Kuma Njambi Kwakala Ndi?

Biyendeka Mbimbiliya

Mu Mbimbiliya muli bukaleho bwa busunga buje bumwesa ngwabwo Njambi kwakala. Mbimbiliya itushongangeya tukulahele ngwetu Njambi kwakala. Nameme ngoco, kuitushongangeya ngwayo tukulahele ngoco mwafwa ya kukabangeya lika bilongesa bya bulombelo, oloni inatunangula ngwayo tupangese ‘nzili yetu ya kusinganyeka’ na cashu cetu ca “kuzibisisa.” (Loma 12:1, NWT; 1 Yowano 5:20) Tusimutwiyeniko biñanda bimo bya mu Mbimbiliya bije bitukwasa kuzibisisa ei simpi:

• Lilu na kaye na byuma bya kuyoya bilimo, byakala mu myela inapande, co bimwesa ngwabyo kwakala Ishamatanga. Mbimbiliya ngwayo: “Mwa busunga, njubo yoshe baitunga kuli munu, oloni Njambi ikeye muka-kutunga byuma byoshe.” (Vahevelu 3:4) Nameme eci cakumwenako cacasi, oloni baka-kulilongesa babangi nabo bacimona ngwabo ca busunga.a

• Yetu banu tukashaka kuzibuka bituli na kuyoyela nameme tunasa kukala na byuma bitutonda ku mubila. Mukemwo Mbimbiliya inendeka ngwayo tutonda Njambi. Kulumbununa ngwabo tushaka kumuzibuka na kumulemesa. (Mateo 5:3; Kujombolola 4:11) Kushaka kuzibuka Njambi na kumulemesa kumwesa ngwabo kwakala, co wakala na cizemo. Co lalo kumwesa ngwabo Njambi ashaka ngwendi tuyoye mwamubwa.—Mateo 4:4.

• Bupolofweto bwabwingi buli mu Mbimbiliya babusonekele myaka yaingi simbu kanda bulishulisilile. Oloni bwalishulisilile ha simbu inapande. Kulishulisilila kwobu bupolofweto nomu mubwamweselele cuma na cuma cikalingiwa kumwesa ngwabo bwatundile kuli munu umo wa nzili manene.—2 Petulu 1:21.

• 

  Baje basonekele Mbimbiliya bazibukile byuma bya sayansi bije kubasele kuzibisisa bakwabo babayoyele nabo. Cakumwenako, kusañulu banu babangi bakulahelele ngwabo lifuti-libu lyakala ha kasitu umo wa kufwa ngwe njamba, combo nambe ngombe. Mbimbiliya ikeyo imwesa ngwayo Njambi ‘nanyengelesa kaye ha bukambwila.’ (Yombi 26:7) Co lalo imwesa ngwayo lifuti-libu lyapwa lya mubundungulu. (Isaya 40:22) Banu babangi banalimwena ngwabo banu basele kusoneka ebi biñanda mu Mbimbiliya mwafwa byatundile kuli Njambi.

• Mbimbiliya inakumbulula bihula byabingi byabikalu kwambateselela na bihula bije binasa kulingisa munu asinganyeke ngwendi Njambi kakeleko nga kawanene bikumbululo. Cakumwenako, bamo bakalihula ngwabo, ‘Nga Njambi kwakala, bika byanecelela bubi na tuyando mu kaye? Mwafwa bika bulombelo bwabwingi buli na kukundwiya byuma byabibi kutubakana kukundwiya byuma byabibwa?’—Tito 1:16.