Mukanda Wakulibanga wa Samwele
20 Co Devidi watewele mu Nayothi mu Lama. Oloni wezile kuli Jonathani na kumwihula ngwendi: “Bika binjinalingi? Mulonga muka unjili nawo? Co njabiisila bati isho mangana ayombe mwonyo wange?” 2 Ngeci, Jonathani wamulekele ngwendi: “Obyo kubyasa kulingiwa! Kuutsi. Tala! Tate kasa kulinga cuma cakama nambe cacindondo kwa kujeneka kunjilekaco. Bika bilingisa tate anjishwekele ei ñanda? Obyo kubilingiwa.” 3 Oloni Devidi wendekele ngwendi: “Isho azibuka mwamubwa ngwendi yobe wanjizema. Ngeci, asa kwendeka ngwendi, ‘Keti muleke Jonathani ei ñanda mwafwa alubala.’ Oloni njilisinga hali Yehova Njambi wa kuyoya na hali yobe ngwange ololo njitsa!”
4 Co Jonathani walekele Devidi ngwendi: “Byoshe-byoshe biwendeka njikulingilabyo.” 5 Devidi walekele Jonathani ngwendi: “Imene kukala cilika ca kutenama kwa ngonde, co njinapande kukalya hamo na mwene. Njitabese njiye, njikabande mu shwata kweta litangwa lyamucitatu mangwezi. 6 Nga isho anjitonda, umuleke ngwobe, ‘Devidi nanjilambelelele ngwendi njimutabese aye ku nganda yendi ya Betelehema bwasi-bwasi, mwafwa naanga yendi yana mulambu wa ha mwaka wa naanga yoshe.’ 7 Nga akumbulula ngwendi, ‘Mwamubwa,’ co ngamba yobe ali mu kwoloka. Oloni nga alubala, co zibuka ngwobe nayongola bene kunjilinga mwamubi. 8 Mwesa ngamba yobe cizemo cije kucesi kutenguluka, mwafwa unalingi cikumiiyo na ngamba yobe kuli Yehova. Oloni nga njili na mulonga, njitsiye bene yobe. Bika biunjakela mu maboko a isho?”
9 Co Jonathani wamukumbulwile ngwendi: “Kunjasa kukusinganyekela byuma bya cifwoco! Nga njiziba ngwange tate ashaka kukutsiya, kuma kunjikuleke ndi?” 10 Co Devidi wehwile Jonathani ngwendi: “Iyoni anjileka nga isho akukumbulula na butenu?” 11 Jonathani walekele Devidi ngwendi: “Ija tuye mu shwata.” Ngeci, boshe babali baile mu shwata. 12 Co Jonathani walekele Devidi ngwendi: “Yehova Njambi ya Isalele apwe mukaleho. Imene nambe indele ha simbu ino bene njisimutwiya na tate mangana njizibuke biyongola byendi. Nga ali na biyongola byabibwa hali yobe, kuma kunjikutumina muzimbu na kukuleka ndi? 13 Oloni nga tate ashaka kukulinga mwamubi, co Yehova anjane kashitiko kakama nga kunjikuleke ei ñanda na kukutabesa uye mu kwoloka. Yehova akale nobe ngwe mwanakela na tate. 14 Co kuma kuunjimwesa cizemo ca Yehova cije kucesi kutenguluka simbu njiciyoya nomwo njitsa ndi? 15 Keti wecele kumwesa bakunjibo yange cizemo cije kucesi kutenguluka nameme Yehova anyongese bitozi ba Devidi boshe ha lifuti-libu.” 16 Ngeci, Jonathani walingile cikumiiyo na bakunjibo ya Devidi ngwendi, “Yehova ana bitozi ba Devidi kashitiko na kubalingisa balitabele.” 17 Jonathani walekele Devidi alisinge mwafwa ya cizemo cendi, mwafwa wamuzemene manene ngwe mwalizemenene.
18 Co Jonathani walekele Devidi ngwendi: “Imene kukala cilika ca kutenama kwa ngonde, co bakakutonda, mwafwa citwamo cobe cikapwa ca mupulungwa. 19 Indele bakakutondoni manene. Unapande kwija na kubanda kuno kuwabandele lije litangwa na kukala kuyehi neli limanya. 20 Co njikasha mikili itatu ku mutambela umo walyo ngwe uje asha cuma cimo. 21 Njikatuma muka-kunjipangela na kumuleka ngwange, ‘Ya ukatonde ije mikili.’ Nga njimuleka ngwange, ‘Tala! Mikili ili ku mutambela ou, yambate,’ co wasa kwija, mwafwa njilisinga hali Yehova Njambi wa kuyoya ngwange oho co byuma bili mwamubwa, kuwesi mu bushonde. 22 Oloni nga njimuleka ngwange, ‘Tala! Mikili ili halutwe lwobe,’ co tewa, mwafwa oho co Yehova ashaka ngwendi uye kweka. 23 Co kutalesa ku lizibasano litunalingi mukati ketu, Yehova akale netu myaka yoshe.”
24 Ngeci, Devidi wabandele mu shwata. Litangwa lya cilika ca kutenama kwa ngonde mulyetele, mwene watumamene ha citwamo cendi mangana alye byakulya. 25 Mwene watumamene ha citwamo cendi ca ku cibumbe ngwe mwa simbu yoshe. Jonathani walitalele nendi, co Abina watumamene kumukulo wa Saulu, oloni mwela wa Devidi wapwile wa mupulungwa. 26 Saulu kendekele byoshe-byoshe lije litangwa, mwafwa walyendekesele ngwendi: ‘Kuli bimo binalingiwa bije binamujwalesa. Eyo, njakulahela napu wa kujwala.’ 27 Co litangwa lyateleko munima ya cilika ca kutenama kwa ngonde, citwamo ca Devidi anga capwile ca mupulungwa. Ngeci, Saulu wehwile munendi Jonathani ngwendi: “Bika binonowesa muna Jesi kwija ku cakulya izau na lelo?” 28 Jonathani wakumbulwile Saulu ngwendi: “Devidi nanjilambelelele ngwendi njimutabese aye ku Betelehema. 29 Nanjilekele ngwendi, ‘Shukulu-kambu njitabese njiye, mwafwa naanga yetu ili na kwana mulambu mu nganda, co ndolome yange nanjisana. Ngeci, nga cakubwasa, njitabese njiye njikamone bandolome bange.’ Mukemwo kezile ku mesa ya mwene.” 30 Ngeci, Saulu walubalelele Jonathani, co wamulekele ngwendi: “Obe muna munakazi uje wapwa muka-kutengulukila, kuma usinganyeka ngwobe kunjizibuka ngwange unangula kwimanena muna Jesi, na kulikokela shwamwa yobe babenya na kuzibisa nyoko shwamwa ndi? 31 Cakama lika muna Jesi ali na kuyoya hano hasi, yobe kuuzama hamolika na bumwene bwobe. Ngeci tuma munu hano bene akamunene, mwafwa napande kutsa.”
32 Oloni Jonathani wehwile ishe Saulu ngwendi: “Bika byanapande kutsila? Nalingi bika?” 33 Co Saulu wamwashele likunga mangana amutsiye. Ngeci, Jonathani wazibukile ngwendi ishe washakele bene kutsiya Devidi. 34 Oho bene Jonathani wakatukile ku mesa oku nalubala manene, co kalile byakulya byoshe-byoshe lije litangwa lyateleko kutunda ha kutenama kwa ngonde, omwo walubalele mwafwa ya Devidi, co lalo ishe wamuzibisile shwamwa.
35 Mutondo, Jonathani waile mu shwata kukaliwana na Devidi kwesekesa nomu mubalizibasanenene, co waile hamo na muka-kumupangela wa mukwenje. 36 Walekele muka-kumupangela ngwendi: “Shatuka ukatonde mikili injasha.” Muka-kumupangela washatukile, co Jonathani washele mukili kulutwe lwendi. 37 Muka-kumupangela mwetele ha mwela hashele mukili, Jonathani wamutambekelele ngwendi: “Mukili uli halutwe lwobe!” 38 Jonathani watambekelele muka-kumupangela ngwendi: “Zambula! Ambata bwasi! Keti wishwale!” Co muka-kumupangela wambatele ije mikili na kwiluka kuli shukulu yendi. 39 Muka-kumupangela kazibukile byakele na kulingiwa. Jonathani na Devidi lika bakebo babizibukile. 40 Jonathani wanene bitwa byendi kuli muka-kumupangela na kumuleka ngwendi: “Ya, bitwale mu nganda.”
41 Muka-kupangela Jonathani mwaile, Devidi wajombolokele mu mwela wa hayehi ku mbwela.* Co watsikamene na kukulamena hasi lutatu. Balitsembele na kulila, oloni Devidi ikeye walilile manene. 42 Jonathani walekele Devidi ngwendi: “Ya mu kwoloka, mwafwa tunalisingi mu lizina lya Yehova ngwetu, ‘Yehova apwe mukaleho mukati kobe nange na mukati ka bana* bobe na bana* bange myaka yoshe.’”
Ngeci, Devidi waile, co Jonathani welukile mu nganda.