Mukanda Wamucibali wa Samwele
18 Devidi watandele banalume bakele nendi na kubangwila bantwama ba maswalale 1,000 na bantwama ba maswalale 100. 2 Devidi watepele baje banalume mu bibunga bitatu. Cibunga cimo wacanene Joabu mangana acitwamenene. Cibunga cikwabo wacanene Abishai ndolome ya Joabu muna Zeluya mangana acitwamenene, co cibunga cikwabo wacanene Itai muka-Gathi mangana acitwamenene. Kutundaho, mwene walekele baje banalume ngwendi: “Nange njiya neni.” 3 Oloni bendekele ngwabo: “Kuwapandele kuya netu, mwafwa nga tukatewa, yetu kubakatwaka mbunge, co nameme bwingi bwetu tutse, na mbunge yabo yahiko mwafwa unapu hamo netu ba kupwa 10,000. Ngeci cibwaha manene nga ututumina bukwasi oku uli mu nganda.” 4 Mwene wabalekele ngwendi: “Njilinga byoshe-byoshe bimumona ngweni byabibwa.” Ngeci mwene wemanene kuyehi na cikolo ca nganda, co banalume boshe baile mu bibunga bya maswalale 100 na maswalale 1,000. 5 Co mwene washikile Joabu na Abishai na Itai ngwendi: “Mukanjilingile mwamubwa ou mukwenje Abisalomu.” Banalume boshe bazibileko mwene mwashikile aba bamyata kutalesa kuli Abisalomu.
6 Aba banalume baile mu shwata kukaliwana na Isalele, co nzita yakelelele mu shwata ya Efremu. 7 Bangamba ba Devidi bahyanene banu ba Isalele, co batsiile banu babangi lije litangwa. Batsiile banalume 20,000. 8 Nzita yajalakanene mu mutambela woshe. Co lalo ha litangwa lije, banu batsililile mu shwata bapwile babangi manene kutubakana baje babatsiile na mukwale.
9 Mamaneselelo, Abisalomu waliwanene na bangamba ba Devidi. Abisalomu walondele ha donki, co owo donki wetile mwisi ya minango ya kuzika ya muti umo wakama, co mutwe wa Abisalomu wasakamenene omwo mu minango, ngeci wanyengelelele mu bukambwila, oloni donki yalondele watwaleleleleho kuya. 10 Kwakele munu umo wamwene byakele na kulingiwa, co walekele Joabu ngwendi: “Tala! Njinamono Abisalomu ali na kunyengela ku muti umo wakama.” 11 Joabu wakumbulwile uje munalume wamunenelele muzimbu ngwendi: “Nga unamumono, bika kuwamutsiilile oho bene? Co ngwe njinabwahelela na kukwana bimbongo bya siuva 10 na mwiba.” 12 Oloni uje munalume walekele Joabu ngwendi: “Nambe unjane bimbongo bya siuva 1,000, kunjasa kujundula liboko lyange na kulinga mwamubi muna mwene mwafwa tunalizibilile mwene mwanashikile yobe na Abishai na Itai ngwendi, ‘Keti kukale munu alinga mwamubi mukwenje Abisalomu.’ 13 Ngwe kunjononokele mwene na kutsiya munendi, ngwe ei ñanda naizibi, co lalo yobe ngwe kuwanjamenene.” 14 Co Joabu wendekele ngwendi: “Uli na kunjibiisila lika simbu!” Ngeci wambatele tubikubo* tutatu twatundondo twa kushongomoka mu liboko na kuya ku muti wakama kwakele na kunyengela Abisalomu, co wakamutibiletwo ha mbunge oku aciyoya. 15 Co baka-kupangela Joabu 10 baje bamwambatelele bitwa, bezile na kumanusulula Abisalomu. 16 Joabu wohyesele limbinga, co baje banalume belukile ku kusheka Baisalele. Joabu wabatambekelele mangana becele kulwa. 17 Bambatele Abisalomu na kumumbila mu bwina bwakama mu shwata, co bamulundikile mutumbo wakama wa mamanya. Co Baisalele boshe batewelele ku binjibo byabo.
18 Abisalomu mwacikele na kuyoya walimikilile ngunzi mu Cingulunga ca Mwene mwafwa wendekele ngwendi: “Kunjesi na mwana wa munalume uje alingisa banu banuke lizina lyange.” Ngeci walukile oyo ngunzi lizina lyendi, co baitumbula ngwabo Cimweso ca Kwanukilaho Abisalomu kweta na lelo lino.
19 Ahimazi muna Zadoki wendekele ngwendi: “Tahi njishatuke njikaleke mwene ou muzimbu mwafwa Yehova namwakula mwamubwa mwanamupatula ku bitozi bendi.” 20 Oloni Joabu wamulekele ngwendi: “Lelo keti yobe utwala ou muzimbu. Wasa kukamuleka muzimbu litangwa lyeka, oloni lelo kuutwala ou muzimbu mwafwa muna mwene ikeye natsi.” 21 Joabu walekele Kakushi ngwendi: “Ya ukaleke mwene biunamono.” Ngeci owo Kakushi* wakulamene halutwe lwa Joabu, co waile oku ashatuka. 22 Ahimazi muna Zadoki walekele lalo Joabu ngwendi: “Mwoshe-mwoshe mubifwila byuma, shukulu-kambu njitabese njishatuke munima you Kakushi.” Nameme ngoco Joabu wamulekele ngwendi: “Bika biulisinina kushatuka munange okuni kukwesi muzimbu uutwala?” 23 Oloni watwaleleleleho kwendeka ngwendi: “Mwoshe-mwoshe mubifwila byuma njitabese njishatuke.” Ngeci Joabu wamulekele ngwendi: “Shatuka!” Co Ahimazi wangwangwasanene mu ngila ita mu mbongi ya Jodani, co kukapwa muje watubakanene Kakushi.
24 Devidi watumamene mukati ka bikolo bibali bya nganda, co muka-kunyunga walondele helu lya cikolo cije cakele ha cibumbe. Owo muka-kunyunga wandwile mesho, co wamwene munalume ali na kwija likalyendi oku ashatuka. 25 Ngeci owo muka-kunyunga watambekelele mwene na kumuleka muzimbu. Co mwene wendekele ngwendi: “Nga ali likalyendi, co kuli muzimbu umo waija na kwambulula.” Mwakele na kushwena muyehi, 26 muka-kunyunga wamwene munalume mukwabo ali na kwija oku ashatuka. Co ou muka-kunyunga watambekelele muka-kunyunga ku cikolo ngwendi: “Tala! Munalume mukwabo uje ali na kwija likalyendi oku ashatuka!” Mwene wendekele ngwendi: “Nendi ali na kunena muzimbu.” 27 Muka-kunyunga wendekele ngwendi: “Munalume injili na kumona uje natwama kulutwe, ali na kushatuka ngwe Ahimazi muna Zadoki.” Co mwene wendekele ngwendi: “Wapwa munu wamubwa, co akanene mizimbu yaibwa.” 28 Co Ahimazi watambekelele mwene ngwendi: “Byuma byoshe binabwaha!” Co wakulamenene hasi halutwe lwa mwene. Kutundaho wendekele ngwendi: “Yehova Njambi yobe bamushangazale mwafwa naka mu maboko obe banalume baje banakutengulukilile* yobe shukulu yange mwene!”
29 Nameme ngoco mwene wehwile ngwendi: “Kuma mukwenje Abisalomu ali mwamubwa ndi?” Ahimazi wamukumbulwile ngwendi: “Njinamwene banu baliuya manene Joabu mwanatumine ngamba yobe mwene, nange, oloni kunjazibukile bibanakala na kuliuila banu.” 30 Ngeci mwene wendekele ngwendi: “Ita oku, imana aha.” Co wetile kumukulo na kwimana oho hamulekele.
31 Co Kakushi wetele na kwendeka ngwendi: “Shukulu yange mwene atambule ou muzimbu: Lelo Yehova na kwakula mwamubwa mwanakupatula mu liboko lya boshe baje banakutengulukilile.” 32 Oloni mwene wehwile Kakushi ngwendi: “Kuma mukwenje Abisalomu ali mwamubwa ndi?” Kakushi wamukumbulwile ngwendi: “Bitozi ba shukulu yange mwene boshe, na boshe baje banakutengulukilile mangana bakulinge mwamubi bapwe ngwe owo mukwenje!”
33 Ou muzimbu wakele mwene mu citanga, co waile ha ciluli ca hakamwa ya cikolo, co mwakele na kwenda wakele na kulila, ngwendi: “Munange Abisalomu, munange, Abisalomu munange! Ngwe yange njinatsi kutubakana yobe, munange Abisalomu, kekange munange!”