Mukanda Wakulibanga wa Samwele
14 Litangwa limo, Jonathani muna Saulu walekele muka-kupanga uje wambatele bitwa byendi ngwendi: “Ija tujabuke, tuye ku cilombo ca Bafilistiya cili mu sambwa.” Oloni kalekele ishe. 2 Saulu watungile cilombo kumukulo wa Gibea, mwisi ya muti wa mapomagraneti mu Migroni, co banalume ba kweta ku 600 bakele hamo nendi. 3 (Ahaija muna Ahitubu, ndolome ya Ikabodi, muna Finihasi, muna Eli, kapilistu ka Yehova mu Shilo wambatele efodi.) Oloni banu kubazibukile ngwabo Jonathani nai. 4 Co mu ngila mwakele na kwita Jonathani omwo wakele na kuya ku cilombo ca Bafilistiya, ku mutambela umo kwakele limanya lya kulifwa na liyo, co ku mutambela ukwabo nakwo kwakele limanya lya kulifwa na liyo. Limanya limo balilukile ngwabo Bozezi, likwaboco balilukile ngwabo Sene. 5 Limanya limo lyapwile ngwe ngunzi mu kunto kulitala na Mikimashi, limanya likwaboco lyakele mu mbwela kulitala na Geba.
6 Co Jonathani walekele muka-kumwambatela bitwa ngwendi: “Tuye mu sambwa ku cilombo caba banalume ba kujeneka kuya ku mukanda. Hamo Yehova atwobola. Mwafwa nacimo cahi casa kwonowesa Yehova kwobola banu bendi kupangesa banu babangi nambe babandondo.” 7 Muka-kumwambatela bitwa wamulekele ngwendi: “Linga byoshe-byoshe biikuleka mbunge yobe. Ya kwoshe-kwoshe kuushaka. Njikukabangeya kwoshe-kwoshe kuikutwala mbunge yobe.” 8 Co Jonathani wendekele ngwendi: “Tuya mu sambwa kuli aba banalume na kukalisholola kuli bakebo. 9 Nga batuleka ngwabo, ‘Imaneni, kweta noho hatwizila kuli yeni!’ co twimana, kutubaila. 10 Oloni nga bendeka ngwabo, ‘Ijeni mwakutulwise!’ co tuya, mwafwa Yehova abana mu liboko lyetu. Eci cikeco cipwa cizibukiso kuli yetu.”
11 Co balisholwele ku cilombo ca Bafilistiya mu bubali bwabo. Bafilistiya bendekele ngwabo: “Taleni! Bahebelu bali na kucapuluka mu mena mubanabandele.” 12 Ngeci, banalume bakele muje mu cilombo balekele Jonathani na muka-kumwambatela bitwa ngwabo: “Ijeni kuno tumimwese kailaila!” Co Jonathani walekele muka-kumwambatela bitwa ngwendi: “Njikabe, mwafwa Yehova abana mu liboko lya Isalele.” 13 Jonathani wakandukile oku akalaba, co muka-kumwambatela bitwa wakele na kumukaba munima. Jonathani washangumukile kwandumuna Bafilistiya, co muka-kumwambatela bitwa wakele na kubatsiya munima yendi. 14 Jonathani na muka-kumwambatela bitwa mubalwisile Bafilistiya lwakulibanga, batsiile banalume ba kweta ku 20 mu mwela wa kweta ku hafu ya eka ya lihya* mu bulaha.
15 Banu babangi balijujukilile mu cilombo ca Bafilistiya, kwambateselela na baje bakele na kucinyunga, hamolika na bibunga bya maswalale babo baje bakele na kuya na kupukula byuma. Lifuti-libu lyashangumukile kujaja, co lyoba lya kutunda kuli Njambi lyabakwatele. 16 Baka-kunyunga Saulu mu Gibea ya Benjamini banangukile ngwabo mpindangano yakele na kujalakana kwoshe.
17 Saulu walekele banu bakele nendi ngwendi: “Tandeni banu tumone indi iya natundu hano.” Mubatandele banu, bawanene ngwabo Jonathani na muka-kumwambatela bitwa bahi. 18 Ngeci, Saulu walekele Ahaija ngwendi: “Shwenesa cikasha ca Njambi wa busunga muyehi!” (Mwafwa cikasha ca Njambi wa busunga cakele na Baisalele ha simbu oyo.*) 19 Simbu Saulu wacikele na kwendeka na kapilistu, mpindangano ije yakele mu cilombo ca Bafilistiya yakele na kulibwezelela manene. Ngeci, Saulu walekele kapilistu ngwendi: “Ecela biuli na kulinga.”* 20 Co Saulu na banu boshe baje bakele nendi balikungulwile na kuya ku nzita, kuje kubakawanene Bafilistiya banalitengulukila umo na mukwabo na mikwale yabo, co liwayanga lyapwile lyakama manene. 21 Co lalo Bahebelu baje balikwatasanene na Bafilistiya hakulibanga na kuya nabo mu cilombo, bashangumukile kuya na kulikwatasana na Baisalele baje bakele mwisi ya Saulu na Jonathani. 22 Banalume boshe ba mu Isalele baje babandele mu mutambela wa malundu wa Efremu bazibile ngwabo Bafilistiya banatewe, co balikwatasanene na bakwabo baje bakele na kubakilimisa mubakele na kulwa. 23 Ngeci, Yehova wobwele Isalele lije litangwa, co batwaleleleleho kulwa nzita kuketa na ku Bethi-aveni.
24 Oloni banalume ba mu Isalele bakele mu citanga olyo litangwa, mwafwa Saulu walingisile banu balisinge omwo wendekele ngwendi: “Woshe alya cakulya coshe-coshe simbu kanda lilauke nambe simbu kanda njilinge bitozi bange shambandinga apwe wa kusinga!” Ngeci, naumo wahi walile cakulya coshe-coshe.
25 Banu boshe baile mu shwata, co bawanene buki hasi. 26 Banu mubetele mu shwata, bamwene buki buli na kundweka, oloni naumo wahi wabulile, mwafwa batewele cisingo. 27 Oloni Jonathani kazibileko omwo ishe walingisile banu balisinge. Ngeci, wolwele mulamu wakele mu liboko lyendi na kumbwitika shongo yawo mu mwenga wa buki. Mwalileko, wakele lalo na nzili.* 28 Co munu umo wendekele ngwendi: “Isho nalingisa banu balisinge omwo nendeka ngwendi, ‘Woshe alya cakulya lelo apwe wa kusinga!’ Mukemwo banu banajuka manene.” 29 Jonathani wendekele ngwendi: “Tate nanenela lifuti bukalu bwakama.* Taleni munjinakela na nzili mwafwa lika ya tubuki twatundondo tunjinamakela. 30 Ngwe lelo banu banazituka kulya ku byuma bibanapukula ku bitozi babo ngwe tunatsii Bafilistiya babangi.”
31 Lije litangwa batwaleleleleho kutsiya Bafilistiya, kutunda ku Mikimashi kweta ku Aijaloni, co banu bajukile manene. 32 Ngeci, banu bashangumukile kulupukila bibapukwile, co bambatele bimanga na bingombe na bana ba bingombe na kubatsiila hasi, co balile situ na maninga ayo. 33 Ngeci, balekele Saulu ngwabo: “Tala! Banu bali na kubiisila Yehova omwo bali na kulya situ na maninga ayo.” Co wendekele ngwendi: “Kumwamwesele likulahelo. Sindumwineni kuno limanya lyakama hano bene.” 34 Co Saulu wendekele ngwendi: “Lishandokeni, muleke banu ngweni, ‘Umo na umo weni napande kunena ngombe yendi wa nkomba na manga yendi na kubatsiila ha limanya eli na kubalya. Keti mubiisile Yehova ha kulya situ na maninga ayo.’” Ngeci, umo na umo wabo wanenele ngombe yendi wa nkomba buje butsiki na kumutsiila haje ha limanya. 35 Co Saulu watungilile Yehova mutula. Ou ukewo mutula wakulibanga watungilile Yehova.
36 Kutundaho, Saulu wendekele ngwendi: “Tusikumukeni butsiki tusheke Bafilistiya na kupukula byuma byabo kweta noho kunaki. Naumo wahi napande kwoboka.” Bamukumbulwile ngwabo: “Linga byoshe biumona ngwobe byabibwa.” Co kapilistu wendekele ngwendi: “Tusimutwiyeni na Njambi wa busunga hano hatuli.” 37 Co Saulu wehwile Njambi ngwendi: “Kuma njinapande kusikumuka na kukalwisa Bafilistiya ndi? Kuma ubana mu liboko lya Isalele ndi?” Oloni Njambi kamukumbulwile lije litangwa. 38 Ngeci, Saulu wendekele ngwendi: “Ijeni kuno eni bamyata boshe ba banu mangana tutondesese bubi bunalingiwa lelo. 39 Njilisinga hali Yehova wa kuyoya uje namena Isalele ngwange munu nalingi ngoco napande kutsa, nameme bene munange Jonathani.” Oloni naumo wahi hakati ka banu wamukumbulwile. 40 Co walekele Baisalele boshe ngwendi: “Kaleni ku mutambela umo, co yange na munange Jonathani tukala ku mutambela ukwabo.” Banu bakumbulwile Saulu ngwabo: “Linga byoshe biumona ngwobe byabibwa.”
41 Co Saulu walekele Yehova ngwendi: “Obe Njambi ya Isalele, kumbulula kupangesa Thamimu!” Thamimu yenikile Jonathani na Saulu, co banu bapatukile. 42 Ngeci, Saulu wendekele ngwendi: “Teni ñela mangana tumone indi iya nalingi mulonga mukati kange na munange Jonathani.” Co ñela yawililile Jonathani. 43 Ngeci, Saulu walekele Jonathani ngwendi: “Njileke, bika biunalingi?” Co Jonathani wamukumbulwile ngwendi: “Njinamakelele lika tubuki tunakele ku shongo ya mulamu unjinakwatele mu liboko. Yange uno, njitse ngano!”
44 Saulu wendekele ngwendi: “Njambi anjane kashitiko kakama nga kuutsi Jonathani.” 45 Oloni banu balekele Saulu ngwabo: “Kuma Jonathani uje nalingisa Isalele ahyane manene ngacije napande kutsa ndi? Obyo kubilingiwa! Tulisinga hali Yehova wa kuyoya ngwetu kukwesi nameme ciñambu ca ku mutwe wendi cinapande kuwila hasi, mwafwa Njambi ikeye namukwasa alinge byanalingi lelo.” Ngeci, banu bamenene* Jonathani, co katsile.
46 Saulu wecelele kusheka Bafilistiya, co Bafilistiya belukile ku lifuti lyabo.
47 Saulu wazamekele bumwene bwendi mu Isalele, co walwile na bitozi bendi boshe mu mitambela yoshe. Walwile na Bamowabi, na Baamoni, na Baedomu, na bimyene ba Zoba, na Bafilistiya. Co kwoshe kwaile wabahyanene. 48 Walwisile Baamaleki mu kusimpa na kubahyana, co wamenene Baisalele mu liboko lya baka-kubapukula.
49 Bana ba Saulu ba banalume bapwile Jonathani, na Ishivai, na Mauki-shuwa. Co wakele na bana ba banakazi babali. Wa mukulunu wapwile Melabu, wa mwanikeco Mikali. 50 Munakazi wa Saulu wapwile Ahinoamu muna Ahimazi. Mukulunu wa maswalale bendi wapwile Abina muna Nele. Abina wapwile ishe ya Saulu wa mwanike. 51 Kishi ikeye wapwile ishe ya Saulu, co Nele ishe ya Abina wapwile muna Abiele.
52 Saulu walwile manene na Bafilistiya mu matangwa oshe ayulile. Munalume woshe wa kukanyama nambe wa kusimpa yamwene Saulu, wamupwisile liswalale wendi.