Obadiya
1 Eci cikeco cimona camwene Obadiya:*
Mwata Wahakamwa ya Byoshe Yehova nendeka kutalesa kuli Edomu ngwendi:
“Tunazibi muzimbu wa kutunda kuli Yehova,
Banatumu katumwa kuli baka-mafuti mangana akabaleke ngwendi:
‘Katukeni, tulibwahesele kukamulwisa.’”
2 “Tala! Njinakupwisa wamundondo hakati ka mafuti,
Banakwombwanesa manene.
3 Mbunge yobe ya kulyalesa inakukwisi,
Yobe wakala mu myela ya kubanda ya mu mamanya,
Yobe watunga ha mwela waulaha, uli na kwendeka mu mbunge yobe ngwobe,
‘Iya anjiwisila hasi?’
4 Nameme utungile helu* ngwe ngonga,
Nambe kutungila lishwa lyobe hakati ka bingongonosi,
Njikupalumunako,” mukemwo mwanendeka Yehova.
5 “Nga bezi bakwizila, mapwepwe nga bakwizila butsiki,
Kuma kubebiko lika byuma bibatonda ndi?
Nambe nga baka-kuteja bushuka bwa binyu baija mu lihya lyobe,
Kuma kubasezeko bumo mangana bakwabo bapupulule ndi?
(Oloni yobe bitozi bakunyongeselela!)
6 Isau banamushakezeka manene!
Byuma byendi bya seho bya kushweka banabishakezeka manene!
7 Banakushekela ku nginga ya lifuti.
Boshe baunalikwatasana nabo* banakukwisi.
Banu bauli nabo mu kwoloka banakuhyana.
Baje bali na kulya byakulya byobe banakutela bwanda,
Oloni kuunanguka.”
8 Yehova nendeka ngwendi, “Ha litangwa olyo,
Kuma kunjikanyongesa baka-mana ba mu Edomu
Na baje bali na cashu ca kunanguka mu mutambela wa minkinda wa Isau ndi?
9 Baka-kulwa nzita bobe bakalijujukila, obe Temani,
Mwafwa banu boshe ba mu mutambela wa minkinda wa Isau bakabatsiya.
10 Mwafwa ya kukenyukila ndolome yobe Jakobu,
Shwamwa ikakulya,
Co ukanyonga myaka yoshe.
11 Ha litangwa liwemanene kumukulo,
Ha litangwa libezile banu beka na kwambata maswalale bendi na kubatwala mu bufunge,
Banu ba ku lifuti lyeka mubakobelele mu cikolo cendi na kutela Jelusalema ñela,
Walikwatasanene nabo.
12 Keti ulisambe ha litangwa lya lubinda lwa ndolome yobe,
Keti ubwahelele ha litangwa lya kunyonga kwa banu ba Juda,
Co keti ulishashe ha litangwa libakobela mu bukalu.
13 Keti wije ku cikolo ca banu bange ha litangwa libakobela mu bukalu,
Keti ulisambe ha litangwa libakobela mu bukalu,
Co keti wolwele liboko lyobe ha bufuko bwabo ha litangwa libakobela mu bukalu.
14 Keti wimane ha masambwa-ngila mangana utsiye banu bendi baje banatewe,
Co ha litangwa lya bukalu, keti wake mu liboko lya citozi banu bendi baje banoboka.
15 Mwafwa litangwa lya Yehova lya kulwisa mafuti oshe lili muyehi.
Bakakulinga ngwe muunalingila bakweni.
Byuma biunalingi ku bakweni bikakwilukila ha mutwe wobe.
16 Mwafwa ngwe muunanwila binyu ha munkinda wange wa kujela,
Baka-mafuti boshe bakatwalelelaho kunwa butenu bwange.
Bakabunwa na kubulehula,
Bakaziluka, co bakapwa ngwe kubakeleko.
17 Oloni ha Munkinda wa Siyone hakakala baje bakoboka,
Co ukapwa wa kujela,
Co bakunjibo ya Jakobu bakaswana byuma bije byapwile byabo.
18 Bakunjibo ya Jakobu bakapwa tuhya,
Bakunjibo ya Jozefu bakapwa mulangi,
Co bakunjibo ya Isau bakapwa ngwe bishati,
Bakabashwameka na kubenyeka,
Co naumo wahi wa ku njibo ya Isau akoboka,
Mwafwa Yehova ikeye nendekamo.
19 Bakaswana Negebu na mutambela wa minkinda wa Isau,
Bakaswana Shefela na lifuti lya baFilistiya.
Bakaswana lihya lya Efremu na lihya lya Samaliya,
Co Benjamini akaswana Giliyadi.
20 Lifuti lya baKanana kuketa bene na ku Zalefathi likapwa lya banu ba Isalele.
Likapwa lya bafunge baje bali mu mwela ubanazengeleka na bibumbe.*
Co bafunge ba mu Jelusalema baje bakele mu Sefaladi bakaswana binganda bya Negebu.
21 Baka-kwobola bakakanduka ha Munkinda wa Siyone
Mangana bakasompe banu ba mu mutambela wa minkinda wa Isau,
Co bumwene bukapwa bwa Yehova.”