Mukanda Wamucibali wa Samwele
24 Butenu bwa Yehova bwepukilile lalo Baisalele omwo kwakele umo wakokweyeye Devidi, mwamulekele ngwendi: “Ya ukatande banu ba Isalele na Juda.” 2 Ngeci mwene walekele Joabu ntwama wa maswalale uje wakele nendi ngwendi: “Ita mu miyati yoshe ya Isalele, kushangumukila ku Dani kweta ku Bele-sheba, usoneke banu mangana njizibuke habanapu.” 3 Oloni Joabu walekele mwene ngwendi: “Yehova Njambi yobe abwezelele banu lwa kupwa 100, co yobe shukulu yange mwene ulimwene mwalinga ngoco. Shukulu yange mwene atondela bika kulinga cuma ca cifweci?”
4 Oloni byendekele mwene byahyanene byendekele Joabu na bamyata ba maswalale. Ngeci Joabu na bamyata ba maswalale batundile halutwe lwa mwene na kuya na kusoneka banu ba Isalele. 5 Bajabukile Jodani na kutunga cilombo ku Aloe, ku cilyo* ca nganda hakati ka cingulunga, co bataleselele ku mutambela wa Bagadi na kutalesela ku Jaze. 6 Kutundaho, baile ku Giliyadi na ku lifuti lya Tatimu-hodishi, batwaleleleleho kweta na ku Dani-jani, co bazengulukile kuya ku Sidoni. 7 Kutundaho, baile ku nganda ya kunyungilila ya Tile na ku binganda byoshe bya Bahivi na bya Bakanana, co mamaneselelo bakele mu Negebu ya Juda ku Bele-sheba. 8 Ngeci, betile mu lifuti lyoshe na kwija ku Jelusalema ku mamaneselelo a bingonde 9 na matangwa 20. 9 Co Joabu wetesele kuli mwene namba ya banu babasonekele. Mu Isalele, baka-kulwa baje bakele na mikwale betele ku 800,000, co banalume ba mu Juda bapwile 500,000.
10 Oloni mbunge* ya Devidi yashangumukile kumupaya munima ya kutanda banu, co Devidi walekele Yehova ngwendi: “Njinalingi bubi bwakama munjinalingi eci cuma. Ngeci obe Yehova, shukulu-kambu konekela mulonga wa ngamba yobe mwafwa binjinalingi bya bulema manene.” 11 Devidi mwendukile mutondo, Yehova walekele kapolofweto Gadi, muka-kumona bimona wa Devidi ngwendi: 12 “Ya ukaleke Devidi ngwobe, ‘Yehova nendeka ngwendi: “Njikwana byuma bitatu wanguleho. Angulaho cimo cinjilinga kuli yobe.”’” 13 Ngeci Gadi wezile kuli Devidi na kumuleka ngwendi: “Kuma ushaka ngwobe mu lifuti lyobe mukale njala yakama ha myaka 7 ndi? Indi hamo ushaka kuyebangela ha bingonde bitatu oku bitozi bobe bakusheka? Indi hamo ushaka ngwobe mu lifuti lyobe mukale mushongo wa kulitambwisa ha matangwa atatu? Singanyekesesa mwamubwa munjinapande kukakumbulwila Uje nanjitumu.” 14 Ngeci Devidi wakumbulwile Gadi ngwendi: “Njili mu citanga cakama. Shukulu-kambu, tuwile mu liboko lya Yehova mwafwa kutetela kwendi kwapwa kwakama. Keti njiwile mu liboko lya munu.”
15 Co Yehova watumine mushongo wa kulitambwisa mu Isalele kushwa mutondo kweta simbu yabwahesele, co banu 70,000 batsile kushangumukila ku Dani kweta ku Bele-sheba. 16 Kangelo mwolwele liboko lyendi kutalesa ku Jelusalema mangana ainyongese, Yehova walibeyele mwafwa ya buje bukalu, co walekele uje kangelo wakele na kunyongesa banu ngwendi: “Kunahwoni! Wisa liboko lyobe.” Kangelo ka Yehova wakele muyehi na lijunguwilo lya Alauna wa Kajebusi.
17 Devidi mwamwene kangelo uje wakele na kutsiya banu, walekele Yehova ngwendi: “Yange njinalingi bubi, co yange njinabiisa. Oloni aba bimanga bika bibanalingi? Shukulu-kambu, liboko lyobe lije hali yange na bakunjibo ya tate.”
18 Ngeci Gadi wezile kuli Devidi lije litangwa na kumuleka ngwendi: “Ya ukatungile Yehova mutula ha lijungwilo lya Alauna wa Kajebusi.” 19 Co Devidi waile mwazibile byendekele Gadi kwesekesa nomu mwashikilile Yehova. 20 Alauna mwatalele na kumona mwene na bangamba bendi bali na kwija kuli ikeye, oho bene wabasheshele na kukatsikamena mwene na kukulamena hasi. 21 Alauna wehwile ngwendi: “Shukulu yange mwene nezila bika kuli yange ngamba yendi?” Devidi wakumbulwile ngwendi: “Njinaija na kulanda lijungwilo lyobe njitungileho Yehova mutula mangana bukalu bubanaliwana nabwo banu buhwe.” 22 Oloni Alauna walekele Devidi ngwendi: “Shukulu yange mwene alyambate na kwanenaho byamona ngwendi byabibwa kupwa mulambu. Bingombe ba kwana kupwa mulambu aba, co ambata na cilei ca kujungwisa na joko mangana bipwe bikuni. 23 Byoshe ebi, obe mwene, Alauna nakwanabyo.” Co Alauna walekele mwene ngwendi: “Yehova Njambi yobe akuzibile ngozi.”
24 Oloni mwene walekele Alauna ngwendi: “Embwe, njinapande kulilanda kuli yobe. Kunjana Yehova Njambi yange milambu ya kwenyeka kwa kujeneka kwecako cimo.” Ngeci Devidi walandele lije lijungwilo na bingombe na mashekele* a siuva 50. 25 Co Devidi watungilileho Yehova mutula na kwana milambu ya kwenyeka na milambu ya kulila hamo. Ngeci, Yehova wakumbulwile lilombelo libalombelelele lifuti, co bukalu bubaliwanene nabwo Baisalele bwahwile.