Mukanda Wamucibali wa Samwele
11 Ku mashangumukilo a mwaka,* ha simbu ibakele na kuya bimyene ku binzita, Devidi watumine Joabu na bangamba bendi* na maswalale boshe ba Isalele kukanyongesa Baamoni, co bazengelekele Laba oku Devidi nasala mu Jelusalema.
2 Litangwa limo mangwezi, Devidi wendukile ha mwela wendi na kuya na kwendangana ha ciluli ca njibo* yendi. Mwakele ha ciluli wamwene munakazi uje wakele na kujwela, co owo munakazi wapwile wamubwa manene. 3 Devidi watumine munu umo akehule bya uje munakazi, co mwelukile wendekele ngwendi: “Ngwetu Bati-sheba uje muna Eliamu munakazi wa Uliya wa Kahiti?” 4 Co Devidi watumine tutumwa mangana bakamushake. Ngeci wezile kuli ikeye, co walilalele nendi. (Ebi byalingiwile ha simbu yakele na kulijelesa ku kujwala kwendi.*) Kutundaho welukile ku njibo yendi.
5 Uje munakazi wakele na cikute, co watumine muzimbu kuli Devidi ngwendi: “Njili na cikute.” 6 Devidi mwazibile ngoco, watumine muzimbu kuli Joabu ngwendi: “Leka Uliya wa Kahiti aije kuno.” Ngeci Joabu watumine Uliya kuli Devidi. 7 Uliya mwetele, Devidi wamwihwile mwendukilile Joabu, nomu mubendukilile maswalale nomwo muyakele na kwendela nzita. 8 Kutundaho Devidi walekele Uliya ngwendi: “Ya ku njibo yobe ukahwime.”* Uliya mwatundile mu njibo ya mwene, mwene wamutuminine bwana.* 9 Oloni Uliya walalele ku cikolo ca njibo ya mwene hamolika na bangamba bakwabo boshe ba shukulu yendi, co kaile ku njibo yendi. 10 Ngeci Devidi bamulekele ngwabo: “Uliya kaile ku njibo yendi.” Devidi mwazibile ngoco wehwile Uliya ngwendi: “Ngwetu unende bungenzi yobe? Bikoni kuwaile ku njibo yobe?” 11 Uliya wakumbulwile Devidi ngwendi: “Cikasha cili mu mapapela hamolika na banu ba mu Isalele na ba mu Juda, co shukulu yange Joabu na bangamba ba shukulu yange banatungu cilombo hashandangala. Co yangeco njiye ku njibo yange na kukalya na kunwa na kulilala na munakazi wange ndi? Njilisinga hali yobe ngwange kunjilingi ngoco!”
12 Co Devidi walekele Uliya ngwendi: “Kala kuno na lelo, imeneco njikusununa.” Ngeci Uliya wakele mu Jelusalema lije litangwa na litangwa lyateleko. 13 Devidi watumine bamo bakamusane mangana akulile hamo nendi na kunwa, co wamupendesele. Oloni mangwezi waile na kulala hamolika na bangamba ba shukulu yendi, co kaile ku njibo yendi. 14 Mutondo Devidi wasonekelele Joabu mukanda, co wawanene Uliya mangana amwitikewo. 15 Omwo mu mukanda wasonekelemo ngwendi: “Aka Uliya kulutwe kuje kuinamena manene nzita, co ilukeni munima na kumuseza endilika mangana bamutsiye.”
16 Joabu wakele na kukengesesa mwamubwa nganda, co wakele Uliya haje hamwene ngwendi hakele baka-kulwa ba bitozi ba nzili. 17 Banalume ba mu nganda mubatuhukilemo na kwija na kulwisa Joabu, bangamba bamo ba Devidi batsile, co Uliya wa Kahiti nendi wapwile umo wa baje batsile. 18 Co Joabu walekele Devidi muzimbu woshe wa kukundama ku nzita. 19 Washikile katumwa ngwendi: “Muukamanesa kuleka mwene muzimbu woshe wa nzita, 20 mwene nasa kukalubala na kwendeka ngwendi, ‘Bika bimunakalwililile kuyehi-yehi na nganda? Kuma te kumuzibuka ngweni banasa kumyasha mikili oku bali helu lya cibumbe ndi? 21 Iya watsiile Abimeleki muna Jelubesheti? Kuma keti munakazi uje wamwashele limanya kutundilila helu lya cibumbe na kumulingisa atsile ku Thebezi ndi? Bika bimunashwenenene kuyehi-yehi na cibumbe?’ Yobeco ukendeke ngwobe, ‘Ngamba yobe Uliya wa Kahiti nendi natsi.’”
22 Ngeci katumwa waile na kukaleka Devidi byoshe byamushikile Joabu ngwendi akamuleke. 23 Katumwa walekele Devidi ngwendi: “Maswalale babo banakele na nzili kututubakana, co banezile na kutulwisila hashandangala, oloni tunabalwisile na kubelwisa ku cikolo ca nganda. 24 Baka-kwasha mikili banakele na kwasha bangamba bobe mikili kutundilila helu lya cibumbe, co bangamba ba mwene bamo banatsi, ngamba yobe Uliya wa Kahiti nendi natsi.” 25 Co Devidi walekele uje katumwa ngwendi: “Ukaleke Joabu ngwobe: ‘Ei ñanda keti ikushotese mbunge, mwafwa mukwale ukali munu woshe-woshe. Lwisa manene oyo nganda na kuifungulula.’ Co ukamukanyamese.”
26 Munakazi wa Uliya mwazibile ngwabo munalume wendi Uliya natsi, washangumukile kumulila. 27 Simbu ya kulila muyahwile lika, Devidi watumine bamo bakamwambate na kumunena ku njibo yendi, co wapwile munakazi wendi, co wamukitilile mwana wa munalume. Oloni byuma byalingile Devidi kubyazibisile Yehova kubwaha.