Mukanda Wakulibanga wa Samwele
19 Mu kwita kwa simbu, Saulu walekele munendi Jonathani na bangamba bendi boshe ngwendi ashaka kutsiya Devidi. 2 Jonathani muna Saulu wazemene manene Devidi, ngeci Jonathani walekele Devidi ngwendi: “Tate Saulu ashaka kukutsiya. Ngeci, nyanyama imene mutondo, co ya ku mwela wa kubanda ukakale bene kuje. 3 Njikemana kuyehi na tate mu mwela muukakala. Njikasimutwiya byobe na tate, co byoshe byakendeka njikakulekabyo.”
4 Ngeci, Jonathani wasimutwiiye na ishe Saulu byuma byabibwa hali Devidi. Wamulekele ngwendi: “Obe mwene yange, keti ulinge mwamubi ngamba yobe Devidi, mwafwa kakubiisilile, co lalo byuma byanakulingila binakukwasa. 5 Nakele buyoye bwendi mu bushonde mwanatsiile uje Kafilistiya, co Yehova nalingisile Baisalele boshe bahyane manene.* Unalimwenenene ebi byuma, co unabwahelelele manene. Bikoni biwitilila maninga a kujeneka mulonga ha kutsiya Devidi okuni byahi byanabiisa?” 6 Saulu watolililile Jonathani, co Saulu walisingile ngwendi: “Njilisinga hali Yehova wa kuyoya ngwange wahi amutsiya.” 7 Munima yebi, Jonathani wasanene Devidi na kumuleka byuma byoshe ebi. Co Jonathani wanenele Devidi kuli Saulu, ngeci watwaleleleleho kumupangela ngwe mwakele na kulingila hakulibanga.
8 Mu kwita kwa simbu, nzita yakatukile lalo, co Devidi waile na kulwisa Bafilistiya, co watsiile Bafilistiya babangi, ngeci batewele.
9 Sipilitu yaibi ya kutunda kuli Yehova yezile hali Saulu mwatumamene mu njibo yendi oku nakwata likunga mu liboko. Ha simbu ei Devidi wakele na kwimba kalyalya. 10 Saulu washakele kupameya Devidi ha cibumbe na likunga, oloni Devidi walihengele, co likunga lyashimbamene ha cibumbe. Devidi wabombolokele na kutewa buje bene butsiki. 11 Ngeci, Saulu watumine tutumwa ku njibo ya Devidi mangana bakainyunge na kumutsiya mutondo, oloni Mikali walekele munalume wendi Devidi ngwendi: “Nga kuutewe* buno butsiki, imene utsa.” 12 Oho bene Mikali wakwasele Devidi atuhukile mu windo, mangana atewe na kukabanda. 13 Mikali wambatele kamponya wa telafimi* na kumulangeka ha mwela, co wakele nanga ya maka a bimembe haje hakele na kusindamena mutwe Devidi na kufwika uje kamponya nanga.
14 Co Saulu watumine tutumwa mangana bakambate Devidi, oloni Mikali wendekele ngwendi: “Ali na kubinja.” 15 Ngeci, Saulu watumine tutumwa bakamone Devidi, co wabalekele ngwendi: “Muneneni kuno ha mwela wendi mangana njakumutsiye.” 16 Tutumwa mubakobelele mu njibo ya Devidi bawanene kamponya wa telafimi* ha mwela, co haje hapandele kukala mutwe wendi bawaneneho nanga ya maka a bimembe. 17 Saulu wehwile Mikali ngwendi: “Bika biunanjikwisila ngacije na kwecelela citozi cange aye mangana oboke?” Mikali wakumbulwile Saulu ngwendi: “Nanjilekele ngwendi: ‘Njecele njiye, keti ngoconi njikutsiya!’”
18 Ha simbu ei Devidi te natewe laja na kwoboka, co wezile kuli Samwele mu Lama. Devidi walekele Samwele byoshe byamulingile Saulu, co ikeye na Samwele baile na kukakala mu Nayothi. 19 Mu kwita kwa simbu, Saulu bamulekele ngwabo: “Tala! Devidi ali ku Nayothi mu Lama.” 20 Ngeci, Saulu watumine tutumwa bakakwate Devidi. Mubamwene tupolofweto ba kukola bapolofweta na kumona Samwele nemana oku ali na kubatwamenena, sipilitu ya Njambi yezile hali tutumwa ba Saulu, co nabo bashangumukile kulinga ngwe tupolofweto.
21 Mubalekele Saulu ebi byuma, oho bene watumine tutumwa bakwabo, co nabo bashangumukile kulinga ngwe tupolofweto. Ngeci, Saulu watumine tutumwa bakwabo lalo bamucitatu, oloni nabo bashangumukile kulinga ngwe tupolofweto. 22 Mamaneselelo nendi waile ku Lama. Mwetele ku lisima lyakama lya mu Seku, wehwile ngwendi: “Samwele na Devidi bali kuli?” Bamukumbulwile ngwabo: “Bali ku Nayothi mu Lama.” 23 Saulu mwatundile kuje kuya ku Nayothi mu Lama, sipilitu ya Njambi yezile na hali ikeye, co wakele na kulinga ngwe kapolofweto mwakele na kwenda kweta noho hetelele ku Nayothi mu Lama. 24 Washulwile na bizalo byendi, co nendi walingile ngwe kapolofweto halutwe lwa Samwele, co walalele bene oho mutotototo* mutanya woshe na butsiki bwoshe. Mukemwo bakendeka ngwabo: “Kuma Saulu nendi napu umo wa tupolofweto ndi?”