Butsiki bumo, Mwene Nebukadineza walotele cilota ca kutewesa. Wakele mu citanga, co wakele mu cilabulabu. Ngeci wasanene tupilistu ba manseno, co wabalekele ngwendi: ‘Njilumbunwineni binjinaloto.’ Bamukumbulwile ngwabo: ‘Mwene tuleke biunaloto.’ Oloni Nebukadineza wendekele ngwendi: ‘Embwe! Njilekeni bene yeni nga kumunjileke, njimitsiya.’ Belukilile kumulomba ngwabo: ‘Tuleke biunaloto mangana tukulumbunwinebyo.’ Mwene mwazibile ngoco wendekele ngwendi: ‘Mubaboshe muli na kushaka kunjikwisa. Njilekeni binjinaloto!’ Baje tupilistu ba manseno balekele mwene ngwabo: ‘Kukwesi munu asa kulinga byuma biuli na kutonda. Byuma biuli na kutuleka ngwobe tulinge kubyasiwa.’

Nebukadineza walubalele manene, ngeci washikile ngwendi batsiye banalume boshe ba mana bakele mu Babiloni. Oku kwambateselele na Daniele na Shadreki na Misheki na Abedinego. Oloni Daniele mwazibile ngoco walombele mwene amwaneko simbu. Co Daniele na babusamba bendi balombelele kuli Yehova mangana abakwase. Yehova walingile bika?

Yehova wamwesele Daniele cilota ca Nebukadineza kwitila mu cimona na kumuleka bicalumbunwine. Lyamukwabo, Daniele waile kuli ngamba ya mwene na kumuleka ngwendi: ‘Keti utsiye banalume ba mana. Njasa kulumbununa cilota ca mwene.’ Ngeci, ngamba ya mwene watwalele Daniele kuli Nebukadineza. Co Daniele walekele mwene ngwendi: ‘Njambi nakujombolwela byuma bikalingiwa kulutwe. Eci cikeco cilota cobe: Wamwene kamponya wakama wa mutwe wa goudi, nulo yendi na maboko endi byapwile bya siuva, lifu lyendi na matafu endi byapwile bya kopa. Tupombo twendi twapwile twa cikubo, co bilyato byendi byapwile bya cikubo ca kulikumbasana na buma. Co limanya lyalamukile ku munkinda na kupupa mendi a kamponya. Ngeci, uje kamponya watikikile, co wapwile likungu lije lyapekumukile na lihunzi. Limanya lije lyatikile kamponya lyatengulukile kupwa munkinda wakama, co lyajalakanene ha lifuti-libu hoshe.’

Kutundaho, Daniele wendekele ngwendi: ‘Ebi bikebyo bicilumbununa cilota cobe: Mutwe wa goudi wimanena bumwene bwobe. Siuva imanena bumwene bukakwinga. Co kukaija bumwene bukwabo bukalifwa ngwe kopa buje bukayula lifuti-libu lyoshe. Kutundaho, kukaija bumwene bukakala na nzili ngwe cikubo. Co bumwene bwa mamaneselelo bukakala na mitamba ibali, mutamba umo ukakala na nzili ngwe cikubo ukwaboco kuukakala na nzili ngwe buma. Limanya lije lyapwile munkinda linapu Bumwene bwa Njambi. Bukatika bumwene bwoshe obu, co bukebwo lika bukakalako myaka yoshe.’

Mwene Nebukadineza watsikamene na kukulamesa mutwe wendi hasi kulutwe lwa Daniele. Co wendekele ngwendi: ‘Njambi yobe ikeye nakujombolwela eci cilota. Kukwesi Njambi nalifu nendi.’ Ngeci, Nebukadineza katsiile Daniele, oloni wamupwisile muka-kuyula provinsi yoshe ya Babiloni na kumupwisa mukulunu wa banalume boshe ba mana mu Babiloni. Kuma mwamono Yehova mwakumbulwilile lilombelo lya Daniele ndi?

Mukwetile myaka yaingi kutunda halotelele bya kamponya, Mwene Nebukadineza wapangele kamponya wakama manene wa goudi. Washimbikile uje kamponya mu cana ca Dura, co wasanene banu ba bulemu mu lifuti kwambateselela na Shadreki, Misheki na Abedinego mangana bakwimane kulutwe lwa kamponya. Co mwene washikile ngwendi: ‘Mumuziba lika cilumo ca limbinga, paipi, kamutolilo ka miyengo ibali, munapande kutsikamena kamponya. Woshe katsikama bamumbila mu lutengo lwa tuhya.’ Kuma baje baHebelu batatu batsikamenene uje kamponya indi balemesele lika Yehova?

Mwene washikile ngwendi bembise bisanzi, co banu boshe batsikamene na kulemesa kamponya kubanga lika Shadreki, Misheki na Abedinego. Banu bamo babamwene, ngeci bakalekele mwene ngwabo: ‘BaJuda bamo banabyana kulemesa kamponya wobe.’ Nebukadineza wabasanene na kubaleka ngwendi: ‘Hano mumuziba cilumo munapande kutsikama na kulemesa kamponya. Oloni nga kumutsikama, njikamyumbila mu tuhya. Wahi njambi asa kumyamena mu maboko ange.’ Co Shadreki, Misheki na Abedinego bamukumbulwile ngwabo: ‘Kututondo kutwana simbu yamucibali. Njambi yetu asa kutwamena. Nameme nga kalingi ngoco, kututsikama na kulemesa kamponya.’

Nebukadineza mwazibile ngoco walubalele manene. Co washikile bangamba bendi ngwendi: “Bashambeye lutengo lwa tuhya mangana lushaluke bisimbu 7 kutubakana mulukashalukila.” Kutundaho washikile maswalale bendi ngwendi: ‘Bakuteni na kubombila mu tuhya!’ Lutengo lwa tuhya lwashalukile manene, co banalume baje batwalele Shadreki, Misheki na Abedinego mubashwenene kuyehi nalyo, haje bene benyele na kutsa. Co baje baHebelu batatu bawililile mu tuhya. Oloni Nebukadineza mwatalele mukati, wamwene ngwendi kwakele banalume bawana kutubakana kukala banalume batatu. Co bakele na kwendangana mu tuhya. Mwene wazibile manene lyoba, co wehwile bamyata bendi ngwendi: ‘Kuma te kutwombilile banalume batatu muje mu tuhya? Njili na nakumona banu bawana, co umo wabo ali na kusholoka ngwe kangelo.’

Nebukadineza washwenene kuyehi na lutengo lwa tuhya na kukatambeka ngwendi: ‘Yeni bangamba ba Njambi Wahakamwa ya Byoshe tundeni omwo mu tuhya!’ Banu boshe bakomokele mubamwene Shadreki, Misheki na Abedinego bali na kwenda mu tuhya oku kubesi na kwenya. Binkambu byabo na cikanda cabo na bizalo byabo kubyenyele, co lalo kubakele na kunika bwisi.

Co Nebukadineza wendekele ngwendi: ‘Njambi ya Shadreki, Misheki na Abedinego wapwa wakama. Natumine kangelo mangana akubamene. Kukwesi njambi wa kulifwa nendi.’

Kuma neni mushaka kupwa ba kulongwa kuli Yehova ngwe mwa baje baHebelu batatu ndi?