Mukanda Wakulibanga wa Samwele
13 Saulu wakele na myaka . . .* mwapwile mwene, co wayulile Isalele ha myaka ibali. 2 Saulu wangwile banalume 3,000 mu Isalele. Ba kupwa 2,000 bakele na Saulu ku Mikimashi mu mutambela wa malundu wa Betheu, co ba kupwa 1,000 bakele na Jonathani ku Gibea ya Benjamini. Welwisile banu boshe baje basaleleko, umo na umo ku tenti yendi. 3 Jonathani watsiile cibunga ca maswalale ba Bafilistiya baje bakele mu Geba, co Bafilistiya bazibile ou muzimbu. Ngeci, Saulu washikile ngwendi bohyese limbinga mu lifuti lyoshe na kutambeka ngwabo: “Bahebelu bazibe!” 4 Baisalele boshe bazibile ou muzimbu wa kwendeka ngwabo: “Saulu natsii cibunga ca maswalale ba Bafilistiya, co hano Bafilistiya banazindi Baisalele.” Ngeci, banu babashikile ngwabo bakabe Saulu ku Giugali.
5 Bafilistiya nabo balikungulwile mangana balwise Isalele. Bakele na matemba a nzita 30,000 na baka-kulonda tubalu 6,000 na maswalale ba kwenda ha mendi babangi-bangi ngwe mushekesheke wa ku ngenge ya kalunga-ndonga. Co baile na kutunga cilombo cabo mu Mikimashi ku butuhukilo bwa litangwa bwa Bethi-aveni. 6 Co banalume ba mu Isalele balishoshomwenene, mwafwa bamwene ngwabo bakele mu bukalu. Ngeci, banu babandele mu mena a mu mamanya, mu mingelo, mu mamanya, mu milili ya mu libu ya kutulikila byuma na mu masima. 7 Bahebelu bamo bajabukile na Jodani kutewela ku lifuti lya Gadi na lya Giliyadi. Oloni Saulu anga wakele mu Giugali, co banu boshe baje bakele na kumukaba balijujukilile. 8 Watwaleleleleho kubandamena ha matangwa 7 kweta na ha simbu yashikile Samwele, oloni Samwele kezile ku Giugali, co banu bakele na kulishandoka na kuseza Saulu. 9 Mamaneselelo Saulu wendekele ngwendi: “Neneni kuno mulambu wa kwenyeka na milambu ya kulila hamo.” Co wanene mulambu wa kwenyeka.
10 Oloni mwamanesele lika kwana mulambu wa kwenyeka, Samwele wetele. Co Saulu wamusheshele na kumubezikisa. 11 Co Samwele wendekele ngwendi: “Bika biunalingi?” Saulu wakumbulwile ngwendi: “Njinamwene ngwange banu bali na kunjiseza, co lalo kuwezile ha simbu iunashikile, co Bafilistiya banakala na kulikungulwila ku Mikimashi. 12 Ngeci, njalyendekesele ngwange, ‘Hano Bafilistiya banjisikumukila mu Giugali, okuni kanda njilombe bukwasi kuli Yehova.’ Mukemwo njamwene ngwange njinapande bene kwana mulambu wa kwenyeka.”
13 Co Samwele walekele Saulu ngwendi: “Biunalingi bya bulema. Kuwononokele lishiko lyanakwanene Yehova Njambi yobe. Ngwe unalingi ngoco, ngwe Yehova nazameka bumwene bwobe mu Isalele myaka yoshe. 14 Oloni hano bumwene bwobe kubwishwala. Yehova abwana munalume uje namui ku mbunge, co Yehova amwangula kupwa ntwama wa banu bendi, mwafwa kuwononokele byanakushikile Yehova.”
15 Co Samwele wakatukile na kuya, kutunda ku Giugali kuya ku Gibea ya Benjamini, co Saulu watandele banu. Baje bacikele nendi bapwile banalume ba kweta ku 600. 16 Saulu na munendi Jonathani na banu baje bacikele nabo bakele mu Geba ya Benjamini, co Bafilistiya batungile cilombo cabo mu Mikimashi. 17 Co bibunga bitatu bya maswalale byakele na kutunda mu cilombo ca Bafilistiya kuya na kulwisa banu. Cibunga cimo cakele na kwenda mu ngila ya kuya ku Ofula mu lifuti lya Shuwala. 18 Cibunga cikwabo cakele na kutalesela mu ngila ya Bethi-holoni. Camucitatuco cakele na kutalesela mu ngila iya ku nginga ije inalitala na cingulunga ca Zeboimu, kutalesela ku mambo.
19 Co mu lifuti lyoshe lya Isalele kumwakele muka-kufula, mwafwa Bafilistiya bendekele ngwabo: “Bahebelu keti bafule mukwale nambe likunga.” 20 Baisalele boshe bapandele kuya kuli Bafilistiya mangana bakabotwele matemo a bikekele, bipiki, bingimbu, nambe bicekesi. 21 Ndando ya kwotwesa litemo lya cikekele, piki, cikwata ca mayo atatu nambe ngimbu nambe kubwahesa citi ca kushongomoka ca kupangwisa bingombe yapwile pimu.* 22 Ha litangwa lya nzita, kukwesi munu wakele na Saulu na Jonathani uje wakwatele mukwale nambe likunga. Saulu na munendi Jonathani bakebo lika bakele na bitwa.
23 Co cibunga ca maswalale ba Bafilistiya caile ku ngila iya mu sambwa lya cimbongo ca Mikimashi.