Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2024 Watch Tower Bible and Tract Society of Pennsylvania
SEPTEMBER 2-8
BISIMPI BYA SEHO BYA MU LIJWI LYA NJAMBI BISAMU 79-81
Mweseni Ngweni Mwazema Lizina lya Yehova Lije Lyapwa lya Bumpau
Ndando ya Kupatula—Yapwa “Bwana Bwabubwa” bwa Kutunda Kuli Tate
5 Twasa kumwesa bati ngwetu twazema lizina lya Yehova? Twasa kumwesa ngoco mu futisi yetu. Yehova ashaka ngwendi tupwe ba kujela. (Tandeni 1 Pita 1:15, 16.) Oku kulumbununa ngwabo tunapande kulemesa lika Yehova na kumwononoka na bimbunge byetu byoshe. Tunapande kulinga mwoshe mutwasela, kunyunga mashiko na binangulo byendi nameme batupakese bati. Nga tulinga byuma byabibwa mu kuyoya kwetu, co tutwisa ceke cetu na kwana bumpau kuli Yehova. (Mat 5:14-16) Ha kupwa na futisi ya kujela, tukamwesa ngwetu mashiko a Yehova apwa amabwa, co Satana wendekele makuli kutalesa ku mashiko Njambi. Nga tunasebuka ha kupwa tu ba kujeneka kulumbunuka, tukatenguluka mu busunga na kwecela kulinga byuma bije bishawisa Yehova.—Sm 79:9.
ijwbv 3 ¶4-5
Loma 10:13—‘Saneni ha lizina lya Mwata’
Mu Mbimbiliya, “kusana ha lizina lya Yehova” kukulumbununa kulizibuka lika kuzibuka lizina lya Yehova na kulipangesa omwo tumulemesa. (Sm 116:12-14) Oloni kunambateselela kukulahela Njambi na kulomba bukwasi kuli ikeye.—Sm 20:7; 99:6.
Lizina lya Njambi lyapwile lya seho kuli Yesu Kristu. Majwi akulibanaga a mulilombelo lyendi lya kutalelako endeka ngwao: “Tate yetu uli mwilu, lizina lyobe balijelese.” (Mat 6:9) Yesu wendekele lalo ngwendi nga tushaka kuwana mwonyo wa myaka yoshe, tunapande kuzibuka babenya lizina, kumwononoka na kumuzema.—Iwa 17:3, 6, 26.
Kutondesesa Bisimpi bya Seho
it-2 111
Jozefu
Lizina lya Jozefu Lyatsimanene. Hakuwana ngwe Jozefu ikeye watele kuli Falo, oku kwamulingisile atsimane ha bana ba Jakobu. Ngeci, bisimbu bimo miyati yoshe ya Isalele bakele na kuisanesa lizina lyendi (Sm 80:1) nambe ije miyati yakukele mu bumwene bwa ku kunto. (Sm 78:67; Amo 5:6, 15; 6:6) Lizina lyendi banalyendeka lalo na mu bupolofweto bwa mu Mbimbiliya. Mu cimona ca camwene Ezekiele, Jozefu bamwanene mitambela ibali (Eze 47:13), Lizina lya Jozefu banalisoneka ha cikolo cimo ca nganda ije ibasanene ngwabo ‘Yehova mwali’ (Eze 48:32, 35) mu muzimbu umo wendeka bya kukwatasanesa lalo banu ba Yehova, Jozefu banamutumbula kupwa ntwama wa mutamba umo wa lifuti, co Juda nendi banamutumbula kupwa ntwama wa mutamba ukwabo. (Eze 37:15-26) Bupolofweto bwa Obadiya bwamwesele ngwabwo ‘bakunjibo ya Jozefu’ bakele na mutamba mu kunyongesa ‘bakunjibo ya Isau’ (Oba 18), bupolofweto bwa Zakaliya co bwamwesele ngwabwo Yehova akobola ‘bakunjibo ya Jozefu.’ (Zak 10:6) Mumwela wa Efremu banengisamo Jozefu kupwa umo wa miyati ya Isalele wa ku sipilitu.—Kuj 7:8.
Hakuwana ngwe Jozefu banamwendeka ku Kujombolola 7:8, oku kumwesa ngwakwo bupolofweto bwendekele Jakobu omwo wakele muyehi na kutsa bwakele na kutalesa ku Isalele wa ku sipilitu. Tunapande kuzibuka ngwetu Muka-nzili, Njambi ya Jakobu ikeye wanene Kristu Yesu kupwa Kanyungi Wamubwa uje wanene mwonyo wendi ku “bimanga.” (Iwa 10:11-16) Kristu Yesu ikeye lalo napu limanya lya mu mbango lya lubula lwa tempele ya Njambi muje muli baIsalele ba ku sipilitu. (Efe 2:20-22; 1Pi 2:4-6) Ou Kanyungi na Limanya ali hamo na Njambi Muka-nzili Yoshe.—Iwa 1:1-3; Bil 7:56; Heb 10:12; Esekeseni Gen 49:24, 25.
SEPTEMBER 9-15
BISIMPI BYA SEHO BYA MU LIJWI LYA NJAMBI BISAMU 82-84
Kandeleleni ku Bipangi Bimuli na Kulinga mu Munga ya Yehova
wp16.6 8 ¶2-3
Bitulilongesa Kutuzila ba Mwilu
Banu ba mu Jelusalema bazibukile mwamubwa tumbyasa tuje twakele na kutungila mashwa atwo ku bimbimbi. Tumo twatungilile mashwa atwo mu Tempele yatungile Solomoni. Hamo tumbyasa tuje twatungilile mashwa atwo mu tempele mwaka na mwaka twawanene ngwatwo mwapwile mu mwela wa kubanda muje mutwasele kulelela twana twatwo mwamubwa.
Muka-kusoneka mukanda wa Bisamu 84—uje wapwile umo wa bana ba Kola, uje wakele na kupangela ku Tempele ha calumingo cimo munima ya bingombe 6—nendi wanangukile mashwa akele mu tempele.[2] Ngwe mwa tumbyasa tuje twa tungile mu njibo ya Yehova, ou muka-kwimba wendekele ngwendi: “Njazema manene tabanakele yobe yakama, Obe Yehova wa maswalale! Mwonyo wange woshe unashungwiya, Eyo njinazeye mwafwa ya kushungwiya malapa a Yehova. . . Nameme kazila akalamo, co kambyasa atungamo lishwa, muje mwanyungila bana bendi kuyehi na mutula wobe wakama, Obe Yehova wa maswalale, Mwene yange na Njambi yange.” (Sm 84:1-3) Kuma yetu hamolika na bana betu tukalizibi ngwe mwalizibilile ou muka-kwimba ha kushaka kukunguluka simbu yoshe na banu ba Njambi ndi?—Sm 26:8, 12.
w08 7/15 30 ¶3-4
Zibukeni Byuma Bimwasa Kulinga, co Mupwa Bakubwahelela
Kukulubala nambe kubinja kwasa kutwonowesa kupangela Yehova mwamubwa. Mwafwa ya kulela bana, bisemi basa kuliziba ngwabo kubesi na kuwana simbu yakupwamo ya kulinga cilongesa ca munu endilika nambe ya kukunguluka. Kuma kwaka manene mbunge ku byuma bije kumwasa kulinga kukekwo kuli na kumilingisa mwonowe kunanguka byuma bimwasa kulinga ha bisimbu bimo ndi?
Kusañulu, kaLevi umo washungwiiye kulinga byuma bije kasele kulinga. Mwaka na mwaka, wakele na kupangela mu Tempele ha byalumingo bibali. Nameme ngoco, washungwiiye kupangela kuyehi na mutula simbu yoshe. (Sm. 84:1-3) Bika byakwasele ou munalume wa kulongwa mangana ajauke na cipangi cakele na kupanga? Wanangukile ngwendi kwapwile kubezika kwakama kupangela mu bipango bya Tempele nameme ha litangwa limo lika. (Sm. 84:4, 5, 10) Mu ngila imo lika, netu kutwapandele kwaka mbunge ku byuma bije kutwasa kulinga, oloni tunapande kukandelela na kunanguka byuma bije bitwasa kulinga.
Mwapwa Muba Seho Kuli Yehova Njambi Yeni.
12 Nga muli na kubinja zibukeni ngweni Yehova azibuka bukalu bweni. Mulombeni mangana amikwase mujeneke kwaka manene mbunge ku bukalu bweni. Co tandeni Mbimbiliya mangana muwane majwi amabwa a Yehova aje asa kumizembeleka. Akeni manene mbunge ku mavesi aje amwesa ngwawo Yehova wamona bangamba bendi kupwa ba seho. Nga mulinga ngoco, co mulimwena ngweni Yehova wapwa wamubwa ku bangamba bendi baje bamupangela mu kulongwa.—Sm 84:11.
Kutondesesa Bisimpi bya Seho
it-1 816
Mwana uje Kesi na Ishe
Hakuwana ngwe kwapwile kwakwasi kwibala baje banatsisa na baje kubakele na bakubanyungilila, Yehova wapangesele majwi akwendeka ngwawo “mwana uje kesi na ishe” kutalesa kuli baIsalele ha simbu ije ibalingile mwamubwa banu na ha simbu ije kubalingile mwamubwa banu baje bakele mu kayando. BaIsalele mubakele na kupangela Yehova mu kulongwa, bakele na kunyungilila mwamubwa bana baje kubakele na baishabo. Oloni omwo balikelele kwononoka mashiko a Yehova, bayengwile bana baje kubakele na baishabo. Co ebi byapwile bimo bya byuma byalingisile Yehova abane mu maboko a bitozi babo. (Sm 82:3; 94:6; Isa 1:17, 23; Jel 7:5-7; 22:3; Eze 22:7; Zak 7:9-11; Mal 3:5) Yehova wasingile baje bakele na kuyandesa bana baje kubakele na baishabo. (Det 27:19; Isa 10:1, 2) Yehova nalitumbula ngwendi ikeye Mwobwole (Pro 23:10, 11), Mukwasi (Sm 10:14), na Tate (Sm 68:5) wa bana baje kubesi na baishabo. Ikeye aka basompela mu kusungama (Det 10:17, 18), kubatetela (Hos 14:3), kubahwimisa (Sm 146:9), na kubanyungilila.—Jel 49:11.
Cuma cimo citwasa kuzibukilaho baka-Kristu ba busunga cinapu kukwasa baje banatsisa banalume babo nambe bisemi babo. Ndongesi Jemusi wasonekelele baka-Kristu ngwendi: “Kulemesa kuje kunajele, kuje kukwesi na mazilo ku mesho a Njambi yetu, Tate yetu, kunapu oku: kunyunga bisiwa na bifwile mu kayando kabo na kulinyunga munu babenya kwa kujeneka citoma mu kaye.”—Jms 1:27.
SEPTEMBER 16-22
BISIMPI BYA SEHO BYA MU LIJWI LYA NJAMBI BISAMU 85-87
Lilombelo Likatukwasa Tukolese
w12 5/15 25 ¶10
Kuma Muli na Kwana Yehova Bumpau ndi?
10 “Twaleleleniho kulombela” kuli Njambi mangana mumwane bumpau. (Lom 12:12) Twasa kulinga ngoco, co tunapande kulombela kuli Yehova mangana atukwase kumupangela mungila inapande. Ngeci, twasa kumulomba mangana atwane sipilitu ya kujela, kumulomba atubwezelele ku likulahelo, kumulomba nzili mangana tukolesele byeseko na kumulomba lalo mangana ‘tulongese lijwi lya busunga mu ngila inapande’. (2 Ti. 2:15; Mat. 6:13; Luk 11:13; 17:5) Ngwe mwa mwana mwakakulahela baishe, netu tunapande kukulahela Tate yetu wa mwilu Yehova. Twakulahela ngwetu nga tulomba Yehova ngwetu atukwase kumupangela na mbunge yetu yoshe, cili bene akumbulula lilombelo lyetu. Kutwapandele kuliziba ngwetu tuli na kumwaka mu cikela omwo tulombela kuli ikeye! Ngeci, omwo tulombela tumushangazaleni na kumukandelela na kumulomba ngwetu atutwamenene maneneni nga tuli mu ceseko. Co lalo tumulombeni ngwetu atukwase kumupangela mu bingila bije bilingisa mangana twane bumpau ku lizina lyendi lya kujela.—Sm. 86:12; Jms. 1:5-7.
Yehova Akakumbulula Bati Malombelo Etu?
17 Tandeni Bisamu 86:6, 7. Devidi uje wapwile muka-kwimba, wakulahelele ngwendi Yehova wazibile malombelo endi na kuakumbulula. Neni mwasa kukulahela ngoco. Byakumwenako bitunasimutwiya muno mu cilongesa bitukwasa kumona ngwetu netu Yehova atwana mana na nzili mangana tukolese. Asa kupangesa naanga yetu ya ku sipilitu nambe baka-kujeneka kukulahela mangana batukwase mu ngila imo.
18 Nameme simbu imo Yehova kakumbulula malombelo etu mu ngila itutonda yetu, tuzibuka ngwetu awakumbulula. Atwana byuma bitutonda ha simbu inapande. Ngeci, twaleleleniho kukulahela ngweni Yehova amitolilila ha simbu ino, co kulutwe mu kaye kakaha, ‘ana byuma byoshe bya kuyoya byuma bibishungwiya.’—Sm 145:16.
Kutondesesa Bisimpi bya Seho
it-1 1058 ¶5
Mbunge
Kupangela Njambi na “Mbunge Yoshe.” Mbunge mpundu ya munu inapande kupwa ya mutunu asina ipanga mwamubwa, oloni mbunge ya cifwisa yasa kulitepa. Devidi walombele ngwendi: “lingisa mbunge yange ipwe imolika mangana njizibile lyoba lizina lyobe,” oku kumwesa ngwako mbunge ya munu ya cifwisa yasa kulitepa mwafwa ya lyoba na byuma byazema. (Sm 86:11) Munu wa cifweci asa kukala na “bimbunge bibali”—na kwonowa kupangela Njambi mwamubwa. (Sm 119:113; Kuj 3:16) Munu asa lalo kukala na “bimbunge bibali” (mbunge mpundu na mbunge ya cifwisa), asa kupangela bimyata babali, nambe kwendeka byuma bimo oku ali na kusinganyeka byeka. (1Ko 12:33; Sm 12:2) Yesu wapayele baka-kulikwisa baje bakele na bimbunge bibali.—Mat 15:7, 8.
SEPTEMBER 23-29
BISIMPI BYA SEHO BYA MU LIJWI LYA NJAMBI BISAMU 88-89
Ciyulo ca Yehova Capwa Cacibwa Manene
Imaneneni Ciyulo ca Yehova!
5 Kuli cuma cikwabo cimwesa ngwabo Yehova ikeye napande kuyula. Akapangesa nzili yendi mu ngila yaibwa. Yehova wendekele ngwendi: ‘Cizemo cange capwa ca myaka yoshe, co njikalingi bya busunga na kusungama. Ebi bikebyo byuma bikanjizibisa kubwaha.’ (Jel. 9:24) Ha kupwa muka-nzili yoshe na muka-busunga, Njambi kesi kutala ku banu ngwendi bamukwase kuzibuka bya busunga nebi byabibwa. Njambi ikeye nana banu mashiko. Twasa kukulahela ngwetu mashiko na binangulo na byuma byakangula kulinga byapwa byabibwa mwafwa ‘akashwana bumwene bwendi mu kusungama na busunga.’ (Sm 89:14; 119:128) Nameme Satana ali na kulishasha ngwendi ciyulo ca Yehova kucesi mwamubwa, oloni nonowa kulingila banu byuma byabibwa.
Imaneneni Ciyulo ca Yehova!
10 Yehova kesi kuyula banu mu ngila yaibi. Washaka ngwendi banu bapwe ba kubwahelela. (2Kr 3:17) Devidi wendekele ngwendi: “Singimikeni na kushangazala Shukulu Kalunga, nzili yendi na bubwa bwendi bili mu njubo yendi ya kujela.” (1Ko 16:7, 27) Na muka-kwimba Ethani wasonekele ngwendi: “Banabwahelela baje bakushangazala na lijwi lya kubwahelela. Batwalelelaho kwenda mu ceke ca ku cihanga cobe, Obe Yehova. Babwahelela mwafwa ya lizina lyobe litangwa lyoshe lyamutunu. Co mwafwa ya kusungama kwobe, babasingimika.”—Sm 89:15, 16.
11 Kusinganyekesesa ha bubwa bwa Yehova simbu yoshe kutukwasa tukulahele ngwetu ciyulo cendi capwa cacibwa manene. Netu tuliziba ngwe mwalizibilile muka-kwimba uje wasonekele ngwendi: “Litangwa limo lya kukala mu njubo yobe, lyalibwa kutubakana matangwa 1,000 a kukala kweka.” (Sm 84:10) Kuma awa majwi anapu a busunga bene ndi? Ha kupwa Ishamatanga wetu, Yehova azibuka byuma bitunajeneka bije bitukwasa tupwe ba kubwahelela, co akatwanabyo. Mashiko akatwana Njambi akatukwasa tupwe ba kubwahelela, nameme kuwononoka kunasa kukaluwa.—Tandeni Isaya 48:17.
w14 10/15 10 ¶14
Kulaheleni Manene Bumwene bwa Njambi
14 Tusimutwiyeniko ha cikumiiyo calingile Yehova na Devidi uje wapwile mwene wa baIsalele. (Tandeni 2 Samwele 7:12, 16.) Ha simbu yakele na kuyula Devidi mu Jelusalema, hakeho halingilile nendi Yehova eci cikumiiyo. Wamukulahesele ngwendi Mesiya akatunda mu cikota cendi. (Luk 1:30-33) Ngeci, oku kwalingisile Yehova alumbunune mwamubwa naanga mwasemukilile Mesiya, co wendekele ngwendi ou akatunda mu naanga ya Devidi ikeye ‘napande kuyula’ bumwene bwa Mesiya. (Eze 21:25-27) Kwitila muli Yesu, bumwene bwa Devidi ‘bakabuzameka myaka yoshe.’ Cili bene, “bana ba Devidi bakalako myaka yoshe,” ngwe litangwa mulyakalako myaka yoshe, litanda lyendi likalako myaka yoshe.” (Sm 89:34-37) Bumwene bwa Mesiya kubukalyatelela banu, co byuma bibukalinga bikakalako myaka yoshe.
Kutondesesa Bisimpi bya Seho
cl 281 ¶4-5
“Yobe Lika Ukamwesa Kulongwa”
4 Lijwi lya “Kulongwa” kwesekesa na bisoneka bya Cihebelu bakalipangesa ku munu uje akalikundika ku munu uje yazema na kutwalelelaho kumukwasa. Munu wa cifwa co akapu wa kulongwa kuli mukwabo mwafwa ya cizemo keti ya kumusindiya. Lijwi lya kulongwa basa kulipangesa ku byuma bije kubyesi na kuyoya. Cakumwenako, muka-kwimba wendekele ngwendi “ngwe ngonde mwilu Ije yapwa ngwe mukaleho wa kulongwa.” Wendekele ngoco mwafwa ika sholoka butsiki mwilu ha simbu yayo. (Bisamu 89:37) Oloni kutwasa kwendeka ngwetu ngonde yapwa ya kulongwa. Mwafwa bika? Mwafwa kulongwa kukendelela hamo na cizemo, co byuma bya kujeneka kuyoya kubyasa kumwesa cizemo.
5 Kwesekesa na bisoneka, kulongwa kukendelela hamo na cizemo. Nga munu apwa wa kulongwa kuli mukwabo, co amwesa ngwendi wamuzema. Oku kulongwa kukatwalelelaho. Kukwalifwile ngwe mankimba a mu kalunga ndonga aje akalyasha kwoshe-kwoshe mwafwa ya lihunzi. Oloni munu wa kulongwa akatwalelelaho kupwa wa kulongwa nameme aliwana na bukalu.
SEPTEMBER 30–OCTOBER 6
BISIMPI BYA SEHO BYA MU LIJWI LYA NJAMBI BISAMU 90-91
Nga mushaka Kuyoya Myaka yaingi, Kulaheleni Yehova
Bashakazekele Bingila Bya Kuyoyelamo Myaka Yaingi
Baka-sayansi bamo bakulahela ngwabo nameme kuwaniwa byuma bije byonowesa banu kukulubala bwasi, banu kubasa kuyoya simbu yailaha. Kushwa mu ciita ca myaka ca bu 19 myaka ya kuyoya kwa banu yalibwezelelako kamandondo. Cinapu ngoco, mwafwa ya kupangesa bingila bimo mu kulinyungilila ku mishongo nambe kulisaka. Baka-sayansi baje bakalilongesa bya maseluzi bakulahela ngwabo banu kubasa kuyoya simbu yailaha.
Myaka ya kweta ku 3,500 kunima, muka-kusoneka Mbimbiliya Mosesa, wendekele ngwendi: “Myaka yetu ya kuyoya inapu 70 nambe 80, maneneni nga munu nakanyama. Oloni yashulu na bukalu na busiwa. Ihwa bwasi-bwasi, co tunyonga.” (Sm 90:10) Nameme banu bali na kulifwita kubwezelelako ku myaka ya kuyoya, oloni buyoye anga bucili bene ngwe mwendekelelemo Mosesa.
Nameme ngoco kuli tusitu na miti imo ije yasa kuyoya myaka ya kutubakana 200. Nga twesekesa myaka itukayoyo na myaka ibakayoyo tusitu, miti, na byuma byeka, twasa kulihula ngwetu: ‘Kuma twasa lika kuyoya myaka 70 nambe 80 ndi twasa kuyoya myaka yoshe?’
wp19.1 5, cipalo
Lizina Lya Njambi Lyapwa Lika?
Banu babangi banalihula eci cihula. Hamo neni mwalihulaho laja eci cihula: Nga melu na byuma byoshe bilimo kuli umo wabitangele, co Njambi ikeye watunda kuli?
Baka-sayansi bakulahela ngwabo melu kuli hawashangumukilile kukalako. Vesi ya kulibanga ya mu Mbimbiliya inendeka byuma bilitombola nawa majwi. Mbimbiliya ngwayo: “Kumashangumukilo, Njambi watangele lilu na lifuti-libu.”—Genese 1:1.
Melu kuwalitangele akewo abenya, kuli umo waatangele. Kukwesi cuma casa kulitanga cibenya. Ngwe wai wakeleko simbu kanda melu akaleko, ngwe na lelo lino melu ngwe ahi. Kuli umo wakeleko myaka yoshe simbu kanda melu akaleko. Ou bene ikeye walingisile melu akaleko. Yehova Njambi muka-nzili uje nakalako myaka yoshe uje lalo wakala na mubila wa sipilitu ikeye watangele melu na byuma byoshe.—Iwano 4:24.
Mbimbiliya inendeka hali Njambi ngwayo: “Simbu kanda minkinda ikaleko Nambe simbu kanda utange lifuti-libu na kaye, Kushwa okwo kwa kujeneka mashangumukilo kuya kwa kujeneka mamaneselelo, yobe wapwa Njambi.” (Sm 90:2) Ngeci, Njambi kwakala myaka yoshe. Co “Kumashangumukilo” watangele lilu na lifuti-libu.—Kujombolola 4:11.
Cizemo Citukwasa Bati Tupwe ba Kusimpa?
16 Satana azibuka ngwendi twashaka manene kuyoya. Ngeci, akendeka ngwendi twasa kulinga nameme byuma bije byasa kubihisa busamba bwetu na Yehova mangana tulinyungilile. (Yom 2:4, 5) Oloni awa anapu makuli. Satana “uje ali na bingila bya kunena kutsa,” ngeci akatulingisa tutewe manene kutsa mangana tupokole mashiko a Yehova. (Heb 2:14, 15) Simbu imo Satana akalingisa banu batujujwise ngwabo nga tutwalelelaho kulemesa Yehova, co batutsiya. Co nga tubinja, Satana akatujujwisa mangana tulisakese mu ngila ije kuilitombola na mashiko a Yehova. Bandotolo na babushoko bwetu baje kubapwile Bakaleho banasa kutusindiya ngwabo tutabe kutwaka maninga, nameme kulinga ngoco kunapu kupokola lishiko lya Njambi. Co bakwabo banasa kutushongangeya tulisakese mu bingila bikwabo bije kubilitombola na binangulo bya mu Mbimbiliya.
17 Twazinda kutsa. Oloni nameme tutsa, tuzibuka ngwetu Yehova atwalelelaho kutuzema. (Tandeni Loma 8:37-39.) Yehova akatwalelelaho kwanuka bangamba bendi nameme banatsi. (Luka 20:37, 38) Ashaka kukabasangula. (Yombi 14:15) Yehova natwana Munendi kupwa ndando ya kupatula mangana tukakale na “kuyoya kwa myaka yoshe.” (Iwano 3:16) Tuzibuka ngwetu Yehova watuzema manene, co lalo watwaka mbunge. Ngeci nga tubinja, kutwapandele kulinga byuma bije kubilitombola na mashiko a Yehova, oloni tunapande kumukulahela manene mangana atuzembeleke na kutwana mana na kutukanyamesa. Ebi bikebyo byalingile ndokazi Valérie na munalume wendi.—Sm 41:3.
Kutondesesa Bisimpi bya Seho
Mwakala na Kangelo Muka-kuminyungilila Ndi?
Mbimbiliya kuyesi kulongesa ngwayo munu na munu wakala na kangelo muka-kumunyungilila. Yesu wendekele bene ngwendi: “Keti mulumbilise umo wa aba babandondo [Bandongesi ba Kristu], njimileka ngwange simbu yoshe tungelo babo mwilu bali na kutala ku mesho a Tate uje ali mwilu.” (Mat 18:10) Oloni hano Yesu walumbunwine ngwendi tungelo baka mbunge umo na umo wa bandongesi bendi. Ngeci, baka-kulemesa ba busunga kubesi kulingila byuma shakelo na kubandamena ngwabo tungelo ba Njambi babanyungilile.
Kuma oku kulumbununa ngwabo tungelo kubesi kukwasa banu ndi? Embwe. (Sm 91:11) Bamo bakalizibi ngwabo Njambi napangesa kangelo mu kubanyungilila na kubatwamenena. Kenneth ibanatumbula kumaputukilo nendi walizibile ngoco. Kutwasa kubyana, hamo wendekele busunga. Bakaleho ba Yehova kakangi bakamono mubakabakwasela ku tungelo omwo bakambulula muzimbu waubwa. Oloni kutuzibuka omwo Njambi mwakapangeselelamo tungelo mu kukwasa banu mwafwa kutwesi kubamona. Nameme ngoco, kutubiyisa nga tukandelela Muka-nzili Yoshe mu bingila byoshe byoshe byakatukwaselamo.—Kol 3:15; Jms 1:17, 18.
OCTOBER 7-13
BISIMPI BYA SEHO BYA MU LIJWI LYA NJAMBI BISAMU 92-95
Cahi Cuma Cacibwa manene mu Kuyoya Cije Citubakana Kupangela Yehova!
Eni Banike, Munaka Mbunge ku Bilengo Byeni bya ku Sipilitu ndi?
5 Kulyakela bilengo bya ku sipilitu kumwesa ngwabo tunakandelela kuli Yehova ha ciszemo canatumwesa na byuma byanatulingila. Muka-kwimba wembile ngwendi: “Kwakubwa kukandelela kuli Yehova . . . Obe Yehova, mwafwa ya bilinga byobe, Njitambeka mu kubwahelela mwafwa ya bipangi bya maboko obe.” (Sm 92:1, 4) Ha kupwa banike, acisinganyekeni ha byuma byanamyana Yehova. Namyana kuyoya na likulahelo na Mbimbiliya na cikungulukilo na lilabelelo lya byuma bya kulutwe. Nga mutwameka byuma bya ku sipilitu kulutwe, co mumwesa ngweni mwakandelela kuli Njambi ha byuma byanamyana na kutakamesa busamba bweni na Njambi.
Bisinganyeka Byeni Byakundama Kuli?
8 Ngwe mwa cisemi wa cizemo, Yehova washaka ngwendi bana bendi bayoye mwamubwa. (Isa 48:17, 18) Mukemwo akatwana binangulo bije bikatukwasa tukale na futisi yaibwa na kuyoya mwamubwa na bakwetu. Washaka ngwendi tulinge byuma mwaya cizango cendi na kubimimona mwakabimwena ikeye. Kulinga ngoco, kukutwonowesa kupwa bakuzituka, oloni kutukwasa tukale na bisinganyeka byabibwa. (Sm 92:5; Pro 2:1-5; Isa 55:9) Kutukwasa lalo twangule byuma bije bitulingisa tupwe ba kubwahelela mu kuyoya. (Sm 1:2, 3) Kusinganyeka mwakasinganyekela Yehova kwapwa kwakubwa manene.
Mwapwa Muba Seho Kuli Yehova Njambi Yeni
18 Omwo tuli na kukulubala tukulaheleni ngwetu Yehova anga asa kutwana bipangi. (Sm 92:12-15) Yesu watulongesele ngwendi Yehova watumona ngwendi tuba seho nameme bitulinga bisholoka ngwe kubyesi na seho. (Luk 21:2-4) Ngeci, akeni mbunge ku byuma bimwasa kulinga. Cakumwenako, mwasa kuleka banu bya Yehova, kulombelela bandolome beni na kubashongangeya mangana bapwe ba kulongwa. Kupanga bipangi byabingi keti kukekwo kulingisa Yehova amimone ngwendi muli na kupangela hamo nendi, oloni kwononoka kweni kukekwo kwazema Yehova.—1Kr 3:5-9.
Kutondesesa Bisimpi bya Seho
cl 176 ¶18
“Bufuko bwa Njambi . . . Mangana Endi Byapwa bya Kuloba Manene!”
18 Nangukeni omwo kapositolo Paulu wamweselele bukama bwa mana a Yehova omwo wendekele ngwendi: “Bufuko bwa Njambi na mana endi na mangana endi byapwa bya kuloba manene! Iya asa kuzibisisa kusompa kwendi? Iya asa kuzibisisa bingila byendi?” (Lom 11:33) Majwi endekele Paulu—amwesele ngwawo walikomokelele manene mwafwa ya mana a Yehova a “kuloba”akala nawo. Lijwi lya Cigriki lyapangesele lije lilumbununa kuloba linalifu na lijwi lya “mbulu.” Ngeci, lijwi lyapangesele Paulu litukwasa kumona kuloba kwa mana a Yehova. Kusinganyekesesa ha mana endi twasa kucesekesa kukukenga mu cina cakama manene ca kuloba cije kutwasa kumona ha cinahwila. (Sm 92:5) Cili bene, mana a Yehova a kasamesa!
OCTOBER 14-20
BISIMPI BYA SEHO BYA MU LIJWI LYA NJAMBI BISAMU 96-99
“Ambululeni Muzimbu Waubwa”!
Muzimbu Waubwa Wapwa uka?
Baka-Kristu banapande kwambulula “muzimbu waubwa wa Bumwene” na kulekako bakwabo ngwabo obu Bumwene bukayula lifuti-libu kulutwe mu kusungama. Majwi akwendeka ngwawo “muzimbu waubwa” banawapangesa mu Mbimbiliya mu kulumbununa byuma bikwabo. Cakumwenako, kuli “muzimbu waubwa wa kwobola” (Sm 96:2); “muzimbu waubwa wa Njambi” (Lom 15:16); “na muzimbu waubwa wa Yesu Kristu.”—Mak 1:1.
Mubwihi, muzimbu waubwa unambateselela busunga bwendekele Yesu buje bubasonekele bandongesi bendi. Simbu kanda Yesu aye kwilu, walekele baka-kumukabangeya ngwendi: “Ngeci bene, yeni oni ku banu ba ku mafuti oshe mukabapwise bandongesi. Mukabambwitike mu lizina lya Tate na lya Mwana na lya sipilitu ya kujela. Mukabalongese kunyunga byuma byoshe binjinamishiki.” (Mat 28:19, 20) Ngeci, baka-Kristu kubapandele lika kulekako bakwabo bya Bumwene, oloni banapande kupwisa banu bandongesi.
Bika Bikalingiwa ha Litangwa lya Kusompa?
Ngwe mubanamwesela mu cikupulo cili ku cilyo, banu babangi bakasinganyeka ngwabo ha litangwa lya kusompa banu bakabemika kulutwe lwa litanda lya Njambi mangana bakabasompe kwesekesa na byuma bibalingile simbu kanda batse—bamo bakabana cikandelela ca kukayoya mwilu bekaco bakabenyeka mu litende lya tuhya. Oloni Mbimbiliya imwesa ngwayo litangwa lya kusompa likaija mangana lyakwobole banu ku byuma byabibi. (Sm 96:13) Njambi nangula Yesu kupwa lyaako uje akanena kwoloka ku banu boshe.—Tandeni Isaya 11:1-5; Bilinga 17:31.
w12 9/15 12 ¶18-19
Kwoloka Kukakalako ha Myaka 1000—na ku Myaka Yoshe!
18 Likwatasano lyakele mukati ka Yehova na banu balitanganesele omwo banu babongumwine kuli Satana, co oku kwalingisile nabo batengulukile ciyulo ca Yehova. Kushwa mu 1914, Bumwene bwa Mesiya buli na kutwalelelaho kulingako bimo mangana bwilwise likwatasano lije lyakeleko hakulibanga. (Efe 1:9, 10) Omwo bumwene bukayula lifuti-libu ha myaka 1000, bukanena byuma byabibwa bije ‘kutwesi na kumona.’ Co munima yebi byuma, Ciyulo ca Kristu ca myaka 1000 ciketa “kumamaneselelo.” Bika bikalingiwa Kristu mwakamanesa kuyula? Nameme ngwabo Yesu banamwana “moko yoshe ya mwilu na hasi,” wapwa wa kulikehesa. Kesi kushungwiya kukala na moko yali nayo Yehova. Akalikehesa, co “akelwisa Bumwene kuli Njambi yendi na Ishe.” Yesu akapangesa moko yendi mu kwana ‘bumpau kuli Njambi.’—Mat 28:18; Flp 2:9-11.
19 Ha simbu oyo, banu boshe bakapwa bakulumbunuka. Nabo bakapwa bakulikehesa na kukundwiya ciyulo ca Yehova ngwe mwa Yesu. Baka mwesa ngoco mubakahyana ceseko camamaneselelo. (Kuj 20: 7-10) Munima yebi bakakutengulukila boshe—banu na tungelo—bakabanyongesa ku myaka yoshe. Ei ikapwa simbu yaibwa ya kubwahelela manene! Naanga ya Yehova ya mwilu na hasi ikamushangazala mu kubwahelela uje akapwa “byuma byoshe ku banu boshe.”—Tandeni Bisamu 99:1-3.
Kutondesesa Bisimpi bya Seho
it-2 994
Mwaso
Majwi akwendeka ngwawo “mwaso wauha” kuwawaniwa lika ku mukanda wa Bisamu oloni awaniwa na ku mukanda wa Isaya na wa kapositolo Iwano. (Sm 33:3; 40:3; 96:1; 98:1; 144:9; 149:1; 149:1; Isa 42:10; Kuj 5:9; 14:3) “Mwaso wauha” banakala na kuwimba nga bendeka biñanda bije byamwesele ngwabyo Yehova nashangumuka kuyula byuma byoshe. Mukanda wa Bisamu 96:10 unamwesa ngwawo: “Yehova napu Mwene.” Ñanda ya seho ibanendeka mu “mwaso wauha” inapu ya ciyulo ca Yehova nebi bicikalinga mwilu na ha lifuti-libu.—Sm 96:11-13; 98:9; Isa 42:10, 13.
OCTOBER 21-27
BISIMPI BYA SEHO BYA MU LIJWI LYA NJAMBI BISAMU 100-102
Kandeleleni ku Cizemo ca Yehova Cije Kucesi Kutenguluka
Mwasa Kulibwahesela Bati—Mangana Bamimbwitike
18 Cifwa cacibwa manene cimunapande kukala naco cinapu kuzema Yehova. (Tandeni Provebia 3:3-6.) Nga mwazema manene Yehova, co kumulikele kumupangela nameme nga muliwana na bukalu. Mbimbiliya imwesa ngwayo Yehova akamwesa bangamba bendi cizemo cije kucesi kutenguluka. (Sm 100:5) Njambi watutangele mu cifwa cendi. (Gen 1:26) Twasa kutembwinina bati cizemo ca Yehova?
Pweni baka-kukandelela. (1Tesa 5:18) Ha litangwa na litangwa lihuleni ngweni, ‘Yehova nanjimwesa bati cizemo?’ Co lombeni Yehova na kukandelela ku byuma bije byanamilingila. Nangukeni byuma byali na kumilingila Yehova mu buyoye bweni bije bimwesa ngwabyo wamizema ngwe mwalingilile kapositolo Paulu. (Tandeni Galatiya 2:20.) Lihuleni ngweni, ‘Njinapande kulinga bika mangana njimwese ngwange njinakandelela ku cizemo cananjimwesa Yehova?’ Kuzema Yehova kumikwasa mukolese mumuliwana na byeseko. Co lalo kumikwasa mutwaleleleho kumulemesa ha litangwa na litangwa na kumwesa ngweni mwamuzema manene.
“Singanyekeni Mwamubwa, Toneni”
10 Kuli byuma bimo kutwapandele kulinga. Ebi byuma binapu kulipasula, kunwa manene bwala, kulya manene, kupangesa majwi amabi, kukenga mafilimu a bukenya, kukenga bikupulo bya mushelengwa na byuma bikwabo bya kulifwa nebi. (Sm 101:3) Liyabolo uje wapwa citozi cetu ali na kushakazeka bingila bya kupangesa mu kumanesa busamba bwetu na Yehova. (1Pi 5:8) Nga kutupu ba kutona Satana asa kukuna bisinganyeka byabibi mu bimbunge byetu bya kufwa ngwe cipululu, kujeneka kupwa ba kulongwa, nuna, cizindo, kulishasha na kukala na nkulundundu. (Gal. 5:19-21) Ha kulibanga tunasa kuliziba ngwetu kukala nebi bifwa kukutukobelesa mu bukalu. Oloni nga kutubitundisa bwasi, co bikola na kutukobelesa mu bukalu.—Jms 1:14, 15.
Kuma Mwononoka Binangulo bya Yehova ndi?
7 Bika byalibungila mu kujenjuka ku balongesi ba makuli? Binapu, kujeneka kubatambula ku binjibo byetu nambe kubameneka. Co lalo kutwesi kutanda mabulu abo, kukenga maprogilamu abo aje abakaka ha ma TV, kukobela ha ma webusaiti abo nambe kukumbulula ku biñanda bibakaka ha ma webusaiti. Mwafwa bika tukajenjuka ku byuma bya cifweci? Mwafwa ya cizemo. Twazema “Njambi wa busunga,” ngeci twazinda bilongesa bya makuli bije kubilitabasana na busunga bwa mu lijwi lya Njambi. (Sm. 31:5; Iwa 17:17) Co lalo twazema munga ya Yehova ije inatulongesa busunga—buje bunambateselela lizina lya Yehova nebi bililumbununa, biyongola bya Njambi ha lifuti-libu na cifwa cibalimo batsi na lilabelelo lya kusanguka. Kuma mucanuka mumwalizibilile omwo mwalilongesele obu bungusa lwa kulibanga na busunga bukwabo ndi? Ngeci kumwapandele kutabesa munu woshe-woshe ku myungumuna na kumitundisa ku busunga bumwalilongesele mu munga ya Yehova.—Iwa 6:66-69.
8 Nameme balongesi ba makuli bendeke byuma bya kufwa bati, kutubakabangeya! Kutwapandele kuya ku masima a kuma kuje kubakatukwisa. Oloni tutwaleleleniho kupwa ba kulongwa kuli Yehova na munga yendi ije inatwalelelaho kumanesa lihwila lyetu kwitila mu mema akujela aje ashubulwisa aje anapu busunga bwa mu Lijwi lyendi.—Isa. 55:1-3; Mat. 24:45-47.
Kutondesesa Bisimpi bya Seho
it-2 596
Limbondo
Limbondo nga nakuta akapulula na kuya kumwela kwa likalyendi, co akaka mutwe mu mambaba endi na kukala lika homa hamo, co akasholoka ngwe ali mu busiwa. Ngeci, nga mumumwena halako munasa kusinganyeka ngweni limanya lya kutoka liliho. Byakalingi ou kazila bikebyo byalingisile muka-kwimba alyesekese kuli ikeye omwo wendekele ngwendi: “Njinafu ngwe limbondo wa mu mambo.” (Sm 102:6) Aha lijwi lya “mambo” kulilumbununa mu “mambo” mpundu, oloni lilumbununa mwela kuje kukwesi banu nambe hamo ku mashali. Ha bisimbu bimo, mambondo akakala ku mashali a ku kunto ya Jodani. Mu Israel muli miyati itatu ya ba tuzila. Mambondo ba kutoka (Pelecanus onocrotalus) ba ku mwijatangwa ya Israel bakebo banalisala manene omu mu lifuti, co lalo kuli muyati ukwabo wa mambondo ubatumbula ngwabo Dalmatian (Pelecanus crispus) na muyati ukwabo lalo wa mambondo ba pinki ha mongo (Pelecanus rufescens), kubesi kusholoka kushwa kumo.
Limbondo washaka kukala ku myela ya kwoloka kuje kukwesi banu amutanganesa. Kukekwo kwakatungila mashwa endi na kutetula bana bendi, co munima ya kulya bisi akeluka na kukosa. Mu Mbimbiliya, myela ije kuyesi kukala na banu banayesekesa kuli ou kazila mwafwa washaka kukala ku myela ya cifweci. Isaya mwendekele bya kunyonga kwa lifuti lya Edomu, wendekele ngwendi omu mu lifuti mu kakala lika limbondo. (Isa 34:11) Zefaniya mwapolofwetele ngwendi mambondo bakakala mu binganda ya Ninive, oku kwalumbunwine ngwabo ebi binganda bakabinyongesa. Co naumo wahi akakalamo.—Zef 2:13, 14.
OCTOBER 28–NOVEMBER 3
BISIMPI BYA SEHO BYA MU LIJWI LYA NJAMBI BISAMU 103-104
“Akanuka Ngwendi tu Likungu”
Pweni Baka-Kuzibisisa—Ngwe Yehova
5 Kulikehesa na kukala na mema ku mbunge bikalingisa Yehova apwe muka-kuzibisisa. Cakumwenako, Yehova wamwesele ngwendi wapwa wa kulikehesa omwo washakele kunyongesa banu ba mu Sodoma. Wapangesele tungelo bendi mangana baleke Lote uje wapwile wa kulongwa atewele ku mutambela wa malundu. Lote wazibile lyoba kutewelako. Ngeci, walilombelele kutewela ku Zowale, ije yapwile mbongi yaindondo yashakele kunyongesa Yehova. Ngwe Yehova washakele, ngwe wasindiiye Lote kukabangeya lika byamulekele. Oloni Yehova watabesele Lote kutewela ku Zowale, co kanyongesele ije mbongi. (Gen 19:18-22) Munima ya myaka yaingi Yehova wamwesele mema ku mbunge baka-Ninive. Watumine kapolofweto Yona uje walekele baka-Ninive baje bakele na kulinga byuma byabibi bya kunyonga kwa nganda yabo. Oloni baka-Ninive mubatengulukile, Yehova wabazibilile ngozi, co kanyongesele nganda yabo.—Jon 3:1, 10; 4:10, 11.
Kulaheleni Yehova Ngwe Mwalingilile Samsoni
16 Nameme Samsoni wayandele mwafwa ya kusebuka kwendi, kalikelele kulinga cizango ca Yehova. Netu nga twasebuka, co banatupaya nambe hamo banatwecelesa bipangi bimo mu cikungulukilo, kutwapandele kulikela kupangela Yehova. Anukeni ngweni Yehova akakonekela. (Sm 103:8-10) Nameme tunasebuka, Yehova asa kutupangesa lalo ngwe mwapangeselele Samsoni.
17 Tusimutwiyeniko ha cakumwenako ca ndolome wa mukwenje wa lizina lya Michael. Wazezamene mu bipangi bya Yehova. Wapwile ngamba wa cikungulukilo, co lalo wapwile painiya wa simbu yoshe. Calubinda, wasebukile, co oku kwalingisile bamwecelese kupwa ngamba wa cikungulukilo na kumwecelesa kupwa painiya. Ou ndolome ngwendi ha simbu oyo: “Njazezamene mu kupangela Yehova. Oloni mu kwita kwa simbu, njalizibile ngwange byahi binjasa kulinga. Kunjasinganyekele ngwange Yehova nanjiyengula. Nameme ngoco, njakele na kulihula indi busamba bwange nendi bupwa lalo ngwe mubwafwililile hakulibanga na kwasa kulinga bipangi bya kuliseza-seza mu cikungulukilo.”
18 Michael kalikelele kupangela Yehova. Ou ndolome ngwendi: “Njalingile mwoshe munjaselele kushwena kuli Yehova kwitila mu kulombela kuli ikeye, kutanda Lijwi lyendi na kusinganyekesesa ha byuma binjakele na kutanda.” Mu kwita kwa simbu, Michael washangumukile lalo kupanga bipangi byakele na kupanga mu cikungulukilo. Hano napu mukulunu mu cikungulukilo, co napu lalo painiya wa simbu yoshe. Ndolome Michael ngwendi: “Bukwasi bunjawanene, maneneni ku bakulunu baje batwaleleleleho kunjitakamesa bwanjilingisile njimone ngwange Yehova anga wanjizema. Co njasa kumupangela lalo mu cikungulukilo na citakutaku ca kujela. Byuma binjinaliwana nabyo byanjikwasa kumona ngwange Yehova akakonekela munu uje natenguluka mu busunga.” Netu nga tulinga mwoshe mutwasela kupangela ha buzeye bwetu na kutwalelelaho kukulahela Yehova, co atubezikisa na kutupangesa nameme twasebukile.—Sm 86:5; Pro 28:13.
Mwasa Kushulisilila Bilengo Byeni bya ku Sipilitu
2 Nga kuli cilengo cimo cimunalyakelele cije kumwashulisilile, keti mulizibe ngweni munonwa. Nameme kushulisilila cilengo cacindondo kakangi kukatondeka simbu na kupanga na nzili. Ntwima imuli nayo ya kushaka kushulisilila cilengo ceni imwesa ngwayo mwamona busamba bweni na Yehova kupwa bwa seho, co mushaka kulinga byoshe bimwasa kulinga mu kumupangela. Yehova ali na kumona kulifwita kweni. Nameme ngoco kashaka ngwendi mulinge byuma bije kumwasa. (Sm 103:14; Mik 6:8) Ngeci, lyakeleni cilengo cije cimwasa kushulisilila. Bika bimwasa kulinga mangana mushulisilile cilengo cimunalyakela? Tucisimutwiyeni ha byuma bimo byasa kumikwasa.
Kutondesesa Bisimpi bya Seho
cl 55 ¶18
Nzili ya Kutanga—“Uje Watangele Lilu na Lifuti-libu”
18 Bika bitulilongesa kuli Yehova mwakapangeselamo nzili yendi ya kutanga? Byuma byakutanga byakulisezaseza bikatukomokesa. Muka-kwimba umo wendekele ngwendi: “Bipangi byobe byapwa byabingi manene, Obe Yehova! . . . Lifuti-libu linashulu byuma biunatanga.” (Sm 104:24) Cili bene! Baka-kulilongesa byuma byakutanga banawana ngwabo kuli miyati yaingi yakulisezaseza ya byuma byakutanga; bamo ngwabo hamo yasakweta ku 10 milioni, 30 milioni nambe kutubakana oho. Munu uje akapanga byuma, bisimbu bimo mana akupanga byuma akamuhwila. Oloni cashu ca Yehova ca kupanga—nzili yendi ya kupanga byuma byabiha byakulisezaseza—kuikahu.