Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2023 Watch Tower Bible and Tract Society of Pennsylvania
MARCH 4-10
BISIMPI BYA SEHO BYA MU LIJWI LYA NJAMBI | BISAMU 16-17
‘Byuma Byoshe Byabibwa Byatunda Kuli Yehova’
Banike, Mwasa Kupwa ba Kubwahelela
ANGULENI BABUSAMBA BABABWA
11 Tandeni Bisamu 16:3. Devidi wazibukile byuma bije bitukwasa tuwane babusamba bababwa. Wapwile wa “kubwahelela” ha kulikwatasana na banu baje bazemene Yehova. Wabatumbwile ngwendi “ba kujela,” mwafwa bakele na futisi ya kujela. Muka-kwimba mukwabo nendi walizibile ngoco ha kwangula babusamba. Wasonekele ngwendi: “Yange nji musamba wa baje baka-kukukomoka, na musamba wa boshe baje bononoka mashiko obe.” (Bis 119:63) Ngwe mutunamwena mu cilongesa cinahu, neni mwasa kulikuta busamba na banu baje bakasingimika Yehova na kwononoka mashiko endi. Basa kupwa banike nambe bakulunu.
w14 2/15 29 ¶4
‘Moneni Bubwa Bwa Yehova’
Devidi wembile ngwendi: “Yehova ikeye mutamba wange ubananjana, na nganja yange. Unyungilila buswana bwange. Myela ibananjana inapu yaibwa.” (Bis 16:5,6) Devidi wakandelele manene kuli Yehova ha kupwa “mutamba” wendi, kulumbununa kumutabesa kupwa kabusamba kendi na kumutabesa kumupangela. Netu twasa kuliwana na bukalu bwa kuliseza-seza ngwe Devidi, oloni tunapande kwanuka ngwetu Yehova natubezikisa mu bingila byabingi ku sipilitu. Ngeci, tutwaleleleniho kulemesa Yehova mu kubwahelela na ‘kukandelela’ ku tempele yendi ya ku sipilitu.
w08 2/15 3 ¶2-3
Kulaheleni Yehova Simbu Yoshe
2 Tubaboshe twasa kulilongesako byabingi ku byuma bibaliwanene nabyo banu babanendeka manene mu Mbimbiliya ba kufwa ngwe Abrahamu, Sara, Mosesa, Ruthi, Devidi, Esita, na kapositolo Paulu na bakwabo. Oloni twasa kulilongesako na ku banu baje kubendekele manene mu Mbimbiliya. Kusinganyekesesa ha mizimbu ya mu Mbimbiliya kutukwasa tulinge byuma bilitombola na majwi a muka-kwimba uje wendekele ngwendi: “Njaka Yehova halutwe lwange simbu yoshe.Mwafwa ali ku liboko lyange lya cilyo, kunjikaninganga.” (Bis 16:8) Awa majwi alumbununa bika?
3 Liswalale wakele na kwambatela moko yendi ya mukwale ku liboko lya cilyo, co ku cimoshwe wakwateleko ntelo. Nameme ngoco, basele lika kumunyungilila nga mukwabo alwila ku liboko lyendi lya cilyo. Nga twaka Yehova mu bisinganyeka simbu yoshe na kulinga cizango cendi, co atunyungilila. Ngeci, tusimutwiyeni ha mizimbu ya mu Mbimbiliya mangana tumone muitukwasela ‘tukulahele manene Yehova simbu yoshe.’—MBB.
Kutondesesa Bisimpi bya Seho
it-2 714
Muñandi wa Lisho
Lijwi lya Cihebelu lya ʼi·shohnʹ (Kwi 32:10; Vis 7:2), nga balikumbasana na lya ʽaʹyin (lisho) lilumbununa “mukwenje wamundondo wa mu lisho.” Mu ngila imolika, lijwi lya bath (mwana wa munakazi) libanapangesa ku mukanda wa Mbimbi 2:18 lilumbununa mwana wa munakazi wa mu lisho uje emanena muñandi wa lisho. Ku mukanda wa Bisamu 17:8 banapangesako majwi abali (ʼi·shohnʹ bath-ʽaʹyin), kulumbununa “mukwenje wa mundondo na mwana wa munakazi wa mu lisho” (“muñandi wa mu lisho”). Twasa kulimona yetu babebya nga tukengesesa mwamubwa mu lisho lya mukwetu.
Lisho likalifwiki bwasi-bwasi nga cinkambu nambe likungu lishaka kukobelamo. Cikonde ca kuhwalala ca ha lisho (cornea) cikeco cikanyungilila lisho. Ngeci, nga kukala bimo bicibulumuna nambe nga kukobela likungu munu kasa kumona mwamubwa nambe kupwa kapuputwa. Mbimbiliya inapangesa majwi a ‘muñandi wa mu lisho lyobe’ kulumbununa byuma bimo bije bibanapande kunyungilila mwamubwa. Mukemwo mutunapande kumwena Mbimbiliya. (Vis 7:2) Mukanda wa Kwituluka mu Mashiko 32:10 unendeka hali Njambi mwanyungililemo Baisalele ngwe cisemi wa munalume ngwawo, wabanyungile ngwe ‘muñandi wa lisho lyendi.’ Devidi walombele ngwendi bamunyungilile kuli Njambi ngwe “muñandi wa lisho.” (Bis 17:8) Washakele ngwendi Yehova alingeko byuma bimo bwasi-bwasi mu kumukwasa nga bitozi bendi bamulwisa. (Esekeseni Zakaliya 2:8).
MARCH 11-17
BISIMPI BYA SEHO BYA MU LIJWI LYA NJAMBI | BISAMU 18
‘Yehova Ikeye Muka-Kunjamena’
Kubwahelela kwa Kutunda Kuli Yehova Kumitakamesa
Mbimbiliya nayo simbu imo ikesekesa Yehova ku byuma bya kujeneka kuyoya. Cakumwenako, Yehova banamwendeka ngwabo wapwa, “muka-kunyunga Isalele,” “limanya” na “butewelo.” (2 Samwele 23:3; Bisamu 18:2; Kwituluka mu Mashiko 32:4) Awa majwi analifu bati? Ngwe limanya lyakama lije kubasa kushwenesa, Yehova nendi asa kupwa cimpaka ceni na kuminyunga.
5 Mukanda wa Bisamu uli na byakumwenako byabingi bije bilumbununa bifwa ya Yehova. Cakumwenako, mukanda wa Bisamu 84:11 unesekesa Yehova ku “litangwa na ntelo” mwafwa akatwana ceke, kuyoya, nzili na kutunyungilila. Co lalo, mukanda wa Bisamu 121:5 ngwawo: ‘Yehova ali muyehi mu kukunyunga.’ Ngeci lika munzinze uje wasa kutunyungilila ku kushaluka kwa litangwa, Yehova nendi akanyungilila baje bamupangela ku bukalu, mu endekesi ikwabo akabanyungilila ha kubaka mu “mambaba.”—Isaya 51:16; Bisamu 17:8; 36:7.
it-2 1161 ¶7
Lijwi
Njambi akazibi lijwi lya bangamba bendi. Baje bapangela Njambi mu busunga bakulahela ngwabo nga batambeka kuli Ikeye mu ndaka yoshe-yoshe abaziba. Nameme nga kubalombela mu kutambeka, Njambi uje azibuka bimbunge bya banu “aziba.” (Bis 66:19; 86:6; 116:1; 1 Sa 1:13; Neh 2:4) Njambi akazibi banu bendi baje bali mu bukalu mubakatambeka kuli ikeye, co lalo azibuka na biyongola bya banu baje bali na kumulwisa na kulwisa bangamba bendi.—Kus 21:17; Bis 55:18, 19; 69:33; 94:9-11; Nje 23:25.
Bika Byasa Kutukwasa Tukolese Nga Tuli mu Bishoti?
2. Singanyekeseseni. Omwo musinganyekesesa ha byuma byalingiwile mu buyoye bweni kunima, kuma mucanuka mwamikwaselele Yehova mukolese mu bukalu bumwakele nabwo ndi? Nga tusinganyekesesa mwanatukwasela Yehova hamolika na bangamba bendi ba kusañulu, co tukanyama na kumukulahela manene. (Bis 18:17-19) Joshua uje wapwa mukulunu wendekele ngwendi: “Njili na mukana wa bikumbululo ku malombelo ange. Ou mukana unanjikwasa njanuke byuma bimo binjalombele Yehova, bije byanjanene.” Ngeci, nga tusinganyekesesa mwanatukwasela Yehova, co bishoti kubituzeyesa.
Kutondesesa Bisimpi bya Seho
it-1 432 ¶2
Likelumbi
Aba bakelumbi bakele na kumwesa ngwabo Yehova kwali. Wendekele ngwendi: “Njikakuwana muje mu mbalaka mwakuliwanena hakamwa ya cifwiko ca mema ku mbunge, mukati ka baje bakelumbi babali ba mambaba.” (Kut 25:22; Kul 7:89) Ngeci Yehova banamwendeka ngwabo, “natumama ha [nambe mukati] ka bakelumbi.” (1 Sa 4:4; 2 Sa 6:2; 2 Vi 19:15; 1 Mi 13:6; Bis 80:1; 99:1; Isa 37:16) Mu endekesi ya cifwisa, aba bakelumbi bakele na kwimanenako “litemba lya bakelumbi” haje ha nalondo Yehova (1 Mi 28:18), co mambaba a bakelumbi akele na kunyungilila na kukwasa litemba lizambule bwasi. Mu mwaso wendi, Devidi walumbunwine mwazambwililemo Yehova mu kumukwasa ngwendi: “wapulwile ha kelumbi” co “wendele na mambaba a lihunzi.”—2 Sa 22:11; Bis 18:10.
MARCH 18-24
BISIMPI BYA SEHO BYA MU LIJWI LYA NJAMBI | BISAMU 19-21
“Melu Ambulula Bumpau bwa Njambi”
w04 1/1 8 ¶1-2
Byakutanga Byoshe Byambulule Bumpau bwa Yehova
DEVIDI muna Njesi mwapwile mwanike wapwile kanyungi mu Betelehema. Ha bisimbu byabingi wakele na kutala bingongonosi mwilu butsiki omwo wakele na kunyunga butanga bwa bimanga ba ishe mu mambo. Co twakulahela ngwetu wanukile ebi byuma mu bamuhwiminine ku sipilitu ya Njambi mangana asoneke mwaso uli na majwi amabwa uje uli ku mukanda wa Bisamu 19. Wendeka ngwawo: “Melu ali na kwambulula bumpau bwa Njambi; Bukambwila buli na kwambulula bipangi bya maboko endi. Oloni cilumo cabyo cinazibika ha lifuti-libu hoshe, Co muzimbu wabyo unaketa na kumamaneselelo a lifuti-libu.”—Bisamu 19:1, 4.
2 Melu ali na kwambulula bumpau bwendi butsiki na mutanya kwa kujeneka kwendeka. Byuma byanatanga Yehova bili na kutwalelelaho kwambulula bumpau bwendi, co kutakamesa kusinganyekesesa ha byuma byakutanga bije bili na kutwalelelaho kwendeka kwa kujeneka majwi “hasi hoshe” mangana banu boshe balimwene. Nameme ngoco, byuma byakutanga bije kubyasa kwendeka kubyapwilemo kwana Yehova bumpau. Banu ba kulongwa banapande kushangazala Yehova na bisamu. Muka-kwimba umo bamuhwiminine aleke baka-kulemesa Njambi mu kulongwa ngwendi: ‘Shangazaleni Yehova mwafwa ya bumpau na nzili yendi. Aneni Yehova bumpau buje bunamupande.’ (Bisamu 96:7, 8) Boshe baje bali na busamba bwakukanyama na Yehova babwahelela kulinga ngoco. Oloni bika byalibungila mu kushangazala Njambi?
Byakutanga Byoshe Byambulule Bumpau bwa Yehova
8 Devidi nalumbununa lalo byuma bikwabo byanatanga Yehova byakukomokesa ngwendi: “Oloni cilumo cabyo cinazibika ha lifuti-libu hoshe, Co muzimbu wabyo unaketa na kumamaneselelo a lifuti-libu. Litangwa nalijangumwina tenti mwilu; Linapu ngwe cambato uje atuhuka mu njibo; Lili na kubwahelela ngwe munalume wa nzili uje ashatuka mu ngila yanezilila. Lituhuka kushongo imo ya lilu, Co lilizenga na kuya kushongo ikwabo ya lilu; Co nacimo cahi cibanda kushaluka kwalyo.”—Bisamu 19:4-6.
9 Litangwa lyapwa lyalindondo kulyesekesa na bingongonosi bimo. Oloni lyapwa lyakama kulyesekesa ku mapulaneti aje akalizengeleka. Libulu limo ngwalyo, litangwa lyakala na bulemu bwa kweta ku “2 bilioni ya mabilioni na mabilioni,” kulumbununa 99.9 pesenti ya bulemu bwa mapulaneti aje akalizengeleka! Litangwa lyakala na nzili ije ikakoko byuma ije ikalingisa lifuti-libu lilizenguluke oku lili ha bulako bwa makilomita 150 milioni kwakujeneka kungumukila kweka nambe kushwena manene ku litangwa. Litangwa lyapwa lya kushaluka manene, oloni kushaluka kwakupwamo lika kuje kukete ha lifuti libu kunapumo kukwasa byuma bitwaleleleho kuyoya.
10 Muka-kwimba nesekesa litangwa ku “munalume wa nzili” uje atunda kushongo imo ya lilu, co alizenga na kuya kushongo ikwabo ya lilu, co nga butsiki bweta akobela mu “tenti” yendi na kulala. Ei ngongonosi ya nzili muikalauka kushongo ikwabo ya lilu kuli yetu tuli ha lifuti-libu ikasholoka ngwe ikobela mu “tenti” yayo na kukalala. Mutondo ei ngongonosi ikatuhuka oku itwa manene ceke co ikasholoka ngwe ‘cambato uje atuhuka mu njibo yendi.’ Ha kupwa kanyungi Devidi wazibukile mwamubwa kutonola kwa butsiki. (Kushangumuka 31:40) Wanukile mwakele na kulikuwila kushaluka kwa litangwa mu myela yaibwa. Cili bene, litangwa kulyajukile mu “bungenzi” bwalyo bwa kukobela na kutuhuka ngwe “munalume wa nzili” uje nalibwahesela kwilukila bungenzi bwendi.
g95 11/8 7 ¶3
Tunapande Kukandelela ku Byuma Byanatanga Yehova
Kuli byuma byabingi byakutanga bije byatuzengeleka, co kukenga ebi byuma kutukwasa tuzibuke mwamubwa Ishamatanga yetu. Simbu imo Yesu walekele bandongesi bendi ngwendi bakengesese bintemo bije byakele na kumena mu Ngalileya. “Lilongeseni ku bintemo bya mu shwata, kubyesi kufwitangana nambe kutunga bizalo, oloni njimileka ngwange nameme Solomoni mu bumpau bwendi bwoshe kazalele ngwe imo yabyo.” (Mateu 6:28, 29) Njambi mwakanyungilamo bintemo bya mu shwata kumwesa mwamubwa ngwabo kasa kwonowa kutunyunga.
Kutondesesa Bisimpi bya Seho
it-1 1073
Cihebelu, II
Kuli mikana imo ya majwi ije ilifwa. Mukana wamucibali kuwendeka byuma byakulifwa nambe kulumbununa byuma byakulilwisa nawo, oloni ukewo ubwezelelako biñanda byeka. Cakumwenako, tuciwana ku mukanda wa Bisamu 19:7-9:
Mashiko a Shukulu kalunga apwa a kulumbunuka,
akewo akolesa mwonyo.
Mashiko a Shukulu Kalunga apwa amabwa kuakulahela,
ana mana kuli baje banawajeneka.
Mashiko a Shukulu Kalunga apwa a busunga,
boshe baje bawononoka babwahelela;
Mashiko a Shukulu Kalunga apwa a kujela,
ana munu mana a kuzibisisa.
Kukomoka Shukulu Kalunga kwapwa kwakubwa,
ku myaka yoshe.
Mashiko a Shukulu Kalunga simbu yoshe apwa a busunga;
apwa amabwa manene.
Hamo mwananguka ngweni mukana wamucibali uli na kushulisilila mukana wakulibanga. Mikana ya mucibali ya kufwa ngwe “akewo akolesa mwonyo” na “ana munu mana a kuzibizisa” akewo asa kukwasa munu azibisise ngwendi, “mashiko a Shukulu Kalunga apwa a kulumbunuka” na mashiko a Shukulu Kalunga ‘apwa amabwa kuakulahela.’ Kuliseza kuli ha mukana wakulibanga na wamucibali kukweko kukwasa munu ahwime mwetaho. Ngeci ei mikana imwesa mubilikabela biñanda, co lalo imwesa mubanapande kusonekela mavesi na kumwesa mavesi aje endelela nawo. Mukemwo simbu imo ei mikana bakaitumbula ngwabo mikana ya kulifwa.
MARCH 25-31
BISIMPI BYA SEHO BYA MU LIJWI LYA NJAMBI | BISAMU 22
Byuma Bibapolofwetele ha Kutsa kwa Yesu
Bawanene Mesiya!
16 Kukasholoka ngwe Njambi nayengula Mesiya. (Bisamu 22:1) Ngwe mubwendekelele bupolofweto, “Kuma 15:00, Yesu watambekele ngwendi: “Eli, Eli, lama sabakitani?” Awa majwi nga banawanungulula, alumbununa ngwawo: “Njambi yange, Njambi yange, bika biunanjisezela?” (Maki 15:34) Yesu kalikelele kukulahela Ishe wa mwilu. Njambi wanene Kristu mu maboko a bitozi bendi mangana amone kulongwa kwendi. Ngeci, Yesu mwatambekele washulisilile majwi ali ku Bisamu 22:1.
Bawanene Mesiya!
13 Devidi wapolofwetele ngwendi Mesiya bakamushaula. (Bisamu 22:7, 8.) Yesu bamushawile oku ali ha citi ca kuyandesela, Mateu ngwendi: “Baje bakele na kwita mu ngila bakele na kumwendeka mwamubi oku bapika ku mitwe yabo. Bakele na kwendeka ngwabo: “Yobe wakele na kwendeka ngwobe wasa kusiula tempele na kuitunga mu matangwa atatu, lyobole yobe babenya! Nga umuna Njambi, shuluka oho ha citi ca kuyandesela!” Tupilistu bakama na baka-kusoneka na bakulunu nabo bashangumukile kumushendumuna ngwabo: “Wakele na kwobola bakwabo, oloni ikeye kasa kulyobola! Ngwetu Mwene ya Isalele, ashuluke ha citi ca kuyandesela, co tumutaba. Nakulahela Njambi, co Njambi amwobole nga amutonda, mwafwa wakele na kwendeka ngwendi, ‘Nji Muna Njambi.” (Mate 27:39-43) Yesu watwaleleho kukolesa nameme bamushawile. Co ou unapu mwanjwa waubwa wanatumwesa!
Bawanene Mesiya!
14 Bakata ñela ha buzalo bwa Mesiya. Muka-kwimba wasonekele ngwendi: “Balipangezela buzalo bwange, na kubuta ñela hakati kabo.” (Bis 22:18) Ebi bikebyo byalingiwile mwafwa “[maswalale ba Baloma] mubamanesele kumupameya [Yesu] ha citi, batele biñela mangana balipangele bizalo byendi bya helu.”—Mate 27:35; tandeni Iwano 19:23, 24.
Kutondesesa Bisimpi bya Seho
w06 11/1 29 ¶7
Kumwesa Kasingimiko ha Simbu ya Biwano
7 Kuli bingila byabingi mutwasa kumwesela kasingimiko ha simbu ya biwano. Ngila imo inapu kwimbila hamo na bakwetu myaso ya Bumwene. Bwingi bwei myaso yapwa malombelo, ngeci tunapande kuimba mu kasingimiko. Kapositolo Paulu wendekele majwi ali ku mukanda wa Bisamu 22 hali Yesu ngwendi: “Njikambulula lizina lyobe ku bandolome bange, njikakushangazala na myaso mukati ka cikungulukilo.” (Bahebelu 2:12) Ngeci, tunapande kulibanga kutumama simbu kanda muka-citwamo azimbule mwaso, co tunapande kulinga mwoshe mutwasela kwaka mbunge ku biulumbununa mwaso. Tunapande kuliziba ngwe mwalizibilile muka-kwimba uje wasonekele ngwendi: “Njikakandelela kuli Shukulu Kalunga na mbunge yange yoshe.” (Bisamu 111:1) Cili bene, kuzumbangeya Yehova kwitila mu myaso kukekwo kunapande kutulingisa twete na simbu ku biwano na kubandamena kweta noho habikahwila.
Shangazaleni Yehova ‘mu Cikungulukilo’
Na ano matangwa, baka-Kristu bali na bingila byabingi mubasa kumwesela likulahelo lyabo ‘mu cikungulukilo. Co imo yabyo inapu kukumbulula ku biwano bya cikungulukilo ha mitamba ije yakala na bihula. Kutwapandele kwombwanesa bubwa butundamo. Cakumwenako, bikumbululo bije bimwesa mutwasa kuhyanena nambe kujenjuka ku bukalu bikwasa bandolome na bandokazi bakabangeye binangulo bya mu Mbimbiliya. Bikumbululo bije bilumbununa mikanda ibanenikila na bikumbululo bije bili na bisimpi byanawana munu kwitila mu kutondesesa, bishongangeya bakwetu baka-Kristu balyakele cilengo ca kulibwahesela mwamubwa na kutondesesa bisimpi.
APRIL 1-7
BISIMPI BYA SEHO BYA MU LIJWI LYA NJAMB I BISAMU 23-25
‘Yehova Ikeye Kanyungi Kange’
‘Yehova Ikeye Kanyungi Kange’
Yehova akatwamenena bimanga bendi. Bimanga ba kujeneka kanyungi basa kuzimbala. Mu ngila imolika, netu twasa lika kwenda mu ngila inapande nga Yehova atutwamenena mu kuyoya kwetu. (Njelemiya 10:23) Yehova nendeka hali Devidi ngwendi, ali na kutwamenena banu bendi ha “mwila wa kuzibuluka” na “kumema a kwoloka.” Natwalelelaho kwendeka ngwendi, “anjitwamenena mu bingila bya kusungama.” (Vesi 2 na 3) Awa majwi ali oku ku mavesi amwesa mwamubwa ngwawo twasa kukulahela Njambi. Nga tutabesa sipilitu yendi itutwamenene kupangesa Mbimbiliya, co tulikuwa kuyoya buyoye bwabubwa, tukala mu kwoloka, co lalo tujauka na byuma bituli nabyo.
‘Yehova Ikeye Kanyungi Kange’
Yehova akanyungilila bimanga bendi. Nga kanyungi wahi bimanga bakalizibi manene lyoba, co lalo wahi asa kubamena. Yehova naleke bangamba bendi ngwendi keti batewe nameme nga ‘benda mukati ka butsiki mu lisusulungu’ kulumbununa ha simbu ya kukaluwa manene mu kuyoya kwabo. (Vesi 4) Yehova ali na kubanyunga simbu yoshe, co nalibwahesela kubakwasa. Asa kwana banu bendi mana na nzili mangana base kukolesa mu byeseko.—Filipu 4:13; Jemusi 1:2-5.
‘Yehova Ikeye Kanyungi Kange’
Yehova akalisa bimanga bendi. Bimanga bakakulahela kanyungi abatondele byakulya. Njambi lika asa kumanesa njala yetu ya ku sipilitu. (Mateu 5:3) Twabezika mwafwa Yehova wapwa muka-kwana wakama, ngeci akabwahesela bangamba bendi byakulya byabingi bya ku sipilitu. (Vesi 5) Mbimbiliya na mabulu aje a nemana ha Mbimbiliya akufwa ngwe eli limuli na kutanda binapu byakulya bya ku sipilitu bije bikatukwasa tuzibuke bituli na kuyoyela nebi byanayongola kukatulingila Njambi kulutwe.
Kutondesesa Bisimpi bya Seho
Zemeni Busunga na Mbunge Yeni Yoshe
YEHOVA ali na kupangesa Lijwi lyendi na sipilitu ya kujela mu kutwamenena banu “mu bingila bya kusungama.” (Bis 23:3) Oloni mwafwa ya kujeneka kulumbunuka, simbu imo tukongumuka omu mu ngila. Ngeci, tunapande kulifwita mangana twilukemo. Bika byasa kutukwasa tulinge ngoco? Tunapande kuzema kulinga byuma byabibwa ngwe mwa Yesu.—Bisamu 45:7
2 ‘Bingila bya busunga’ byapwa bika? Ngila yapwa tapalo yaindondo mwa kwenda na mendi. Yehova ikeye akatwana ebi “bingila” kwesekesa na mashiko endi a kusungama. Mu Cihebelu na Cigriki, “busunga” bulumbununa “kulongwa” kulumbununa kukabangeya mwamubwa mashiko endeka bya kukala na futisi ya kujela. Yehova ‘wapwa muka-busunga wakama’ ngeci baje bamulemesa banapande kubandamena kuli ikeye abamwese ngila ya kulongwa mubanapande kwenda.—Nje 50:7.
3 Tuzibisa Njambi kubwaha nga tulifwita kulinga byuma bije bilitombola na mashiko endi. (Kwi 32:4) Twasa kulinga ngoco nga tulilongesa byendi kwitila mu Lijwi lyendi Mbimbiliya. Nga tulilongesa manene byendi na kushwena kuli ikeye ha litangwa na litangwa, co tuzema manene busunga bwendi. (Jms 4:8) Tunapande lalo kukabangeya binangulo bya mu Mbimbiliya omwo twangula byuma bya seho byakulinga.
APRIL 8-14
BISIMPI BYA SEHO BYA MU LIJWI LYA NJAMBI | BISAMU 26-28
Bika Byakwasele Devidi Atwaleleleho Kupwa wa Kulongwa?
w04 12/1 14 ¶8-9
Endeni mu Ngila ya Kulongwa
8 Devidi walombelele ngwendi: ‘Njilule na kunjeseka yobe Shukulu Kalunga, eseka mbunge yange na binso byange.’ (Bisamu 26:2) Binso byakala manene mukati ka mubila wa munu. Binso bya cifwisa bimanena bisinganyeka bya kuloba bya munu nomu mwakalizibila. Co mbunge ya cifwisa imanena munu wa mukati, biyongola byendi, mwakalizibila na mana endi. Devidi mwalombele ngwendi Yehova amwilule wamulekele ngwendi elule biyongola byendi bya mukati nomu mwakalizibila.
9 Devidi walombele ngwendi binso na mbunge yendi babijelese. Yehova akajelesa bati bunu bwetu bwa mukati? Devidi wembile ngwendi: “Njikushangazala yobe shukulu kalunga omwo unanjana mana, nameme simbu ya butsiki mbunge yange injinangula.” (Bisamu 16:7) Awa majwi alumbununa bika? Alumbununa ngwawo binangulo bya Yehova byetele ku mbunge na binso bya Devidi na kukalamo na kutengulula biyongola byendi nomu mwakele na kulizibila. Netu binangulo bya Yehova bitweta ku mbunge na kukalamo nga tusinganyekesesa ha binangulo byatwana kwitila mu Lijwi lyendi, baje banangula kututwamenena, hamolika na munga yendi. Nga simbu yoshe tulomba Yehova ajelese bisinganyeka byetu na biyongola byetu, co tutwalelelaho kwenda mu kulongwa.
w04 12/1 15 ¶12-13
Endeni mu Ngila ya Kulongwa
12 Devidi wendekele lalo ha cumo cikwabo camulingisile atwaleleleho kupwa wa kulongwa ngwendi: “Kunjesi kukala hamo na baka-makuli nambe kusimutwiya na baka-cibembulu, yange njazinda muunga ya banu baka-bubi, co kunjesi kukala hamo na banu baka-bubi.” (Bisamu 26:4, 5) Devidi kakele na kukala na baka-bubi. Wazindile kulikwatasa nabo.
13 Batico yetu? Kuma tukeseka mwoshe mutwasela kujeneka kulikwatasana na baka-kujeneka busunga, ipwe ha intaneti nambe mu bingila byoshe-byoshe ndi? Kuma tukanjenjuka ku banu baje bakashweke cifwa cabo? Batukakobela nabo sikola nambe batukapanga nabo banasa kushaka kulikuta busamba netu mangana balinge byuma byabibi. Kuma tushaka kulikuta busamba na banu baje kubesi na kwenda mu busunga ndi? Baka-kutengulukila banasa lalo kushweka biyongola byabo byakushaka kutwecelesa kupangela Yehova. Batico nga mu cikungulukilo ca baka-kristu kuli bamo bali na kulinga byuma bije kubilitombola nebi biyendeka Mbimbiliya? Nabo lalo bakashweke cifwa cabo ca mukati. Jayson uje napu ngamba wa cikungulukilo nendi wakele na babusamba bacifwa eci ku bwanike. Wendekele ngwendi: “Litangwa limo umo wabo wendekele kuli yange ngwendi, ‘bukalu bwahi nameme tuli na kulinga byuma byabibi mwafwa nga kaye kakaha keja yetu oku tunatsi laja. Kutukalizibi ngwetu byuma byabibwa binatwiti.’ Aje majwi anjilingisile njitone. Njishaka kukakala mu kaye kakaha.” Jayson wecelele kulikwatasana na babusamba ba cifweci. Kapositolo Paulu wanangwile baka-Kristu ngwendi: “Keti bamyungumune kulikwatasana na banu bababi kubiisa bilinga byabibwa.” (1 Kolinte 15:33) Kunapu kwa seho manene kujeneka kulikwatasana na banu bababi.
w04 12/1 16 ¶17-18
Endeni mu Ngila ya Kulongwa
17 Tabanakele na mutula wayo habakele na kwenyekela biñombelo hakeho hemanene kulemesa kwa busunga mu Isalele. Mu kumwesa kukandelela ku mwela ubakele na kulemesela Baisalele, Devidi walombelele ngwendi: “Njizema njibo yobe muje muwakala yobe Shukulu Kalunga mu mwela muje mwakala bumpau bwobe”—Bisamu 26:8.
18 Kuma mwazema kulikungulwila ku myela itukalilongesela bya Yehova ndi? Njibo ya Bumwene yakala na cinoneko ca biwano, co ikemanena kulemesa kwa busunga mu citingitingi muili. Co lalo, twakala na biwano byakama, biwano bya citingitingi na biwano bya kulitila. Oku ku biwano bakatwanukisa ‘binangulo’ bya Yehova. Nga ‘tuzema manene’ ebi biwano, co tukala na lishungu lya kuyako na kutolilila mwamubwa. (Bisamu 119:167) Kukatushubulwisa kukala hamo na bakwetu baka-Kristu baje bazibuka mwamubwa mutukalizibila na kushaka kutukwasa tutwaleleleho kupwa bakulongwa.—Bahebelu 10:24, 25.
Kutondesesa Bisimpi bya Seho
w06 7/15 28 ¶15
Yehova Akobola Baje Banazeye
15 Devidi wembile ngwendi: “Batate na banana basa kunjumbila, oloni Shukulu Kalunga akanjinyunga.” (Bisamu 27:10) Kutuzembeleka kuzibuka ngwetu Yehova watuzema manene kutubakana mubatuzemena bisemi betu. Nameme bisemi betu batubyana nambe kutulinga mwamubi, Yehova atwalelelaho kutunyunga. (Loma 8:38, 39) Anukeni ngweni Njambi akakoko baje bazema mangana bamupangele. (Iwano 3:16; 6:44) Nameme banu banamilingi mwamubi anukeni ngweni, Tate yetu wa mwilu wamizema.
APRIL 15-21
BISIMPI BYA SEHO BYA MU LIJWI LYA NJAMBI | BISAMU 29-31
Kunangula Yapwa Ngila Imo Yakamweselamo Njambi Cizemo
it-1 802 ¶3
Cihanga
‘Kufwika cihanga’ kulumbununa byuma bya kuliseza-seza kwesekesa na byuma bili na kulingiwa ha simbu oyo. Nga Yehova ashwekela munu cihanga kunasa kulumbununa ngwabo ecela kumubezikisa nambe kumumwesa nzili yendi. Nasa kulinga ngoco nga munu nambe cibunga ca banu kubamwononoka, ngwe mubalingilile Baisalele. (Yom 34:29; Bis 30:5-8; Isa 54:8; 59:2) Bisimbu bimo kunasa kulumbununa ngwabo Yehova kakwasa owo munu nambe kumukumbulula. (Bis 13:1-3) Devidi mwakele na kulomba Yehova ngwendi, ‘Shweka cihanga cobe ku bubi bwange’ wakele na kumulomba ngwendi amukonekele na kwibala bubi bwendi.—Bis 51:9; esekeseni Bis 10:11.
w07 3/1 19 ¶1
Twabwahelela Kubandamena Kuli Yehova
Ngeci lika mubukakolela bushuka, binangulo bya Yehova nabyo bikatukwasa tukole ku sipilitu. Mbimbiliya inendeka ha kunangula kwa kutunda kuli Njambi ngwayo: “Kulingisa baje babanalongesa noku kunangula beme bushuka bwa kwoloka bwa kusungama.” (Bahebelu 12:11) Kukatondeka simbu mangana bushuka buhye, mu ngila imo lika, netu kunasa kwita simbu mangana tushangumuke kupangesa binangulo bya Yehova. Cakumwenako, nga batunyeka cipangi cimo mu cikungulukilo mwafwa ya bilinga byetu byabibi, kukala na mbunge ya kubandamena kuli Yehova kutukwasa keti tuzeye, co lalo kutulingisa tutwaleleleho kumupangela. Nga tuliwana mu bukalu bwa cifweci, co kwanuka majwi asonekele Devidi kutukwasa. Wendekele ngwendi: ‘Omwo kulubala kwendi kwaka simbu lika, oloni bubwa bwendi bwapwa bwa simbu yoshe. Co kulila kukakalako ha simbu ya butsiki oloni kubwahelela kukakalako ha simbu ya mutondo.’ (Bisamu 30:5) Nga tukala na mbunge ya kubandamena na kutambula binangulo byatwana Njambi kwitila mu Lijwi lyendi Mbimbiliya hamolika na munga yendi, co simbu ya ‘kubwahelela’ ikaija.
Bika Bikulumbununa Kutenguluka kwa Busunga?
18 Munu uje natundu mu cikungulukilo asa kumwesa ngwendi natenguluka mu busunga nga akunguluka simbu yoshe na kukabangeya cinangulo ca bakulunu ca kulombela na kulilongesa Mbimbiliya simbu yoshe. Co lalo, napande kujenjuka byuma bije byasa kumulingisa elukile kulinga bubi bwalingile. Nga alinga mwoshe mwasela kulikuta lalo busamba na Yehova, co amukonekela. Co lalo, bakulunu bamwilwisa mu cikungulukilo. Nameme ngoco, bakulunu bakatala ñanda ya munu uje nalingi bubi bwakama kwesekesa nomwo muinafu mwafwa bazibuka ngwabo banu bakatenguluka mu bingila bya kuliseza-seza. Oloni bakasompo mu kusungama.
Kutondesesa Bisimpi bya Seho
w06 5/15 19 ¶13
Bisimpi bya mu Libulu lya Bisamu Wakulibanga
31:23—Mu ngila muka ibana munu wa kulyalesa cikandelela mu kutubakanesa? Cikandelela cibalumbununa aha cinapu kashitiko. Muka-busunga atambula cikandelela nga bamunangula kuli Yehova ha kusebuka. Kulingila munu wa kulyalesa kesi kushaka kwecela bubi bwendi bakamwana kashitiko kakama.—Visimo 11:31; 1 Pita 4:18.
APRIL 22-28
BISIMPI BYA SEHO BYA MU LIJWI LYA NJAMBI | BISAMU 32-33
Mwafwa Bika Tunapande Kujombolola Bubi Bwakama Butunalingi?
w93 3/15 9 ¶7
Ngozi ya Yehova Itukwasa Mangana Keti Tulizibe Kukala Manene na Mulonga
7 Nga tunapokola mashiko a Njambi kunasa kutukaluwila kwendeka bubi bwetu nameme kuli Yehova. Bika byasa kulingiwa nga twaliwana mu bukalu bwa cifweci? Ku Bisamu 32 Devidi wasonekele ngwendi: ‘Mubila wange wazeyele, omwo kunjalitabelele bubi bwange, co njakele na kuziba kubabala litangwa lyoshe. Mutanya na butsiki Yehova wanjihisile, co nzili yange yoshe yahwile ngwe mulikomu litukuta lya ntondwe.’ (Vesi 3, 4) Devidi wazibile kubabala ku mbunge mwesekele kushweka bubi bwalingile. Kubabala ku mbunge kwazibile kwatepulwile nzili yendi, co walizibile ngwe muti kuwesi na mema mwafwa ya lilanga. Wazibile kubabala mu bisinganyeka na ku mubila. Ngeci, kapwile wakubwahelela simbu yoshe. Bika bitunapande kulinga nga netu tuliwana mu bukalu bwa cifweci?
cl 262 ¶8
Njambi Uje ‘Nalibwahesela Kukonekela’
8 Devidi mwatengulukile ku bubi bwendi wendekele ngwendi: “Njalitabelele bubi bwange kuli yobe, co kunjakushwekelele bubi bwange, co yobe wanjisambesele ku milonga ya bubi bwange.” (Bisamu 32:5) Lijwi lya “kukonekela” mu cihebelu lilumbununa “kujundula” nambe “kwambata.” Mubanalipangesela aha lilumbununa kusambesa bubi. Mu ngila ikwabo Yehova wakonekelele Devidi. Twakulahela ngwetu oku kwalingisile Devidi keti alizibe kukala manene na mulonga. (Bisamu 32:3) Netu twakulahela bene ngwetu Njambi akakonekela baje balomba likonekelo kuli ikeye kwitila mu ndando ya kupatula ya Yesu Kristu.—Mateu 20:28.
w01 6/1 30 ¶1
Kulitabela Bubi Bwetu Kutulingisa Tushubuluke
Devidi mwalitabelele bubi bwendi kalizibile lalo kupwa wa ngoco. Byasonekele ku Bisamu ha kulitabela bubi bwendi bimwesa mwalizibililemo na cizango cendi ca kushaka kupangela Njambi mu kulongwa. Cakumwenako, Bisamu 32:1 ngwayo: “Nabezika munu uje ibasambesa ku milonga yendi, munu uje bubi bwendi banabufwiki.” Nameme munu nalingi bubi bwakama bati, abwahelela nga atenguluka mu busunga. Ngila imo yasa kumweselamo ngwendi natenguluka mu busunga inapu kulitabela bubi bwendi ngwe mwalingile Devidi. (2 Samwele 2:13) Kalimanenene nambe kwana bakwabo mulonga. Vesi 5 yendeka ngwayo: ‘Njalitabelele bubi bwange kuli yobe, co kunjakushwekelele bubi bwangwe njalyendekesele mu mbunge yange ngwange: ‘Njikalitabela bubi bwangwe kuli yobe Yehova,’ co yobe wanjisambesele ku milonga ya bubi bwange.’ Kulitabela bubi bwetu kutukwasa mangana keti tulizibe kukala na mulonga mwafwa ya bubi bwetu bwa kunima.
Kutondesesa Bisimpi bya Seho
w06 5/15 20 ¶1
Bisimpi bya mu Libulu lya Bisamu Wakulibanga
33:6; futunoti —“Sipilitu” nambe “muku” wa mukanwa ka Yehova wapwa uka? Ei sipilitu yapwa nzili yakapangesa Njambi nambe sipilitu ya kujela ije yapangesele mu kutanga melu. (Genese 1:1, 2) Banaitumbula ngwabo sipilitu ya mukanwa kendi mwafwa yapwa ngwe muku wa nzili uje wasa kuya halako na kulinga byuma bimo.
APRIL 29–MAY 5
BISIMPI BYA SEHO BYA MU LIJWI LYA NJAMBI | BISAMU 34-35
“Shangazaleni Yehova Simbu Yoshe”
w07 3/1 22 ¶11
Tushangazaleni Hamo Lizina lya Yehova
11 “Simbu yoshe njikakandelela Shukulu Kalunga, kunjikalikela kumushangazala.” (Bisamu 34:1) Ha kuwana ngwe Devidi kakele na kuyoya mu mwela umolika wapandele kulishoshomwena manene ha byuma bya ku mubila, oloni majwi endi amwesa ngwawo Davidi simbu yoshe wakele mbunge ku kushangazala Yehova. Ou unapu mwanja waubwa kuli yetu nga tuliwana na bukalu. Kwoshe-kwoshe kutuli ipwe ku sikola, ku bipangi nambe tuli hamo na bakwetu baka-Kristu ndi mu lihya tunapande kutwalelelaho kushangazala Yehova. Kuli byuma byabingi binapande kutulingisa tulinge ngoco. Cakumwenako, tutwalelelaho kulilongesa ku byuma byabibwa byanatanga Yehova. Co lalo, acisinganyekeni ha byuma byabingi byanalingi kwitila mu mutamba wa munga yendi ya hano hasi. Yehova ali na kutwalelelaho kupangesa bangamba bendi ba kulongwa ba hano hasi nameme kubalumbunukile. Kuma twasa kwesekesa bipangi bya Njambi ku bipangi bya banu ba bali na kusingimika manene banu muno mu kaye ndi? Tulitombola na majwi a Devidi uje wasonekele ngwendi: “Kukwesa weka lalo wa kulifwa nobe hakati ka binjambi yobe Shukulu, kukwesi bipangi byakulifwa nebi byobe.”—Bisamu 86:8.
w07 3/1 22 ¶13
Tushangazaleni Hamo Lizina lya Yehova
13 “Njikamushangazala ha bije byanalingi, boshe baje baka-kulikehesa bazibe na kubwahelela.” (Bisamu 34:2) Devidi kalyalesele mwafwa ya byuma byalingile. Cakumwenako, kalyalesele mwakwisile mwene wa ku Gathi. Wazibukile ngwendi Yehova ikeye wamunyungile mwakele ku Gathi, co wobokele mwafwa yendi. (Visimo 21:1) Ngeci, Devidi kalyasele mwafwa ya byuma byalingile, oloni mwafwa ya Yehova. Oku kwalingisile banu ba kulikehesa bashangumuke kupangela Yehova. Mu ngila imolika, Yesu washangazalele lizina lya Yehova, co oku kwalingisile banu ba kulikehesa baije kuli Ikeye. Na ano matangwa, banu ba kulikehesa ba kutunda ku miyati ya kuliseza-seza bali na kwija ku cikungulukilo ca baka-Kristu cije cali na kutwamenena Yesu. (Kolose 1:18) Banu ba kulikehesa bakabwahelela mu bakazibi bangamba ba Njambi ba kulikehesa bamushangazala, co lalo bakabwahelela mu bakazibi muzimbu wa Njambi wa mu Mbimbiliya uje ubakazibisisa mwafwa ya sipilitu ya Njambi ya kujela.—Iwano 6:44; Bilinga 16:14.
w07 3/1 23 ¶15
Tushangazaleni Hamo Lizina lya Yehova
15 “Njalombelele kuli Shukulu Kalunga, co wanjikumbulwile, ikeye wanjipatwile ku lyoba lyange lyoshe.” (Bisamu 34:4) Yehova wakwasele manene Devidi. Ngeci, watwaleleleho kwendeka ngwendi: “Tuhutu bakatambeka kuli ikeye, co akabaziba, ikeye akabamena ku tuyando twabo twoshe.” (Bisamu 34:6) Nga tuli hamo na bandolome na bandokazi betu, twasa kubalekako byuma bitunaliwana nabyo nomwu mwanatukwasela Yehova mu simbu ya bukalu. Kulinga ngoco, kukanyamesa likulahelo lyabo ngeci lika mwa majwi a Devidi muwakanyameselele baje bakele na kumukundwiya. Banu ba Devidi “bakengele kuli Yehova, co bajolelele, kubazibile shwamwa.” (Bisamu 34:5) Kubazibile lyoba nameme Mwene Saulu wakele na kubatonda mangana abatsiye. Bazibukile ngwabo Njambi wakele hamo na Devidi ngeci babwahelelele. Mu ngila imolika, baje banashangumuka ololo kulilongesa bya Yohova na baka-Kristu baje banamupangela ha simbu yailaha basa kukulahela ngwabo abakwasa. Ha kuwana ngwe banalimwena mwanabakwasela Yehova, bapwa ba kubwahelela na kushungwiya kutwalelelaho kupwa ba kulongwa kuli ikeye.
Kutondesesa Bisimpi bya Seho
w06 5/15 20 ¶2
Bisimpi bya mu Libulu lya Bisamu Wakulibanga
35:19—Devidi walumbunwine bika mwalombele Yehova ngwendi keti atabese baje banamuzindi balinyateye na mesho? Kulinyateya na mesho kwamwesele ngwabo bitozi ba Devidi bakele na kubwahelela mwafwa ya bubi bubakele na kumulinga. Ngeci, Devidi walombele Yehova mangana keti abecelele balinge ngoco.