BaJuda belukilile-ilukilile kuseza Yehova na kushangumuka kulemesa binjambi ba makuli. Co ha myaka yaingi Yehova watwaleleleleho kubakwasa. Wabatuminine tupolofweto mangana bakabanangule, oloni kubatolililile. Bashendumwine obo tupolofweto. Yehova wabecelesele bati kulemesa binjambi ba makuli?

Nebukadineza mwene wa Babiloni wakele na kufungulula mafuti. Mwafungulwile nganda ya Jelusalema lwakulibanga, wakwatele Mwene Jehoyakini, na bamyata bendi, na maswalale bendi, na bangangula na kubatwala ku Babiloni. Wambatele na byuma bya seho byakele mu tempele ya Yehova. Co Nebukadineza waswanesele Zedekiya kupwa mwene wa Juda.

Hakulibanga, Zedekiya wakele na kulinga byakele na kumuleka mwene Nebukadineza. Oloni banu bakele mu mafuti aje akele muyehi nendi na tupolofweto ba makuli, bamushongangeyeye atengulukile Nebukadineza. Co Jelemiya wanangwile Zedekiya ngwendi: ‘Nga utengulukila Nebukadineza, banu batsa, co lalo kukala njala na mishongo mu lifuti lya Juda.’

Munima ya kuyula ha myaka 8, Zedekiya watengulukilile Nebukadineza wa Babiloni. Co walombele bukwasi ku maswalale ba Ijipiti. Nebukadineza mwamwene ngwendi Zedekiya namutengulukila, watumine maswalale bendi bakazengeleke Jelusalema na kuilwisa. Jelemiya walekele Zedekiya ngwendi: ‘Yehova nendeka ngwendi oshe ulyana mu maboko a baka-Babiloni, co wobola mwonyo wobe na ino nganda. Nga kuulingi ngoco, baka-Babiloni benyeka nganda ya Jelusalema na kukutwala mu bundungo.’ Oloni Zedekiya wamukumbulwile ngwendi: ‘Kunjilyana mu maboko abo.’

Mukwetile mwaka umo na hafu, baka-Babiloni bapujwile bibumbe bya nganda ya Jelusalema na kuyenyeka. Benyekele tempele na kutsiya banu babangi na kutwala makulukazi a banu mu bundungo.

Zedekiya mwamwene ngoco, watewele mu Jelusalema, co maswalale ba Babiloni bamushekele. Bakamukwatelele kuyehi na nganda ya Jeliko, co bamunenele kuli Nebukadineza. Mwene wa Babiloni watsiile bana ba Zedekiya ba banalume oku Zedekiya ali na kulimwena. Kutundaho, Nebukadineza watibile Zedekiya mesho na kumwaka mu kamenga muje mwakatsililile. Nameme ngoco, Yehova wakulahesele banu ba mu Juda ngwendi: ‘Munima ya myaka 70, njikamilwisa kwimbo lyeni ku Jelusalema.’

Byuma muka byalingiwile ku banike babafungulwile na kubatwala ku Babiloni? Kuma bakatwaleleleleho kupwa ba kulongwa kuli Yehova ndi?

Mwene Nebukadineza mwambatele bamyata ba mu Juda na kubatwala mu Babiloni, wakabanene mu liboko lya Ashipenazi mukulunu wa bamyata bendi. Nebukadineza walekele Ashipenazi ngwendi anguleho bakwenje baje balikangwile mwamubwa, ba kunyanyama na kubalongesa ha myaka itatu. Ebi bilongesa byapwile bya kubakwasa bapwe bamyata ba seho mu Babiloni. Babalongesele kutanda na kusoneka na kwendeka ndaka ya Akadi ya mu Babiloni. Bapandele lalo kulya byakulya byakele na kulya mwene na bamyata bendi. Ha cibunga ca baje bakwenje hakele Daniele, Hananiya, Mishaele na Azariya. Co Ashipenazi wabalukile mazina a baka-Babiloni. Awa mazina apwile Beuteshaza, Shadreki, Misheki na Abedinego. Kuma bilongesa bibakele na kubalongesa byabalingisile becele kupangela Yehova ndi?

Aba bakwenje bawana kubatabesele cuma coshe-coshe cibonowese kupangela Yehova. Bazibukile ngwabo kubapandele kulya byakulya byakele na kulya mwene mwafwa Mashiko a Yehova amwesele ngwawo byakulya bimo byapwile bya kujwala. Ngeci, balombele Ashipenazi ngwabo: ‘Tulomba keti utusindiye kulya byakulya byakali mwene.’ Ashipenazi wabakumbulwile ngwendi: ‘Mwene anjitsiya nga amimona musholoka kubinja mwafwa ya kujeneka kulya ebi byakulya.’

Daniele walekele Ashipenazi ngwendi: ‘Shukulu-kambu eseka kutwana lika bisapasapa na mema ha matangwa 10. Kutundaho, co wesekesa mutusholokela nomu mubasholokela bakwetu bakwenje baje bali na kulya byakulya bya mwene.’ Ashipenazi watabele.

Munima ya kubeseka ha matangwa 10, Daniele na babusamba bendi batatu basholokele kupwa ba kulikangula kutubakana bakwenje bakwabo. Yehova wabwahelelele mwafwa bamwononokele. Co lalo Yehova wanene Daniele mana a kuzibisisa bimona na bilota.

Ashipenazi watwalele bakwenje boshe kuli Nebukadineza mubamanesele kubalongesa. Mwene mwasimutwiiye nabo, wanangukile ngwendi Daniele, Hananiya, Mishaele na Azariya bapwile ba kunyanyama, co lalo bakele manene na mana kutubakana bakwabo. Ngeci, mwene wangwile aba bakwenje bawana mangana bakapangele mu lipela lyendi. Co wakele na kulomba binangulo kuli bakebo ha biñanda bya seho. Yehova wabalingisile bakale na mana kutubakana banalume ba mana boshe ba mwene na baka-manseno.

Daniele, Hananiya, Mishaele na Azariya kubebalele ngwabo bapwile banu ba Yehova nameme bakele mu lifuti lyeka. Kuma neni mutwalelelaho kwanuka Yehova nameme kumwesi hamo na bisemi beni ndi?