Mukanda Wamucibali wa Samwele
19 Joabu bamulekele ngwabo: “Mwene ali na kulila munendi Abisalomu, co ali mu busiwa.” 2 Ngeci kuhyana kubahyanene* lije litangwa kwatengulukile kupwa busiwa ku banu boshe mwafwa bazibile ngwabo mwene ali na kulila munendi. 3 Lije litangwa banu belukile mu nganda oku banoloka kulu ngwe banu baje banazibi shwamwa mwafwa ya kutewa mu nzita. 4 Mwene walifwikile ku mesho, co watwaleleleleho kulila mu kutambeka ngwendi: “Munange Abisalomu, Abisalomu munange, tawe munange!”
5 Co Joabu waile kuli mwene ku njibo yendi na kukamuleka ngwendi: “Lelo unazibisa shwamwa bangamba bobe boshe baje banobola mwonyo wobe na myonyo ya bana bobe ba banalume na bana bobe ba banakazi na banakazi bobe na banakazi bobe bakwabo. 6 Wazema baje bakuzinda, co wazinda baje bakuzema, mwafwa unamwesa mwamubwa lelo ngwobe bamyata bobe na bangamba bobe kubesi na seho kuli yobe. Mwafwa njakulahela ngwange ngwe Abisalomu ikeye ali na kuyoya lelo, co yetu boshe ngwe tunatsi, ngwe cinabwaha kuli yobe. 7 Ngeci katuka, tuhuka ukazembeleke bangamba bobe, mwafwa njilisinga hali Yehova ngwange, nga kuui, naumo wahi asala nobe butsiki bwa lelo, co eci cipwa cuma cacibi manene kutubakana byuma byoshe byabibi biunaliwana nabyo kushwa ku bwanike bwobe.” 8 Ngeci mwene wakatukile, co wakatumamene ku cikolo ca nganda, co banu boshe babalekele ngwabo: “Mwene natumama ku cikolo ca nganda.” Ngeci banu boshe bezile kulutwe lwa mwene.
Oloni Baisalele bakwabo boshe* batewele, munu na munu watewelele ku njibo yendi. 9 Banu boshe mu miyati yoshe ya Isalele bakele na kulicokota ngwabo: “Mwene watwobwele ku bitozi betu, co watwobwele na ku Bafilistiya, oloni hano natewe mu lifuti mwafwa ya Abisalomu. 10 Co Abisalomu itunabwabesele ngwetu atuyule natsila mu nzita. Bikoni bimunatumamena lika kwa kujeneka kwilwisa mwene?”
11 Mwene Devidi watumine muzimbu kuli kapilistu Zadoki na kapilistu Abiatha ngwendi: “Lekeni bakulunu ba Juda ngweni, ‘Bika bimupwila ba mamaneselelo kwilwisa mwene ku njibo yendi, okuni kuno kunjili njinazibi ngwabo Baisalele boshe bashaka kunjilwisa ku njibo yange? 12 Yeni mu bandolome bange, mu babushoko bwange,* co bika bimupwila ba mamaneselelo kwija na kunjilwisa ku njibo yange?’ 13 Lekeni na Amasa ngweni: ‘Yobe u kabushoko kange. Ngeci Njambi anjane kashitiko na kubwezelelako nga kunjikupwisa ntwama ya maswalale bange kutunda hano na kuya kulutwe mu mwela wa Joabu.’”
14 Ngeci, majwi endi etele banalume boshe ba mu Juda ku bimbunge, co batumine muzimbu kuli mwene ngwabo: “Iluka, yobe na bangamba bobe boshe.”
15 Mwene washangumukile kwiluka, co wetele ku Jodani. Banu ba mu Juda bezile ku Giugali mangana bakuliwane na mwene, co bamusindikiiye mu sambwa lya Jodani. 16 Co Shimei muna Gela, Kabenjamini wa ku Bahulimu wazambwile hamo na banalume ba ku Juda kuya na kuliwana na Mwene Devidi. 17 Co wezile hamo na banalume 1,000 ba ku muyati wa Benjamini. Ziba muka-kupangela bakunjibo ya Saulu na bana bendi ba banalume ba kupwa 15 na bangamba ba kupwa 20 nabo bazambwilile ku Jodani simbu kanda mwene ete. 18 Wajabukile* ha mwaba mangana ajabwise bakunjibo ya mwene na kumulingila byoshe-byoshe byashaka. Oloni Shimei muna Gela watsikamene halutwe lwa mwene, mwene mwashakele kujabuka Jodani. 19 Walekele mwene ngwendi: “Shukulu yange keti anjane mulonga, co keti wanuke byabiisile ngamba yobe litangwa liwatundile mu Jelusalema yobe shukulu yange mwene. Mwene keti abyake mbunge, 20 mwafwa yange ngamba yobe njizibuka ngwange njinabiisa. Ngeci lelo ku bakunjibo ya Jozefu boshe, yange njinalibanga kwija na kushesha shukulu yange mwene.”
21 Oho bene Abishai muna Zeluya wendekele ngwendi: “Shimei napande kutsa lelo, mwafwa nasingile wakubwabesa wa Yehova.” 22 Oloni Devidi wendekele ngwendi: “Ei ñanda inamikundama bati eni bana ba Zeluya mangana lelo munjitengulukile? Kuma kuli umo ibanapande kutsiya mu Isalele lelo ndi? Kuma keti nji mwene wa Isalele lalo ndi?” 23 Ngeci mwene walekele Shimei ngwendi: “Kuutsi.” Co mwene walisingile.
24 Mefibosheti mutekulya Saulu nendi wezile na kushesha mwene. Kajelesele mendi endi nambe kukamba munjezi wendi nambe kukusha bizalo byendi, kushwa litangwa lyaile mwene kweta litangwa lyelukile mu kwoloka. 25 Mwezile ku Jelusalema mangana akuliwane na mwene, mwene wamwihwile ngwendi: “Mefibosheti, bika kuwaililile nange?” 26 Mefibosheti wakumbulwile ngwendi: “Shukulu yange mwene, ngamba yange nanjikwisile mwafwa yange ngamba yobe njinendekele ngwange, ‘Njibwahesele donki mangana njilondeho njiye na mwene,’ mwafwa yange ngamba yobe njatenguka mendi. 27 Oloni nanjibiisile lizina kuli yobe shukulu yange mwene. Nameme ngoco, yobe shukulu yange mwene, wapwa ngwe kangelo ka Njambi wa busunga. Ngeci linga byoshe-byoshe biumona ngwobe byabibwa. 28 Bakunjibo ya tate boshe ngwe unabanyongesa, yobe shukulu yange mwene, oloni unaka ngamba yobe hakati ka baje balila ku mesa yobe. Ngeci lisesa muka linjili nalyo lya kutwalelelaho kutatokela mwene?”
29 Oloni mwene wamulekele ngwendi: “Ulisina lika kwendeka. Njinakula ngwange nobe na Ziba mulipangele lihya.” 30 Oloni Mefibosheti walekele mwene ngwendi: “Alyambate lyoshe, cakama lika shukulu yange mwene neluka ku njibo yendi mu kwoloka.”
31 Co Bazilai muka-Giliyadi wasikumukile ku Jodani kutunda ku Logelimu mangana akusindikiye mwene ku ndonga ya Jodani. 32 Bazilai wakulubalele manene, wakele na myaka 80. Wakele na kwana mwene byakulya mwakele ku Mahanaimu mwafwa wapwile munalume wa kufuka manene. 33 Ngeci mwene walekele Bazilai ngwendi: “Jabuka nange, co njikakwana byakulya mu Jelusalema.” 34 Oloni Bazilai wakumbulwile mwene ngwendi: “Njinasala na matangwa angahijo a kuyoya mangana njiye na mwene ku Jelusalema? 35 Hano njili na myaka 80. Kuma njicasa kwangununa byuma byabibwa ku byabibi ndi? Kuma yange ngamba yobe njicasa kuziba binjilya nebi binjinwa ndi? Kuma njicasa kutolilila ku majwi a baka-kwimba ba banalume na ba banakazi ndi? Co bika binjipwila citele kuli yobe shukulu yange mwene, na kubwezelela ku bitele biuli nabyo laja? 36 Obe mwene, ngamba yobe najauka mwanakusindikiya kweta ku Jodani. Mwene anjanena bika eci cikandelela ngwe fweto? 37 Tabesa ngamba yobe eluke, co njitabese njikatsile mu nganda yange kuyehi na bihilo bya tate na nana. Oloni ngamba yobe Kimuhamu ou. Jabuka nendi shukulu yange mwene, co wasa kumulingila biumona ngwobe byabibwa.”
38 Ngeci mwene wendekele ngwendi: “Kimuhamu ajabuka nange, co njimulingila biumona ngwobe byabibwa. Njikulingila byoshe-byoshe biunjilomba ngwobe njikulingile.” 39 Co banu boshe bashangumukile kujabuka Jodani, co mwene mwajabukile, watsembele Bazilai na kumubezikisa, co Bazilai welukile kwimbo. 40 Mwene mwajabukile kutalesela ku Giugali, Kimuhamu wajabukile nendi. Banu boshe ba mu Juda na banu bamo ba mu Isalele bajabwisile mwene.
41 Co banalume boshe ba mu Isalele bashwenene mwene na kumwihula ngwabo: “Mwafwa bika bandolome betu, banalume ba mu Juda banakwibile yobe mwene na bakunjibo yobe na kukujabwisa ndonga ya Jodani hamolika na banalume boshe bauli nabo?” 42 Banalume boshe ba mu Juda bakumbulwile banalume ba mu Isalele ngwabo: “Mwafwa mwene kabushoko ketu. Bika binamilubalesa? Kuma kuli cuma cimo ca mwene citunali nambe bwana bumo bwanatwana ndi?”
43 Oloni banalume ba mu Isalele bakumbulwile banalume ba mu Juda ngwabo: “Tuli na mitamba 10 mu bumwene bwa Devidi, co bushoko bwetu nendi bwakama kutubakana bweni. Bikoni bimunatushawila ngacije? Kuma keti yetu tunapandele kulibanga kwilwisa mwene yetu ndi?” Oloni majwi a banalume ba mu Juda ahyanene majwi a banalume ba mu Isalele.