Mukanda Wamucibali wa Samwele
16 Devidi mwasikumukile kamandondo kutunda helu lya munkinda, Ziba muka-kupangela Mefibosheti wezile na kuliwana nendi oku ali na bidonki* babali, co obo bidonki te banabatwiki mikasha ya makende 200, na makende 100 a bushuka bwa binyu bwa kuma, na makende 100 a bushuka bwa mu ntondwe,* na njaba yakama ya binyu. 2 Co mwene wehwile Ziba ngwendi: “Bika biunanenela ebi byuma?” Ziba wakumbulwile ngwendi: “Bidonki njinabanenela bakunjibo ya mwene mangana balondeho. Makende na bushuka bwa mu ntondwe bya bakwenje mangana balye, binyuco bya baje bajuka mu mambo mangana banwe.” 3 Co mwene wendekele ngwendi: “Indi muna* shukulu yobe ali kuli?” Ziba wakumbulwile mwene ngwendi: “Ali mu Jelusalema, mwafwa nendeka ngwendi, ‘Lelo bakunjibo ya Isalele banjilwisila bumwene bwa tate.’” 4 Co mwene walekele Ziba ngwendi: “Tala! Byuma byoshe bya Mefibosheti hano byobe.” Ziba wakumbulwile ngwendi: “Njitsikama halutwe lwobe. Twalelelaho kunjitetela, obe shukulu yange mwene.”
5 Mwene Devidi mwetele mu Bahulimu, munalume umo wa mu naanga ya Saulu wa lizina lya Shimei muna Gela, wezile kuli ikeye oku ali na kumukuwilila bisingo. 6 Wakele na kwasha Devidi mamanya hamolika na bangamba boshe ba Mwene Devidi hamolika na banu boshe na banalume ba kukanyama baje bakele ku liboko lyendi lya cilyo na ku liboko lyendi lya cimoshwe. 7 Shimei mwakele na kwendeka mandamba, wakele na kwendeka ngwendi: “Yokwo, yokwo, obe muka-kwitila maninga! Obe munalume wa kujeneka seho! 8 Yehova nakwilwisila mulonga wa maninga mwafwa ya bakunjibo ya Saulu, baje baunayulu mu mwela wabo kupwa mwene, oloni hano Yehova ana bumwene mu liboko lya munobe Abisalomu, co uliwana na bukalu mwafwa u muka-kwitila maninga!”
9 Co Abishai muna Zeluya walekele mwene ngwendi: “Ou katali wa kutsa ashawila bika yobe shukulu yange mwene? Njitabese njikamutape mutwe.” 10 Oloni mwene wendekele ngwendi: “Bika binamiwana eni bana ba Zeluya? Mweceleni anjisinge, mwafwa Yehova namuleke ngwendi, ‘Singa Devidi!’ Co iya napande kumwihula ngwendi, ‘Bika biuli na kulingila ebi?’” 11 Kutundaho, Devidi walekele Abishai na bangamba bendi boshe ngwendi: “Cinonwa munange, munange wa kulikitila ali na kushakezeka mwonyo* wange, co batyoni Kabenjamini! Mweceleni anjisinge mwafwa Yehova ikeye namuleke ngwendi alinge ngoco! 12 Hamo Yehova amona kayando kange, co Yehova anjana bibezikiso kwingisa mu bisingo byananjisingi lelo.” 13 Co Devidi na banu bakele nendi batwaleleleleho kwenda mu ngila oku Shimei ali na kukaba Devidi. Wakele na kwenda kumukulo wa munkinda oku ali na kubasinga na kubasha mamanya na kubashawila libu.
14 Mamaneselelo, mwene na banu boshe bakele nendi betele kubakele na kuya oku banajuka, co bahwimine.
15 Co Abisalomu na banalume ba mu Isalele boshe baje bakele na kumukabangeya betele mu Jelusalema, co Ahithofeo wakele nendi. 16 Hushai wa Kaaki kabusamba ka* Devidi mwezile kuli Abisalomu, walekele Abisalomu ngwendi: “Mwene ayoye myaka yaingi! Mwene ayoye myaka yaingi!” 17 Ngeci Abisalomu wehwile Hushai ngwendi: “Kuma eci cikeco cizemo cije kucesi kutenguluka ciumwesa kabusamba kobe ndi? Bika kuwaile na kabusamba kobe?” 18 Hushai wakumbulwile Abisalomu ngwendi: “Embwe, yange njili ku mutamba wa munu yanangula Yehova, naba banu, na banalume ba mu Isalele boshe. Ikeye injikala nendi. 19 Njicendekamo lalo ngwange, Iya injinapande kupangela? Kuma kunjapandele kupangela munendi ndi? Njikupangela ngwe munjinapangelele isho.”
20 Co Abisalomu walekele Ahithofeo ngwendi: “Njinangule. Bika bitunapande kulinga?” 21 Co Ahithofeo walekele Abisalomu ngwendi: “Lilale na banakazi ba isho bakwabo banaseze ngwendi banyunge njibo.* Baisalele boshe baziba ngwabo unalipwisa citozi ca isho, co baje bali na kukukundwiya bakukundwiyoni manene.” 22 Ngeci bakelele Abisalomu tenti helu lya ciluli, co Abisalomu walilalele na banakazi ba ishe bakwabo ha mesho a Baisalele boshe.
23 Mu matangwa aje, binangulo bya Ahithofeo bakele na kubimona ngwabo bitunda kuli Njambi wa busunga. Devidi na Abisalomu mukemwo mubakele na kumwena binangulo byoshe bya Ahithofeo.