Biñanda bya Kupangesa mu Mukanda wa Biwano wa Buyoye Bwetu Baka-Kilistu na Cipangi Cetu
JUNE 3-9
BISIMPI BYA SEHO BYA MU LIJWI LYA NJAMBI | NGALATIYA 4-6
“Bika Bitulilongesa ku ‘Cisimo’ Eci?”
(Ngalatiya 4:24, 25) Byuma ebi twasa kubizibuka ngwe cisimo, banakazi babali banemanena mazibasano abali. Uje wakele na mwana ibakitilile mu bundungo ikeye Hangale, co nemanena lizibasano lije libalingile ku Munkinda wa Sinai. 25 Hangale, nemanena Munkinda wa Sinai mu Alambiya, nemanena lizibasano lya kwinika nganda ya Yelusalema, ije ili mu bundungo na banu bamwo boshe.
it-1 1018 ¶2
Hangale
Kapositolo Paulu wendekele ngwendi Hangale nemanena Baisalele ba ku cisemwa. Yehova walingile nabo cikumiyo ca Lishiko ku Munkinda wa Sinai. Cije cikumiyo calingisile bana bapwe bindungo. Baisalele bonowele kukabangeya cije cikumiyo, mwafwa bapwile baka-bubi. Cije cikumiyo kucabalingisile bapwe ba kupatuka, mwafwa bapwile baka-bubi, co bapandele kutsa, ngeci bapwile bindungo. (Yow 8:34; Lom 8:1-3) Hangale wemanenene Yelusalema ije yakeleko mu bisimbu bya Paulu, mwafwa Baisalele baje bakele mu Yelusalema babatwalele mu bundungo hamo na bana babo. Oloni Baisalele ba ku Sipilitu, banapu “Yelusalema ya mwilu,” uje napu munakazi wa Njambi wa cifwisa. Eyi Yelusalema ya mwilu kanda ikale mu bundungo ngwe mwa Sala uje kakele mu bundungo. Bana ba Yelusalema ya mwilu baje babanapatula kuli Mwana bakabapakesa kuli bana ba Yelusalema uje ibatwalele mu bundungo ngwe mubakele na kupakesela Isake kuli Ishimela. Hangale na munendi mubabashekele, kwemanenene Yehova mwabyanene Baisalele ba ku cisemwa.—Nga 4:21-31; kengeni lalo Yow 8:31-40.
(Ngalatiya 4:26, 27) Oloni Yelusalema ya mwilu inapu ya kupatuka, co ikeyo inapu cisemi cetu. 27 Omwo bisoneka byendeka ngwabyo, “Bwahelela, yobe munakazi wa kujeneka bana. Tambeka na kujolela, yobe kuwazibile mushongo wakukita mwana. Omwo uje munakazi ibasezele akakala na bana babangi kutubakana munakazi uje nashomboka simbu yakama.”
w14 10/15 10 ¶11
Kulaheleni Bumwene bwa Njambi
11 Nameme cikumiyo ca Abilahama na Njambi calishulisilile laja ku batekwilila ba Abilahama omwo bakobelele mu Lifuti lya Cikulaheso, oloni Bisoneka bimwesa lalo ngwabyo cije cikumiyo cikalishulisilila lalo ku sipilitu. (Nga 4:22-25) Mu cikumiyo eci ca ku sipilitu, kapositolo Paulu bamuhwiminine asoneke ngwendi, Kilistu ikeye wapwa mutekulwila wa seho wa Abilahama, co lalo baka-Kilistu ba kubwabesa ba kupwa 144,000 nabo bapwa batekwilila ba Abilahama. (Nga 3:16, 29; Kuj 5:9, 10; 14:1, 4) Munakazi uje emanena Yelusalema ya mwilu nambe ngwetu mutamba wa mwilu wa munga ya Njambi ikeyo inabakiti. (Nga 4:26, 31) Bana ba munakazi bakebo bakanena bibezikiso hano hasi ngwe mucamwesele cikumiyo calikumiyiye Yehova na Abilahama.
(Ngalatiya 4:28-31) Co ololo, yeni, bakwetu, munapu bana ba Njambi ngwe ku cikulaheso cendi, ngwe mwafwile Isake. 29 Ha simbu ije uje mwana ibakitile ku cisemwa ca banu wapakesele uje ibakitile omwo Munzinzime wa Njambi, co cinapu cuma cimolika ololo. 30 Oloni bisoneka byendeka batijo? Byendeka ngwabyo, “Sheka munakazi wa ndungo na munendi hamo, omwo mwana wa munakazi wa ndungo kakakala na mutambela wa bufuko bwa ishe hamo lika na mwana wa munakazi wa kupatuka.” 31 Ngeci bene, bakwetu, yetu keti tu bana ba munakazi wa ndungo embwe, oloni tu bana ba munakazi wa kupatuka.
Kutondesesa Bisimpi bya Seho
(Ngalatiya 4:6) Mukumwesa ngeci yeni munapu bana bendi, Njambi watumine Munzinzime wa Munendi mu bimbunge byetu, Munzinzime uje muka-kutambeka ngwendi, “Tate [Abba, NWT], Tate.”
Muzibuka Ndi?
Mwafwa bika Yesu watumbwile Yehova ngwendi “[Abba] Tate” mu lilombelo lyendi?
Eli lijwi lya Cialamaiki lya ʼab·baʼʹ linasa kulumbununa “Tate” nambe “Tate yange.” Eli lijwi liwaniwa lutatu mu Mbimbiliya. Co Yesu walipangesele mwakele na kulombela kuli Ishe wa mwilu Yehova. Eli lijwi lilumbununa bika?
Libulu lya The International Standard Bible Encyclopedia lyendekele ngwalyo: “Ha simbu yayoyele Yesu hano hasi, lijwi lya ʼabbāʼ balipangesele manene kutalesa ku banu baje balizema manene co lalo lyamwesele kasingimiko kabakelenako bana ku bisemi babo.” Kusanesa munu lije lijwi kwamwesele ngwabo wamuzema. Bisemi balongesele bana babo eli lijwi oku bacili babandondo. Yesu wapangesele eli lijwi mwalombelele kuli Ishe. Mwakele mu Lihya lya Ngetesemani ha butsiki bwatsile, watumbwile Ishe ngwendi “Abba Tate.”—Mak 14:36, NWT.
Eli libulu lyendekele lalo ngwalyo: “Mu simbu ya Bangiliki na baka-Loma, eli lijwi lya ʼAbbāʼ kubalipangesele manene mu mabulu a Bayunda, mwafwa balizililile manene ngeci kupangesa eli lijwi kuli Njambi kwamwesele ngwe banamushaula. Nameme ngoco, Yesu walipangesele mu lilombelo lyendi mu kumwesa cizemo cakele mu kati kendi na Njambi.” Eli lijwi lya “Abba” liwaniwa lalo ha mitamba ibali ya mu Bisoneka byasonekele Paulu, kumwesa ngwabo baka-Kilistu ba mu cita ca myaka ca kulibanga nabo balipangesele mubalombelele.—Lom 8:15; Nga 4:6.
(Ngalatiya 6:17) Mukumanesela ngwange, keti kukale umo anjane bukalu, omwo bibebe binjilinabyo ha mubila wange bimwesa ngeci yange nji ndungo ya Yesu.
w10 11/1 15
Muzibuka Ndi?
Kapositolo Paulu walumbunwine bika mwendekele ngwendi wakele na bibebe ha mubila wendi bije byamwesele ngeci wapwile ndungo ya Yesu?—Nga 6:17
Majwi endekele Paulu hamo alingisile banu baje bakele na kumutolilila basinganyeke byuma byabingi. Cakumwenako, kusañulu bakele na kubabula banu na cikubo ca tuhya mangana bazibuke cinzinda wa mu nzita, mwizi wa mu tembele na bangamba baje bezile na kubanda. Munu ibababwile wakele na cibebe co wapwile wa kushauka.
Oloni banu bamo balyakele bibebe nameme kubakele na mulonga. Bamo balyakele bibebe mangana babazibuke ngwabo batundile ku muyati umo nambe ku bulombelo bumo. Cakumwenako, libulu lya Theological Dictionary of the New Testament ngwalyo: “Baka-Silya balikundikile ku binjambi byabo bibatumbwile ngwabo Hadad na Atargatis ha kulyaka bibebe ha maboko nambe mu singo. . . Beka balisonene liputa lya nemo imo mu kumwesa ngwabo balikundikile kuli Dionysus.”
Baka-kutondesesa bamo bakasinganyeka ngwabo hamo bibebe byatumbwile Paulu byapwile mapakeso aliwanene nawo mu cipangi ca bumishinali. (2 Ko 11:23-27) Paulu mwendekele bya bibebe walumbunwine ngwendi yoyesi yendi ikeyo yamulingisile bamuzibuke ngwabo wapwile muka-Kilistu, keti bibebe mpundu bya ha mubila, embwe.
Kutanda Mbimbiliya
(Ngalatiya 4:1-20) Oloni ngwange simbu swana acili mukwenje napu mumo na ndungo, nameme ikeye byuma byoshe binapu byendi. 2 Omo acili mukwenje, kubali banu baka-kumulela na kumukengelako byendi noho simbu ije yemika ishe. 3 Mu ngila ije bene, netu lalo twapwile tu bindungo ba buswana bwa minzinzime ya kaye simbu te kanda tucikole mu munzinzime. 4 Oloni omwo simbu yaibwa yetele, Njambi watumine Munendi, wa kusemuka ku munakazi, wa kusemuka ku majwi a Lishiko, 5 mu kukula baje bali mwisi ya Mashiko, ngeci tupwe tu bana ba Njambi. 6 Mu kumwesa ngeci yeni munapu bana bendi, Njambi watumine Munzinzime wa Munendi mu bimbunge byetu, Munzinzime uje muka-kutambeka ngwendi, “Tate, Tate.” 7 Ngeci bene, yobe keti u ndungo lalo oloni unapu u mwana. Co nga unapu u munendi, Njambi akwana byoshe bije alinabyo bya bana bendi. 8 Mu myaka ya kunima kumwazibukile Njambi, ngeci bene, mwapwile mu bindungo na kukundama kuli minzinzime ije kuyapwile binjambi. 9 Oloni ololo munazibuka Njambi, nambe njendeke ngwange, ololo Njambi namizibuka, batijo lalo mushaka kwiluka kunima kuli minzinzime yangoco ya kuzeya? Omwo bikajo mushaka kupwa bindungo babo lalo simbu yoshe? 10 Yeni mukanyunga-nyunga matangwa amwo na bingonde na bisimbu na myaka. 11Njili na kulishoshomwena hali yeni. Kuma bipangi byange byoshe binapu byangoco hali yeni ndi? 12 Njamilombo, bakwetu, pweni ngwe yange. Omwo yange njinapu ngwe yeni. Yeni kumwalingile cuma cimo cacibi kuli yange cahi. 13 Anukeni omwo bikajo njambulwile muzimbu kuli yeni ha simbu ya kulibanga, capwile ngeci omwo yange njakele na kubinja. 14 Oloni nameme kwinduka kwange kwa mubila kwapwile ceseko cakama manene kuli yeni, yeni kumwanjiyengwile nambe kunjibyana. Oloni mwanjitambwile ngwe kangelo wa kutunda mwilu, mwanjitambwile ngwe Kilistu Yesu. 15 Mwabwahelelele manene. Bikajo binalingiwa? Yange njasa kwendeka ngwange nga mwasele, nga mwacakubwile mesho eni, na kunjanawo. 16 Kuma yange ololo njinemuka citozi ceni ha kumileka busunga ndi? 17 Obo banu beka bamwesa sholobya yakama muli yeni, oloni biyongola byabo keti byabibwa embwe. Eci bashaka lika cinapu kumyangununa bamitundise kuli yange, ngeci yeni mukakale na sholobya imolika muli bakebo ngwe bakebo balinayo muli yeni. 18 Co ololo, mwamubwa kukala na sholobya yakama ya cifwa ca ngacije nga butumbe bunapu bwabubwa, simbu yoshe eci cinapu ca busunga, co keti mukemwo lika omwo yange njili hamo neni. 19 Bana bange ba cizemo. Njilukilamo lalo, ngwe munakazi ali na mushongo wa kukita mwana, njili na kuziba cifwa cimo ca mushongo omwo yeni noho cisemwa ca Kilistu banacipanga muli yeni. 20 Njilibeya manene ngwe njikale hamo neni ololo, ngeci njilumbunune lijwi lyange, omwo njalishoshomwenene hali yeni.
JUNE 10-16
BISIMPI BYA SEHO BYA MU LIJWI LYA NJAMBI | EFESO 1-3
“Ciyulo ca Yehova Nomwo Mucikapangela”
(Efeso 1:8, 9) bije byanatwana mu seteko yakama. Mu mana endi oshe na mu kuzibuka kwendi kwoshe 9 Njambi walingile bije watumbwile kulinga, co watusholwelele butumbe bwendi bwa kushweka [Lihungu lya Kujela, NWT] buje bwayongwele laja ngeci buhwile hali Kilistu.
it-2 837 ¶4
Lihungu lya Kujela
Bumwene bwa Mesiya. Mikanda ya Paulu yajombolola mwamubwa lihungu lya kujela lya Kilistu. Mukanda wa Efeso 1:9-11, unendeka mwanalumbunwina Njambi lihungu lya kujela lya cizango cendi ngwawo: “Njambi walingile bije watumbwile kulinga, co watusholwelele butumbe bwendi bwa kushweka [lihungu lya kujela] buje bwayongwele laja ngeci buhwile hali Kilistu. Butumbe obu, buje Njambi akabumanesa omwo simbu inapumo, bukakungulwila byakutanga byoshe bya mwilu nebi bya hano hasi, Kilistu akapwa mutwe wabyo. Byuma byoshe bilingiwa kupwisa ngwe ku butumbe bwa Njambi na biyongola byendi, co Njambi watwangwile kupwa tu bana bendi muli Kilistu omwo ha butumbe bwendi, buje nsina yabwo ikeyo inapu bije byayongwele tunde ha kulibanga.” Eli lihungu lya kujela linambateselela na Bumwene bwa Njambi bwakayula Yesu. Baje bakayula hamo na Kilistu mu Bumwene bwa mwilu, bakebo banapu byuma “byakutanga byoshe bya mwilu” byalumbunwine Paulu. Baje bakakala hano hasi bakebo baatumbwile ngwendi byuma byakutanga “bya hano hasi.” Yesu wakwasele bandongesi bendi bazibuke ngwabo lihungu lya kujela lyalitombwele na Bumwene bwa Njambi omwo wendekele ngwendi: “Yeni banamyana kuzibuka byuma [lihungu lya kujela] bya Bumwene bwa Njambi.”—Mak 4:11.
(Efeso 1:10) Butumbe obu, buje Njambi akabumanesa omwo simbu inapumo, bukakungulwila byakutanga byoshe hamo lika, byuma byoshe bya mwilu nebi bya hasi, Kilistu akapwa mutwe wabyo.
w12 7/15 27-28 ¶3-4
Yehova Akwatasanesa Naanga Yendi
Mosesa walekele Baisalele ngwendi: “Shukulu Kalunga ikeye lika Shukulu Kalunga Njambi yetu” (Kwi 6:4) Bilinga bya Yehova na biyongola byendi byalitombola. Simbu muyetele, Njambi washimbikile Bumwene bwendi. Buje Bumwene bukwatasanesa byuma byatangele. (Efe 1:8-10) Bulinga byuma bibali. Ca kulibanga, bukwasa bakubwabesa base kuyoya mwilu, muje Yesu Kilistu ikeye Mutwe wabo. Eci cipangi, cashangumukile ha Pentekosita ya mu 33 C.E. omwo Yehova washangumukile kwangula baje bakayula hamo na Kilistu mwilu. (Vil 2:1-4) Bakubwabesa banapu “bana ba Njambi” mwafwa ndando ya kupatula yanana Kilistu yabapwisa baka-busunga.—Lom 3:23, 24; 5:1; 8:15-17.
4 Ca mu cibali, buli na kukwasa baje bakayoya hano hasi balibwahesele kukayoya mu Paladaisi mu Bumwene bwa Mesiya. Mu Paladaisi mukashula “mbunga yakama.” (Kuj 7:9, 13-17; 21:1-5) Ha myaka 1,000 yakayula Yesu, batsi bakasanguka na kulikwatasana hamo na mbunga yakama. (Kuj 20:12, 13) Tukalikwatasana manene na baje bakasanguka. Munima ya myaka 1,000, ‘byuma bya hasi’ bakabyeseka lwa mamaneselelo. Baje bakatwalelelaho kupwa ba kulongwa bakapwa “bana ba Njambi” ba hasi.—Lom 8:21; Kuj 20:7, 8.
Kutondesesa Bisimpi bya Seho
(Efeso 3:13) Ngeci bene, njimilomba ngwange keti muzeye ha ñababa yange njili na kuwana omwo hali yeni, byoshe ebi binapu bije bimuwanaho [bumpau, NWT].
Keti Mutabese Cuma Coshe Coshe Cimyonowese Kukatambula Bumpau
15 Nga tukakateya kulinga cizango ca Njambi, co tukwasa bakwetu batambule bumpau. Paulu wasonekelele cikungulukilo ca ku Efeso ngwendi: “Njimilomba ngwange keti muzeye ha ñababa yange njili na kuwana omwo hali yeni, byoshe ebi binapu bije bimuwanaho [bumpau, NWT].” (Efe 3:13) Tuyando twaliwanene natwo Paulu twalingisile bati baka-Efeso batambule bumpau? Paulu watwaleleleho kwambulula nameme waliwanene na bukalu, co wakwasele baka-Efeso bamone ngwabo babezikile ha kupwa baka-Kilistu. Kupwa muka-Kilistu capwile cipangi cakama, co lalo ca seho. Ngwe Paulu wazeyele munima ya mapakeso, ngwe wamwesele ngwendi busamba bwabo na Yehova na cipangi ca kwambulula na lilabelelo libakele nalyo byapwile bya ngoco. Kukolesa kwa Paulu kwalingisile banu babangi baije mu bulombelo bwa busunga. Co wakwasele baka-Kilistu bamone ngwabo kubapandele kutabesa cuma coshe coshe cibonowesa kupwa bandongesi.
(Efeso 3:19) Eyo, munapande kuzibuka cizemo cendi, nambe kumwasa kucizibuka mwamubwa, co mushulilile na cifwa ca Njambi.
cl 299 ¶21
“Munapande Kuzibuka Cizemo Cendi [Kilistu]”
21 Kuli byuma byabingi byalibungila mu lijwi lya Cingiliki libananungulula ngwabo “kuzibuka.” Kuzibuka tunapande kucimwesa mu bilinga. Nga tulyana kukwasa bakwetu na kubakonekela kutundilila kwisi ya mbunge, co tutembwinina Yesu mu kumwesa cizemo ku bakwetu. Nga tulinga ngoco, co tumwesa kukandelela ku cizemo cendi. Co lalo kutukwasa ‘tuzibuke cizemo cendi, nambe kutwasa kucizibuka coshe.’ Twanukeni ngwetu kutembwinina Kilistu kutukwasa tushwenye muyehi na Yehova Njambi yetu wa cizemo uje ya tembwininine Yesu.
Kutanda Mbimbiliya
(Efeso 1:1-14) Mukanda wa kutunda kuli yange Paulu, ku cizango ca Njambi njinapu muluwa wa Kilistu Yesu. Njili na kusonekela kuli banu ba Njambi baje bali mu Efeso, kuli baje baka-kukulahela kuli Kilistu Yesu. 2 Njambi Tate yetu na Mwene Yesu Kilistu bamyane kutetela na kwoloka. 3 Tukandeleleni kuli Njambi na Ishe ya Mwene yetu Yesu Kilistu. Omwo ha kukala kwetu muli Kilistu, Njambi natubezikisa ha kutwana bwana bwoshe bwa munzinzime mu lifuti lya mwilu. 4 Nambe te kaye kanda bakatange, Njambi watwangwile laja tupwe tu bendi muli Kilistu, ngeci tupweni ba kujela na kujeneka mulonga ku mesho endi. Omwo cizemo cendi 5 Njambi waciyongwele laja ngeci hali Yesu Kilistu ikeye akatupwisa tu bana bendi, eci capwile cakumubwasa na butumbe bwendi babenya. 6 Tushangazaleni Njambi ku bumpau bwa kutetela kwendi, omwo ha bwana buje bwanatwana muli Munendi uje yazema. 7 Omwo tunapatuka ha maninga a Kilistu, ngeci na bubi bwetu banabusambesa, kutetela kwa Njambi kunapu kwakama, 8 bije byanatwana mu seteko yakama. Mu mana endi oshe na mukuzibuka kwendi kwoshe 9 Njambi walingile bije watumbwile kulinga, co watusholwelele butumbe bwendi bwa kushweka buje bwayongwele laja ngeci buhwile hali Kilistu. 10 Butumbe obu, buje Njambi akabumanesa omwo simbu inapumo, bukakungulwila bya kutanga byoshe hamo lika, byuma byoshe bya mwilu nebi bya hasi, Kilistu akapwa mutwe wabyo. 11 Byuma byoshe bilingiwa kupwisa ngwe ku butumbe bwa Njambi na biyongola byendi, co Njambi watwangwile kupwa tu bana bendi muli Kilistu omwo ha butumbe bwendi, buje ntsina yabwo ikeyo inapu bije byayongwele tunde ha kulibanga. 12 Ngeci bene, yetu ba kulibanga twakala na cinyangabili muli Kilistu, tushangazaleni bumpau bwa Njambi. 13 Ngeci bene, neni lalo mwapwile mu banu ba Njambi omwo mwazibile lijwi lya busunga, Biñanda Byabibwa bije byaminenele kwoboka. Mwakulahelele muli Kilistu, co Njambi namyaka cizibukiso ca kupwa mubendi ha kumyana Munzinzime wa Kujela uje yamikulahesele. 14 Munzinzime ikeye cishimbikiya ngeci tukatambule bije Njambi nakulahesa banu bendi, co tunasimpi ngeci Njambi akana kupatuka kwa mutunu kuli baje banapu bendi. Tulemeseni bumpau bwendi.
JUNE 17-23
BISIMPI BYA SEHO BYA MU LIJWI LYA NJAMBI | EFESO 4-6
“Zaleni Bitwa Byoshe Bije Byanamyana Njambi”
(Efeso 6:11-13) Zaleni bitwa byoshe bije byanamyana Njambi, ngeci mwase kwimana na kulwisa matumbe amabi a Liyabolo. 12 Omwo kutwesi na kulwa na banu embwe, oloni tuli na kulwa na binzili byabibi bya minzinzime ya ha bukambwila na baka-kuswana na baka-moko ya kushika na aba baka-kuswana na nzili mu lisusulungu eli lya myaka ino iliko. 13 Ngeci bene, zaleni bitwa bya Njambi ololo. Co omwo litangwa lyalibi liketa, mukase kwimana na kulwisa uje citozi akamilwisa, co omwo munalu na kweta ku shongo, mukasa kwimana mbe.
Eni Banike Hyaneni Liyabolo
Kapositolo Paulu wesekesele buyoye bwa baka-Kilistu ku maswalale baje bali na kulwa nzita. Oloni nzita yetu inapu ya ku sipilitu keti ya ku mubila. Co bitozi betu kubali. Satana na bandemone bendi bali na myaka yaingi mu kulwa nzita, co bapwa bitongwe. Ngeci, tunasa kusinganyeka ngwetu kutwasa kubahyana. Tunasa lalo kusinganyeka ngwetu banike baka-Kilistu kubesi na nzili ya kuhyana Satana. Banike basa kuhyana, co bali na kuhyana. Basa kuhyana bati Satana na bandemone bendi? Basa kuhyana nga ‘bakulahela nzili ya Mwene.’ Kuli byuma bikwabo lalo bili na kubakwasa. Banazala ‘bitwa byoshe bya nzita byanabana Njambi’ ngwe mubakalingi maswalale babanalongesa mwamubwa.—Efe 6:10-12.
(Efeso 6:14, 15) Ngeci bene, libwaheseleni cimweja, na busunga munalizitikabwo ngwe mwiba mu bimbunda byeni na kulongwa ngwe ntelo ha binulo byeni, 15 co ngwe biñaku ku myanja yeni, mu kulibwahesela cimweja kwambulula Biñanda Byabibwa bya kwoloka.
Eni Banike Hyaneni Liyabolo
4 Mu ngila imo lika, busunga butuli na kulilongesa mu Lijwi lya Njambi buli na kutunyungilila ku bilongesa bya makuli. (Yow 8:31, 32; 1 Yow 4:1) Nga tuzema manene busunga bwa mu Lijwi lya Njambi, co kutupwila kwakwasi kwambata ‘ntelo yetu ya ha nulo,’ kulumbununa kuyoya mu kulitombola na mashiko a Njambi. (Mya 111:7, 8; 1 Yow. 5:3) Co lalo, nga tuzibisisa mwamubwa busunga bwa mu Lijwi lya Njambi, co twasa kubunyungilila kuli baje bali na kubulwisa.—1 Pe 3:15.
7 Mashiko a Yehova anapu ngwe ntelo mwafwa akanyungilila bimbunge byetu bya cifwisa. (Vis 4:23) Ngwe mwa liswalale uje kasa kuseza ntelo yendi ya kukola na kwambata ntelo ya kujeneka kukola, netu kutwapandele kwombwanesa mashiko a Yehova mu kushaka lika kulinga byuma mutushakela. Kukulahela nzili yetu kukwasa kutunyungilila. (Vis 3:5, 6) Simbu yoshe tunapande kumona ngwetu “ntelo” yanatwana Yehova inyungilila bimbunge byetu.
10 Biñaku bya maswalale ba Baloma byapwile bya kuya nabyo ku nzita, oloni biñaku bya cifwisa bibanazala baka-Kilistu bibakwasa kwambulula biñanda byabibwa. (Isa 52:7; Lom 10:15) Tunapande kupwa ba kusimpa mangana twase kwambulula ku bakwetu hoshe hatuwanena simbu. Bo wa myaka 20 wendekele ngwendi: “Njakele na kuziba lyoba kwambulwila bakwetu banjekele na kukobela nabo sikola. Njakele na kuziba shwamwa. Kunjizibuka byakele na kunjilingisa ngoco. Hano njabwahelela kwambulwila babusamba bange.”
(Efeso 6:16, 17) Simbu yoshe ambateni kukulahela ngwe ntelo, omwo na ikeyo mwase kuzima mikili ya tuhya ya Uje Muka-bubi. 17 Co zaleni tepa ya kwoboka, na lijwi lya Njambi ngwe moko ya mukwale ije yanamyana Munzinzime.
Eni Banike Hyaneni Liyabolo
13 “Mikili ya tuhya” yakapangesa Satana inapu kwendeka makuli hali Yehova. Akendeka ngwendi Njambi katwakele mbunge. Ida wa myaka 19 walizibile kupwa wa ngoco. Wendekele ngwendi: “Yehova wakala kulako nange, co kasa kupwa kabusamba kange.” Wahyanene bati obu bukalu? Wendekele lalo ngwendi: “Kuya ku biwano kukekwo kwakanyamesele likulahelo lyange. Ha simbu injakele ku biwano kunjakele na kukumbulula. Njalizibile ngwange naumo wahi asa kuliziba kubwaha nga njikumbulula. Ha simbu ino, njikalibwahesela kukumbulula lubali nambe lutatu nga njili ku biwano. Keti kwakwasi kulinga ngoco, oloni njikashubuluka munjikakumbulula. Co bandolome na bandokazi bakanjitakamesa manene. Munjikeluka kwimbo kutunda ku biwano, njikalizibi ngwange Yehova wanjizema.”
16 Ngwe mwa ije tepa muyanyungililile mutwe wa liswalale, na ‘lilabelelo lyetu lya kwoboka’ linyungilila mana na kuzibisisa kwetu. (1 Te 5:8; Vis 3:21) Lilabelelo likatukwasa kwaka mana ku byuma byanatukulahesa Njambi na kumona byuma mu ngila yaibwa. (Mya 27:1, 14; Vil 24:15) Nga tushaka ngwetu tepa yetu itunyungilile, tunapande kuizala ku mutwe, keti kuyambata ku liboko.
20 Paulu wesekesele mukwale ku Lijwi lya Njambi lije lyanatwana Yehova. Oloni tunapande kulilongesa mwakulipangesela mu butongwe omwo twambulula nambe omwo tutengulula bisinganyeka byetu byabibi. (2 Ko 10:4, 5; 2 Ti 2:15) Mwasa kubwezelela bati ku butongwe bweni? Sebastian uje ali na myaka 21 wendekele ngwendi: “Mu kapetulu na kapetulu, njikasoneka vesi imo kumukulo, mwoshe munjitandela Mbimbiliya. Njili na kwaka ha mukana mavesi aje anjashaka. Kulinga ngoco kunanjikwasa njilinge byuma mu kulitombola na bisinganyeka bya Yehova.” Daniel itunendeka ku maputukilo wendekele ngwendi: “Munjikatanda Mbimbiliya, njikangula mavesi aje anjimona ngwange akakwasa banu banjikambulwila. Njalimwena ngwange banu bakatolilila mwamubwa nga bamona ngwabo twazema Mbimbiliya, co lalo tuli na lishungu lya kubakwasa.”
Kutondesesa Bisimpi bya Seho
(Efeso 4:30) Co keti mubiililise Munzinzime wa Kujela wa Njambi, omwo Munzinzime wa Kujela wapwa cimweso ca Njambi ca bundambo hali yeni, napu cishimbikiya ngeci litangwa likaija omwo Njambi akamipatula.
it-1 1128 ¶3
Kujela
Munzinzime wa kujela nambe sipilitu ya kujela. Nzili yakapangesa Yehova nambe ngwetu sipilitu, ikapanga mu kushulisilila biyongola byendi. Yapwa ya kujela co akaipangesa lika mu ngila yaibwa. Mukemwo bakaitumbula ngwabo “munzinzime wa kujela” nambe ngwetu sipilitu ya kujela. (Mya 51:11; Luk 11:13; Lom 1:4; Efe 1:13) Sipilitu ya kujela ikakwasa banu balinge byuma bya kujela. Kulinga byuma byabibi kukonowesa sipilitu ya kujela itukwase nambe kunapu ngwe ‘kuibiisila.’ (Efe 4:30) Nameme sipilitu ya kujela kuyapwile munu, oloni twasa kuibiisila mwafwa ikasholola cifwa ca kujela ca Njambi. Kulinga byuma byabibi kwasa kuzima sipilitu ya kujela. (1 Te 5:19) Nga munu atwalelelaho kulinga byuma byabibi, co sipilitu ya kujela iliziba busiwa. Co apwa citozi ca Njambi. (Isa 63:10) Munu uje azibisa sipilitu ya kujela busiwa nasa lalo kuishaula. Kulinga ngoco unapu mulonga wakama manene uje wendekele Yesu ngwendi kubakamusambesa lalo nameme ha simbu ya kulutwe.—Mat 12:31, 32; Mak 3:28-30.
(Efeso 5:5) Mwa busunga, naumo wahi muka-bupangala, nambe muka-mazilo, nambe muka-cipululu [nuna], (omwo cipululu citwala kukulemesa tumponya) kesi na mutambela mu Bumwene bwa Kilistu na Njambi.
it-1 1006 ¶2
Nuna
Ikasholoka mu Bilinga. Munu uje wakala na nuna twasa kumuzibukila ha byuma byabibi byakashungwiya. Yakomba wendekele ngwendi nga lishungu linakolo, co likita bubi. (Yak 1:14, 15) Ngeci munu uje wakala na nuna twasa kumuzibukila ku bilinga byendi. Kapositolo Paulu wendekele ngwendi munu uje wakala na nuna napu muka-kulemesa tumponya. (Efe 5:5) Akakela manene mana ku byuma byakashakezeka ikeye babenya na kubipwisa ngwe njambi yendi kutubakana kulemesa Ishamatanga na kutwameka cipangi cendi.—Lom 1:24, 25.
Kutanda Mbimbiliya
(Efeso 4:17-32) Ngeci bene, mu lizina lya Mwene, njiminangula ngwange, keti muyoye ngwe baje baka-kujeneka kukulahela, baje biyongola byabo byapwa byangoco, 18 co mana abo ali mu lisusulungu. Bakebo kubesi na mutambela mu mwonyo uje wakana Njambi, omwo bakebo bali ku nzimba na mukukaluwa kwa bimbunge byabo. 19 Bakebo boshe banakundwila na shwamwa yahi, banalyecelela na kulyumbila mu bubi na kulinga byoshe bya mazilo kujeneka kulikela. 20 Eci keti cikeco mwalilongesele hali Kilistu. 21 Mwa busunga yeni mwaziba laja bya hali ikeye, co ha kupwa baka-kumukaba bamilongesele busunga buje buli muli Yesu. 22 Ngeci bene, umbileni kuti bunu bweni bwa laja, buje bwamilingisile ngeci muyoye ngwe muje mwayoyele, bunu bwa laja buje buya na kunyonga na mashungu abwo a makuli. 23 Bimbunge byeni na mana eni binapande kupwa byabiha, 24 co munapande kuzala bunu bwabuhwa, buje bubanatanga mu cifwa ca Njambi, co bunasholoka bukebwo babenya mu mwonyo wa busunga uje waubwa na kujela. 25 Ngeci bene, keti mwendeke makuli lalo. Munu na munu napande kwendeka busunga kuli mukwabo muka-kukulahela, omwo yetu boshe tunapu bilyo bimo lika mu mubila wa Kilistu. 26 Nga mulubala, keti mutabe kulubala kweni kumitwale ku bubi, co keti mutokese litangwa mukulubala lika embwe. 27 Keti mutabe kwana Liyabolo mwela. 28 Munu uje webile kapandele lalo kwiba, napande kushangumuka kupanga, ngeci ayoye mwamubwa ikeye babenya, co ase kukwasa lalo tuhutu. 29 Keti mupangese majwi amabi omwo mwendeka, oloni pangeseni majwi amabwa akukwasa, aje asa kutunga na kumyana bije bimunajeneka, ngeci byoshe mwendeka bikapwe byabibwa kuli boshe baje bamitolilila. 30 Co keti mubiililise Munzinzime wa Kujela wa Njambi, omwo Munzinzime wa Kujela wapwa cimweso ca Njambi ca bundambo hali yeni, napu cishimbikiya ngeci litangwa likaija omwo Njambi akamipatula. 31 Tundiseni kulula kwoshe na mashungu na bukalu. Keti kukale lalo kulijokota nambe kulishaula, keti kukale lalo matumbe amabi hakati keni. 32 Oloni pweni baka-ngozi na baka-mbunge ya lyobwa-obwa kuli umo na mukwabo, co lisambeseni umo na mukwabo, ngwe mwanamisambesa Njambi muli Kilistu.
JUNE 24-30
BISIMPI BYA SEHO BYA MU LIJWI LYA NJAMBI | FILIPU 1-4
“Keti Mushote Mbunge ha Cuma Cimo”
(Filipu 4:6) Keti mushote mbunge ha cuma cimo, oloni mu malombelo eni oshe lombeni Njambi ha bije munajeneka, simbu yoshe mulombeni na mbunge ya kukandelela.
‘Naumo Wahi Asa Kuzibisisa. . . Kwoloka kwa Njambi’
10 Bika byasa kutulingisa tujeneke kushota mbunge na kukala mu “kwoloka kwa Njambi”? Majwi a Paulu amwesa ngwabo kulombela kukatepulula ku bishoti. Ngeci, tunapande kulombela nga tuli mu bishoti. (1 Pe 5:6, 7.) Omwo mulombela kuli Yehova, kaleni na likulahelo na kuzibuka ngweni ikeye ali na kumilela. Lombeleni na “mbunge ya kukandelela” ha byuma byabibwa byanamilingila. Tumukulahela nga twanuka ngwetu asa kutwana manene “kutubakana bije twasa kumulomba, nambe kutubakana bije bitwasa kuyongola.”—Efe 3:20.
(Filipu 4:7) Co kwoloka kwa Njambi, kuje munu naumo wahi asa kuzibisisa, cikanyunga bimbunge byeni na biyongola byeni mwamubwa muli Kilistu Yesu.
‘Naumo Wahi Asa Kuzibisisa. . . Kwoloka kwa Njambi’
7 Baka-Filipu mubatandele mukanda wabasonekelele Paulu banukile bukalu bwaliwanene nabwo. Ha simbu ije na umo wahi wasinganyekele ngwendi Yehova asa kumukwasa. Paulu wabalongesele bika? Wabalongesele ngwendi keti balishoshomwene. Lombeleni, co kwoloka kwa Njambi kunyunga bimbunge byeni. Oloni Mbimbiliya ngwayo ‘naumo wahi asa kuzibisisa. . . kwoloka kwa Njambi.’ Awa majwi alumbununa bika? Baka-kulumbununa bamo banalumbununa awa majwi ngwabo “kunatubakana byuma byoshe bitukasinganyeka” nambe ngwetu “kunatubakana biyongola byoshe bya banu.” Paulu walumbunwine ngwendi naumo wahi asa kulumbununa mukwafwila “kwoloka kwa Njambi.” Ngeci ha kupwa banu, mutukaliwana na bukalu mana akatuhwila, oloni Yehova azibuka mwakutukwasela na kutwamena.—2 Pe 2:9.
‘Naumo Wahi Asa Kuzibisisa. . . Kwoloka kwa Njambi’
16 Kukala mu “kwoloka kwa Njambi, kuje munu naumo wahi asa kuzibisisa” kutukwasa bati? Bisoneka ngwabyo ‘kukanyunga bimbunge na bisinganyeka byetu mwamubwa muli Kilistu Yesu.’ (Fil. 4:7) Lijwi lya “kunyunga” bakele na kulipangesa mu nzita. Lyalumbunwine maswalale baje bakele na kunyunga binganda kusañulu. Na nganda ya Filipu bakele na kuinyunga. Banu ba mu Filipu bakele na kulala na mbunge imo butsiki, mwafwa bazibukile ngwabo ku bikolo bya nganda kwakele mashwalale baka-kunyunga. Mu ngila imo lika, nga tukala mu “kwoloka kwa Njambi,” mbunge na bisinganyeka byetu bihwima. Tuzibuka ngwetu Yehova watwaka mbunge, co ashaka ngwendi tupwe ba kubwahelela. (1 Pe 5:10) Nga tuzibuka eyi simpi, kutulishoshomwena nambe kuzeya.
Kutondesesa Bisimpi bya Seho
(Filipu 2:17) Nameme nga betila maninga ange [banjitila, NWT] ngwe mulambu wa ha ñombelo ije ya kukulahela kweni kuli Njambi, njibwahelela na kujolelela hamo neni boshe.
it-2 528 ¶5
Milambu
Milambu ya Byakunwa. Baisalele balambwile milambu ya byakunwa ngwe mubalambwile milambu yoshe, maneneni mubaketele mu Lifuti lya Cikulaheso. (Kul 15:2, 5, 8-10) Eyi milambu ya byakunwa inambateselele na binyu, co bakele na kuitila ha mutula. (Kul 28:7, 14; esekeseni na Kut 30:9; Kul 15:10) Kapositolo Paulu wasonekelele mukanda baka-Kilistu ba ku Filipu ngwendi: “Nameme nga betila maninga ange [nambe ngwetu nga banjitila] ngwe mulambu wa ha ñombelo ije ya kukulahela kweni kuli Njambi, njibwahelela.” Oku ku mukanda, wendekele bya mulambu wa ha ñombelo nambe ngwetu mulambu wa byakunwa mu kumwesa ngwendi walyanene mangana akwase bakwabo baka-Kilistu. (Fil 2:17) Simbu kanda atse, wasonekelele Timateo ngwendi: “Simbu inete ya kunjikombelela, simbu inete kuli yange ya kuseza mwonyo owu njili nawo.”—2 Ti 4:6.
(Filipu 3:11) mu kukulahela ngeci yange bakanjisangule [ha cisangukilo ca kulibanga, NWT] kutunda ku kutsa na kuya ku mwonyo.
w07 1/1 26-27 ¶5
“Cisangukilo ca Kulibanga” Cashangumuka
5 Bakubwabesa baje bapwa Baisalele ba Njambi bakaliwana hamo mwilu na Mwene Yesu Kilistu, co bakakala hamo nendi simbu yoshe. (Nga 6:16; 1 Te 4:17) Cije kusanguka banacitumbula ngwabo “cisangukilo ca kulibanga.” (Kuj 20:6) Co mu cikahwa, kukatakanako kusanguka kwa baje bakayoya myaka yoshe mu Paladaisi. Ngeci, nameme tuli na lilabelelo lya kukayoya mwilu nambe hano hasi, tushaka kuzibuka byabingi ha “cisangukilo ca kulibanga.” Eci cisangukilo, capwa ca cifwa muka? Cikalingiwa litangwa muka?
Kutanda Mbimbiliya
(Filipu 4:10-23) Njijolela manene muli Mwene omwo nambe kuneti simbu yakama ololo munendula lalo cizango ca kunjikwasa. Kunjendeka ngwange mwalikelele kunjikwasa, oloni kumwasele kuwana ngila ya kucilinga. 11 Co kunjesi na kwendeka eci ngwe omwo njamono ngwange munanjecelela embwe, omwo njalilongesa kupwa muka-kupwisamo na bije njili nabyo. 12 Njazibuka kukala mu kujeneka, co njazibuka kukala nebi byabingi bya kuhyana bije byanjipande. Njalilongesa cisiñiko eci, mu byoshe na kwoshe njikajolela nambe njinakuta nambe njili na njala, nambe njili na byabingi nambe byabindondo manene. 13 Njasa kulinga byuma byoshe ha nzili ije yananjana Kilistu. 14 Oloni capwile cacibwa manene kuli yeni ha kunjikwasa mu tuyando twange. 15 Co neni lalo baka-Filipu mwazibuka mwamubwa ngweni omwo njatundile ku Masendoniya mu matangwa a kulibanga a kwambulula Biñanda Byabibwa, kubanga baka-cikungulukilo ceni lika mwanjikwasele, kubanga yeni lika bamo mwalipangezelele nganyo yange na kujeneka kwange. 16 Omwo ha bisimbu byabingi omwo njajenekele byakulikwasa nabyo mu Tesalonika, yeni mwanjikwasele. 17 Keti ngwe yange njishaka lika bwana kuli yeni embwe, oloni njishaka kumona nganyo ya kubwezelela ku mbango yeni. 18 Ngeci bene, njili na kutuma bukaleho bwa byuma byoshe bije mwatumine kuli yange, bikebyo byajawisa kujeneka kwange kwoshe. Ololo njili nebi byoshe njishaka omwo Epafolonditu nanjinenela bwana bweni bwoshe. Bukebwo bunapu ngwe mulambu wa kunika lwengo lwalubwa kuli Njambi, ñombelo ije ya tambula na kumubwahelelesa ikeye. 19 Co Njambi yange akamyana byuma byoshe bije mushaka ngwe ku kujeneka kweni muli Kilistu Yesu. 20 Kuli Njambi yetu na Tate yetu kukale bumpau ku myaka na myaka. Ewa. 21 Bihindu kuli boshe banu ba Njambi baje banakundama kuli Kilistu Yesu. Baka-kutaba bali kuno hamo nange banatumu bihindu byabo kuli yeni. 22 Banu ba Njambi boshe kuno banatumu bihindu byabo, bunene kuli baje banakundama ku lipela lya Ngubulu. 23 Kutetela kwa Mwene Yesu Kilistu kukale hamo neni boshe.