Mu munga yetu kumwesi bantwama baje batukafwete bimbongo. Oloni bakangula bandolome bamo mangana bapwe “tunyungi ba cikungulukilo ca Njambi,” ngwe mubalingile kunima, ha simbu ibashangumukile cikungulukilo ca baka-Kilistu. (Vilinga 20:28) Aba bakulunu bapwa banalume ba kuhya ku sipilitu, co bakatwamenena cikungulukilo na kucinyunga, ‘keti ngwe na kulisindiya embwe, oloni na kulyana ku mesho a Njambi, keti ngwe na cizango ca kuwanenaho soso embwe, oloni mu kulishakela.’ (1 Petulu 5:1-3) Bipangi muka bibakatulingila bakulunu mu cikungulukilo?

Bakatujakama na kutunyunga. Bakulunu bakapangesa Bisoneka mu kutwamenena cikungulukilo na kucinyunga ku sipilitu. Bazibuka ngwabo Njambi nabana cipangi cakama ca kunyunga banu bendi, ngeci kubesi kubalyatelela, oloni bakabakwasa bakale mwamubwa na kupwa ba kubwahelela. (2 Kolinte 1:24) Kanyungi akajakama bimanga bendi boshe umo na umo. Bakulunu nabo bakeseka mwoshe mubasela kuzibuka umo na umo wetu mu cikungulukilo.—Visimo 27:23.

Bakatulongesa mwakulingila cizango ca Njambi. Calumingo na calumingo, bakulunu bakatwamenena biwano bya cikungulukilo na kukanyamesa likulahelo lyetu. (Vilinga 15:32) Aba bandolome ba kulongwa, bakatwamenena lalo cipangi ca kwambulula. Bakapanga netu mu lihya na kutulongesa bingila bya kulisezaseza bya kwambulwilamo.

Batwaka mbunge munu na munu. Bakulunu ba mu cikungulukilo cetu bakai ku binjubo byetu nameme kusimutwiya netu ha Njubo ya Bumwene mangana batukwase na kutuzembeleka na Bisoneka. Bakalingi ngoco mangana tukanyamese busamba bwetu na Yehova.—Yakomba 5:14, 15.

Bakulunu bakala na bipangi byabingi bya cikungulukilo. Oloni lalo bakapanga bipangi bya ku mubila, co beka bali na binaanga bibanapande kunyunga. Tunapande kusingimika aba bandolome mwafwa bali na kupanga na nzili.—1 Tesalonika 5:12, 13.

• Bipangi muka bibakalingi bakulunu mu cikungulukilo?

• Bakulunu bakamwesa bati ngwabo batwaka mbunge munu na munu?

Mbimbiliya inendeka bibunga bibali bya bandolome baje bakakwasa cikungulukilo. Aba banapu ‘tunyungi na baka-kupangela.’ (Filipu 1:1) Mu bikungulukilo bya baka-Kilistu mwakala tunyungi na baka-kupangela babangi. Bipangi muka bibakatulingila baka-kupangela?

Bakakwasa cibunga ca bakulunu. Baka-kupangela bapwa bandolome ba kuhya ku sipilitu. Bamo bapwa banike ku myaka, co boshe babakulahela mwafwa bakalingi bipangi byabo na mbunge imo. Bakakwasa mu bipangi bya kulisezaseza bya cikungulukilo. Ebi bipangi bikasiwisa bakulunu kutala lika ha cipangi cabo ca kulongesa na kunyunga cikungulukilo.

Bakapanga bipangi bya kulisezaseza. Bamo bakabana cipangi ca kutambula baje baija ku biwano bya cikungulukilo. Bakwabo bakapangela ku makina a bilumo, ku bimbongo bya cikungulukilo, kwana mabulu, kwana baka-kwambulula bitingitingi bya kwambulwila. Bakakwasa lalo mu kubwahesa Njubo ya Bumwene. Bakulunu bakabalombo kuya na kukwasa tukulukazi ba mu cikungulukilo. Baka-kupangela bakapanga na mbunge imo cipangi coshe coshe cibabana. Mukemwo cikungulukilo cikasingimika aba bandolome mwafwa bakapanga na nzili.—1 Timateo 3:13.

Bakamwesa mwanja waubwa mu cikungulukilo. Baka-kupangela bakabangula mwafwa bakamwesa bilinga byabibwa bya ku sipilitu. Omwo bakana biñanda ku biwano, bakakanyamesa likulahelo lyetu. Bakamwesa mwanja waubwa mu kwambulula, ngeci bakatushongangeya tupange na nzili. Bakanene kubwahelela na likwatasano mwafwa bakalikwatasana mu kupangela hamo na bakulunu. (Efeso 4:16) Mu kwita kwa simbu, bakabangula kupwa bakulunu nga banapwisamo byuma bitondeka mu Bisoneka.

• Baka-kupangela bapwa beya?

• Baka-kupangela bakakwasa bati cikungulukilo kupanga mwamubwa?

Bisoneka bya Cingiliki bya Baka-Kilistu binendeka manene hali Mbanambase na kapositolo Paulu. Aba banalume bapwile tunyungi ba kuzenguluka, co bendelele bikungulukilo bya kulibanga. Mwafwa bika? Mwafwa bajakamene manene bandolome babo ba ku sipilitu. Simbu imo, Paulu washakele kubamona, co wendekele ngwendi “twiluke tukendwise bakwetu” na kumona mubali na kuyoyela. Wakutile bungenzi bwa bulaha mangana akabamone na kukabakanyamesa. (Vilinga 15:36) Eli likelyo lishungu libakala nalyo tunyungi ba kuzenguluka ano matangwa.

Bakatushongangeya. Kanyungi wa kuzenguluka akendela bikungulukilo 20 nameme kutubakana, co akapanga na cikungulukilo calumingo cimo lubali ha mwaka. Twasa kulilongesa byabingi kuli aba bandolome na banakazi babo nga bambata. Bakashaka kuzibuka bandolome, bandokazi, bakulunu na banike. Co bakashaka kwenda netu omwo tuya mu lihya na ku bilongesa byetu bya Mbimbiliya. Aba tunyungi ba kuzenguluka na bakulunu ba mu cikungulukilo bakalingi mangenzi a bunyungi mangana batutakamese.—Vilinga 15:35.

Bakamwesa cizemo ku boshe. Tunyungi ba kuzenguluka bakakwasa cikungulukilo ku sipilitu. Bakaliwana na bakulunu na baka-kupangela, co baketuluka mu bipangi bya cikungulukilo mangana bamone habanalingi mwamubwa na kubanangula habanapande kupangela. Bakakwasa bapainiya batwale lutwe cipangi cabo ca kwambulula. Co lalo bakashaka kuzibuka baje bacili babaha na kumona indi bali na kukola ku sipilitu. Tunyungi ba kuzenguluka bapwa ‘bakwetu mutukapangela bipangi bije bitukwasa.’ (2 Kolinte 8:23) Tutembwinineni likulahelo lyabo na mbunge yabo ya kulyana kuli Njambi.—Vahevelu 13:7.

• Mwafwa bika tunyungi ba kuzenguluka bakendela bikungulukilo?

• Bika bitunapande kulinga mangana batukwase?

Nga kunasholoka bukalu, Bakaleho ba Yehova bakakungulula bwasi bwasi byuma na kubituma kuli bandolome babo mangana bibakwase. Oku kukamwesa ngwabo twazema bakwetu. (Yowano 13:34, 35; 1 Yowano 3:17, 18) Bika bitukalingi mangana tukwase bakwetu?

Tukalambula bimbongo. Omwo njala yakama yakobelele mu Yundeya, baka-Kilistu ba kulibanga mu Antyoke batuminine bandolome babo ba ku sipilitu bimbongo mangana bibakwase. (Vilinga 11:27-30) Netu ano matangwa, mutukazibi ngwabo bandolome betu ku lifuti limo bali mu bukalu, tukalambula bimbongo mu bikungulukilo mangana babalandele byuma bya kulikwasesa.—2 Kolinte 8:13-15.

Tukakwasa mu bingila byeka lalo. Bakulunu baje bali ku mwela kunasholokela bukalu, bakashakezeka Bakaleho boshe ba mu bikungulukilo na kumona ngwabo boshe bali mwamubwa. Komiti ya kutala bya bukwasi ikanene byakulya, mema a kunwa, buzalo, kubwahesa kwa kulala na byemba. Bakaleho babangi baje bali na ceke mu bipangi bimo bakalifwetela babenya na kuya mu kukwasa bandolome babo, nambe kukwasa kutungulula binjubo bije binabihya na Binjubo bya Bumwene. Likwatasano litwakala nalyo mu munga yetu, nomwo mutukapangelamo bipangi, kukatukwasa tukungulule bwasi bwasi byuma bije bitondeka. Nameme tukakwasa tahi “baje banakundama ku naanga yetu mu kukulahela,” oloni tukakwasa na banu ba mu bulombelo bweka nga citaba.—Ngalatiya 6:10.

Tukabakanyamesa na kubazembeleka ku sipilitu. Nga banu banakobela mu bukalu bwakama, bakatondo kubazembeleka. Mu simbu ya bukalu, tukashwenye kuli “Njambi kuje kukatundu bukwasi bwoshe.” (2 Kolinte 1:3, 4) Tukaleke bakwetu baje bali mu bukalu byuma biinakulahesa Mbimbiliya. Tukabazembeleka ngwetu ololo Bumwene bwa Njambi bumanesa bukalu buje buli na kunena bishoti na tuyando.—Kujombolola 21:4.

• Mwafwa bika Bakaleho bakakwasela bwasi bwasi bakwabo nga bali mu bukalu?

• Twasa kuzembeleka bati ku sipilitu baje banoboka mu bukalu bwakama?

Omwo Yesu wakele kuyehi na kutsa, wasanene bandongesi bendi bawana na kwendeka nabo ku bushweke. Aba bandongesi bapwile Petulu, Yowano, Anduleo na Yakomba. Yesu wabaleke bya cizibukiso ca kupwako kwendi mu simbu ya kukotoka kwa kaye. Co wabehwile cihula ca seho ngwendi: ‘Iyajo napu ndungo wa kulongwa na kunyanyama ou ibanangula kuli shukulu yendi amunyungile banu ba ku njuvo yendi na kubana byakulya ha simbu inapande?’ (Mateo 24:3, 45; Mako 13:3, 4) Yesu wakulahesele bandongesi bendi ngwendi ha kupwa “shukulu” yabo, akangula banu baje bakabana byakulya bya ku sipilitu mu simbu ya kukotoka kwa kaye. Beya bakapwa ou ndungo?

Napu cibunga cacindondo ca bandongesi ba Yesu ba kubwabesa. Ou “ndungo” napu Cibunga ca Kutwamenena ca Bakaleho ba Yehova. Ali na kwana bakwabo mubakulahelela Yehova byakulya bya ku sipilitu. Twakulahela ou ndungo wa kulongwa kutwana ‘byakulya bya ku sipilitu ha simbu inapande.’—Luka 12:42.

Ali na kunyunga mwamubwa ba ku njubo ya Njambi. (1 Timateo 3:15) Yesu wanene ndungo cipangi cakama ca kutala mutamba wa hasi wa munga ya Yehova. Ali na kutala bufuko bwa mu munga ya Yehova, kutwamenena cipangi ca kwambulula na kutulongesa kwitila mu bikungulukilo. Ou “ndungo wa kulongwa na kunyanyama” ali na kutwana byakulya bya ku sipilitu kwitila mu mabulu atukapangesa mu lihya, mu biñanda bitukatolilila ku biwano bya cikungulukilo na ku biwano byakama.

Ou ndungo napu wa kulongwa mwafwa ali na kulongesa lika busunga bwa mu Mbimbiliya na kutwamenena cipangi ca kwambulula muzimbu waubwa. Napu lalo wa kunyanyama mwafwa ali na kupangesa bufuko bwa Kilistu bwa hano hasi mu mana. (Vilinga 10:42) Yehova nabezikisa cipangi ca ndungo ca kunena banu babangi kuli ikeye na kubwahesa byakulya byabingi bya ku sipilitu.—Isaya 60:22; 65:13.

• Yesu wangwile iya mangana alise bandongesi bendi byakulya bya ku sipilitu?

• Bika twendekela ngwetu ou ndungo napu kulongwa na kunyanyama?

Mu simbu ya baka-Kilistu ba kulibanga, cibunga cacindondo ca ‘tupositolo na bakulunu mu Yeluselema’ cikeko capwile cibunga ca kutwamenena. Eci cibunga cendesele byuma bije byakwasele cikungulukilo coshe ca baka-Kilistu ba kubwabesa. (Vilinga 15:2) Balitabasanene mu biyongola byabo byoshe mwafwa bapangesele Bisoneka na kutabesa sipilitu ya Njambi ibatwamenena. (Vilinga 15:25) Eyi ikeyo ngila icili na kukabangeya Cibunga ca Kutwamenena ano matangwa.

Njambi ali na kupangesa eci cibunga mu kulinga cizango cendi. Bandolome ba kubwabesa baje bali mu Cibunga ca Kutwamenena, bazema Lijwi lya Njambi, co lalo bali na ceke ca kwendesa bipangi bya mu munga na kukumbulula bihula bya kukundama ku bulombelo. Bakaliwana calumingo na calumingo na kusimutwiya bya bujene bwa bandolome ba mu kaye koshe. Bali na kutwana bilongesa bya mu Mbimbiliya kwitila mu mikanda, nambe tunyungi ba kuzenguluka na beka ngwe mukwafwile mu simbu ya tupositolo. Oku kunalingisa banu ba Njambi balikwatasane mu bisinganyeka na mu bilinga. (Vilinga 16:4, 5) Cibunga ca Kutwamenena cili na kutala bya kubwahesa byakulya bya ku sipilitu, kukundwiya cipangi ca kwambulula bya Bumwene na kutala bya kwangula bandolome mu bipangi bya kulisezaseza.

Bali na kucitwamenena na sipilitu ya Njambi. Bandolome ba mu Cibunga ca Kutwamenena bakulahela Yehova uje wapwa Mwene wa Mwilu na Hasi. Co lalo bakulahela Yesu uje wapwa Mutwe wa cikungulukilo. (1 Kolinte 11:3; Efeso 5:23) Aba bandolome kubesi kulimona kupwa bantwama mukati ka banu ba Njambi. Aba bandolome, hamolika na baka-Kilistu boshe ba kubwabesa, “bakakabangeya Muna Manga [Yesu] kwoshe kuje aya.” (Kujombolola 14:4) Cibunga ca Kutwamenena cikandelela manene nga tubanuka mu malombelo etu.

• Beya bakele mu cibunga ca kutwamenena mu simbu ya baka-Kilistu ba kulibanga?

• Bandolome ba mu Cibunga ca Kutwamenena ano matangwa bakatala bati kuli Njambi mangana abatwamenene?

Mbetele, lyapwa lizina lya Cihebelu lije lilumbununa ngwalyo “Njubo ya Njambi.” (Kushangumuka 28:17, 19, majwi a kwisi) Eli lizina linafwila kulisanesa maofisi abanatungu Bakaleho ba Yehova mu kaye koshe mwafwa bakawapangesa mu kutwamenena na kukundwiya cipangi ca kwambulula. Cibunga ca Kutwamenena cakala ku ofisi yakama ku New York State, ku America. Eyi ofisi yakama ikeyo ili na kutwamenena bipangi byoshe bibali na kulinga ha maofisi a minango ya mu mafuti a kulisezaseza. Mbunga ya banu baje bali na kupangela ha maofisi awa, baitumbula ngwabo naanga ya Mbetele. Co bakala hamo, bakapangela hamo, bakalila hamo byakulya na kulilongesela hamo Mbimbiliya, ngwe mubakalingila banu ba mu naanga.—Myaso 133:1.

Wapwa mwela wa kulitila uje wakala na banu baje banalyana. Ha Mbetele hakala bandolome na bandokazi ba kuhya ku sipilitu baje banalyana kulinga cizango ca Njambi na kupanga bipangi bya Bumwene simbu yoshe. (Mateo 6:33) Naumo wahi ibakana fweto, oloni bakabana milili ya kutumbamamo, byakulya na kambongo ka kulanda byuma bya ku mubila. Banu boshe ha Mbetele bakala na cipangi cibakalingi. Bamo bakapangela mu maofisi, mu kicini, nameme mu mulili wa kulila. Beka bakapangela ku kupulinta na kutunga mabulu, kujelesa milili, kukusha buzalo, kubwahesa byuma bije binabihya na bipangi byeka lalo.

Mwela wa kuzezama uje ukakundwiya cipangi ca kwambulula bya Bumwene. Cipangi cakama cibakalingi ha Mbetele capwa ca kuzibukisa banu busunga bwa mu Mbimbiliya kwitila mu mabulu. Eli libulu linapu limo lyawa mabulu. Cibunga ca Kutwamenena cikatala cipangi ca kusoneka mabulu. Co bakapangesa makina kutuma mabulu ku bibunga bya baka-kunungulula mu bindaka bya kulisezaseza mu kaye koshe. Kutundaho, bakawapulinta kupangesa makina akama aje awaniwa ha Bimbetele bimo na kuwatuma ku bikungulukilo bya kutubakana 120,000. Binaanga bya Mbetele bikakwasa manene mu kukundwiya cipangi cakama ca kwambulula muzimbu waubwa.—Mako 13:10.

• Beya bakapangela ha Mbetele, co bakabanyungu bati?

• Cipangi muka ca seho cibali na kukundwiya ku bipangi bya ha Mbetele?

Banu ba mu naanga ya Mbetele bakapangela mu madipatimenti a kulisezaseza mu kukundwiya cipangi ca kwambulula ca mu lifuti limo, nameme mafuti amangi. Banasa kupangela ku dipatimenti ya kunungulula mabulu, kupulinta mangazini, kutunga mabulu, ku milili ya kutulikila mabulu, kutuhwisa mavidio na majwi a kukopa, nameme bipangi byeka bya ha munango.

Ofisi ya munango ikakwasa bikungulukilo. Cibunga ca Kutwamenena cikangula Komiti ya Munango ya bakulunu ba kuhya batatu nameme kutubakana mangana batwamenene ofisi ya munango. Eyi komiti ikaleke Cibunga ca Kutwamenena mucili na kwendela cipangi mu lifuti lyabo na bukalu buje busholoka. Mizimbu ya cifwa eci, ikakwasa Cibunga ca Kutwamenena cangule biñanda bibanapande kusimutwiya mu mabulu eja kulutwe, ku biwano bya cikungulukilo, nambe biwano byakama. Baka-kwimanena Cibunga ca Kutwamenena bakabatumu kuya mu kunangula Bikomiti bya Minango mubanapande kupangela bipangi byabo. (Visimo 11:14) Ha simbu ibendela minango, kukakala pulogilamu ya kulitila, co bakendeka na ñanda yaibwa ya kutakamesa baje bakala mu mutambela woyo ofisi ya munango.

Ofisi ya munango ikakwasa bikungulukilo. Bandolome baje bali na moko ha ofisi ya munango, bakatabesa kushimbika bikungulukilo byabiha. Aba bandolome bakatwamenena lalo cipangi ca ba painiya, bamishinali na tunyungi ba kuzenguluka baje bali na kupangela mu mutambela woyo ofisi ya munango. Bakabwahesa biwano bya citingitingi, biwano bya mutambela. Bakatwamenena cipangi ca kutunga Binjubo bya Bumwene na kumona ngwabo bikungulukilo bili na kutambula mabulu. Bipangi byoshe bibakalingi ha munango bikakwasa kutwala lutwe cipangi ca kwambulula.—1 Kolinte 14:33, 40.

• Makomiti a Minango akakwasa bati Cibunga ca Kutwamenena?

• Bipangi muka bibakatwamenena ha ofisi ya munango?

Tuli na kutuhwisa mabulu mu bindaka bya kukokela ku 1,000 mangana “biñanda byabibwa” byete “ku mafuti oshe, ku miyati yoshe, ku bindaka byoshe na ku banu boshe.” (Kujombolola 14:6) Eci cipangi cacikalu, ngeci tuli na kucasa bati? Tuli na bibunga bya baka-kusoneka na baka-kunungulula baje bali na kutukwasa. Boshe aba bapwa Bakaleho ba Yehova.

Biñanda bakabisoneka mu Ingilishi. Cibunga ca Kutwamenena cikatala bipangi bya Dipatimenti ya Kusoneka ya ku ofisi yetu yakama ya mu kaye koshe. Eyi dipatimenti ikatwamenena baka-kusoneka baje bakapangela ha ofisi yakama na ha maofisi amo a minango. Kukala na baka-kusoneka ba ku mafuti a kulisezaseza, kukatukwasa tusoneke mabulu aje ali na biñanda bikwasa banu ba bisemwa bya kulisezaseza.

Biñanda bakabitumu kuli baka-kunungulula. Hanima ya kusoneka ebi biñanda na kubitabesa, bakabitumu ku bibunga bya baka-kunungulula mu kaye koshe kupangesa makina. Co bakabinungulula, baketulukamo na kutandamo mangana bisungame. Bakalifwiti kwangula ‘majwi amabwa a busunga’ mu ndaka yabo aje endelela na bulumbunwisi buli ku Ingilishi—Muka-kwambulula 12:10.

Makompyuta akazambwisa bwasi cipangi. Kompyuta kuyasa kusoneka na kunungulula. Makompyuta akakwasa baka-kusoneka na baka-kunungulula bapangese madikishonali, mapulogilamu akalaho na kuwapangesa mu kutondesesa mizimbu. Bakaleho ba Yehova banatungu pulogilamu ibasana ngwabo MEPS (Multilanguage Electronic Publishing System). Eyi pulogilamu ikasiwisa kusoneka bisona mu bindaka byabingi, kwaka bikupulo na kumwesa mulikasholokela libulu libakapulinta.

Bika bitukalifwitila kunungulula mabulu na mu bindaka bije bibakendeka lika ku banu babandondo? Mwafwa Yehova ashaka ngwendi “banu boshe boboke na kweta ku kuzibuka busunga.”—1 Timateo 2:3, 4.

• Mabulu etu bakawasoneka bati?

• Bika bituli na kunungulwila mabulu etu mu bindaka byabingi?

Mwaka na mwaka, munga yetu ili na kusoneka Bimbimbiliya na mabulu eka amangi na kuwana ku banu kwa kujeneka kufweta. Tuli na kutunga na kubwahesa Binjubo bya Bumwene na maofisi a minango. Tuli na kukwasa baje bali ha Mbetele na bamishinali, co lalo tukana bukwasi ku bandolome betu baje bali mu bukalu. Mwasa kulihula ngweni, ‘Kuli kutuli na kuwana bimbongo bya kupangesa?’

Kutwesi kutambula ca mu likumi, kufwetesa banu, nambe kwitisamo malonga. Cipangi cetu ca kwambulula cikatondo bimbongo byabingi. Oloni kutwesi kulomba bimbongo ku banu embwe. Myaka 100 inetimo, magazini ya mu cibali ya Kaposhi ka Kukengela yendekele ngwayo Yehova ikeye ali na kutukwasa. Ngeci “kutukalambelela nambe kulomba bukwasi ku banu embwe,” co lalo kanda tulingeho laja ngoco.—Mateo 10:8.

Bipangi byetu bali na kubikundwiya na bwana bwa kulyanukila. Banu babangi bali na kukandelela ku cipangi cetu ca kulongesa banu Mbimbiliya, ngeci bali na kwana milambu. Babenya Bakaleho bakashubuluka kwana simbu yabo, nzili yabo, bimbongo byabo na byuma byeka mangana cizango ca Njambi cilingiwe hano hasi hoshe. (1 Mizimbu 29:9) Ku Njubo ya Bumwene, ku biwano byetu bya citingitingi na ku biwano bya mutambela bakakako bikasha mangana boshe baje bashaka, bakemo milambu yabo. Co lalo basa kulambula kupangesa webusaiti yetu ya jw.org. Yesu washangazalele fwile uje wanene tumbongo tubali twa bunengu mu cikasha ca ku tembele. Ngeci mwa uje fwile, milambu yaingi itukatambula, ikatundu ku banu ba kujeneka kufuka. (Luka 21:1-4) Ngeci munu na munu asa “kwakela ku mukulo bimbongo bimo” na “kwana mwanayongwela.”—1 Kolinte 16:2; 2 Kolinte 9:7.

Tunakulahela ngwetu Yehova ashongangeya bimbunge bya banu baje bashaka kulambula ‘bamusingimike na bufuko bwabo’ mangana cizango cendi cilingiwe.—Visimo 3:9.

• Munga yetu inaliseze bati na bulombelo bweka?

• Milambu ibali na kwana banu mu kulyanukila tuli na kuipangesa bati?

Kunafwila kutumbula njubo itukakungulukila ngwetu Njubo ya Bumwene, mwafwa kukekwo kutukasimutwiiya bya Bumwene bwa Njambi. Ou ukewo mutwe wa ñanda wasimutwiiye Yesu mwakele hano hasi.—Luka 8:1.

Binapu myela ya kulemeselamo Njambi mu busunga. Ha myela eyi hakeho habakasimutwiiya bya kwambulula muzimbu waubwa wa Bumwene. (Mateo 24:14) Binjubo bya Bumwene byalisezaseza ku bukama na cifwa, co tungisi yabyo kuyapwile ya kukomokesa embwe. Mu Binjubo bya Bumwene bimo, mukaliwanena bikungulukilo bya kutubakana mu cimo. Mu myaka ya ololo inetimo, tunatungu Binjubo bya Bumwene byabiha byabingi (kuya na avaleji, Binjubo bitanu ha litangwa) mwafwa banu bali na kulibwezelela manene. Tuli na kwasa bati kulinga eci cipangi?—Mateo 19:26.

Tuli na kubitunga na milambu ya kulyanukila. Eyi milambu tukaitumu ku ofesi ya munango mangana batungile bakwetu baje batondeka Njubo ya Bumwene, nambe kutungulula Njubo yabo ya Bumwene.

Bali na kubitunga ku banu ba kulisezaseza baje banalyana kupanga kwa kujeneka kubafweta. Mu mafuti amangi, banabwahesa Bibunga bya Baka-kutunga Binjubo bya Bumwene. Hali aba baka-kulyana, bamo bapwa ba simbu yoshe, bakwabo ba simbu yaindondo, co bakai mu kutunga Binjubo bya Bumwene ku mitambela ya kulisezaseza ya mu lifuti lyabo. Bakai na ku myela ya kulako kukakwasa baje bakalako kutunga Binjubo byabo bya Bumwene. Mu mafuti akwabo, bakangulamo Bakaleho baje bazibuka mwamubwa cipangi mangana batwamenene cipangi ca kutunga na kubwahesa Binjubo bya Bumwene bya mu mutambela ubanabana. Ku myela kubakai na kutungila, bakawanako lalo bandolome baje bakala na butongwe mu kutunga, co nabo bakalyana kukwasa mu kutunga. Oloni banu ba mu cikungulukilo cibatungila Njubo ya Bumwene bakebo bakalifwiti manene kukwasa mu kutunga. Yehova ali na kupangesa sipilitu yendi na banu bendi baje banalyana na bimbunge byoshe mangana balinge eci cipangi.—Myaso 127:1; Kolose 3:23.

• Bika bitukasanena myela itukalemesela Njambi ngwetu Binjubo bya Bumwene?

• Tuli na kwasa bati kutunga Binjubo bya Bumwene mu kaye koshe?

Binjubo bya Bumwene byoshe bya Bakaleho ba Yehova, bimanena lizina lya Njambi lya kujela. Ngeci, tukalizibi kubezika kujelesa Njubo ya Njambi na kuibwahesa na kuinyunga mangana isholoke mwamubwa. Tubaboshe tunapande kulinga eci cipangi mwafwa nakwo kunapu mutamba wa kulemesa Njambi.

Kwaseni kujelesa hanima ya ciwano. Hanima ya ciwano, bandolome na bandokazi bakajelesa kamandondo mangana keti baseze mazilo mu Njubo ya Bumwene. Co bakangulula litangwa limo mu calumingo lya kujelesa manene. Mukulunu nameme muka-kupangela akendesa eci cipangi mu kukabangeya cinoneko ca mwakujelesela. Kwesekesa na bipangi biliko, banu basa kukomba, kutotomona likungu, kwaka bwino bitwamo, kujelesa bimbushu na kwakamo byemba bya kutsiya tulongolo, kujelesa binjanena, kunonongola mazilo na kujelesa hanja. Co mu mwaka, bakangula litangwa limo lya kujelesa na kuhyanesa. Nga tuya na bana betu na kubanako bipangi bimo, co tubalongesa basingimike myela yetu ya kulemesela.—Muka-kwambulula 5:1.

Kwaseni kubwahesa haje hanabihya. Mu mwaka lalo, bakangula litangwa lya kwilula Njubo ya Bumwene mukati na hanja. Munima ya kwilula, kukakala hamo haje hatondewa kubwahesa bwasi bwasa kutewa habihya manene na kutondeka bimbongo byabingibingi. (2 Mizimbu 24:13; 34:10) Njubo ya Bumwene ije ibananyungu na kujelesa mwamubwa yapwa yaibwa kulemeselamo Njambi. Nga tukwasa mu cipangi eci ca kujelesa, tumwesa ngwetu twazema Yehova na mwela wetu wa kumulemesela. (Myaso 122:1) Oku kulingisa lalo banu ba mu citingitingi cetu basingimike bulombelo bwetu.—2 Kolinte 6:3.

• Bika bitunapande kujelesela mwela wetu wa kulemesela Njambi?

• Bika bibanabwahesa mangana tujelese Njubo ya Bumwene simbu yoshe?

Mushaka kutondesesa mizimbu imo mangana mubwezelele ku mana eni a kuzibuka Mbimbiliya ndi? Mushaka ngweni muzimbuke mwamubwa cisoneka cimo, lizina lya munu umo, mwela umo, nameme cuma cimo cibanendeka mu Mbimbiliya ndi? Muli na kuuwasana ngweni Lijwi lya Njambi kulyasa kumikwasa mu bukalu bumo bumuli nabwo ndi? Nga ngweni eyo, co yeni na kutondesesa ku laibulali ya mu Njubo ya Bumwene.

Yakala na mabulu amangi aje atukwasa mu kutondesesa. Hamo kumwesi na mabulu oshe a Bakaleho ba Yehova mu ndaka yeni. Oloni mu laibulali ya mu Njubo ya Bumwene muli mabulu amangi a ololo. Omu mu laibulali, hamo muli Bimbimbiliya bya kulisezaseza, madikishonali amabwa na mabulu eka aje amikwasa. Mwasa kupangesa eyi laibulali simbu kanda biwano na hanima ya biwano. Nga muli kompyuta, co hamo banakaho Watchtower Library. Eyi inapu pulogilamu ya ha makina ije yakala na mabulu etu amangi, co yapwa yayasi kuipangesa mu kutondesesa biñanda, majwi, nameme bisoneka mangana mu bizibisise mwamubwa.

Ikakwasa baje banalisonekesa mu Ciwano ca Buyoye na Cipangi Cetu. Mwasa kupangesa laibulali ya mu Njubo ya Bumwene nga mulibwahesela ñanda yeni. Kanyungi wa Ciwano ca Buyoye na Cipangi Cetu ikeye muka-kutala eyi laibulali. Ikeye amona ngwendi mabulu amaha muwali, co lalo banawatumbika mwamubwa. Ou kanyungi, nambe mulongesi weni, basa kumimwesa mwakuwanena mizimbu imushaka. Oloni munu kapandele kwambata mabulu a mu laibulali ya mu Njubo ya Bumwene. Co lalo tunapande kuwanyunga mwamubwa, keti kusoneka sonekamo embwe.

Mbimbiliya ngwayo nga tushaka kuwana “mana a kuzibuka Njambi,” co tunapande kuwashakezeka ngwe “bufuko bwa kushweka.” (Visimo 2:1-5) Laibulali ya mu Njubo ya Bumwene imikwasa mushakezeke mana a Njambi.

• Byuma muka byakala mu laibulali ya mu Njubo ya Bumwene bije bitukwasa kutondesesa?

• Beya basa kumikwasa muzibuke mwakupangesela laibulali?

Yesu Kilistu walekele bandongesi bendi ngwendi: “Ceke ceni citwile ku banu, ngeci bamone bilinga byeni byabibwa, co bakashangazala ishweni ali mwilu.” (Mateo 5:16) Ngeci, tuli na kupangesa mwamubwa buyalutwe buliko ano matangwa, kwambatesela bene na intaneti. Webusaiti yetu ya jw.org, ikeyo itukapangesa kwaka mizimbu ya byuma bitwakulahela yetu Bakaleho ba Yehova na bipangi byetu. Byuma muka biliho?

Hali bikumbululo bya mu Mbimbiliya ku bihula bibakehula banu babangi. Mwasa kuwana mubanakumbulwila bihula bya seho bibali na kulihula banu. Cakumwenako, matilakiti a Tuyando Tukahwa Ndi? na Batsi Bakayola Lalo Ndi? hawali mu bindaka bya kutubakana 700. Hali Mbimbiliya ya Bisoneka bya Kaye Kakaha mu bindaka bya kutubakana 180. Hali lalo mabulu a kupangesa mu kulilongesa Mbimbiliya, a kufwa ngwe Bika Biitulongesa Mbimbiliya na mangazini a Kaposhi ka Kukengela na Toneni! Bungi bwawa mabulu banawakopo, co mwasa kuwatolilila ha intaneti. Awa mabulu ali lalo mu cifwa ca PDF, EPUB na JWPUB, co mwasa kuwatanda nambe kuwambata ha intaneti. Mwasa kupulinta mapapelo amo na kwanako babusamba beni mu ndaka yabo. Mabulu a mu ndaka ya tubebebe aje ali mu cifwa ca vidio kuwali amangi. Mwasa kwambata mizimbu ya mu Mbimbiliya ibanatanda mwamubwa, bweho bwa mu Mbimbiliya na myaso yaibwa imwasa kutolilila mu simbu yeni ya kuhwima.

Hali mizimbu ya busunga ya Bakaleho ba Yehova. Tuli na kwakaho mizimbu yaiha na mavidio aje amwesa cipangi cetu ca kwambulula mu kaye koshe. Tunakaho mizimbu ya byuma bituli na kuliwana nabyo yetu Bakaleho ba Yehova, nomwo mutuli na kukwasela banu baje bali mu bukalu bwa cishitukila. Hali na mitambi ya kumileka biwano byakama bimukala nabyo na makeyala a minango yetu.

Tuli na kulinga byoshe ebi mangana ceke ca busunga cete kushongoshongo ya kaye. Banu ba mu mafuti oshe, kwambateselela na likanda lya kutonola mameme lya Antarctica, bali na kuwana bukwasi bwakama. Tulombela ngwetu ‘lijwi lya Yehova lyete bwasi bwasi’ ku mitambela ya hasi hoshe mangana banu bane Njambi bumpau.—2 Tesalonika 3:1.

• Keyela ya jw.org ili na kukwasa bati banu balilongese busunga bwa mu Mbimbilya?

• Bika bimushaka kutondesesa ha webusaiti yetu?