Mwene mukwabo wa Babiloni wapwile Daliasi wa kaMede. Daliasi wamwene Daniele kupwa wa kulitila. Wangwile Daniele kutwamenena banalume ba seho manene ba mu lifuti. Aba banalume bazibililile Daniele cipululu, co batondele kumutsiya. Bazibukile ngwabo Daniele wakele na kulombela kuli Yehova lutatu ha litangwa na litangwa. Ngeci balekele Daliasi ngwabo: ‘Obe Mwene, kukale lishiko limwesa ngwalyo banu boshe banapande kulombela kuli yobe lika. Co woshe kononoka eli lishiko banapande kumumbila mu bwina bwa bindumba.’ Daliasi washakele ebi biyongola, co wasainile lije lishiko.

Daniele mwazibile lika lije lishiko lyaliha, waile ku njibo yendi. Wakatsikamene ha mabuli na kulombela kuli Yehova oku ali halutwe lwa windo ya kushokoloka. Baje banalume ba cipululu bakobelele mu njibo ya Daniele mu kukasumuna, co bamuwanene ali na kulombela. Ngeci baile kuli mwene Daliasi na kukamuleka ngwabo: ‘Daniele kesi na kukwononoka. Akalombela kuli Njambi yendi lutatu ha litangwa na litangwa.’ Daliasi wazemene manene Daniele, co katondele ngwendi atse. Litangwa lyoshe lya mutunu wasinganyekele ha bingila bya kwobwelamo Daniele. Oloni nambe mwene bene kasele kutengulula lishiko lya nasaina. Ngeci, washikile banu bendi ngwendi bombile Daniele mu bwina bwa bindumba ba kutewesa.

Buje butsiki, Daliasi walishoshomwenene manene hali Daniele, co wonowele na kulala. Lyamukwabo mutondo, washatukilile ku bwina na kutambeka ngwendi: ‘Daniele, kuma Njambi yobe nakwobola ndi?’

Daliasi wazibile lijwi. Lije lijwi lyapwile lya Daniele. Daniele watambekele ngwendi: ‘Kangelo ka Yehova nashokele tunwa twa bindumba. Co kubanjibulumwine.’ Daliasi wabwahelelele. Co washikile ngwendi Daniele bamutundise mu bwina. Daniele kabulumukile. Mwene washikile ngwendi: ‘Umbileni mu bwina banalume baje banabangeya Daniele.’ Baje banalume mubabombilile mu bwina, bindumba babalile.

Daliasi washikile banu bendi ngwendi: ‘Banu boshe bazibile lyoba Njambi ya Daniele. Uje namwobola mu bwina bwa bindumba.’

Kuma mukalombela kuli Yehova ha litangwa na litangwa ngwe mwa Daniele ndi?

Esta wapwile kaJuda, co wakele mu Pelesha nganda ya Shushani. Naanga yendi ije yakele mu Jelusalema baitwalele mu bundungo mu Babiloni kuli Mwene Nebukadineza. Esta bamulelele kuli mushoniendi Modekai, ngamba ya Mwene Ahasuerasi wa ku Pelesha.

Mwene Ahasuerasi washakele kwambata lishano wamuha. Ngeci, bangamba bendi bamunenelele banakazi bababwa manene ba mu lifuti, kwambateselela na Esta. Ha banakazi baje boshe, mwene wangwile Esta kupwa munakazi wendi. Modekai walekele Esta ngwendi keti endeke ngwendi wapwa kaJuda.

Hamani uje wapwile wa kulyalesa ikeye wapwile ntwama wa bamyata. Hamani washakele ngwendi banu boshe bamutsikamene. Oloni Modekai wabyanene kumutsikamena. Hamani walubalele manene, co washakele kutsiya Modekai. Hamani mwazibukile ngwendi Modekai wapwile kaJuda, wayongwele kutsiya baJuda boshe ba muje mu lifuti. Ngeci, Hamani walekele mwene ngwendi: ‘BaJuda banapu banu bababi, unapande kubatsiya.’ Mwene Ahasuerasi wendekele ngwendi: ‘Linga byoshe biushaka,’ co wamwanene nzili ya kutunga lishiko. Hamani watungile lishiko lya kutsiya baJuda ha litangwa lya bu 13 mu ngonde ya Adara. Oloni Yehova wakele na kumona byuma byoshe.

Esta kazibukile bya lije lishiko. Ngeci, Modekai wamutuminine lije lishiko na kumuleka ngwendi: ‘Ya kuli mwene ukasimutwiye nendi.’ Esta wendekele ngwendi: ‘Munu woshe aya kuli mwene kwa kujeneka kumulanya bamutsiya. Mwene kanjilanyele ha matangwa 30, oloni njiya. Nga akanjinika mulamu wendi, co kubakanjitsii. Oloni nga kakalingi ngoco, co bakanjitsiya.’

Esta wakobelele mu lipela lya mwene. Mwene mwamumwene wamwinikile mulamu wendi, co Esta waile kuli ikeye. Mwene wamwihwile ngwendi: ‘Esta utonda njikulingile byuma muka?’ Esta wendekele ngwendi: ‘Njishaka kukulanya ku cilika na Hamani.’ Mubakele kuje ku cilika, Esta wabalanyele lalo ku cilika cije cakeleko litangwa lyateleko. Ku cilika camucibali, mwene wehwile lalo Esta ngwendi: ‘Ushaka njikulingile bika?’ Esta wendekele ngwendi: ‘Kuli umo atonda kunjitsiya na banu bange. Ngeci, njilomba utwobole.’ Mwene wamwihwile ngwendi: ‘Iya atonda kukutsiya?’ Esta wendekele ngwendi: ‘Ou bene munalume wamubi Hamani.’ Mwene Ahasuerasi walubalele manene, co haje bene walekele bangamba bendi batsiye Hamani.

Oloni wahi wasele kutengulula lishiko lya Hamani, nambe mwene bene kasele kulinga ngoco. Ngeci mwene wangwile Modekai kupwa ntwama ya bamyata na kumwana nzili ya kutunga lishiko lyaliha. Modekai watungile lishiko lije lyatabesele baJuda balyamene nga babalwisa. Ha litangwa lya bu 13 mu ngonde ya Adara, baJuda bahyanene bitozi babo. Kutunda bene haje, bakele na kulinga cilika ca kwanuka eli litangwa mwaka na mwaka.