Mukanda Wamucibali wa Samwele
12 Ngeci Yehova watumine Nathani kuli Devidi. Waile kuli ikeye na kukamuleka ngwendi: “Kwakele banalume babali mu nganda imo, umo wapwile wa kufuka mukwabo wapwile kahutu. 2 Owo munalume wa kufuka wakele na bimanga babangi na bingombe babangi, 3 oloni owo munalume wa kahutu ikeye nabimo byahi byakele nabyo kubanga manga wa lwabo yalandele. Wamunyungile, co wamulelelele hamo na bana bendi ba banalume. Wakele na kulya ku tubyakulya twatundondo twakele natwo na kunwa mu nganja yendi na kulala mu maboko endi. Wapwile ngwe munendi wa munakazi. 4 Mu kwita kwa simbu, owo munalume wa kufuka watambwile mungenzi, oloni kambatele manga yendi nambe ngombe yendi mangana abwahesele owo wamwendelele. Wambatele manga wa kahutu na kumubwahesela mungenzi wendi.”
5 Ngeci Devidi walubalelele manene ou munalume na kuleka Nathani ngwendi: “Njilisinga hali Yehova wa kuyoya ngwange owo munalume napande kutsa! 6 Co lalo napande kufweta bimanga bawana, mwafwa nalingi cuma cacibi manene, co kamwesele mema ku mbunge.”
7 Co Nathani walekele Devidi ngwendi: “Yobe bene owo munalume! Yehova Njambi ya Isalele ngwendi: ‘Yange njakubwabesele kupwa mwene wa Isalele na kukwamena kuli Saulu. 8 Njakwanene njibo ya shukulu yobe na kukwana banakazi bendi, co lalo njakwanene bakunjibo ya Isalele na bakunjibo ya Juda. Oloni nga ebi byapwile byabindondo, njalibwaheselele kukubwezelelako na bikwabo byabingi. 9 Bika biunombwanesela lijwi lya Yehova na kulinga byuma byabibi mu mesho endi? Unatsii Uliya wa Kahiti na mukwale! Kutundaho unambata munakazi wendi munima ya kumutsiya na mukwale wa Baamoni. 10 Ngeci mukwale kuutundu mu njibo yobe, mwafwa unanjombwanesa muunambata munakazi wa Uliya wa Kahiti kupwa munakazi wobe.’ 11 Yehova nendeka ngwendi: ‘Njikunenela bukalu buje butundilila mu njibo yobe, co njana banakazi bobe kuli munalume weka oku unatalelela, co alilala nabo mutanya-mwelu. 12 Nameme yobe walingile ngoco ku bushweke, yange njilinga ebi byuma ha mesho a Baisalele boshe mutanya-mwelu.’”
13 Devidi walekele Nathani ngwendi: “Njinabiisila Yehova.” Nathani wamukumbulwile ngwendi: “Yehova nendi nakukonekela. Ngeci kuutsi. 14 Nameme ngoco, kulingila unashaula manene Yehova muunalingi ebi byuma, owo munobe nasemuka atsa.”
15 Kutundaho Nathani waile ku njibo yendi.
Co Yehova walingisile muna Devidi uje yakitile na munakazi wa Uliya abinje. 16 Devidi walambelelele Njambi wa busunga ngwendi akangwise mwanike. Devidi walibindikile kulya, co wakele na kukobela mu mulili wendi na kulala hasi butsiki. 17 Ngeci bakulunu ba ku njibo yendi bamwimanenene na kumushongangeya ngwabo enduke, oloni wabyanene, co kakele na kulya nabo. 18 Ha litangwa lya bu 7, mwanike watsile, oloni bangamba ba Devidi bazibile lyoba kumuleka ngwabo mwanike natsi. Bendekele ngwabo: “Mwanike te aciyoya tunesekele kusimutwiya nendi, oloni nabyanene kututolilila. Co bati nga tumuleka ngwetu mwanike natsi? Nasa kulinga cuma cacibi manene.”
19 Devidi mwamwene bangamba bendi bali na kuliyebetela, wanangukile ngwendi mwanike natsi. Devidi wehwile bangamba bendi ngwendi: “Mwanike natsi ndi?” Bamukumbulwile ngwabo: “Eyo natsi.” 20 Ngeci Devidi wendukile mu libu. Wakatanene na kulikwita mazi na kuzala bizalo byeka, co waile ku njibo ya Yehova na kukatsikama. Kutundaho welukile ku njibo* yendi na kukalomba ngwendi bamunenele byakulya, co walile. 21 Bangamba bendi bamwihwile ngwabo: “Bika biunalingila ngacije? Mwana mwanakele na kuyoya unalibindikile kulya na kutwalelelaho kulila, oloni mwanatsi unenduka na kulya byakulya.” 22 Wabakumbulwile ngwendi: “Mwana mwanakala na kuyoya njalibindikile kulya na kutwalelelaho kulila, mwafwa njalyendekesele ngwange, ‘Iyajo azibuka, hamo Yehova anjitetela na kukangwisa munange.’ 23 Co mwanatsi, bika lalo binjilibindikila kulya? Kuma njasa kumwilwisa ndi? Yange tangwa njikamukaba, oloni ikeye keluka kuli yange.”
24 Co Devidi wazembelekele munakazi wendi Bati-sheba. Waile kuli ikeye na kulilala nendi. Mu kwita kwa simbu, wakitile mwana wa munalume, co Devidi wamulukile ngwendi Solomoni.* Co Yehova wamuzemene, 25 co lalo watumine kapolofweto Nathani akamuluke lizina ngwendi Jedadaya,* mwafwa ya Yehova.
26 Joabu watwaleleleleho kulwisa nganda ya Laba ya Baamoni, co wafungulwile nganda ya bumwene. 27 Co Joabu watumine tutumwa kuli Devidi mangana bakamuleke ngwabo: “Njinalwisi Laba na kufungulula nganda ya mema.* 28 Ngeci, kungulula maswalale boshe banasalako mangana wakulwise ei nganda na kuifungulula. Keti ngoconi njiifungulula, co banu bashangazala yange.”
29 Ngeci Devidi wakungulwile maswalale boshe na kuya ku nganda ya Laba na kukailwisa, co waifungulwile. 30 Co washulwile Maukamu cilongo ku mutwe. Bulemu bwaco bwapwile talenti* imo ya goudi, co lalo cakele na mamanya a seho, co bacizikile Devidi ku mutwe. Wambatele lalo na byuma byabingi bibapukwile mu nganda. 31 Co wambatele banu bakelemo na kubana bipangi bya kusaha mamanya na kupangesa bikwata bya bikubo bya kubambuka, na bingimbu, na kupanga masitina. Ebi bikebyo byalingile ku binganda byoshe bya Baamoni. Mamaneselelo Devidi na maswalale boshe belukile ku Jelusalema.