Mukanda Wamucibali wa Samwele
23 Awa akewo majwi a Devidi a mamaneselelo:
“Majwi a Devidi muna Jesi,
Majwi a munalume ibajundwile,
Wakubwabesa wa Njambi ya Jakobu,
Muka-kwimba wamubwa wa myaso ya Isalele.
2 Sipilitu ya Yehova yendekele kwitila muli yange,
Lijwi lyendi lyakele ha ndaka yange.
3 Njambi ya Isalele wendekele,
Limanya lya Isalele wanjilekele ngwendi:
‘Nga muka-busunga ikeye ayula banu,
Nga azibila Njambi lyoba omwo ayula,
4 Co kunapu ngwe ceke ca mutondo omwo litangwa litwa ceke,
Ngwe mutondo nga kukwesi lifwike.
Kunapu ngwe ceke cije cikakalako nga nyonzi inaki,
Na kulingisa mwila umene ha lifuti-libu.’
5 Kuma omu keti mukemwo muinafu njibo yange kuli Njambi ndi?
Mwafwa nalingi nange cikumiiyo ca myaka yoshe,
Nacibwahesa mwamubwa na kucinyungilila.
Mwafwa cikeco cinjilingisa njoboke na kunjibwasa,
Mukemwo nacilingisa cikaleko.
6 Oloni banalume boshe ba kujeneka seho, babombila kuti ngwe biputa bya mingonga,
Mwafwa kubibwaha kubikwata na maboko.
7 Nga munu abikwata,
Napande kukala na citwa ca cikubo na likunga,
Co banapande kubyenyeka byoshe oho habinamenena.”
8 Awa akewo mazina a baka-kulwa ba nzili ba Devidi: Joshebu-bashebeti wa Kahakimoni, uje wapwile ntwama wa baka-kulwa ba nzili manene batatu. Simbu imo watsiile banu 800 na likunga lyendi. 9 Watele kuli ikeye wapwile Eliaza muna Dodo, Dodo muna Ahohi. Eliaza wapwile umo wa baka-kulwa batatu ba nzili manene baje bakele na Devidi mubashendumwine Bafilistiya. Balikungulwilile ku nzita, co banalume ba Isalele mubatewele, 10 wemanene mbe na kutwalelelaho kutsiya Bafilistiya kweta noho liboko lyendi lyazeyele, co mishisha ya liboko lyendi yalikwatele mwafwa ya kukwatelela mukwale. Ngeci Yehova wabahyanesele* manene lije litangwa, co banu bezile munima yendi na kupukula byuma bya baje batsile.
11 Watele kuli ikeye wapwile Shamaha muna Agi wa Kahalali. Bafilistiya balikungulwilile ku Lehi kuje kwakele lihya lije lyakele na makunde amangi, co banu batewele mwafwa ya Bafilistiya. 12 Oloni ikeye wemanene mbe hakati ka lihya na kulilwila, co watwaleleleleho kutsiya Bafilistiya. Ngeci Yehova wahyanesele* manene banu bendi.
13 Bamyata batatu ku bamyata 30 baile kuli Devidi ku bwina bwa mu limanya bwa Adulamu ha simbu ya kuteja, co cibunga ca Bafilistiya catungile cilombo mu Cingulunga ca Lefaimu. 14 Ha simbu oyo, Devidi wakele mu cimpaka, co cilombo cacindondo ca maswalale ba Filistiya cakele mu Betelehema. 15 Co Devidi wendekele ngwendi: “Tawe, ngwe kuli umo anjinenelako mema a mu lisima lya ku cikolo ca Betelehema!” 16 Ngeci baje baka-kulwa batatu ba nzili balifwitile kukobela mu cilombo ca Bafilistiya na kukatekula mema mu lisima lya ku cikolo ca Betelehema na kuwanenela Devidi, oloni wabyanene kuwanwa, co wawetililile Yehova. 17 Wendekele ngwendi: “Obe Yehova, kunjasa kulinga cuma ca cifweci! Kuma njinapande kunwa maninga a banu baje banakele myonyo yabo mu bushonde ndi?” Ngeci wabyanene kuwanwa. Ebi bikebyo byuma bibalingile baka-kulwa bendi ba nzili batatu.
18 Abishai ndolome ya Joabu muna Zeluya wapwile ntwama wa baka-kulwa bakwabo ba nzili batatu. Watsiile banu 300 na mukwale wendi, co nendi watsimanene ngwe mwa baje batatu. 19 Nameme watsimanene manene hakati ka baje bakwabo batatu, co lalo ikeye wapwile ntwama yabo, ketele ha seteko ya baje batatu bakulibanga.
20 Benaya muna Jehoyada wapwile munalume wa kusimpa uje walingile byuma byabingi mu Kabizele. Watsiile bana ba Aliele wa ku Mowabi babali ba banalume, co lalo wasikumukile mu bwina na kutsiilamo ndumba ha litangwa likwanyokele mema a kukonda. 21 Co lalo watsiile munalume wa ku Ijipiti wa kutunuka manene. Nameme ou munalume wa ku Ijipiti wakwatele likunga mu liboko, Benaya waile kuli ikeye na mulamu na kukamunyangula likunga lyakwatele, co wamutsiile na likunga lyendi. 22 Ebi bikebyo byuma byalingile Benaya muna Jehoyada, co watsimanene ngwe mwa baje baka-kulwa ba nzili batatu. 23 Nameme watsimanene manene kutubakana bamyata 30, ketele ha seteko ya baje baka-kulwa ba nzili batatu. Nameme ngoco, Devidi wamupwisile umo wa baka-kumunyunga.
24 Asahele ndolome ya Joabu wapwile umo wa baje bamyata 30. Bakwabo bapwile: Euhanani muna Dodo wa ku Betelehema, 25 Shamaha muka-Halodi, Elika muka-Halodi, 26 Helezi muka-Peleti, Ila muna Ikeshi muka-Tekoa, 27 Abi-eza muka-Anathothi na Mebunai muka-Husha, 28 Zaumoni wa Kaahohi, Mahalai muka-Netofa, 29 Helebu muna Banahe muka-Netofa, Itai muna Libai wa ku Gibea ya Babenjamini, 30 Benaya muka-Pilathoni, Hidai wa ku bingulunga bya Gashi, 31 Abi-auboni muka-Araba, Azimavethi muka-Bahulimu, 32 Eliaba muka-Shalibimu, bana ba Jasheni, Jonathani, 33 Shamaha wa Kahalali, Ahiyamu muna Shala wa Kahalali, 34 Elifeleti muna Ahasibai muka-Makathi, Eliamu muna Ahithofeo muka-Gilo, 35 Hezro muka-Kameu, Palai muka-Arabia, 36 Iga muna Nathani wa ku Zoba, Bani wa ku cikota ca Gadi, 37 Zeleki wa Kaamoni uje wapwile muka-kwambatela Joabu muna Zeluya bitwa, 38 Ila wa Kaithili, Galebu wa Kaithili, 39 na Uliya wa Kahiti, co boshe bapwile 37.