Mukanda Wamucibali wa Samwele
10 Mu kwita kwa simbu, mwene wa Baamoni watsile, co munendi Hanuni wamwingile na kupwa mwene. 2 Co Devidi wendekele ngwendi: “Njimwesa cizemo cije kucesi kutenguluka kuli Hanuni muna Nahashi ngwe mwanjimweselele ishe cizemo cije kucesi kutenguluka.” Ngeci Devidi watumine bangamba bendi mangana bakamuzembeleke mwafwa ya kutsisa ishe. Oloni bangamba ba Devidi mubetele mu lifuti lya Baamoni, 3 bamyata ba Baamoni balekele shukulu yabo Hanuni ngwabo: “Kuma usinganyeka ngwobe Devidi nasingimika isho mwanatumu baka-kukuzembeleka ndi? Kuma Devidi kabatumine mangana baije na kutondesesa mu nganda na kuinenga mangana baifungulule ndi?” 4 Ngeci Hanuni wambatele bangamba ba Devidi na kutehula mutamba umo wa minjezi yabo, co watetele bizalo byabo ha matako kuseza lika ca kwilu. Co wabalekele ngwendi baye. 5 Devidi mubamulekele ebi byuma, oho bene watumine banu mangana babasheshe mwafwa aba banalume babazibisile manene shwamwa, co mwene wabalekele ngwendi: “Acikaleni mu Jeliko kweta noho haikolela minjezi yeni asina mwiluka.”
6 Mu kwita kwa simbu, Baamoni banangukile ngwabo banapu bitozi kuli Devidi. Ngeci, Baamoni batumine banu bakakumune baka-Siria ba mu Bethi-lehobu, na baka-Siria ba mu Zoba, kulumbununa maswalale ba kwenda ha mendi 20,000 na mwene wa Maaka uje wakele na banalume 1,000, na kukumuna banalume 12,000 ba mu Ishitobu.* 7 Devidi mwazibile ebi byuma watumine Joabu na cibunga coshe ca maswalale hamolika na baka-kulwa bendi ba nzili manene. 8 Co Baamoni baile na kulikwalaleka ku cikolo ca nganda mu kulibwahesela kulwa, oku baka-Siria ba mu Zoba na ba mu Lehobu hamolika na Ishitobu* na Maaka bali abolika mu cana.
9 Joabu mwamwene ngwendi maswalale ba bitozi bendi bakele na kwija na kumulwisa kulutwe na kunima, wangwile maswalale bamo mu Isalele baje bazibukile manene kulwa na kubalingisa balibwahesele kulwa na baka-Siria. 10 Banalume bakwabo boshe wabanene kuli* ndolome yendi Abishai abatwamenene mangana balibwahesele kulwa na Baamoni. 11 Co wendekele ngwendi: “Nga umona ngwobe baka-Siria bali na kunjihyana, co wije na kunjikwasa, oloni nga njimona ngwange Baamoni bali na kukuhyana, co njija na kukukwasa. 12 Tunapande kukanyama na kupwa ba kusimpa mwafwa ya banu betu na binganda bya Njambi yetu, co Yehova alinga byamona ngwendi byabibwa.”
13 Ngeci, Joabu na banalume bakele nabo bashwenene baka-Siria mangana babalwise, co baka-Siria batewele. 14 Baamoni mubamwene ngwabo baka-Siria banatewe, batewele kuli Abishai na kukobela mu nganda. Ngeci Joabu welukile kutunda na kulwisa Baamoni, co waile ku Jelusalema.
15 Baka-Siria mubamwene ngwabo Baisalele banabahyana, balikungulwile lalo. 16 Ngeci Hadadiza watumine banu bakambate baka-Siria ba mu cikulo ca Ndonga,* co bezile ku Helamu, co Shobaki ntwama wa maswalale ba Hadadiza ikeye wakele na kubatwamenena.
17 Devidi Mubamulekele ebi byuma, oho bene wakungulwile maswalale boshe ba Isalele na kujabuka Jodani, co bezile ku Helamu. Baka-Siria balikungulwile mangana baliwane na Devidi, co balwile nendi. 18 Oloni baka-Siria batewele Baisalele, co Devidi watsiile maswalale 700 baje balondele mu matemba na maswalale ba baka-Siria 40,000 baje balondele ha tubalu na kutsiya Shobaki ntwama wa maswalale babo, co watsililile haje bene. 19 Bimyene boshe baje bapwile bangamba ba Hadadiza mubamwene ngwabo Baisalele babahyanene, oho bene balingile lizibasano lya kwoloka na Baisalele, co Baisalele bashangumukile kubayula, co baka-Siria batewele kukwasa lalo Baamoni.