Kulinga Biwano bya Cikungulukilo Kupangesa Makina

Bifulumende byabingi binabindika banu kulishwena muyehi na kulinga biwano bya mbunga. Bakaleho ba Yehova bali na kwononoka awa mashiko oku bali na kutwalelelaho kulinga biwano kwa kujeneka kulikungulwila hamo. Ngeci, bikungulukilo bili na kupangesa ma apu a kufwa ngwe Zoom mu kulinga biwano ha makina.

Cibunga ca Kutwamenena cinatabesa ngwaco bwana bumo bwa bimbongo bubakana babubapangese mu kulandela bikungulukilo ma akaunti a Zoom mangana biwano bitwaleleleho kulingiwa. Kulinga ngoco kunakwasa bikungulukilo bimo bije kubyasa kufwetela ma akaunti a ndando ya kweta ku $15-$20 nambe kutubakana. Ebi bikungulukilo byakele na kupangesa ma apu a bwana aje akatabesa lika nambala ya banu babandondo, co lalo a kujeneka kunyungilila mwamubwa. Ma akaunti a Zoom ainafwetela munga apwa a masi kuapangesa, co lalo akatabesa banu babangi kulinga konekiti ku ciwano. Ano matangwa, bikungulukilo bya kupwa 65,000 mu mafuti akutubukana 170 bali na kupangesa awa ma akaunti.

Cikungulukilo ca Kairagi mu Manado, ku North Sulawesi mu Indonesia, balikelele kupangesa apu imo ya bwana na kushangumuka kupangesa akaunti ya Zoom iinafwetela munga, mu kulinga biwano. Ndolome Hadi Santoso ngwendi: “Awa ma akaunti ainafwetela munga apwa amasi kuwapangesa, nameme bandolome na bandokazi baje kubazibuka bwino kupangesa makina basa oni kulinga konekiti ku biwano, mwafwa ha simbu ino kubatondeka kulinga konekiti ku ciwano cimo ha bisimbu byabingi.”

Lester Jijón, Jr, uje wapwa mukulunu mu cikungulukilo ca Guayacanes Oeste mu Guayaquil ku Ecuador, ngwendi: “Mwafwa ya kujeneka bimbongo, bikungulukilo bimo kunesi kubikaluwila kufwetela ma akaunti a Zoom aje asa kulingisa cikungulukilo coshe cilinge konekiti ku biwano. Ano matangwa tukalanya banu ku biwano kwa kujeneka kulishoshomwena ngwetu hamo bapwa manene babangi, mwafwa ma akaunti a Zoom atuli na kupangesa ha simbu ino atabesa banu babangi kulinga konekiti ku ciwano.”

Ndolome Johnson Mwanza uje wapwa mukulunu mu cikungulukilo ca Ngwerere North ku Lusaka mu Zambia, wasonekele ngwendi: “ Ha bisimbu byabingi bandolome na bandokazi babangi bendekele ngwabo, ‘awa ma akaunti ainafwetela munga anatukwasa tukale muyehi na bandolome na bandokazi betu na kulimwena ngwetu Yehova watwaka mbunge co lalo watuzema.’”

Awa ma akaunti bali na kuwalanda kupangesa bimbongo bibakatulika mangana bikwase baje banaliwana na bukalu bwa kulizila. Ebi bimbongo byapwa bwana bubakana mangana bukwase mu cipangi ca mu kaye koshe. Obu bwana bakabwanena ha intaneti kupangesa donate.jw.org. Twakandelela manene ku bwana bweni bumukana buje bukakwasa na mu bipangi byeka bya kukwasa baje bali mu bukalu mu kaye koshe.—2 Korinte 8:14.