Litangwa limo butsiki, Nebukadineza walotele cilota ca kutewesa manene. Co wasanene banalume ba mana mangana bamuleke bicilumbununa cilota cendi. Oloni naumo wahi wasele kumulumbunwinaco, ngeci wasanene Daniele.

Nebukadineza walekele Daniele ngwendi: ‘Munjinakala na kulota njinamwene muti. Ou muti wakolele kuketa na ku mashelwa. Banu boshe ha lifuti-libu bakele na kuumona. Wakele na maputa amabwa na bushuka bwabwingi. Tusitu bakele na kuhwimina mu munzinze wawo, tuzila nabo bakele na kutunga mashwa abo ku minango yawo. Co kangelo wezile hasi na kutambeka ngwendi: “Pakuleni ou muti na kusalula minango yawo na kukuta nsina yawo na lilyenge lya cikubo na lya kopa. Mbunge yayo kuikapu ya bunu, oloni ikapwa ya busitu noho bisimbu 7 bineti. Banu boshe bakazibuka ngwabo Njambi ikeye Muka-kuyula, co akana bumwene ku munu woshe-woshe yashaka.”’

Yehova walekele Daniele bicalumbunwine cije cilota. Daniele wazibile manene lyoba mwazibukile bicalumbunwine cije cilota. Co wendekele ngwendi: ‘Obe mwene, njishungwiya ngwange byuma bili omu mu cilota bilingiwe ku bitozi bobe, oloni bilingiwa kuli yobe. Uje muti uwamwene oku baupakula unapu yobe. Bumwene kubukapu bwobe, co ukalya mwila ngwe mwa kasitu wa mu shwata. Oloni mwafwa kangelo nendekele ngwendi baseze nsina na mizi yawo, bumwene bukapwa bwobe lalo.’

Munima ya mwaka, Nebukadineza wakele na kwenda helu lya ciluli ca lipela lyendi oku ali na kushangala nganda ya Babiloni. Co wendekele ngwendi: ‘Taleni bukama bwa nganda injinatungu. Taleni bukama bwange!’ Mwacikele na kwendeka, lijwi lyatundile mwilu, co lyendekele ngwalyo: ‘Nebukadineza! Hanwoni banakunyeke bumwene bwobe.’

Haje bene, Nebukadineza wazalukile na kutenguluka kupwa ngwe kasitu wa mu shwata. Watundile mu lipela lyendi na kukayoya mu shwata na tusitu. Binkambu bya Nebukadineza byakolele ngwe mangona a kambembe, co byala byendi byapwile byabilaha ngwe bya kazila.

Munima ya myaka 7, Nebukadineza wakele lalo na mana, co Yehova wamupwisile lalo mwene wa Babiloni. Ngeci Nebukadineza wendekele ngwendi: ‘Njishangazala Yehova, Mwene wa mwilu. Njazibukoni ngwange Yehova ikeye Muka-kuyula. Akakehesa baka-kulijundula, co asa kwana bumwene kuli woshe-woshe yashaka.’

Mu kwita kwa myaka, Beushaza wapwile mwene wa Babiloni. Litangwa limo butsiki, walanyele banu babangi ba bulemu mu lifuti ku cilika. Co washikile bangamba bendi bakambate binganja bya goudi bije byakambatele Nebukadineza ku Jelusalema mu tempele ya Yehova. Beushaza na bangenzi balanyele banwililile muje mu binganja na kushangazala binjambi babo. Co haje bene kwasholokele liboko lya munu lije lyashangumukile kusoneka majwi ha cibumbe aje kubazibisisile.

Beushaza wazibile manene lyoba. Ngeci, watambekele na kusana baka-manseno na kubaleka ngwendi: ‘Woshe atanda ebi bisona na kunjilumbunwinabyo, njimupwisa wamucitatu ku nzili ya kuyula mu Babiloni.’ Besekele kumulumbunwinabyo, oloni bonowele. Co ina ya mwene wakobelele mu mutungo mubakele na kulingila cilika na kukaleka mwene ngwendi: ‘Kuli munalume wa lizina lya Daniele uje wakele na kulumbunwina Nebukadineza bilota. Asa kukulumbunwina ebi bisona.’

Bakasanene Daniele, co wezile kuli mwene. Beushaza wamulekele ngwendi: ‘Nga wasa kunjitandela ebi bisona na kunjilumbunwinabyo, co njikupwisa wamucitatu ku nzili ya kuyula mu Babiloni.’ Oloni Daniele wamukumbulwile ngwendi: ‘Kunjitondo bwana bwobe. Nameme ngoco, njikutandela ebi bisona na kukulumbunwinabyo. Isho Nebukadineza walyalesele, oloni Yehova wamulingisile alikehese. Uzibuka byuma byoshe byalingiwile kuli ikeye, nameme ngoco kuwalikehesele, oloni unashaula Yehova ha kunwila binyu mu binganja bya goudi bya ku tempele yendi. Ngeci, Njambi ikeye nasoneka awa majwi: Mene, Mene, Tekele, na Pasini. Awa majwi alumbununa ngwawo baMede na baPelesha bafungulula nganda ya Babiloni, co kuukapu mwene lalo.’

Kwasholokele ngwe wahi wasele kufungulula nganda ya Babiloni. Mwafwa nganda yaco bainyungililile na bibumbe bya kukanyama na ndonga ya kuloba. Nameme ngoco, buje bene butsiki baMede na baPelesha bezile kwa kufungulula nganda ya Babiloni. Sailasi Mwene wa baPelesha wendile tupila mangana atepulule mema, ngeci maswalale bendi basele kuketa ku bikolo bya nganda. Mubaketele ha cikolo, bakawanene mapito anasala casi. Baje maswalale bakobelele mukati na kufungulula ije nganda na kutsiya mwene. Co Sailasi wapwile mwene wa Babiloni.

Kukwetile na mwaka, Sailasi wanene mutambi ngwendi: ‘Yehova nanjileke ngwendi njitungulule tempele yendi mu Jelusalema. Co munu woshe ku banu bendi uje ashaka kukakwasa nazituka kuya.’ Ngwe mwendekelele Yehova, baJuda babangi belukile kwimbo lyabo munima ya myaka 70 kutunda ha banyongeselele Jelusalema. Sailasi welwisile bije binganja bya goudi na siuva na byuma bikwabo byakulikwasesa byakambatele Nebukadineza mu tempele. Kuma mwamono Yehova mwapangeselele Sailasi mangana apatule banu bendi?