Mukanda Wakulibanga wa Samwele
18 Devidi mwamanesele lika kusimutwiya na Saulu, Jonathani na Devidi balikutile busamba bwa kukanyama, co Jonathani washangumukile kuzema Devidi ngwe mwalizemenene.* 2 Kushwa bene lije litangwa, Saulu watwaleleleleho kukala na Devidi, co kamutabesele kwiluka ku njibo ya ishe. 3 Ngeci, Jonathani na Devidi balingile cikumiiyo, mwafwa Jonathani wazemene Devidi ngwe mwalizemenene.* 4 Jonathani washulwile cizalo cendi ca helu ca kujeneka maboko na kucana Devidi, hamolika na bizalo byendi bya nzita, na mukwale wendi, na buta bwendi bwa lusipa, na mwiba wendi. 5 Devidi washangumukile kuya ku nzita. Co kwoshe kwakele na kumutuma Saulu, byuma byakele na kumwendela mwamubwa.* Ngeci, Saulu wamupwisile ntwama wa banalume baje bakele na kuya ku nzita, co ebi byazibisile banu boshe kubwaha, hamolika na bangamba ba Saulu.
6 Devidi na bakwabo mubakele na kutunda mu kutsiya Bafilistiya, banakazi bakele na kutunda mu binganda byoshe bya Isalele oku baimba na kukina mubakele na kushesha Mwene Saulu, co bakele na kwimba na tungoma na bisanzi bya mikole itatu oku balisamba. 7 Banakazi baje bakele na kulisamba bakele na kwimba ngwabo:
“Saulu natsii makulukazi,
Devidi natsii makumi a makulukazi.”
8 Saulu walubalele manene, co ou mwaso kuwamuzibisile kubwaha, mwafwa wendekele ngwendi: “Devidi ngwabo natsii makumi a makulukazi, oloni yange ngwabo njinatsii makulukazi. Cuma cinasalako lika cinapu kumwana bumwene.” 9 Kushwa lije litangwa, Saulu wecelele kukulahela Devidi.
10 Lyamukwabo, sipilitu yaibi ya kutunda kuli Njambi yezile hali Saulu, co washangumukile kutambangela* mu njibo oku Devidi ali na kwimba mwaso ha kalyalya ngwe mwakele na kulinga ha bisimbu bikwabo. Saulu wakwatele likunga mu liboko, 11 co washele lije likunga oku alyendekesa ngwendi: ‘Njipameya Devidi ha cibumbe.’ Oloni Devidi wobokele ha bisimbu bibali byamwashele. 12 Co Saulu wazibilile Devidi lyoba mwafwa Yehova wakele na Devidi, oloni wasezele Saulu. 13 Ngeci, Saulu wecelesele Devidi kupangela halutwe lwendi, co wamwangwile kupwa ntwama wa maswalale 1,000. Ngeci, Devidi wakele na kutwamenena maswalale mu nzita. 14 Byuma byoshe byakele na kulinga Devidi byatwaleleleleho kwenda mwamubwa* mwafwa Yehova wakele nendi. 15 Co Saulu wamuzibilile lyoba mwamwene ngwendi byuma byakele na kumwendela mwamubwa manene. 16 Oloni banu boshe mu Isalele na mu Juda bazemene Devidi, mwafwa wakele na kubatwamenena mu binzita byabo.
17 Mu kwita kwa simbu, Saulu walekele Devidi ngwendi: “Munange wa munakazi wa mukulunu Melabu ou. Njikwanaye apwe munakazi wobe. Oloni unapande kutwalelelaho kupwa liswalale wange mu kusimpa na kulwa binzita bya Yehova.” Mwafwa Saulu walyendekesele ngwendi: ‘Keti njimutsiye yange. Bamutsiye Bafilistiya.’ 18 Devidi mwazibile ngoco walekele Saulu ngwendi: “Yange iyajo, co babushoko bwange baka-naanga ya tate beyajo mu Isalele mangana njipwe ishemweno ya mwene?” 19 Oloni simbu ya kushombwesa Melabu muna Saulu kuli Devidi muyetele, te banamushombwesa laja kuli Adriele wa Kamehola.
20 Co Mikali muna Saulu wa munakazi wazemene Devidi, ngeci balekele Saulu, co ou muzimbu wazibisile Saulu kubwaha. 21 Saulu wendekele ngwendi: “Njimwanaye apwe muheto kuli ikeye, mangana Bafilistiya bamutsiye.” Co Saulu walekele Devidi lwamucibali ngwendi: “Ulinga nange lizibasano lya bulo* lelo.” 22 Kutundaho, Saulu washikile bangamba bendi ngwendi: “Lekeni Devidi ku bushweke ngweni, ‘Tala! Unazibisa mwene kubwaha, co lalo bangamba bendi boshe banakushaka. Ngeci, linga lizibasano lya bulo na mwene.’” 23 Bangamba ba Saulu mubalekele Devidi ebi byuma, Devidi wendekele ngwendi: “Yeni kuma mumona ngweni kwakwasi kulinga lizibasano lya bulo na mwene okuni nji kahutu, co lalo nomu munjinafu mwahi ndi?” 24 Co bangamba ba Saulu balekele Saulu ngwabo: “Awa akewo majwi anendeka Devidi.”
25 Saulu mwazibile ngoco wendekele ngwendi: “Yeni mukaleke Devidi ngweni: ‘Mwene katondo conda coshe-coshe. Atonda lika bikoba 100 bya Bafilistiya bya ku bunalume mangana alinge shambandinga bitozi ba mwene.’” Mwafwa Saulu wayongwele ngwendi Devidi bamutsiye Bafilistiya. 26 Ngeci, bangamba ba Saulu betesele awa majwi kuli Devidi, co kulinga lizibasano lya bulo na mwene kwazibisile Devidi kubwaha. Simbu kanda simbu ibakele yete, 27 Devidi na banalume bakele nabo baile na kutsiya banalume ba Bafilistiya 200, co Devidi wanenele bikoba byabo byoshe bya ku bunalume kuli mwene mangana alinge nendi lizibasano lya bulo. Ngeci, Saulu wamwanene munendi wa munakazi Mikali apwe munakazi wendi. 28 Saulu wanangukile ngwendi Yehova wakele na Devidi, co lalo wanangukile ngwendi munendi Mikali wazemene Devidi. 29 Ebi byalingisile Saulu azibile manene lyoba Devidi, co Saulu wamwene Devidi kupwa citozi cendi mu kuyoya kwendi kwoshe.
30 Bamyata ba Bafilistiya bakele na kuya ku nzita. Oloni mwoshe mubakele na kuilako, Devidi wakele na kuhyana manene kutubakana bangamba boshe ba Saulu, co lizina lyendi lyatsimanene manene.