ange. Yange Yehova. 4 Kukwesi munu wa ku naanga ya Aloni uje ali na mbumba nambe uje ali na kwitisa bimo ku bushwamwa bwendi napande kulya byuma bya kujela. Napande kubandamena noho hakajelela. Co lalo woshe uje akwata munu uje napu wa kujwala mwafwa ya cibimbi, nambe munu uje ali na kwitisa mbuto ku bushwamwa bwendi kapandele kulya byuma bya kujela. 5 Co lalo woshe uje akwata byakutanga bya kujwala bije bikende mu bibunga, nambe uje akwata munu wa kujwala uje asa kumujwalesa kapandele kulya byuma bya kujela. 6 Woshe akwata cuma coshe-coshe ku byuma ebi apwa wa kujwala kweta mangwezi, co kapandele kulya cuma ca kujela coshe-coshe, oloni napande kutana. 7 Litangwa mulilahuka, apwa wa kujela, co munima nasa kulya ku byuma bya kujela mwafwa binapu byakulya byendi. 8 Co lalo kapandele kulya kasitu woshe-woshe wa kulitsila nambe cuma coshe-coshe cibanapapozola bikashama, mangana keti apwe wa kujwala mwafwa yaco. Yange Yehova.

9 “‘Banapande kwononoka lishiko lyange. Kubapandele kujwalesa byuma bya kujela mangana keti balinge bubi na kutsa. Yange Yehova uje ali na kubajelesa.

10 “‘Munu uje kubatabesele* kapandele kulya byuma byoshe-byoshe bya kujela. Munu wa ku lifuti lyeka uje naija na kumenekela kapilistu nambe muka-bipangi uje yanakumuna, kapandele kulya byuma byoshe-byoshe bya kujela. 11 Oloni nga kapilistu alanda munu na bimbongo byendi, co uje munu nasa kulya ku byuma bya kujela. Bindungo baje banasemukila mu njibo yendi nabo banasa kulya byakulya byendi. 12 Nga muna kapilistu wa munakazi ashomboka ku munu uje keti kapilistu, co ou mwana kapandele kulya ku mulambu wa byuma bya kujela. 13 Oloni nga uje muna kapilistu wa munakazi apwa fwile nambe bamulukulula oku kesi na bana, co eluka na kukala mu njibo ya ishe ngwe muje mwakele ku bwanike, co asa kulya ku byakulya bya ishe, oloni munu uje kubatabesele* kapandele kubilya.

14 “‘Nga munu alya cuma ca kujela kwa kujeneka kuzibuka, napande kwilwisa kuli kapilistu buje bwana bwa kujela bwanali na kubwezelelaho mutamba wamucitanu wa ndando yoco cuma. 15 Ngeci kubapandele kujwalesa byuma bya kujela bya Baisalele bije bibana kuli Yehova, 16 na kubalingisa babane kashitiko mwafwa ya milonga yabo ibanalingi omwo banali byuma byabo bya kujela, mwafwa yange Yehova, yange njili na kubajelesa.”’

17 Yehova watwaleleleleho kuleka Mosesa ngwendi: 18 “Leka Aloni na bana bendi ba banalume na Baisalele boshe ngwobe, ‘Nga Kaisalele wa munalume nambe munu wa ku lifuti lyeka uje ali mu Isalele ana bwana bwa kwenyeka kuli Yehova mangana ashulisilile bikumiiyo byendi nambe nga ana bwana bwa kulishakela, 19 napande kwana ngombe wa nkomba wamubwa na bana ba bimanga ba nkomba nambe bimembe mangana Njambi atambule obu bwana. 20 Kumwapandele kwana bwana bwoshe-bwoshe buje buli na kapenga, mwafwa kubulingisa Njambi amitambule.

21 “Nga munu ana mulambu wa kulila hamo kuli Yehova mangana ashulisilile cikumiiyo cendi, nambe nga ana bwana bwa kulishakela napande kwana ngombe wamubwa nambe manga, asina Njambi atambula obu bwana. Obu bwana kubwapandele kukala na kapenga nambe kamandondo. 22 Kumwapandele kwana cimuna wa kutsa mesho, nambe wa kupokoka, nambe uje ali na mbandu, nambe uje ali na tusondondwa, nambe wa mabanda, nambe wa linjandi nambe wa matota. Kumwapandele kwana bimuna ba cifweci kuli Yehova, nambe kwana bwana bwa cifweci kuli Yehova ha mutula. 23 Munasa kwana ngombe wa nkomba nambe manga uje ali na lindi lyalilaha kutubakana likwabo nambe lyalihi kupwa bwana bwa kulishakela, oloni nga mwana bimuna ba cifweci kupwa bwana bwa cikumiiyo, co Njambi kabatambula. 24 Kumwapandele kwana Yehova cimuna uje ali na mambindu anabihya nambe abanatiki, nambe ibanalutula, co kumwapandele kwana bimuna ba cifwoco mu lifuti lyeni. 25 Co munu wa ku lifuti lyeka kapandele kwana bimuna ba cifweci kupwa byakulya bya Njambi yeni, mwafwa banatenguka, co bali na kapenga. Kubabatambula.”’

26 Yehova walekele lalo Mosesa ngwendi: 27 “Nga ngombe wa nkomba nambe muna manga wa nkomba nambe membe asemuka, napande kutwalelelaho kukala na ina ha matangwa 7, oloni kushangumuka ha litangwa lya bu 8 kuya kulutwe, njasa kumutambula kupwa bwana, bwana bubenyeka mu tuhya kuli Yehova. 28 Oloni kumwapandele kutsiya ngombe nambe manga na munendi ha litangwa lya kulifwa.

29 “Nga mwana mulambu wa kumwesa kukandelela kuli Yehova, munapande kuwana mu ngila ije ilingisa Njambi amitambule. 30 Munapande kuulya ha litangwa olyo bene. Kumwapandele kusezako umo kweta mutondo. Yange Yehova.

31 “Munapande kunyunga mashiko ange na kuwononoka. Yange Yehova. 32 Kumwapandele kujwalesa lizina lyange lya kujela, co Baisalele banapande kunjimona kupwa nji wa kujela, Yange Yehova, uje ali na kumijelesa, 33 uje namitundisa mu lifuti lya Ijipiti, mangana njimimwese ngwange njapwa nji Njambi. Yange Yehova.”