7. Bumwene bwa Njambi buli na mashiko amabwa

Bifulumende binapande kutunga mashiko aje akwasa banu na kubanyungilila. Bumwene bwa Njambi nabwo buli na mashiko abanapande kukabangeya banu. Tandeni 1 Kolinte 6:9-11, na kusimutwiya ha bihula binatako:

• Kaye kanesi kufwa bati ngwe banu boshe bali na kukabangeya awa mashiko a Njambi?a

• Mumona bati, kuma Yehova napande kuleka baje bashaka kukala mu Bumwene bwendi ngwendi bononoke awa mashiko ndi? Mwafwa bika?

• Tuzibuka bati ngwetu baje kubesi na kukabangeya awa mashiko basa kutenguluka?—Taleni vesi 11.

Banu babangi kubesi kuzituka kusimutwiya ha ñanda ya kulilala. Oloni Mbimbiliya inendeka mwamubwa ñanda ya kulilala mu kasingimiko. Co biyendeka bitukwasa. Yehova ikeye Ishamatanga. Ngeci, atuzibuka mwamubwa, co azibuka na byuma bitukwasa. Akatuleke byuma bitwasa kulinga mangana tumuzibise kubwaha na byuma bije bitukwasa mangana tulikuwe kuyoya myaka yoshe.

1. Yehova wamona bati kulilala?

Kulilala kunapu bwana bwa kutunda kuli Yehova. Ashaka ngwendi munalume na munakazi baje banalyambata balikuwe obu bwana. Obu bwana bukakwasa lalo banu baje banalyambata bakite bana na kulimwesa cizemo mu ngila yaibwa. Mukemwo Mbimbiliya ngwayo: “Bwahelela na kujolela na munakazi wobe uje iwambatele mu bukwenje bwobe.” (Visimo 5:18, 19) Yehova ashaka ngwendi baje banalyambata bapwe ba kulongwa kuli umo na mukwabo, co kubapandele kulinga bukoi.—Tandeni Vahevelu 13:4.

2. Bilinga bya bukwizi binambateselela bika?

Mbimbiliya ngwayo “baka-bukwizi . . . kubakaswana Bumwene bwa Njambi.” (1 Kolinte 6:9, 10) Baje basonekele bisoneka bya Cigriki mubakele na kwendeka bya bilinga bya bukwizi, bapangesele lijwi lya por·neiʹa.a Eli lijwi linambateselela (1) kulilala kwa banu baje kubalyambatele, (2) kulilala kwa banu ba bushwamwa bumo na (3) kulilala na kasitu. Nga kutulingi bupangala, co tuzibisa Yehova kubwaha ku mbunge, co lalo kutuliwana na bukalu bukaija mwafwa ya kulinga ngoco.—1 Tesalonika 4:3.

TONDESESENI

3. Teweni bilinga bya bukwizi

Yosefa wapwile wa kulongwa, co walingile mwoshe mwaselele mangana bilinga byendi bipwe bya kujela. Tandeni Kushangumuka 39:1-12, na kusimutwiya ha bihula binatako:

• Bika byalingisile Yosefa atewe?—Taleni vesi 9.

• Kuma Yosefa walingile mwamubwa ndi? Mwafwa bika?

VIDIO: Teweni Bupangala (5:06)

Yehova kashaka ngwendi tulikobelese mu bilinga bya bukwizi. Tandeni 1 Kolinte 6:18, na kusimutwiya ha bihula binatako:

• Bika byasa kulingisa munu alinge bukwizi?

• Mwasa kutewa bati bilinga bya bukwizi?

4. Mwasa kuhyana byeseko

VIDIO: Kutanda Mbimbiliya Kumikwasa Muhyane Byeseko (3:02)

• Bika byanalingile ndolome itunamono mu vidio mwananangukile ngwendi bilinga byendi na bisinganyeka byendi byasa kumulingisa onowe kupwa wa kulongwa kuli munakazi wendi?

Bisimbu bimo kunasa kupwa kwakukalu nameme kuli muka-Kilistu wa kulongwa kutundisa bisinganyeka bya kujwala mu mbunge yendi. Bika bimikwasa mangana keti mutwaleleleho kusinganyeka byuma byabibi? Tandeni Filipu 4:8, na kusimutwiya ha bihula binatako:

• Byuma muka bitunapande kushulisa mu biyongola byetu?

• Kutanda Mbimbiliya na kuzezama mu cipangi ca Yehova kutukwasa bati mangana tuhyane byeseko?

5. Mashiko a Yehova atukwasa

VIDIO: Kujeneka Kukala na Mana (9:31)

• Bika byalingisile uje mukwenje aliwane mu bukalu?—Taleni Visimo 7:8, 9.

• Kwesekesa na Visimo 7:23, 26, bilinga bya bukwizi byasa kutukobelesa mu bukalu. Bukalu muka butwasa kujenjuka nga tukala na futisi yaibwa?

• Bibezikiso muka bitukalikuwa kulutwe nga tukala na futisi yaibwa?

Banu bamo bakendeka ngwabo Mbimbiliya kuyalingile mwamubwa kubindika banu ba bushwamwa bumo kulilala. Oloni Yehova wapwa Njambi wa cizemo, co ashaka ngwendi banu balikuwe kuyoya myaka yoshe. Nga tushaka kuyoya myaka yoshe, tunapande kwononoka mashiko a Njambi. Tandeni 1 Kolinte 6:9-11, na kusimutwiya ha cihula cinatako:

• Kwesekesa nomu mwakamwena Njambi byuma, kuma kulilala na munu wa bushwamwa bumo ikeyo lika futisi yaibi ndi?

Nga tushaka kuzibisa Njambi kubwaha, tubaboshe tunapande kutengululako bimo mu kuyoya kwetu. Kuma kulinga ngoco kwa seho ndi? Tandeni Myaso 19:8, 11, na kusimutwiya ha bihula binatako:

• Mumona bati, kuma mashiko a Njambi aje endeka bya kukala na futisi yaibwa amabwa ndi? Mwafwa bika?

SIMPI YAKAMA

Kulilala kunapu bwana bwa kutunda kuli Yehova bwanana munalume na munakazi baje banalyambata.

Kwitulukamo

• Bika byalibungila mu bilinga bya bukwizi?

• Bika bitukwasa mangana keti tulikobelese mu bilinga bya bukwizi?

• Kwanuka mashiko a Yehova aje endeka bya kukala na futisi yaibwa kutukwasa bati?

WANENI BIKWABO

Mwafwa bika munalume na munakazi baje kubalyambatele kubapandele kuyoya hamo?

“Bika Biyendeka Mbimbiliya ha Banu Baje Bayoya Hamo Okuni Kubalyambatele?” (Ñanda ya ha webusaiti)

Mbimbiliya kuyesi na kunena cizindo mukati ka banu ha kubindika futisi ya kulilala kwa banu ba bushwamwa bumo.

“Kuma Kulilala kwa Banu ba Bushwamwa Bumo Kunabihya Ndi?” (Ñanda ya ha webusaiti)

Mashiko a Njambi aje endeka bya kulilala atunyungilila bati?

“Kuma Kulilalela ku Kanwa Kunapu Kulilala Bene Ndi?” (Ñanda ya ha webusaiti)

Tandeni ñanda ya “Banjisingimikile,” mangana muzibisise byalingisile munalume umo uje wakele na futisi ya kulilala na bakwabo banalume atengulule futisi yendi na kushangumuka kuzibisa Njambi kubwaha.

“Mbimbiliya Ikatengulula Buyoye bwa Banu” (Kaposhi ka Kukengela ka April 1, 2011)

Banu bali na biyongola bya kuliseza-seza kutalesa ku kunwa bwala. Bamo bakanu lika kamandondo. Bamoco bakanu mu kutubakanesa. Bakwaboco na kunwa kubesi kunwa. Bika biyendeka Mbimbiliya ha kunwa bwala?

1. Kuma kunwa bwala kunabihya ndi?

Mbimbiliya kuyabindikile kunwa bwala. Mbimbiliya inendeka ha bwana bwa kuliseza-seza bwanatwana Njambi. Co inendeka ngwayo Njambi ‘nana lalo munu binyu ngeci bimuzibise kubwaha ku mbunge.’ (Myaso 104:14, 15) Banalume na banakazi bamo babanendeka mu Mbimbiliya nabo bisimbu bimo banwile bwala.—1 Timateo 5:23.

2. Binangulo muka bya mu Mbimbiliya bije bikwasa munu uje angula kunwa bwala?

Yehova nabindika kunwa manene bwala. (Ngalatiya 5:21) Mbimbiliya ngwayo: “Keti ulipandakane hamo na baka-kunwa manene binyu.” (Visimo 23:20) Ngeci, nga twangula kunwa bwala, ipwe ku mbunga nambe kwa likalyetu, kutwapandele kunwa mu kutubakanesa. Kutwapandele kunwa mu ngila ije itwonowesa kusinganyeka mwamubwa, kutulingisa twendeke nambe kulinga byuma bije kubyapandele, nambe kwaka bukangule bwetu mu bushonde. Nga kutwasa kunwa mu kwesekela, cibwaha manene kulikela kunwa.

3. Twasa kusingimika bati bibanangula bakwetu kutalesa ku kunwa bwala?

Munu na munu asa kulyangwila kunwa bwala nambe kujeneka kubunwa. Kutwapandele kupaya bakwetu nga bangula kunwa bwala mu kwesekela. Co lalo kutwapandele kusindiya bakwetu nga kubashaka kunwa bwala. (Loma 14:10) Kutwapandele kunwa bwala nga tuzibuka ngwetu nga tunanuko twasa kunena bukalu. (Tandeni Loma 14:21.) Kutwapandele ‘kulishakezekela bubwa bwetu lika babenya, oloni tunapande kuyongola bubwa bwa bakwetu.’—Tandeni 1 Kolinte 10:23, 24.

TONDESESENI

4. Mwamona bati kunwa bwala?

Yesu wamwene bati kunwa bwala? Cikomokeso ca kulibanga calingile citukwasa tuwane cikumbululo. Tandeni Yowano 2:1-11, na kusimutwiya ha bihula binatako:

• Eci cikomokeso cimwesa ngwaco Yesu wamona bati bwala na baje bakabunu?

• Yesu kendekele ngwendi kunwa bwala kunabihya. Co muka-Kilistu napande kumona bati munu angula kunwa bwala?

Nameme muka-Kilistu nazituka kunwa bwala, kukulumbununa ngwabo asa kunwa bwala simbu yoshe-yoshe. Tandeni Visimo 22:3, na kusimutwiya ha byuma binatako bije binasa kulingisa munu ajeneke kunwa bwala:

• Nga munu ashaka kwendesa mota nambe kupangesa likina limo.

• Nga munu ali na cikute.

• Nga ndotolo namibindika ngwendi keti munwe bwala.

• Nga kukamikaluwila kunwa mu kwesekela.

• Nga kuli mashiko aje kuwamitabesa kunwa bwala.

• Nga muli na munu uje nalikele kunwa bwala mwafwa nakala na kubunwa manene kunima.

Bika byasa kumikwasa mwangule mwamubwa byakulinga nga mushaka ngweni ha cilika ca bulo nambe ha cilika ceka hakale bwala? Kengeni VIDIO.

VIDIO: Kuma Kunapande Kukala Bwala Ndi? (2:41)

Tandeni Loma 13:13 na 1 Kolinte 10:31, 32. Munima ya kutanda cisoneka na cisoneka, simutwiyeni ha cihula cinatako:

• Eci cinangulo casa kumikwasa bati mangana mwangule byuma bije bizibisa Yehova kubwaha ku mbunge?

5. Zibukeni seteko ya bwala bumunapande kunwa

Nga mwangula kunwa bwala, anukeni ngweni Yehova kabindikile kunwa bwala, oloni nabindika kunwa manene bwala. Mwafwa bika? Tandeni Hoziya 4:11, 18, na kusimutwiya ha cihula cinatako:

• Bika byasa kutundamo nga munu anwa manene bwala?

Bika byasa kutukwasa mangana keti tunwe manene bwala? Tunapande kuzibuka seteko ya bwala butunasa kunwa mangana tunwe mu kwesekela. Tandeni Visimo 11:2, na kusimutwiya ha cihula cinatako:

• Mwafwa bika munu napande kuzibuka seteko ya bwala bwanasa kunwa?

6. Keti munwe bwala mu kutubakanesa

VIDIO: ‘Njenukwile Futisi Injakele Nayo’ (6:32)

• Kwesekesa na vidio, bwala bwalingisile Dmitry alinge bika?

• Kuma kwamupwililile kwakwasi kwecela kunwa bwala ndi?

• Bika byamukwasele ecele kunwa bwala?

Tandeni 1 Kolinte 6:10, 11, na kusimutwiya ha bihula binatako:

• Mbimbiliya yendeka bika ha kunwa manene bwala?

• Bika bimwesa ngwabyo munu uje akanu manene bwala asa kutenguluka?

Tandeni Mateo 5:30, na kusimutwiya ha cihula cinatako:

• Kubatula liboko kulumbununa kulingako bimo mangana tuzibise Yehova kubwaha. Bika bimwasa kulinga nga kuli na kumikaluwila kwecela kunwa manene bwala?a

Tandeni 1 Kolinte 15:33, na kusimutwiya ha cihula cinatako:

• Bika byasa kutundamo nga mulikwatasana na banu baje bakanu manene bwala?

SIMPI YAKAMA

Yehova wanene banu bwala mangana balikuwebwo, oloni nabindika kunwa manene bwala na butakwa.

Kwitulukamo

• Mbimbiliya yendeka bika ha kunwa bwala?

• Bukalu muka bwasa kutunda mu kunwa manene bwala?

• Twasa kusingimika bati bibanangula bakwetu kutalesa ku kunwa bwala?

WANENI BIKWABO

Bika bikwasa babaha bangule mwamubwa byakulinga ha ñanda ya bwala?

Singanyekeni ha Bukalu bwa Kunwa Manene Bwala (2:31)

Nangukeni byuma bimwasa kulinga mangana mwecele kunwa manene bwala.

“Nweni Bwala mu Ngila Inapande” (Kaposhi ka Kukengela ka January 1, 2010)

Kuma baka-Kilistu banapande kumbolesa binganja nga kuli bimo bibanwa ndi?

“Bihula bya Baka-kutanda” (Kaposhi ka Kukengela ka February 15, 2007)

Tandeni ñanda ya “Njapwile Ngwe Mungomo Uje Kuwasa Kushula” mangana muzibe byakwasele munalume umo ecele kunwa manene bwala.

“Mbimbiliya Ikatengulula Buyoye bwa Banu” (Kaposhi ka Kukengela ka May 1, 2012)

Bisimbu bimo munasa kusebuka nameme mwazema Yehova, co lalo mukalingi mwoshe mumukasela mangana keti mulinge byuma bije kashakele. Bubi bumo bwapwa bwakama kutubakana bukwabo. (1 Kolinte 6:9, 10) Nga mwalingi bubi bwakama, anukeni ngweni Yehova anga wamizema, co ashaka kumikonekela na kumikwasa.

1. Bika bitunapande kulinga mangana Yehova atukonekele?

Baje bazema Yehova bakalizibi kubihya ku mbunge nga bananguka ngwabo banalingi bubi bwakama. Oloni majwi a Yehova akabakwasa. Yehova ngwendi: ‘Nambe bubi bweni bubenga ngengu, oloni bukatoka to ngwe mema a kukonda.’ (Isaya 1:18) Nga twatenguluka mu busunga, Yehova atukonekela. Twasa kulinga bati ngoco? Nga tunalingi bubi, tunapande kwecela bubi butunalingi na kulomba Yehova ngwetu atukonekele. Co lalo tunapande kulinga mwoshe mutwasela mangana tumbile kuti bisinganyeka byabibi nambe kalingolingo kaje kanatulingisile tulinge obwo bubi. Kutundaho, tunapande kulinga mwoshe mutwasela mangana tuyoye mu kulitombola na mashiko a Yehova.—Tandeni Isaya 55:6, 7.

2. Yehova akapangesa bati bakulunu mu kutukwasa nga tunalingi bubi?

Nga tunalingi bubi bwakama, Yehova ashaka ngwendi ‘tuleke bakulunu ba cikungulukilo.’ (Tandeni Yakomba 5:14, 15.) Bakulunu bazema Yehova hamolika na bimanga bendi. Co Yehova akabatwamenena mangana batukwase tukanyamese busamba bwetu nendi.—Ngalatiya 6:1.

Bakulunu basa kutukwasa bati nga tunalingi bubi bwakama? Bakulunu babali nambe batatu bapangesa bisoneka mangana batunangule. Co lalo banasa kutulekako byuma bimo bije byasa kutukwasa na kutushongangeya mangana keti twilukile kulinga bubi butunalingi. Bakulunu bakatundisa munu mu cikungulukilo uje nalingi bubi bwakama, co lalo shendi kutenguluka mangana banyungilile cikungulukilo.

TONDESESENI

3. Kulitabela bubi butunalingi kutukwasa

Bubi bwoshe bwalinga munu buzibisa Yehova kubihya ku mbunge. Ngeci, tunapande kulitabela kuli ikeye nga kuli bubi bumo butunalingi. Tandeni Myaso 32:1-5, na kusimutwiya ha cihula cinatako:

• Mwafwa bika tunapande kulitabela kuli Yehova bubi butunalingi kutubakana kubushweka?

VIDIO: ‘Yehova Akanyanyamesa Boshe Baje Bazema’ (3:01)

• Kwesekesa na vidio, bakulunu bakwasele bati Canon mangana busamba bwendi na Yehova bukanyame lalo?

Tunapande kwendeka busunga omwo tuleka bakulunu bubi butunalingi mwafwa batukwasa. Tandeni Yakomba 5:16, na kusimutwiya ha cihula cinatako:

• Nga twendeka busunga omwo tuleka bakulunu bubi butunalingi, kubapwila bati kwakwasi kutukwasa?

4. Yehova akazibila ngozi baje banalingi bubi

Munu uje nalingi bubi bwakama, co lalo shendi kukabangeya binangulo bya Yehova, bamutundisa mu cikungulukilo. Co kutwapandele kulikwatasana nendi. Tandeni 1 Kolinte 5:6, 11. Kutundaho, simutwiyeni ha cihula cinatako:

• Musima waundondo unasa kufutunwisa mukasha wa likende. Bukalu muka bwasa kutunda mu kulikwatasana na munu uje natundu mu cikungulukilo?

Yehova mwakalingilamo baje banalingi bubi kumwesa bati ngwabo watuzema, co akatuzibisisa na kutuzibila ngozi?

5. Yehova atukonekela nga tutenguluka

Cakumwenako cendekele Yesu citukwasa tuzibisise mwakalizibila Yehova nga munu uje nalingi bubi atenguluka. Tandeni Luka 15:1-7, na kusimutwiya ha cihula cinatako:

• Eci cakumwenako cimilongesa bika hali Yehova?

Tandeni Ezekiyele 33:11, na kusimutwiya ha cihula cinatako:

• Kutenguluka ku bubi kunambateselela bika?

SIMPI YAKAMA

Nga tunalingi bubi bwakama, co twalilula na kutenguluka, Yehova asa kutukonekela.

Kwitulukamo

• Mwafwa bika tunapande kulitabela kuli Yehova bubi butunalingi?

• Bika bitunapande kulinga mangana Yehova atukonekele nga tunalingi bubi?

• Bika bitunapande kulekela bakulunu nga tunalingi bubi bwakama?

WANENI BIKWABO

Nangukeni omwo munalume umo walimwenenene ngozi ya Yehova ije ibanendeka ku mukanda wa Isaya 1:18.

Yehova Wakala na Ngozi (5:02)

Kutundisa munu mu cikungulukilo kukwasa bati boshe?

“Bakulunu Basa Kumwesa Bati Cizemo na Ngozi ku Munu Uje Nalingi Bubi?” (Kaposhi ka Kukengela ka August 15, 2024)

Mwasa kulumbunwina bati munu uje keti Mukaleho seho ya kutundisa munu mu cikungulukilo?

“Bakulunu Basa Kukwasa Bati Munu Uje Natundu mu Cikungulukilo?” (Kaposhi ka Kukengela ka August 15, 2024)

Tandeni ñanda ya “Njapandele Kwiluka Kuli Yehova” mangana mumone byalingisile munalume umo watundile mu busunga alizibe ngwendi Yehova namukoko lalo.

“Mbimbiliya Ikatengulula Buyoye bwa Banu” (Kaposhi ka Kukengela ka April 1, 2012)