Mukanda Wakulibanga wa Samwele
26 Mu kwita kwa simbu, banalume ba mu Zifu bezile kuli Saulu ku Gibea na kumuleka ngwabo: “Devidi nabanda ha lilundu lya Hachila lije linalitala na Jeshimoni.” 2 Ngeci, Saulu wakatukile na kuya mu mambo ya Zifu oku ali na banalume 3,000 bangwile mu Isalele mangana bakashakezeke Devidi mu mambo ya Zifu. 3 Saulu watungile cilombo kumukulo wa ngila ha lilundu lya Hachila lije linalitala na Jeshimoni. Ha simbu ei Devidi wakele na kuyoya mu mambo, co wazibile ngwabo Saulu namukaba mu mambo. 4 Ngeci, Devidi watumine tunenga mangana bakamone indi cili bene Saulu naija. 5 Kutundaho, Devidi waile ku mwela kwatungile Saulu cilombo, co Devidi wamwene halalele Saulu na Abina muna Nele, ntwama wa maswalale. Saulu walalele hakati ka cilombo, co maswalale boshe bamuzengelekele. 6 Co Devidi wehwile Ahimeleki wa Kahiti na Abishai muna Zeluya, ndolome ya Joabu ngwendi: “Iya aya nange mu cilombo ca Saulu?” Abishai wakumbulwile ngwendi: “Njiya nobe.” 7 Ngeci, Devidi na Abishai baile kuli aba maswalale butsiki, co bakawanene Saulu nalala hakati ka cilombo oku likunga lyendi linashimbama mu libu kuyehi na mutwe wendi. Abina na maswalale boshe balalele oku banamuzengeleka.
8 Co Abishai walekele Devidi ngwendi: “Lelo Njambi naka citozi cobe mu liboko lyobe. Ngeci, njitabese njimutibe likunga lumolika limupulyasane kuketa na hasi, co kunjimutibi lubali.” 9 Oloni Devidi walekele Abishai ngwendi: “Keti umulinge mwamubi. Mwafwa iya asa kujundula liboko lyendi na kulwisa wakubwabesa wa Yehova na kutwalelelaho kujeneka kukala na mulonga?” 10 Devidi watwaleleleleho kwendeka ngwendi: “Njilisinga hali Yehova wa kuyoya ngwange Yehova babenya amutsiya, nambe hamo litangwa limo atsa ngwe mubakatsila banu boshe, nambe hamo akaya ku nzita na kukatsilako. 11 Kunjasa kulinga cuma ca cifweci ku mesho a Yehova. Kunjasa kujundula liboko lyange na kulinga mwamubi wakubwabesa wa Yehova! Ngeci, ambata likunga lili kuyehi na mutwe wendi na njaba ya mema tuye.” 12 Co Devidi wambatele likunga na njaba ya mema bije byakele kumukulo wa mutwe wa Saulu, co baile. Naumo wahi wabamwene nambe kunanguka bibalingile nambe kunyangumuka, omwo boshe balalele, mwafwa tulo twakama twa kutunda kuli Yehova twabakwatele. 13 Co Devidi waile mu sambwa na kukemana halako helu lya munkinda, kuseza kanunda mukati kabo.
14 Devidi watambekelele maswalale na Abina muna Nele ngwendi: “Abina, kuukumbulula?” Abina wakumbulwile ngwendi: “Yobe iya, yobe uli na kutambekela mwene?” 15 Devidi walekele Abina ngwendi: “Kuma keti u munalume ndi? Iya nalifu nobe mu Isalele? Co bikoni kuwanyungililile shukulu yobe mwene? Mwafwa umo wa maswalale nezile mangana akutsiye mwene, shukulu yobe. 16 Biunalingi keti bikebyo. Njilisinga hali Yehova wa kuyoya ngwange unapande kutsa, mwafwa kuwanyungililile shukulu yobe, wakubwabesa wa Yehova. Tala-tala kumukulo wobe! Likunga lya mwene na njaba yendi ya mema bije binakele kuyehi na mutwe wendi bili kuli?”
17 Saulu wanangukile lijwi lya Devidi, co wendekele ngwendi: “Lijwi lyobe olyo Devidi munange?” Devidi wakumbulwile ngwendi: “Lijwi lyange mwane, shukulu yange mwene.” 18 Watwaleleleleho kwendeka ngwendi: “Mwafwa bika shukulu yange ali na kusheka ngamba yendi? Bika binjinalingi, co mulonga muka unjinabulumuna? 19 Shukulu yange mwene, shukulu-kambu tolilila ku majwi a ngamba yobe. Nga Yehova ikeye nakutumu ngwendi unjilwise, co atambule* bwana bwange bwa binona. Oloni nga banu bakebo banakushongangeya, co banapu ba kusinga kuli Yehova, mwafwa bananjitundisa ku buswana bwa Yehova lelo, omwo banendeka ngwabo, ‘Ya ukapangele binjambi beka!’ 20 Ngeci, keti witile maninga ange hasi kulako na Yehova, mwafwa mwene wa Isalele ali na kutonda njandu ngwe uje ali na kusheka likokwa ha minkinda.”
21 Co Saulu wendekele ngwendi: “Njinalingi bubi. Iluka munange Devidi. Kunjikulingi mwamubi lalo, mwafwa unamono buyoye bwange kupwa bwa seho lelo. Eyo, binjinalingi bya bulema, co njinasebuka mweka.” 22 Devidi wakumbulwile ngwendi: “Likunga lya mwene eli. Umo wa bakwenje aije akulyambate. 23 Yehova ikeye elwisila munu na munu kwesekesa na kusungama na kulongwa kwendi, mwafwa lelo Yehova nakwana mu liboko lyange, oloni kunjashakele kujundula liboko lyange na kulinga mwamubi wakubwabesa wa Yehova. 24 Tala! Ngecilika mwonyo* wobe muunapu wa seho lelo kuli yange, mwonyo* wange nawo upwe wa seho mu mesho a Yehova, co anjamene ku tuyando twange twoshe.” 25 Saulu wakumbulwile Devidi ngwendi: “Pwa wa kubezika, munange Devidi. Cili bene ulinga byuma byakama, co biulinga bibwaha bene.” Kutundoho, Devidi waile, co Saulu welukile ku njibo yendi.