Kulilongesa Mbimbiliya kwapwa kwa seho. Oloni kunasa kukaluwa. Hamo mwasa kuliziba ngweni kumwasa kutwalelelaho kulilongesa Mbimbiliya. Oloni bika kwapwila kwa seho kutwalelelaho kulilongesa Mbimbiliya? Bika bimikwasa mutwaleleleho kukolesa nameme muliwana na bukalu?

1. Bika kwapwila kwa seho kulilongesa Mbimbiliya?

“Lijwi lya Njambi lili na kuyoya na kupanga.” (Vahevelu 4:12) Mbimbiliya yapwa ya seho mwafwa imwesa biyongola bya Njambi nomu mwamizemena. Imikwasa mukale na mana a busunga na kumona mumwasa kupangesela owo mana. Co lalo imikwasa mulabelele byuma bya kulutwe. Mbimbiliya imikwasa lalo mulikute busamba na Yehova. Co kulikuta busamba na Yehova cikeco cuma ca seho manene. Kulilongesa Mbimbiliya kumikwasa lalo mupwe banu bababwa.

2. Bika bitunapande kuzibukila seho ya busunga bwa mu Mbimbiliya?

Busunga bwa mu Mbimbiliya bunapu bwa seho manene. Mukemwo Mbimbiliya itushongangeya ngwayo ‘tulande busunga, co keti tulyangunuke nabwo.’ (Visimo 23:23) Nga tuzibuka seho ya busunga bwa mu Mbimbiliya, co tulinga mwoshe mutwasela mangana tutwaleleleho kulilongesa nameme tuliwana na byeseko bya kuliseza-seza.—Tandeni Visimo 2:4, 5.

3. Yehova amikwasa bati mangana mutwaleleleho kulilongesa?

Yehova ikeye Ishamatanga muka-nzili yoshe, co lalo wapwa Kabusamba keni. Ashaka kumikwasa mangana mulilongese byendi. Asa kumikwasa ‘mukale na cizango na nzili mangana mwase kwononoka butumbe bwendi.’ (Tandeni Filipu 2:13.) Ngeci, nga muliziba ngweni kumwesi na cizango ca kulilongesa, nambe kupangesa bimuli na kulilongesa, mulombeni, co amikwasa. Co lalo nga muliziba ngweni kumwesi na nzili ya kuhyana ceseko cimo, mulombeni mangana amikwase. Simbu yoshe, lombeni Yehova mangana amikwase mutwaleleleho kulilongesa Mbimbiliya.—1 Tesalonika 5:17.

TONDESESENI

4. Moneni kulilongesa Mbimbiliya kupwa kwa seho manene

Bisimbu bimo, tunasa kuzezama manene, co tunasa kumona ngwe kutwesi na simbu ya kulilongesa Mbimbiliya. Oloni bika byasa kutukwasa? Tandeni Filipu 1:10, na kusimutwiya ha bihula binatako:

• Byuma muka bimwamona ngweni byapwa bya seho manene mu kuyoya?

• Bika bimwasa kulinga mangana mulilongese Mbimbiliya simbu yoshe?

1. Nga mushangumukila kwaka mushekesheke mu cikwata, asina mwakamo mamanya, co mamanya kuwafumo

2. Oloni nga mushangumukila kwakamo mamanya, co mwasa kwakamo mushekesheke wawingi. Mu ngila imolika, nga mutwameka byuma bya seho manene mu kuyoya kweni, co mubilinga mwamubwa, co lalo muwana na simbu ya kulinga byuma bikwabo

Kulilongesa Mbimbiliya kutukwasa tuzibuke mwamubwa Njambi na kumulemesa. Tandeni Mateo 5:3, na kusimutwiya ha cihula cinatako:

• Bubwa muka butuwana nga tutwameka kulilongesa Mbimbiliya?

5. Twaleleleniho kulilongesa Mbimbiliya nameme bamilwisa

VIDIO: Bubwa Bunatundu mu Kutwalelelaho Kulilongesa Mbimbiliya (5:22)

• Babusamba ba Francesco na baka-naanga yendi balingile bika mwabalekele ngwendi ali na kulilongesa Mbimbiliya?

• Bubwa muka bwatundilemo, Francesco mwatwaleleleleho kulilongesa Mbimbiliya?

Tandeni 2 Timateo 2:24, 25, na kusimutwiya ha bihula binatako:

• Baka-naanga yeni na babusamba beni bakalizibi bati mubakamimono mulilongesa Mbimbiliya?

• Kwesekesa nou mukanda, mulinga bati nga banu bamo kubashaka ngwabo mulilongese Mbimbiliya? Mwafwa bika?

6. Kulaheleni ngweni Yehova amikwasa

VIDIO: Yehova Akakwasa Banu Batenguluke (3:56)

• Kwesekesa na vidio, Jim watengulwile bati yoyesi yendi mangana azibise Yehova kubwaha?

• Mwanja wa Jim umikwasa bati?

Tandeni Vahevelu 11:6, na kusimutwiya ha bihula binatako:

• Yehova akalingila bika baje “bali na kumushakezeka” nambe ngwetu baje bali na kulinga mwoshe mubasela mangana bamuzibuke na kumuzibisa kubwaha?

• Yehova akalizibi bati mwakamimono mulinga mwoshe mumwasela mangana mulilongese Mbimbiliya?

SIMPI YAKAMA

Kulilongesa Mbimbiliya simbu imo keti kwakwasi, oloni kulinga ngoco kumikwasa mupwe ba kubwahelela myaka yoshe. Twaleleleniho kukulahela Yehova, co amibezikisa.

Kwitulukamo

• Bika bimilingisa mumone ngweni busunga bwa mu Mbimbiliya bwa seho?

• Mwasa kutwameka bati byuma bya seho manene mu kuyoya kweni?

• Bika bimunapande kulombela Yehova nga mushaka kutwalelelaho kulilongesa Mbimbiliya?

WANENI BIKWABO

Tandeni ei ñanda imwesa byuma biwana bije binakwasa banu babangi bapangese mwamubwa simbu yabo.

“Mwasa Kupangesa Bati Mwamubwa Simbu Yeni?” (Toneni! ya February 2014)

Munakazi umo wakele na kulinga mwoshe mwaselele mangana azibise Yehova kubwaha nameme muka-limbo lyendi kakele na kumona seho ya kulinga ngoco. Moneni mwamukwaselele Yehova.

Yehova Akatukwasa Twambate Bitele Byetu (5:05)

Kengeni ei vidio mangana mumone mwakoleselele munakazi umo na kukwasa muka-limbo lyendi.

Njashakele Kumona Indi Bwapwile Busunga (6:30)

Banu bamo bakendeka ngwabo Bakaleho ba Yehova bakatepe binaanga. Kuma bikebyo bibakalingi ndi?

“Bakaleho ba Yehova Bakatepe Binaanga Indi Bakabilingisa Bilikwatasane?” (Ñanda ya ha webusaiti)

Tubaboshe tukangula byakulinga. Byuma bitwangula byasa kutukwasa nambe kutukobelesa mu bukalu. Co lalo byasa kukanyamesa busamba bwetu na Yehova nambe kubutsiya. Cakumwenako, hamo tunasa kwangula kutukala, mwakuliyoyesela, kukala mu buzike nambe kukobela mu bulo. Nga twangula mwamubwa byakulinga, co tuzibisa Yehova kubwaha ku mbunge, co lalo tupwa ba kubwahelela.

1. Mbimbiliya yasa kutukwasa bati mangana twangule mwamubwa byakulinga?

Simbu kanda mwangule byakulinga, lombeni Yehova amikwase. Co iluleni lalo biyendeka Mbimbiliya ha ñanda oyo. (Tandeni Visimo 2:3-6.) Mu byuma bimo, Yehova akatwana mashiko atunapande kukabangeya. Ngeci, nga mulyangwila kwononoka mashiko a Yehova, co mulinga mwamubwa manene.

Oloni bati nga kukwesi lishiko lya mu Mbimbiliya lije lyendeka mpundu ha ñanda imo? Yehova anga acitutwamenena ‘mu ngila mutunapande kuya.’ (Isaya 48:17) Alinga bati ngoco? Kuli binangulo byasa kutukwasa. Binangulo bya mu Mbimbiliya bimwesa biyongola bya Njambi nomu mwakalizibila. Kutanda Mbimbiliya kutukwasa tuzibuke biyongola bya Njambi. Kuzibuka mwakalizibila Yehova kutukwasa twangule mwamubwa byakulinga.

2. Bika bitunapande kwaka mu biyongola omwo twangula byakulinga?

Mbimbiliya ngwayo: “Baka-mana bakebo bazibuka kuje kubaya.” (Visimo 14:15) Ngeci, simbu kanda twangule byakulinga, tunapande kusinganyekesesa ha byuma bitushaka kulinga. Omwo mwangula byakulinga, lihuleni ngweni, ‘Binangulo muka bya mu Mbimbiliya bije byasa kunjikwasa? Byuma binjishaka kulinga binapande ndi? Bizibisa bakwetu kubabala ku mbunge nambe kubakobelesa mu bukalu ndi? Bizibisa Yehova kubwaha ndi?’—Kwituluka mu Mashiko 32:29.

Yehova ikeye asa kutukwasa tuzibuke byuma byabibwa na byuma byabibi. Nga tuzibuka mwamubwa mashiko na binangulo bya Yehova na kubikabangeya, co tukala na citakutaku ca kujela. Citakutaku capwa cuma cije cikatuleke byuma byabibwa nambe byabibi. (Loma 2:14, 15) Nga tulongesa mwamubwa citakutaku cetu, co twangula mwamubwa byakulinga.

TONDESESENI

3. Tabeseni Mbimbiliya imitwamenene

VIDIO: Tabeseni Binangulo bya mu Mbimbiliya Bimitwamenene (5:54)

• Kwesekesa nei vidio, bwana muka bwanatwana Njambi?

• Mwafwa bika Yehova natwana nzili ya kulyangwila byakulinga?

• Bika byanatwana bije bitukwasa tupangese mwamubwa nzili ya kulyangwila byakulinga?

Tandeni Efeso 5:15, 16, mangana mumone cinangulo cimo ca mu Mbimbiliya. Mwasa kupangesa bati mwamubwa simbu yeni mangana . . .

• muwane simbu ya kutanda Mbimbiliya?

• mupwe cisemi wamubwa, mwana wamubwa nambe kukala mwamubwa mu bulo?

• mukunguluke ku biwano?

4. Longeseni citakutaku ceni mangana mwangule mwamubwa byakulinga

VIDIO: “Twaleleleniho Kukala na Citakutaku ca Kujela” (5:13)

• Kwesekesa nei vidio, bika byalingile uje ndokazi mangana alongese citakutaku cendi na kwangula mwamubwa byuma bije bizibisa Yehova kubwaha ku mbunge?

Mwafwa bika kutwapandele kuleka bakwetu batwangwile byakulinga bije bitunapande kulyangwila yetu babenya? Tandeni Vahevelu 5:14, na kusimutwiya ha bihula binatako:

• Nameme kunasa kutupwila kwakwasi kuleka bakwetu batwangwile byakulinga, tunapande kuzibuka mwakwangunwina bika?

• Bika bitukwasa mangana tulongese mwamubwa citakutaku cetu na kwangula mwamubwa byakulinga?

5. Singimikeni bitakutaku bya bakweni

Banu baliseza-seza, co banasa kwangula byuma bya kuliseza. Twasa kusingimika bati bitakutaku bya bakwetu? Tusimutwiyeniko ha byakumwenako bibali:

Cakumwenako 1: Hamo kuli ndokazi uje washaka kulipenta, co aya ku cikungulukilo kuje kuli bandokazi baje kubesi kuzituka nga bamona munu nalipente.

Tandeni Loma 15:1 na 1 Kolinte 10:23, 24. Kutundaho, simutwiyeni ha bihula binatako:

• Kwesekesa nebi bisoneka bika byanasa kulinga ou ndokazi? Mulinga bati nga mukweni abyana kulinga byuma bicimitabesa citakutaku ceni?

Cakumwenako 2: Hamo kuli ndolome uje nangula kujeneka kunwa bwala nameme azibuka ngwendi Mbimbiliya kuyabindikile kunwa bwala mu kwesekela. Co mubanamulanya ku cilika cimo, amona bandolome bakwabo bali na kunwa bwala.

Tandeni Muka-kwambulula 7:16 na Loma 14:1, 10. Kutundaho, simutwiyeni ha bihula binatako:

• Kwesekesa nebi bisoneka bika byanasa kulinga ou ndolome? Mulinga bati nga mukweni alinga byuma bicimibindika citakutaku ceni?

Byuma bimikwasa mwangule mwamubwa byakulinga

1. Lombeni Yehova amikwase kwangula mwamubwa byakulinga.—Yakomba 1:5.

2. Tondeseseni mu Mbimbiliya na mu mabulu etu muwane binangulo bije bimikwasa. Lombeni lalo bukwasi ku bandolome na bandokazi.

3. Lihuleni ngweni, ‘Byuma binjangula kulinga binjilingisa njikale na citakutaku ca kujela ndi? Njitanwisa bakwetu ndi?’

SIMPI YAKAMA

Twasa kwangula mwamubwa byakulinga nga tusinganyekesesa mwalizibila Yehova ha byuma bitwangula kulinga, na kumona indi obyo byuma byasa kukwasa bakwetu nambe kubakobelesa mu bukalu.

Kwitulukamo

• Mwasa kwangula bati byuma bije bizibisa Yehova kubwaha?

• Mwasa kulongesa bati citakutaku ceni?

• Mwasa kusingimika bati bitakutaku bya bakweni?

WANENI BIKWABO

Mwasa kwangula bati byuma bije bimikwasa mukanyamese busamba bweni na Njambi?

“Anguleni Byuma Bije Bimwesa Kasingimiko Kuli Njambi” (Kaposhi ka Kukengela ka April 15, 2011)

Mu bingila muka bikwabo mwakatunangwila Yehova?

Yehova Akatwamenena Banu Bendi (9:50)

Moneni byakwasele munalume umo angule mwamubwa byakulinga nameme kwamukaluwilile kulinga ngoco.

Yehova Akana Banu Bendi Byuma Byabibwa (5:46)

Byuma muka bikwabo bitukwasa tuzibise Yehova kubwaha ku mbunge nameme nga Mbimbiliya kuyendekele byuma mpundu bitunapande kulinga?

“Kuma Simbu Yoshe Kubanga Kukale Lishiko lya mu Mbimbiliya Ndi?” (Kaposhi ka Kukengela ka December 1, 2003)