Bandameneni Kukotoka kwa Kano Kaye mu Kusimpa

Nameme Yehova necelela baka-bubi ha simbu yailaha, oloni ololo abanyongesoni. Ololo bulombelo bwa makuli babunyongesa, mafuti alikwatasana mu kulwisa banu ba Yehova, co Yehova akanyongesa baka-bubi ha nzita ya Alamagidoni. Baka-Kilistu banabandamena kukamona ebi byuma mubikalingiwa.

Oloni kutuzibuka biñanda byoshe kutalesa ku kayando kakama. Cakumwenako, kutuzibuka litangwa likakashangumuka kayando kakama. Kutuzibuka bikalingisa baka-bupolitiki balwise bulombelo. Kutuzibuka ngwetu mafuti aje akalikwatasana mu kulwisa banu ba Yehova akalinga ngoco ha simbu ya kupwa hali nomwo mubakatuyandesela. Co lalo kutuzibuka ngila mpundu yakapangesa Yehova mu kunyongesa banu bababi ha Alamagidoni.

Nameme ngoco, Mbimbiliya yatuleke byuma byoshe bitunapande kuzibuka mangana tupwe bakusimpa omwo tubandamena byuma bikalingiwa kulutwe. Cakumwenako, tuzibuka ngwetu tuli na kuyoya mu “matangwa a kukotoka.” (2 Ti 3:1) Tuzibuka lalo ngwetu matangwa abakalwisa bulombelo “bakawatepulula” mangana bulombelo bwa busunga keti babunyongese. (Mat 24:22) Tuzibuka ngwetu Yehova akobola banu bendi. (2 Pe 2:9) Co lalo tuzibuka ngwetu Yehova nangula muka-busunga, wa nzili mangana akobole mbunga yakama ha nzita ya Alamagidoni.—Kuj 19:11, 15, 16.

Byuma bikalingiwa kulutwe bikalingisa banu babangi ‘bakalezumuke mwafwa ya lyoba.’ Oloni kutanda na kusinganyekesesa omwo Yehova wobwelelemo banu bendi kunima, nebi byanatuleke kutalesa ku byuma bikalingiwa kulutwe kutulingisa ‘twimane na kwandula mitwe yetu,’ mwafwa tuzibuka ngwetu kwoboka kwetu kuli muyehi.—Luk 21:26, 28.