Mu nganda ya Ninive ya baka-Asiria mwakele banu bababi. Yehova walekele kapolofweto kendi Jona aye ku Ninive na kukaleka baka Ninive batenguluke na kwecela bilinga byabo byabibi. Oloni Jona watewelele ku mutambela weka. Wakobelele mu bwato bwakama buje bwakele na kuya ku Tashishi.

Co Yehova wahuwisile lihunzi lyakama ha kalunga-ndonga, ngeci baka-kujabula bwato batewele manene. Balombelele ku binjambi babo na kwendeka ngwabo: ‘Mwafwa bika byuma bya cifweci bili na kulingiwa?’ Co Jona wabalekele ngwendi: ‘Yange njabinene. Kunjalingile byananjileke Yehova. Njikakuleni munjumbile mu kalunga-ndonga, co lihunzi lyecela kuhuwa.’ Baje baka-kujabula bwato kubashakele kumbila Jona mu kalunga-ndonga, oloni Jona watwaleleleleho kubaleka ngwendi bamumbile mu kalunga-ndonga. Mubamumbilile mu kalunga-ndonga, lihunzi lyakama lyolokele.

Jona wasinganyekele ngwendi atsa. Omwo wakele na kubombela mu kalunga-ndonga, walombelele kuli Yehova. Co Yehova watumine isi wakama. Uje isi walehwile Jona, oloni katsile. Jona mwakele mwimo lya isi, walombelele ngwendi: ‘Njilikumiiya kukwononoka simbu yoshe.’ Yehova wanyungililile Jona mwimo lya isi ha matangwa atatu. Co ha litangwa lyamucitatu uje isi washanjelele Jona ha nunda.

Nameme Yehova wobwele Jona, kuma oku kwalumbunwine ngwabo Jona kapandele lalo kuya ku Ninive ndi? Embwe. Yehova walekele lalo Jona ngwendi aye ku Ninive. Ha simbu ei Jona wononokele. Waile na kuleka banu bababi ngwendi: ‘Kunasala lika matangwa 40, co Ninive bainyongesa.’ Oloni kwalingiwile byuma bije Jona kabandamenene. Banu ba mu Ninive batolilile kuli ikeye na kutengulula bilinga byabo byabibi. Mwene wa Ninive walekele banu bendi ngwendi: ‘Lombeni kuli Njambi na kutengulula bingila byeni byabibi. Hamo Njambi atengulula biyongola byendi mangana keti atunyongese.’ Yehova mwamwene ngwendi banu ba mu Ninive banatenguluka, kanyongesele nganda ya Ninive.

Jona walubalele mwafwa Yehova kanyongesele nganda ya Ninive. Acisinganyekeni lika Yehova wamwesele Jona mbunge ya kubandamena na kumukonekela, oloni Jona katetelele banu ba mu Ninive. Jona watundile mu nganda na kukatumama mwisi ya munzinze wa intwi ya bishuwa. Ije intwi yomine, co Jona walubalele. Ngeci Yehova wamulekele ngwendi: ‘Uli nakuzibila ngozi intwi ya bishuwa kutubakana kuzibila ngozi banu ba mu Ninive. Njinabatetela, co banoboka.’ Bika byalumbunwine Yehova? Walumbunwine ngwendi banu ba mu Ninive bapwile ba seho manene kutubakana cimena coshe-coshe.

Maswalale ba Asiria balwisile na kufungulula miyati 10 ya Isalele. Co ha simbu ei, Mwene Senakeribu wa Asiria washakele kulwisa miyati ibali ya Juda. Washangumukile kufungulula binganda byakele mu Juda imo na imo. Oloni nganda ya Jelusalema ikeyo yatondele manene. Senakeribu kazibukile ngwendi Yehova wakele na kunyungilila nganda ya Jelusalema.

Hezekiya, mwene wa Juda, wafwetele Senakeribu bimbongo byabingi mangana keti alwise nganda ya Jelusalema. Senakeribu watambwile bimbongo bibamwanene, oloni watumine maswalele bendi banzili bakalwise Jelusalema. Banu mu nganda balishoshomwenene mwafwa maswalale ba Asiria bakele na kwija kwa kulwisa nganda ya Jelusalema. Co Hezekiya wabalekele ngwendi: ‘Keti muzibe lyoba. Nameme baka-Asiria bali na nzili, Yehova atukwasa tukale na nzili kubatubakana.’

Senakeribu watumine katumwa kendi Labushake ku Jelusalema mangana akashaule baIsalele. Labushake wemanene hanja ya nganda na kutambeka ngwendi: ‘Yehova kasa kumikwasa. Keti mutabese Hezekiya amyungumune. Kukwesi njambi asa kumyobola kuli yetu.’

Hezekiya wehwile Yehova amuleke byakulinga. Co Yehova wamukumbwilile ngwendi: ‘Keti muzibe lyoba mwafwa ya byuma byanendeka Labushake. Senakeribu kanyongesa nganda ya Jelusalema.’ Kutundaho, Hezekiya watambwile mikanda ya kutunda kuli Senakeribu. Muje mu mikanda basonekele ngwabo: ‘Likele lika. Yehova kasa kumyamena.’ Hezekiya walombelele kuli Yehova ngwendi: ‘Obe Yehova, twamene mangana banu boshe bazibuke ngwabo yobe lika Njambi wa busunga.’ Yehova wamulekele ngwendi: ‘Mwene wa Asiria keja mu nganda ya Jelusalema. Njinyungilila nganda yange.’

Senakeribu wasinganyekele ngwendi anyongesa nganda ya Jelusalema. Oloni butsiki bumo, Yehova watumine kangelo ku cilombo ca maswalale ba Asiria. Uje kangelo watsiile maswalale ba Asiria bakupwa 185,000. Maswalale ba mwene Senakeribu banzili boshe batsile. Mwene Senakeribu byahi byasele kulinga, ngeci welukile kwimbo lyendi oku napaye. Yehova wanyungililile Hezekiya na nganda ya Jelusalema ngwe mwakulaheselele. Ngwe neni mwakele mu Jelusalema ha simbu ije, kuma ngwe mwakulahelele Yehova ndi?