Mukanda Wamucibali wa Samwele
17 Ahithofeo walekele Abisalomu ngwendi: “Njitabese njangule banalume 12,000 mangana tukabe Devidi butsiki. 2 Njimuila ha simbu yanajuka na kujeneka nzili,* co njikamwaka mu ciluwaluwa. Banu boshe bali nendi bakatewa, co njikatsiya lika mwene. 3 Co njikelwisa banu boshe kuli yobe. Kwiluka kwa banu boshe kunemana ha byuma bilingiwa ku munu iuli na kushakezeka, co banu boshe bakala mu kwoloka.” 4 Abisalomu na bakulunu ba Isalele boshe bamwene ngwabo ebi biyongola binasungama.
5 Oloni Abisalomu wendekele ngwendi: “Acisaneniko Hushai wa Kaaki mangana nendi tuzibe byatuleka.” 6 Ngeci Hushai wezile kuli Abisalomu, co Abisalomu wamulekele ngwendi: “Eci cikeco cinangulo canatwana Ahithofeo. Kuma tulinge byanatuleke ndi? Nga embwe, co tuleke bitunapande kulinga.” 7 Hushai walekele Abisalomu ngwendi: “Cinangulo ca Ahithofeo ha simbu ino keti cacibwa.”
8 Hushai watwaleleleleho kwendeka ngwendi: “Uzibuka mwamubwa ngwobe isho na banalume bali nabo bapwa ba kukanyama, co lalo banatenuka ngwe mbeya uje nazimbalesa bana mu shwata. Co lalo isho wapwa muka-kulwa, ngeci kalala kubalala banu butsiki. 9 Simbu ino nabanda mu bwina bumo bwa mu limanya, co nga ikeye abanga kutulwisa, baje bazibako bendeka ngwabo, ‘Banu baje bali na kukaba Abisalomu banabahyana!’ 10 Nameme munalume wa kusimpa wa mbunge ya kulifwa na ya ndumba alijujukila mwafwa Baisalele boshe bazibuka ngwabo isho wapwa wa kukanyama, co lalo banalume bali nendi bapwa ba kusimpa. 11 Cinangulo cange eci: Kungulwila Baisalele boshe kuli yobe, kutunda ku Dani kweta ku Bele-sheba, babangi manene ngwe mushekesheke wa ku kalunga-ndonga, co unapande kubatwamenena ku nzita. 12 Tukamulwisa kwoshe-kwoshe kutukamuwana, co tukamujemukila ngwe lime mulikawila hasi, co naumo wahi hakati kabo akoboka, ipwe ikeye nambe banalume bali nendi. 13 Nga atewela mu nganda, Baisalele boshe bakambata mikole na kuya okwo ku nganda, co tukaikokela mu cingulunga kweta noho nambe limanya limo likasalaho lyahi.”
14 Ngeci Abisalomu na banalume boshe ba mu Isalele baje bakele nendi bendekele ngwabo: “Cinangulo ca Hushai wa Kaaki cacibwa kutubakana cinangulo ca Ahithofeo.” Mwafwa Yehova wayongwele kutanganesa cinangulo cacibwa ca Ahithofeo mangana ikeye Yehova anenele Abisalomu bukalu.
15 Kutundaho, Hushai walekele kapilistu Zadoki na kapilistu Abiatha ngwendi: “Eci cikeco cinangulo ca Ahithofeo kuli Abisalomu na bakulunu ba Isalele, co eci cikeco cinangulo cange. 16 Ngeci tumeni muzimbu kuli mwene bwasi-bwasi na kumuleka ngweni: ‘Keti ukale ku myaba* ya mu mambo butsiki bwa lelo, jabuka bwasi-bwasi, keti ngoconi mwene na banu boshe baje bali nendi babazilula.’”*
17 Jonathani na Ahimazi bakele ku Eni-rogeu, ngeci ngamba umo wa munakazi waile na kukabaleka, co baile na kuleka Mwene Devidi mwafwa kubashakele ngwabo kukale umo abamona mubakobela mu nganda. 18 Oloni mukwenje umo wabamwene, co wakalekele Abisalomu. Ngeci boshe babali batundilemo bwasi-bwasi na kuya ku njibo ya munalume umo mu Bahulimu uje wakele na lisima mu lilapa lyendi. Bakakobelele omwo mu lisima. 19 Co munakazi wa uje munalume wafwikile cimo ha kanwa kolyo lisima na kwakaho binona bya kupolola, co naumo wahi wazibukile byalingile. 20 Bangamba ba Abisalomu bezile ku njibo yowo munakazi na kumwihula ngwabo: “Ahimazi na Jonathani bali kuli?” Uje munakazi wakumbulwile ngwendi: “Banetile omu, co banataleselele ku ndonga.” Ngeci baje banalume baile na kubatonda, oloni kubabawanene, co belukile ku Jelusalema.
21 Baje banalume mubaile, Ahimazi na Jonathani batundile mu lisima mubabandele, co baile na kuleka Mwene Devidi. Bakamulekele ngwabo: “Katuka bwasi-bwasi ujabuke ndonga, mwafwa cinangulo ca Ahithofeo cinapu ca kukulwisa.” 22 Oho bene Devidi na banu boshe baje bakele nendi bakatukile na kujabuka Jodani. Mukwakile, naumo wahi wasaleleko uje kajabukile Jodani.
23 Ahithofeo mwamwene ngwendi cinangulo cendi kubacikabangeyeye, walondele ha donki na kuya ku njibo yendi, mu mbongi yendi. Mwamanesele kushika bakunjibo yendi, walishukikile.* Ngeci watsile, co bamutsindile ku bihilo bya bakukulwila bendi.
24 Devidi waile ku Mahanaimu, co Abisalomu na banalume ba mu Isalele boshe baje bakele nendi bajabukile Jodani. 25 Abisalomu wangwile Amasa kupwa ntwama wa maswalale kwinga mu mwela wa Joabu. Amasa wapwile muna munalume umo wa Kaisalele wa lizina lya Ithra yakitile kuli Abigeu muna Nahashi ndokazi ya Zeluya ina ya Joabu. 26 Baisalele na Abisalomu batungile cilombo mu mutambela wa Giliyadi.
27 Devidi mwetele lika mu Mahanaimu, Shobi muna Nahashi wa ku Laba ya Baamoni, na Makeya muna Amiele wa ku Lo-deba, na Bazilai muka-Giliyadi wa mu Logelimu, 28 banenele myela, malonga, bindeho bya buma, tiliku, mbali, fulawa, binona bya kwoca, miyati ibali ya makunde, binona bya kukanga, 29 buki, bata, bimanga na mazi a mabele.* Banenele byoshe ebi kuli Devidi na banu bakele nendi mangana balye, mwafwa bendekele ngwabo: “Banu banatsi njala na lihwila mu mambo, co lalo banajuka.”